I te 1940, kua apii toku nga metua i te Pipiria mei te Au Kite o Iehova. Kua akamutu raua i te apii, inara kua rauka ua ta mama makatini Te Punanga Tiaki e te E Ara! I te 1950 kua raveia te uruoaanga pa enua ki New York City, e kua āriki toku pamiri i te patianga kia tae atu ki te reira.

I muri akera, kua atoro mai te Taeake Lawrence Jeffries ia matou. Kua tauturu mai aia iaku. I te akamata anga kua patoi au i tona manako no te turanga takake o te Au Kite o Iehova kia kore e piri ki te angaanga poritiki e te vaeau. Kua māro au e me patoi te katoatoa o Marike i te aere ki te tamaki, ka autuia te reira e te au enemi. Kua akamārama marie mai te Taeake Jeffries e: “Eaa toou manako ta Iehova ka rave me tavini te au tangata katoatoa i Marike iaia e kua aere mai te au enemi i te tamaki ia ratou?” Kua tauturu tana pauanga no teia e tetai atu au manako iaku kia kite e e puapinga kore taku patoianga. Kua akakeuia au kia apii.

Kua pou te ora i toku tatau anga i te au makatini taito o Te Punanga Tiaki e te E Ara! ta toku mama i tuku ki raro ake i te are. Aere ua rai, kua kite mai au e te apii ra au i te tuatua mou, no reira kua āriki au i te Taeake Jeffries kia apii i te Pipiria kiaku. Kua akamata au i te aere putuputu ki te au uipaanga. Kua mataora tikai au i taku e apii ra, e kua riro mai ei papuritia no te nuti meitaki. Kua taui toku akakoroanga i te mārama anga au e te “vaitata [maira] te rā maata o Iehova.” (Zepha. 1:14) E kare au e inangaro i te  aere ki te apii teitei, kua inangaro au i te tauturu i tetai kia kite i te tuatua mou Pipiria.

Kua akaoti au i taku apii teitei ia Tiunu 13, 1956, e toru rā i muri mai, kua papetitoia au i ko i te akaputuputuanga kotinga. Kare au i manako ana e ka rauka iaku te au akameitakianga mei te oronga anga i toku oraanga kia kite e kia apii no runga ia Iehova.

E ono mārama i muri ake i toku papetitoanga, kua riro mai au ei painia tamou. Kua tataia te atikara “Ka Rauka Ainei ia Koe i te Tavini i te Ngai te Anoano Maata ra i te Tauturu?” i te reo Papaa, i roto i ta Tatou Angaanga Patireia o Titema 1956. Ka rauka katoa iaku taua patianga. Kua inangaro au i te tauturu i te ngai e iti te aronga tutu aere i te nuti meitaki.​—Mata. 24:14.

Kua neke atu au ki Edgefield, South Carolina. Ki tetai putuputuanga e a papuritia. E naku i akatae atu i te numero ki te rima. Kua rave matou i ta matou uipaanga ki roto i te pia kainga o tetai taeake. I te au mārama, kua akapou au e 100 ora ki roto i te angaanga tutu aere. Kua rave maroiroi au i te tutu aere e te akono i te au tuanga o te uipaanga. Te maata atu taku e rave ra, te maata atu taku e apii ra no runga ia Iehova.

Tetai vaine taku e apii ra i te Pipiria, e pu aia no tetai ngai tanumanga i Johnston, e oire kare i mamao roa. Kua oronga mai aia i tetai angaanga tei inangaroia e au e kua āriki mai kia taangaanga matou i tetai manga are ei Are Uipaanga Patireia.

Kua neke mai te Taeake ko Jolly Jeffries, e tamaiti na te taeake tei apii iaku, mei Brooklyn, New York, e kua riro aia ei painia patana noku. Kua noo maua ki roto i tetai are terera meangiti no tetai taeake.

E meangiti te moni tutaki i te tua Apatonga. E rua me kore e toru tara i te rā. I tetai atianga, kua pou taku moni i te oko kai. Toku tomo anga mai ki vao kua ui mai tetai tangata: “Ka inangaro koe i te angaanga? Ka tutaki au ia koe e tai tara i te ora.” Kua oake mai aia e toru rā te tāmā anga i tetai ngai patu are. Papu iaku te tauturu ra a Iehova iaku kia noo ki Edgefield. Kua aere rai au ki te uruoaanga i te pa enua 1958 tei raveia i New York City.

