1-2. Eaa te akangaueueanga tei totouia no to tatou tuatau?

“KARE i roa ana, kua ingainga te au are ki raro mei te pepa rai.” “Mataku tikai te katoatoa . . . Karanga te tangata e kua ngaruerue te enua no tetai rua miniti. Kiaku ra, mei te mea kua roa atu te reira.” Teia te au tuatua a tetai pae tei ora mai mei te ngaruerue enua tei tupu i Nepal i te 2015. Me kua na roto ana koe i teia tupuanga, kare rava te reira e ngaropoina ia koe.

² Inara i teianei, te tupu nei tetai ngaruerue anga tuke ake, kare e tupu ki tetai ua oire me kore enua. Mari ra, ki te au enua katoatoa, e te tupu nei te reira no tetai tuatau roa. Kua totou te peroveta ko Hagai i teia akangaueue anga. Tata aia: “Te na ko maira oki a Iehova Sabaota ra, ‘Okotai toe, kare e mamia, e akangaueue ei au i te au rangi, e te enua, e te moana, e te one marō.’”​—Haga. 2:6.

3. Akapeea teia akangaueueanga i tuke ei ki te ngaruerue enua?

³ Te akangaueueanga ta Hagai i akataka, kare te reira i aite ki tetai ngaruerue enua, te ka akatupu i te kino. Mari ra, ka akatupu i te meitaki. Karanga a Iehova: “E naku e akangaueue i te au enua katoa ra, e e tae mai tei inangaroia e te au enua katoa ra: e akaki oki au i teianei are ki te kakā.” (Haga. 2:7) Eaa te aiteanga o teia totou no te tangata i to Hagai tuatau? Eaa te aiteanga no tatou i teia tuatau? Ka uriuri tatou i teia nga uianga e ka apii katoa akapeea tatou me piri ki teia akangaueueanga i teia tuatau.

4. Eaa a Iehova i tono ei i te peroveta ko Hagai kia tuatua ki Tona iti tangata?

⁴ Kua oronga a Iehova i tetai angaanga puapinga ki te  peroveta ko Hagai. Akamanako i tei tupu i mua ake. Penei ko Hagai tetai o te aronga tei oki ki Ierusalema mei te tuikaa i Babulonia i te 537 M.T.N. Te tae anga ratou ki reira, kua rave te au tavini tiratiratu i te au angaanga no te patu i te are o Iehova, me kore te iero. (Ezera 3:8, 10) Inara, kare i roa i muri mai, kua tupu tetai mea taitaia. No te maata o te patoianga, kua akamutu ratou i te angaanga i runga i te iero. (Ezera 4:4; Haga. 1:1, 2) No reira i te 520 M.T.N., kua tono a Iehova ia Hagai kia akamaroiroi akaou ia ratou kia akaoti i te patu i te iero. *​—Ezera 6:14, 15.

5. Eaa i riro ei te karere a Hagai i te akamaroiroi i te iti tangata o te Atua?

⁵ Kua riro te karere a Hagai i te akamatutu i te akarongo ki roto ia Iehova. Akakite te peroveta ki te au ngati Iuda tei taitaia: “E akamaroiroi katoa kotou, e te au tangata ravarai o te enua nei, te tuatua mairā Iehova, e ka rave i te angaanga: tei ia kotou katoa ana oki au, te tuatua mairā Iehova Sabaota ra.” (Haga. 2:4) Kua riro te ingoa “Iehova Sabaota” i te akamaroiroi ia ratou. E mana to Iehova ki rungao i te nuku angera, e ka anoanoia te ngati Iuda kia irinaki iaia.

6. Eaa te ka tupu mai mei te akangaueueanga ta Hagai i totou?

⁶ Kua tono a Iehova ia Hagai kia akakite i tetai karere ki te ngati Iuda e ka akangaueue Aia i te au enua katoa. Kua akapapu teia orama ki te aronga tei akamutu i te patu i te iero e ka akangaueue a Iehova ia Peresia, te mana tutara o tera tuatau. Eaa te ka tupu mai mei teia akangaueueanga? Mea mua, ka oti i te iti tangata o te Atua i te patu i te iero. E oti, ka rauka katoa i te au tangata ke i te kapiti mai i te akamori ia Iehova i ko i te iero. E karere akamaroiroianga tikai teia no te iti tangata o te Atua!​—Zeka. 8:9.

