1. Eaa te au tupuanga mataora te tapapa atu nei tatou i te tuatau o te Tutaraanga Tauatini Mataiti?

 E RĀ mataora tikai me tupu te tuakaouanga i te enua nei i te tuatau o ta Karaiti Tutaraanga Tauatini Mataiti! Ka tapapa atu te katoatoa i to ratou au akaperepere tei takake. To Iehova manako ïa. (Iobu 14:15) E aravei anga rekareka tikai i te ao katoa. Mei ta tatou i apii mei te atikara i mua ake, ko “te aronga tuatua-tika,” tei tataia to ratou ingoa i roto i te puka ora, e “tuakaouanga ora” to ratou. (Anga. 24:15; Ioa. 5:29) Penei ko to tatou aronga akaperepere tetai ka akatuia mai i te akamata anga o te tuakaouanga i te enua. * “Te aronga tuatua-tika kore,” tei kore i rava te tuatau no te apii no runga ia Iehova e te tavini tiratiratu iaia i mua ake ka mate ei, ka akatuia mai ratou ma “te tuakaouanga akaapa.”

2-3. (a) Ia Isaia 11:9, 10, eaa te porokaramu apiianga ka raveia ki te tangata ravarai? (e) Eaa ta tatou ka uriuri i teia atikara?

² Ka anoanoia e kia apiiia teia aronga akatuakaouia. (Isa. 26:9; 61:11) No reira ka raveia te porokaramu apiianga  ki te tangata ravarai. (E tatau ia Isaia 11:9, 10.) No teaa ra? Tetai tumu, ka anoanoia te aronga tuatua tika kore tei akatuia mai kia kite no runga ia Iesu Karaiti, te au akanoonoo anga no te Patireia, te atinga oko, e te māroanga no runga i te ingoa o Iehova e tona turanga ngateitei. Ka anoanoia te aronga tuatua tika kia kite i te au apiianga ou ta Iehova i akakite marie mai no tona akakoroanga no te enua. Kua mate teia aronga tiratiratu i mua ake ka akapapaia ai ta Iehova tuatua ei puka Pipiria. E maata ta te aronga tuatua tika kore e te tuatua tika ka anoanoia kia apii.

³ I teia atikara, ka uriuri tatou i teia au uianga: Eaa te o maira no te rave anga i te porokaramu apiianga maata? Eaa te puapinga o teia porokaramu no runga i te au ingoa kia tata tinamouia ki roto i te puka ora e me kare? Puapinga maata te au pauanga kia tatou i teia rā. Mei ta tatou ka kite, ka akamārama mai tetai au totou tei tataia i roto i te puka o Daniela e Apokalupo, i te ka tupu me akatuia tei mate. Mea mua, ka akara ana tatou i te au tupuanga mataora tei taputouia i roto i te totou a Daniela 12:1, 2.

4-5. Eaa ta Daniela 12:1 e akakite maira no te tuatau openga?

⁴ E tatau ia Daniela 12:1. Te akaari maira te puka o Daniela i te au tupuanga akamaroiroi anga a te tuatau openga. Ei akaraanga, akakite maira a Daniela 12:1 ia Mikaela, ko Iesu Karaiti, ko “tei tu mai ei tika no te tamariki a [to te Atua] ra au tangata.” Kua akatupuia te reira totou i te 1914 i te akataoongaia anga a Iesu e ko te Ariki o te Patireia o te Atua i te rangi.

⁵ Kua akakiteia kia Daniela e ka “tu mai” a Iesu i “te tuatau manamanata, kare e aite mei te tupu anga mai o te enua ra e tae rava atu ki taua tuatau ra.” Ko te “tuatau manamanata” ko te “mate maata” ïa i roto ia Mataio 24:21. Ka tu a Iesu, me kore ka paruru i to te Atua iti tangata, i te openga o teia tuatau manamanata, ia Aramagido. Te akakite ra te puka o Apokalupo no teia pupu e ko “te aronga teia i aere mai mei roto i te mate maata.”​—Apo. 7:9, 14.

6. Eaa te ka tupu me ora atu te aronga maata rava i te mate maata? Akamārama mai. (Akara i te “Au Uianga a te Aronga Tatau” no te tuakaouanga i te enua nei.)

⁶ E tatau ia Daniela 12:2. Eaa te ka tupu i muri ake te ora anga te aronga maata rava i te tuatau manamanata? Kare teia totou e taiku ra ki te tuakaouanga akatutu ua, e akaoraora anga i te pae vaerua no te au tavini o te Atua te ka tupu i te tuatau openga, mei ta tatou i mārama i mua ana. * Mari ra, te taiku ra teia au tuatua ki te tuakaouanga o te aronga mate i roto i te ao ou e vaitata maira. Eaa tatou i manako akapera ei? Te tuatua “one-pueu” tetai akataka anga ko “te vaarua” i roto ia Iobu 17:16. Akapapu maira teia e te taiku ra a Daniela 12:2 ki te tuakaouanga ka tupu me ope te tuatau openga e i muri ake i te tamaki anga o Aramagido.