I te rā rua o te uruoaanga, kua tupu tetai apinga manea. Kua aravei au ia Ruby Wadlington, te painia tamou ra i Gallatin, Tennessee. No to maua inangaro i te angaanga mitinari, kua aere maua ki te uipaanga apii Gileada i ko i te uruoaanga. I muri mai kua akamata maua i te tata ki tetai e tetai. E oti kua patiia au kia oronga i tetai akoanga ki te katoatoa i Gallatin. Kua taangaanga au i te reira tuatau no te pati iaia kia akaipoipo maua. Kua neke au ki ta Ruby putuputuanga e kua akaipoipo maua i te 1959.

I toku 23 mataiti, kua riro mai au ei tavini no te putuputuanga (i teianei e taeake tauturu no te pupu aronga pakari) i Gallatin. Ko matou te putuputuanga mua ta Charles Thompson i atoro mai ei akaaere kotinga. E taeake tukatau aia; inara, kua ui mai aia eaa tei anoanoia e te au taeake e akapeea te au akaaere kotinga me akono i te reira. Kua apii mai au e mea meitaki kia ui i te au uianga e kia rauka te tika i mua ake ka rave ei i tetai angaanga.

Ia Me 1964, kua patiia au kia aere ki te Apii na te Aronga Pakari e tai marama i South Lansing, New York. Kua akamaroiroi te au taeake iaku kia apii maata e kia tere ki mua i te pae vaerua.

Kua tae mai ta maua patianga ko Ruby kia rave i te angaanga kotinga ia Tianuare 1965. Kua tukuia maua ki te kotinga mei Knoxville, Tennessee, ki Richmond, Virginia. Ka kapiti mai i te au putuputuanga i North Carolina, Kentucky, e West Virginia. Kua tavini ua au i te au putuputuanga taeake kerekere no te akatakake anga e tupu ra i te tua apatonga o Marike, kare te au taeake kerekere e uipa kapiti ki te au taeake teatea. E putaua te au taeake, no reira kua apii maua i te oronga ua. Kua apii mai tetai akaaere kotinga i te apiianga puapinga: “Kia riro ei taeake. Auraka e aere ki tetai putuputuanga ei pu. Ka rauka ia koe te tauturu me akara mai ratou ia koe ei taeake no ratou.”

Ia maua e atoro ra i tetai putuputuanga iti ua, kua apii a Ruby i tetai mapu vaine e tamaine tana e tai mataiti. No te mea kare e rauka i tetai i roto i te putuputuanga i te apii iaia, kua rave a Ruby i te reira na roto i te tataanga pepa. I tera mai atoro anga kotinga, kua tae mai te vaine ki te au uipaanga. Te neke anga mai tetai nga tuaine painia takake ki reira, kua rave raua i te apii e kua papetitoia te reira vaine. E 30 mataiti i muri mai i te 1995, i Betela Patterson, kua aravei mai tetai mapu tuaine ia Ruby. Ko te tamaine a te mapu vaine ta Ruby i apii. Tei roto te tamaine e tana tane i te pupu 100 o te Apii Gileada.

Te rua o ta maua kotinga ko te tuanga rotopu o Florida. I teia taime kua anoano maua i te motoka, no reira kua oko maua i tetai e mea mama. Inara i te epetoma mua kua kino te ngai pamu vai. Kare a maua moni no te ripea i te reira. Kua ringi atu au i tetai taeake no te tauturu. Kua aere mai tana tangata angaanga i te maani i te motoka e kare i ariki i te moni tutaki. Karanga mai aia, “Kua oti te reira.” Kua oake mai aia i tetai moni ei pakau aroa! E akaraanga manea tikai te reira te akono ua ra a Iehova i tona au tavini. Akamaara mai te reira ia maua kia oronga ua.

Me atoro maua i tetai putuputuanga, kua noo maua ki te kainga o te au taeake. Tei tupu, kua rauka te au oa piri mou. I tetai rā, kua akaruke au i taku ripoti kare i oti no te putuputuanga ki roto i taku typewriter. Toku oki mai anga i te aiai, kua akaoti te tamaiti o te ngutuare e toru mataiti i taku ripoti. Kua tatiaeae au iaia no te reira no tetai au mataiti i muri mai.

I te 1971, kua tae mai taku pepa kia tavini ei akaaere tapere i New York City. Kua poitirere maua! I to maua neke anga ki reira, e 34 oku mataiti. Kua āriki pumaana mai te au taeake iaku, ei akaaere tapere kerekere mua ki reira.