7. Eaa te angaanga akangaueue ta tatou i piri ki roto i teia tuatau? Akamārama mai.

⁷ Eaa te aiteanga o ta Hagai totou no tatou i teia tuatau? Te akangaueue nei a Iehova i te au enua katoa, e i teianei, te piri nei tatou ki teia angaanga. Akamanako ana: I te 1914, kua akaterono a Iehova ia Iesu ei Ariki no Tona Patireia i te rangi. (Sala. 2:6) Te tutara anga teia Patireia, kua riro te reira ei nuti kino ki te aronga mana o teianei ao. Te aiteanga, ka ‘ope to te etene tuatau,’​—te tuatau kare a Iehova i iki i tetai tangata kia tutara nona. (Luka 21:24) No reira, mei te 1919 mai, kua kite te iti tangata o Iehova e ko te Patireia o te Atua te ravenga anake no te tangata kia rauka te oraanga meitaki. Kua akangaueueia te ao katoa nei te tutu aereia anga “te evangelia o te basileia.”​—Mata. 24:14.

8. Ia Salamo 2:1-3, akapeea te au pa enua te ariu anga ki teia karere?

⁸ Akapeea te tangata te ariu anga ki teia karere? Kua patoi te maataanga. (E tatau ia Salamo 2:1-3.) Kua riri te au pa enua. Kua patoi ratou i te Tutara ta Iehova i iki. Kare ratou e āriki e e “nuti meitaki” te karere o te Patireia ta tatou e tutu aere nei. Te tika, kua arai tetai au kavamani i ta tatou angaanga tutu aere! Noatu te karanga nei te maata anga o te au tutara e te akamori ra ratou i te Atua, kare ra ratou e inangaro i te akaruke i to  ratou mana tutara. Mei ta te au tutara i to Iesu tuatau i rave, kua patoi te au tutara o teia tuatau i ta Iehova i Akatainu na te tamakianga i tona au tavini tiratiratu.​—Anga. 4:25-28.

9. Eaa ta Iehova i tuatua ki te au pa enua tei patoi i teia karere?

⁹ Eaa ta Iehova i tuatua ki te au pa enua tei patoi i teia karere? Karanga a Salamo 2:10-12: “E tenana, e te ui ariki ra, kia pakari kotou; e āriki i te ako, e te au akava o te enua nei. E akamori ia Iehova ma te mataku; E rekareka, ma te rutetetete; Ka ongi ana i te Tamaiti ra, ko te riri aea aia, mate iora kotou i te arataa ra; kare oki tona riri e roaia kua tupu; e ao to te aronga e irinaki iaia.” Kua oronga a Iehova i tetai tuatau no ratou kia taui i to ratou manako e kia āriki i te Patireia o Iehova. Inara, te pou nei te tuatau. Te noo nei tatou i roto i te au “tuatau openga” o teia akatereanga. (2 Timo. 3:1; Isa. 61:2) E angaanga rapurapu teia kia apii i te tangata kia kite i te tuatua mou e kia iki ratou i te tavini ia Iehova.

10. Ia Hagai 2:7-9, eaa te meitaki ta te akangaueueanga i akatupu?

¹⁰ E tupu anga meitaki ta te akangaueueanga, ta Hagai i totou, i akatupu. No runga i te reira, karanga aia, “e tae mai tei inangaroia [te au tangata ngakau akaaka] e te au enua katoa ra” i te akamori ia Iehova. * (E tatau ia Hagai 2:7-9.) Kua totou katoa a Isaia e Mika e ka tupu teia i “te au rā openga ra.”​—Isa. 2:2-4; Mika 4:1, 2.

11. Eaa ta tetai taeake i rave te akarongo mua anga aia i te karere o te Patireia?

¹¹ Akamanako ana eaa ta te karere o te akangaueueanga i akatupu ki te taeake ko Ken, te tavini ra i ko i te opati maata o te Au Kite. Te maara nei rai iaia te akarongo mua anga aia i te karere o te Patireia tetai 40 mataiti i topa. Karanga a  Ken: “Te akarongo anga au mei te Tuatua a te Atua e te noo nei tatou i roto i te au rā openga o teia akatereanga, kua mataora tikai au. Kite mai au e e rauka ai te akameitakianga a Iehova e te ora mutu kore, ka anoanoia au kia akaruke i teia ao taukore e kia akavaitata atu kia Iehova. Kua rave viviki au i te reira. Kua akaruke au i teia ao taukore e kua oro atu ki te Patireia ngaueue kore o te Atua”