7. (a) Akapeea tetai pae me akatuia ei “te ora mutu kore”? (e) Akapeea teia i riro ei ei “tuakaouanga i te mea meitaki rava”?

⁷ Inara, eaa te aiteanga o Daniela 12:2,  te taiku anga e ka akatuia tetai pae ei “te ora mutu kore”? Te aiteanga ko te aronga tei akatuia e kua kite mai, me kore kua apii ua atu, e kua kauraro kia Iehova e Iesu i te tuatau o te 1,000 mataiti ka rauka ia ratou te ora mutu kore. (Ioa. 17:3) Ko te “tuakaouanga i te mea meitaki rava” ïa, kare i aite ki te aronga tei akatuia i mua ana. (Ebe. 11:35) No teaa ra? Kua mate akaou te reira aronga apa ua.

8. Akapeea tetai me akatuia “ei te akama ïa, e te akavaavaa mutu kore”?

⁸ Kare te katoa anga o te aronga tei akatuia mai e āriki i ta Iehova porokaramu apiianga. Te akakite ra ta Daniela totou ka akatuia tetai pae “ei te akama ïa, e te akavaavaa mutu kore.” No te mea ka akaari ratou i te tu meameaau, kare to ratou ingoa e tataia ki roto i te puka ora e kare katoa e ora e tuatau ua atu. Mari ra, ei “te akavaavaa mutu kore,” me kore ka takoreia ratou. No reira te taiku ra a Daniela 12:2 i te ka tupu ki te aronga akatuia no ta ratou i rave i muri ake i to ratou tuakaouanga. * (Apo. 20:12) Ka rauka i tetai pae te ora mutu kore; e kare tetai pae.

9-10. Eaa atu te ka tupu i muri ake i te mate maata, e koai ma ka “kakā mai, ïa mei te kakā o te rangi ra”?

⁹ E tatau ia Daniela 12:3. Eaa atu tetai ka tupu i muri ake i te “tuatau manamanata”? Kapiti atu kia Daniela 12:2, taiku ra te irava 3 ki te ka tupu i muri ake i te mate maata.

¹⁰ Koai ma ka “kakā mai, ïa mei te kakā o te rangi ra”? Ka kitea te pauanga i roto i ta Iesu tuatua ia Mataio 13:43: “Ei reira oki te aronga tuatua-tika e kakā mai ei i te basileia o to ratou Metua mei te rā ra.” I roto i teia aerenga manako, te tuatua ra a Iesu no “te tamariki o te basileia,” tona au taeake akatainuia, te ka tavini kapiti kiaia i te Patireia i te rangi. (Mata. 13:38) No reira te taiku ra a Daniela 12:3 ki te aronga akatainuia e ta ratou angaanga i te Tutaraanga Tauatini Mataiti.

11-12. Eaa te angaanga a te 144,000 i te 1,000 mataiti?

¹¹ Akapeea te aronga akatainuia me “akaariu i te tangata e manganui ki te tuatua-tika”? Ka angaanga kapiti te aronga akatainuia ma Iesu Karaiti i te arataki anga i te porokaramu apiianga kia raveia i te enua nei i te 1,000 mataiti. Ka tutara te 144,000 ei au ariki e ei kau taunga. (Apo. 1:6; 5:10; 20:6) No te reira, ka tauturu ratou i “te rapakau [anga] i to te pa enua”​—te akatupu marie anga i te oraanga tiama ki te tangata ravarai. (Apo. 22:1, 2; Eze. 47:12) E tuatau rekareka anga ki te aronga akatainuia!

¹² Koai ma te “manganui” ka rauka te tuatua tika? Ka kapiti mai te aronga tei akatuia e te aronga katoa tei ora mai ia Aramagido ma te au tamariki penei ka anauia i te ao ou. I te openga o te 1,000 mataiti, ka tiama te katoatoa i te enua. Aea i reira to ratou ingoa e tataia ai ma te inika kare ki te penitara i roto i te puka ora?

13-14. Eaa ta te au tangata apa kore katoatoa i te enua ka akapapu e rauka ai ia ratou te ora mutu kore?

¹³ Kia akamaara tatou kare te aiteanga o te tu apa kore e ka rauka ua te ora mutu kore. E akamanako ia Adamu e Eva. E nga tokorua apa kore raua, inara kua anoanoia raua kia akarongo ki te Atua ko Iehova i mua ake ka rauka ai ia raua te ora mutu kore. Ma te mii, kare raua i akarongo ana iaia.​—Roma 5:12.