Ei akaaere tapere, kua reka au i te apii ia Iehova i te au openga epetoma i ko i te akaputuputuanga kotinga. E maata te au akaaere kotinga tukatau atu iaku. Kua oronga tetai ia ratou te akoanga no toku papetitoanga. Tetai akaou taeake ko Theodore Jaracz, tei riro ei mema no te Pupu Akaaere. E maata katoa te au taeake tukatau tei tavini i ko i te Betela i Brooklyn. Mataora tikai au e kua āriki ua te au akaaere kotinga e te au taeake Betela iaku. Kua kite meitaki au i teia au tiaki aroa tei irinaki i te Tuatua a te Atua e tei turu tiratiratu i te akaaerenga. No to ratou tu akaaka i māmā ei iaku i te tavini ei akaaere tapere.

I te 1974 kua tono te Pupu Akaaere i tetai au akaaere kotinga ki te angaanga tapere, e ka tavini akaou au ei akaaere kotinga​—i teianei ki South Carolina. Ma te mataora, kua taokotaiia te au putuputuanga e te au kotinga, tei akarekareka i te au taeake.

I te 1976, kua tukunaia au ki te kotinga i Georgia i rotopu ia Atlanta e Columbus. Kua maara meitaki iaku te oronga anga i tetai akoanga i te ngai tanumanga no nga tamariki kerekere e rima tei mate i te akaaruruia anga to ratou kainga e te au tangata tutungi ai. Kua kinokino te metua vaine e kua tukunaia ki roto i te are maki. Kua aere ua mai te Au Kite o Iehova, te kerekere e te teatea, ki te are maki no te akapumaana i te nga metua. Kua kite au i te aroa akaperepere o te au taeake. Kua tauturu te tu tangi aroa i te au tavini o te Atua kia akakoromaki i te au turanga ngatā.

I te 1977 kua patiia maua kia aere ki Betela i Brooklyn no tetai nga marama i te angaanga ki reira. I te vaitata anga te reira i te oti, kua aravei mai e rua mema o te Pupu Akaaere iaku ma te pati me ka inangaro maua ko Ruby i te angaanga tamou i Betela. Kua āriki maua i te patianga.

E 24 mataiti akenei, i toku angaanga anga ki roto i te Tipatimani Tavini Anga, te ngai e akono ana te au taeake i te au uianga ngatā. I te au mataiti i aereia mai kua oronga mai te Pupu Akaaere i te aratakianga tei rotai ki te au kaveinga Pipiria. Kua taangaangaia teia ei pau i te au uianga, e te tereni i te au akaaere kotinga, te aronga pakari e te au painia. Kua tereni teia i te manganui kia tupu i te pae vaerua. E kua akapuapingaia ta Iehova akaaerenga.

Mei te 1995 ki te 2018, kua atoro au i te au opati Betela tukeke ei mata no te opati maata, tei kapikiia i mua ana ko te akaaere tuanga enua. Kua aravei au i te au Kumiti Opati Betela, te au taeake Betela, e te au mitinari no te akamaroiroi ia ratou e te tauturu ia ratou. Mei te reira, kua akamaroiroiia maua ko Ruby. Ei akaraanga, kua atoro maua ia Rwanda i te mataiti 2000. Kua pakia to maua ngakau te akarongo anga i te oraanga o te au taeake e te pamiri Betela i te reira tuatau kino i te 1994. E maata te au taeake akaperepere tei takake. Noatu ta ratou i na roto kua akaari ua teia au taeake i te akarongo, te manakonakoanga e te tu mataora.

E 80 tuma o maua mataiti i teianei. E 20 mataiti toku tavini anga ei mema no te Kumiti Opati Betela o Marike. Kare rava au i aere ana ki tetai apii teitei; inara kua rauka iaku tetai apii teitei rava atu mei ia Iehova e tana akaaerenga. Kua tauturu teia iaku kia apii i te au tuatua mou Pipiria te ka akapuapinga i te tangata e tuatau ua atu. (2 Kori. 3:5; 2 Timo. 2:2) Kua kite ana au akapeea te karere Pipiria te tauturu anga i te tangata kia meitaki atu to ratou oraanga e kia akatupu i tetai pirianga vaitata ki Tei Anga ia ratou. (Iako. 4:8) Me rauka ana ia maua, te akamaroiroi nei maua ko Ruby i tetai ua atu kia akaperepere i ta ratou tikaanga kia kite ia Iehova e kia apii i te au tuatua mou Pipiria ki tetai ke​—e tikaanga mataora no tetai tavini o Iehova!