12. Akapeea te iero pae vaerua o Iehova te akakakāia anga i teia au rā openga?

¹² Taka ua ra e kua akameitaki a Iehova i tona iti tangata. I roto i teia au rā openga, kua maata mai te numero o te aronga te akamori ra Iaia. I te 1914, e rima tauatini ua rai Au Kite. I teianei, kua tere atu i te varu mirioni te akamori ra i te Atua, e e mirioni ua atu tei kapiti mai ki te Akamaaraanga i te mate o Iesu. Na roto i teia tu, kua kī to Iehova iero pae vaerua i te enua nei​—tana akanoonooanga no te akamorianga mou​—i te au mea “tei inangaroia e te au enua katoa ra.” Kua akakakā katoaia te ingoa o Iehova me akamata te au tangata i te taui i to ratou tu taito ki te tu Kerititiano.​—Ephe. 4:22-24.

13. Eaa tetai atu totou tei akatupuia i roto i teia angaanga? (Akara i te tutu i te kapi mua.)

¹³ Kua akatupu katoa teia angaanga i tetai totou ke mai, mei te totou i roto ia Isaia pene 60. Karanga te irava 22: “E riro te mea ngiti okotai ei tausani; e ko tei mea ngiti poepoe ra, e riro ïa ei enua maroiroi: naku, na Iehova, e akarapurapu i te reira i tona tuatau.” No te maata o te tangata tei akamata i te tavini ia Iehova, kua tupu mai tetai apinga meitaki. Kua apai mai teia au mea “inangaroia” i to ratou au tu karape e te maroiroi, e kua puareinga ua i te piri ki roto i te angaanga tutu aere i “te evangelia o te basileia.” Tei tupu, kua orongaia ki te iti tangata o Iehova “te u o te pa enua ra” ta Isaia i akakite. (Isa. 60:5, 16) Ma te tauturu a teia au taeake e te au tuaine inangaroia, te tutu aereia nei te evangelia i roto i te 240 enua e te neneiia nei te au puka ki roto i te 1,000 tuma reo.

14. Eaa te ikianga ka anoanoia te tangata kia rave i teianei?

¹⁴ I roto i teia au rā openga, te akakeu nei teia akangaueueanga i te tangata kia rave i tetai ikianga. Ka turu ainei ratou i te Patireia o te Atua, me ka turu ratou i te au kavamani o teianei ao? E ikianga teia na tatou katoatoa. Noatu e aru ana te iti tangata o Iehova i te au ture a te kavamani i te ngai e noo ra ratou, inara ka vai takake ua rai ratou mei te au porotiki o teianei ao. (Roma 13:1-7) Kua kite ratou e ko te Patireia anake te rapakau no te au manamanata o te tangata. Kare teia Patireia e no teianei ao.​—Ioa. 18:36, 37.

15. Eaa te timataanga pakari tei akakiteia i roto i te puka o Apokalupo?

¹⁵ Akakite te puka o Apokalupo e ka timataia te tu tiratiratu o te iti tangata o te Atua i te au rā openga. Ka tupu te au patoianga pakari kia tatou. Ka māro te au kavamani kia oronga tatou i ta te Atua kia ratou e ka takinokino i te aronga tei patoi. (Apo. 13:12, 15) Ka “māro [ratou] kia akairo atu i te tangata ravarai, te aronga mamaata, e te tangata rikiriki, te aronga apinga, e te aronga apinga kore, te rangatira, e te tuikaa, ki roto i to ratou rima katau, e kare ïa, ei runga i to ratou rae.” (Apo. 13:16) I te tuatau taito, e tungiaia ana tetai akairo ki runga i te pakiri o te au tavini no te akaari e naai ratou. Mei te reira rai, ka anoanoia tetai akairo ki runga i te rima me kore te rae o te katoatoa i teia tuatau. Ka akaari mai ta ratou e manako ra e ta ratou angaanga e te turu ra ratou i te au kavamani o teianei ao.