¹⁴ Eaa te turanga o te aronga i te enua nei i te openga o te 1,000 mataiti? Ka rauka i te katoatoa te tu apa kore. Ka turu ainei te aronga apa kore i ta Iehova tutaraanga e tuatau ua atu? Me ka riro ainei tetai pae mei ia Adamu e Eva​—noatu te tu apa kore kare i vai tiratiratu ana? Ka anoanoia kia pauia teia au uianga, inara ka akapeea?

15-16. (a) Aea te tangata ravarai e akaari ei i to ratou tu tiratiratu kia Iehova? (e) Eaa te ka tupu mei te timata anga openga?

¹⁵ Ka tapekaia a Satani e 1,000 mataiti. A te reira taime, kare e rauka iaia te akavare i tetai. Inara, i te openga o te 1,000 mataiti, ka tukunaia mai a Satani ki vao. Ka tauta aia i te akavare i te au tangata apa kore. A te reira timata anga, ka rauka i te au tangata apa kore i te enua i te akaari taka meitaki i to ratou turanga no  runga i te māroanga o te ingoa o te Atua e tona turanga ngateitei. (Apo. 20:7-10) Te akataka maira ta ratou ikianga ki ta Satani angaanga me ka tataia to ratou ingoa ma te mutu kore ki roto i te puka ora.

¹⁶ Ka aite rai tetai pae aronga mei ia Adamu e Eva, ka patoi i ta Iehova tutaraanga. Eaa te ka tupu kia ratou? Te akakite maira a Apokalupo 20:15 e: “Te tangata ravarai kare i kitea tona ingoa i te tata angaia ki roto i te buka ora ra, kua uriia ïa ki roto i te roto ai ra.” Ae, ka takore puia teia aronga meameaau. Ka autu te katoa anga o te tangata apa kore i te timata anga openga. Ka tata tinamouia to ratou ingoa ki roto i te puka ora.

17. Eaa tei akakiteia kia Daniela ka tupu i to tatou tuatau? (Daniela 12:4, 8-10)

¹⁷ E atianga rekareka tikai kia akamanako i te au tupuanga a te tuatau ki mua! Inara, kua rauka ia Daniela tetai karere puapinga mei tetai angera no to tatou tuatau, “te tuatau openga ra.” (E tatau ia Daniela 12:4, 8-10; 2 Timo. 3:1-5) Kua akakite te angera kia Daniela: “E tupu atura te kite i te maata anga.” Ae, ka mārama  meitakiia te au tuatua totou i roto i tana puka e te iti tangata o te Atua. Karanga katoa mai te angera a te reira tuatau “e rave ra te aronga kino i te kino; kare oki tetai o te aronga kino e kite.”

18. Eaa te ka tupu ki te aronga kino kare e roa atu?

¹⁸ I teia tuatau i te akaraanga te rave ra te aronga kino i te kino. (Mala. 3:14, 15) Kare e roa atu ka akava a Iesu i te aronga kino mei te puakanio te tu e ka akatakake ia ratou mei te aronga mamoe te tu. (Mata. 25:31-33) Kare te aronga kino e ora i te mate maata, e kare katoa e akatuia i te ao ou. To ratou ingoa kare i roto i “tetai buka manakoanga” ia Malaki 3:16.

19. Eaa tei anoanoia no tatou i teianei kia rave, e no teaa ra? (Malaki 3:16-18)

¹⁹ Ko teia te tuatau no tatou kia akapapu e kare ko tatou tetai o te aronga kino. (E tatau ia Malaki 3:16-18.) Te akaputu nei a Iehova i te aronga tana i manako “ei apinga meitaki rava,” me kore ei apinga akaperepereia. Papu ka inangaro tatou ko tatou tetai o ratou.

20. Eaa te taputou openga kia Daniela, e eaa koe ka tapapa atu ei i te tupuanga o te reira?

²⁰ E tikai te noo nei tatou i te tuatau akamaroiroi anga. Te vaitata maira te au mea umereia kia akatupuia. Kare e roa ka kite tatou te takoreanga o te kino. Aru mai, ka kite tatou i te tupuanga o ta Iehova taputou kia Daniela: “Ka tu atu rai koe i to tuanga i te openga o te au rā ra.” (Dani. 12:13) Te tapapa ra ainei koe i tera rā me “tu” akaou a Daniela, e toou aronga akaperepere? Me ko tera, e rave maroiroi i teianei kia vai tiratiratu, e ka papu ia koe ka vai rai toou ingoa ki roto i ta Iehova puka ora.