16. Eaa i puapinga ai kia akaketaketaia to tatou tu tiratiratu kia Iehova i teia taime?

¹⁶ Ka āriki ainei tatou i teia akairo e ka turu i te au kavamani a te tangata? Te aronga te ka patoi i te reira, ka tupu te au manamanata kia ratou. Akakite te puka o Apokalupo: “E auraka rava tetai tangata e oko atu i te apinga e kia oko mai oki, mari ra ko te tangata tei iaia taua akairo ra.” (Apo. 13:17) Inara kua kite te iti tangata o te Atua eaa te ka tupu ki te aronga kua akairoia. (Apo. 14:9, 10) Kare ratou e āriki ua i te akairo, mari ra, ka tata ratou ki runga i to ratou rima, “No Iehova.” (Isa. 44:5) Ko teia te tuatau kia akapapu e te ketaketa ra to tatou tu tiratiratu kia Iehova. Me koia ïa, ka āriki rekareka mai a Iehova ia tatou!

17. Eaa ta tatou ka akamaara no runga i te tu akakoromaki o Iehova?

¹⁷ Kua akaari a Iehova i te tu akakoromaki maata i teia au rā openga. Kare aia e inangaro kia mate atu tetai. (2 Pete. 3:9) Kua oronga mai aia i tetai tuatau no te katoatoa kia tataraara e kia rave i te au ikianga meitaki. Inara ka ope tona tu akakoromaki. Te aronga kare e āriki i Tona Patireia, ka aite to ratou turanga ki to Pharao i te tuatau o Mose. Karanga a Iehova kia Pharao: “Naringa oki au i akatika atu ei i toku rima, ka ta atu ei ia koe, e toou au tangata, i te maki-mate, kua taka ke atu koe i te enua nei i reira: No reira tika rai oki au i vaoo ei ia koe, ei akakite anga atu ia koe i toku nei mana, e kia akakiteia toku ingoa e pini ua ake te ao katoa nei.” (Exo. 9:15, 16) Ka kite te au enua katoa e ko Iehova anake te Atua mou. (Eze. 38:23) Akapeea teia e tupu ei?

18. (a) Eaa atu tetai akangaueueanga tei taikuia ia Hagai 2:6, 20-22? (e) Akapeea tatou e kite ei e ka akatupuia ta Hagai tuatua a te tuatau ki mua?

¹⁸ E au anere mataiti i muri ake i te tuatau  o Hagai, kua akauruia te apotetoro ko Paulo kia tata e ko te totou ia Hagai 2:6, 20-22, ka akatupu katoaia te reira a te tuatau ki mua. (E tatau.) Tata a Paulo: “I teianei ra kua tuatua mai ïa aia, kua na ko maira, ‘Okotai aku akangaueue anga toe, kare oki te enua anake ra, ko te rangi katoa ra.’ E ko taua tuatua nei, ‘Okotai akangaueue anga toe,’ no te akakore anga ïa i te au mea e ngaueue ua ra, mei te au mea i angaia ra, kia vai rai te au mea ngaueue kore ra.” (Ebe. 12:26, 27) Ei tuke ki te akangaueue anga tei taikuia ia Hagai 2:7, ka takore takiri teia akangaueue anga i te aronga tei patoi ia Iehova, mei ia Pharao rai.

19. Eaa te ka kore e akangaueueia e akapeea tatou e kite ei?

¹⁹ Eaa te ka kore e akangaueueia me kore ka takoreia? Karanga a Paulo: “E teianei kua rauka ia tatou te basileia ngaueue kore, e tāpu marie rai tatou i taua aroa ua ra, kia akamori tatou i te Atua ma te kiteia mai, ma te akaaka e te mataku.” (Ebe. 12:28) Ae, i muri ake i teia akangaueueanga openga, ko te Patireia o te Atua anake te ka vai. Kare rava te reira e ngaueue!​—Sala. 110:5, 6; Dani. 2:44.

20. Eaa te ikianga ta te tangata ka rave, e akapeea tatou me tauturu ia ratou?

²⁰ Auraka e kaimoumou i te tuatau! Ka anoanoia te tangata kia iki: Ka turu ainei ratou i te tu oraanga o teianei ao, te ka takoreia, me kore ka iki ainei ratou i te rave i to te Atua anoano, kia rauka te ora mutu kore? (Ebe. 12:25) Na roto i te angaanga tutu aere, ka rauka ia tatou i te tauturu i te tangata kia iki eaa ta ratou ka rave. Kia tauturu tatou i teia aronga inangaro maataia kia turu i te Patireia o te Atua. E kia akamaara tatou i te tuatua a to tatou Atu ko Iesu: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.”​—Mata. 24:14.