1. Ia Malaki 3:16, eaa te puka ta Iehova i tata ana, e eaa to roto i reira?

 E TAUATINI ua atu mataiti i topa, kua tata ana a Iehova i tetai puka puapinga. E akapapaanga ingoa to roto i teia puka, te akamata anga ki te ingoa o te kite tiratiratu mua, ko Abela. * (Luka 11:50, 51) I te au anere mataiti i aereia mai, kua tata a Iehova i tetai au ingoa ki roto i te puka, e i teia rā e mirioni ua atu ingoa i reira. I roto i te Pipiria, kua kapikiia te reira puka, ko “tetai buka manakoanga,” “te buka ora,” e ‘te pokaikai ora.’ I teia atikara, ka kapiki tatou i te reira ko “te buka ora.”​—E tatau ia Malaki 3:16; Apo. 3:5; 17:8.

2. Noai mā te ingoa tei tataia ki roto i te puka ora, e akapeea to tatou ingoa e o atu ei ki roto i te reira puka?

² Tei roto i teia puka puapinga te au ingoa o te aronga tei akamori ia Iehova ma te ngateitei, e tei akaperepere i tona ingoa. Ka rauka ia ratou te ora mutukore. I teia rā ka rauka to tatou ingoa i te tataia ki roto i te puka me piri vaitata tatou kia Iehova ma te akaperepere i te atinga oko o tana Tamaiti, ko Iesu Karaiti. (Ioa. 3:16, 36) Ka inangaro pouroa tatou i to tatou ingoa kia tataia ki roto i te puka​—noatu me ka noo tatou ki te rangi me ki te enua nei.

3-4. (a) Ka ora ainei tatou e tuatau ua atu me kua tataia to tatou ingoa ki roto i te puka ora? Akamārama mai. (e) Eaa te ka uriuriia i teia atikara e te ka aru mai?

³ Ko te aiteanga ainei ka rauka te ora mutu kore i te aronga kua tataia to ratou ingoa ki roto i te puka? Tei roto te pauanga i ta Iehova tuatua kia Mose, ia Exodo  32:33. Karanga a Iehova: “Ko tei ara ïa iaku nei, ko taku ïa e taparapara i roto i taku nei buka.” Te au ingoa tei tataia ki roto i te puka ka rauka te reira i te kiritiia me kore te tamaia, mei te mea atura kua tata a Iehova i te reira au ingoa ki te penitara. (Apo. 3:5) Ka akapapu tatou kia vai ua to tatou ingoa ki roto i te puka e tae ua atu ki te taime e tataia ai te reira ki te peni inika.

⁴ Ka ui ra tatou i te uianga. Ei akaraanga, eaa ta te Pipiria i karanga no te aronga te ka tataia te ingoa ki roto i te puka ora e te aronga kare te ingoa i tataia? Aea e rauka ai te ora mutu kore no te aronga tei vai ua te ingoa ki roto i te puka? Akapeea te aronga tei mate kare i apii ana no runga ia Iehova? Ka rauka ainei to ratou ingoa i te tataia ki roto i te puka? Ka pauia teia au uianga i roto i teia atikara e te ka aru mai.

NOAI MA TE INGOA I ROTO I TE PUKA?

5-6. (a) Mei tei akakiteia ia Philipi 4:3, noai ma te ingoa tei tataia ki roto i te puka ora? (e) Aea to ratou ingoa e tata tinamouia ai ki roto i te puka ora?

⁵ Noai ma te ingoa ka tataia ki roto i teia puka akatutuia? Ei pau i teia uianga, ka akara tatou e rima pupu tangata. Tetai au ingoa kua tataia ki roto i te puka ora, tetai pae, kare.

⁶ Te pupu mua ko te aronga tei ikiia kia tutara ma Iesu i te rangi. Tei roto ainei to ratou ingoa i te puka ora? Ae. Kia tau ki te au tuatua a te apotetoro ko Paulo ki “tetai papaki oa rave angaanga” i Philipi, kua tataia te ingoa o te aronga akatainuia ki roto i te puka ora, tei patiia kia tutara ma Iesu. (E tatau ia Philipi 4:3.) Kia vai ua to ratou ingoa ki roto i teia puka akatutu, ka anoanoia ratou kia vai tiratiratu. Me rauka ia ratou te akairo  openga, i mua ake ka mate ei me kore i mua ake i te akamataanga o te mate maata, kua papu ka tataia to ratou ingoa ki roto i te puka.​—Apo. 7:3.

7. Eaa ta tatou i mārama no Apokalupo 7:16, 17 e aea te ingoa o te urupu maata o te au mamoe ke atu e tata tinamouia ai ki roto i te puka ora?

⁷ Te rua o te pupu ko te urupu maata o te au mamoe ke atu. Kua tataia ainei to ratou ingoa ki roto i te puka ora? Ae. Ka vai ua ainei to ratou ingoa ki roto i te puka ora me ora atu ratou ia Aramagido? Ae. (Apo. 7:14) Karanga a Iesu ka aere teia au mamoe “ei te ora mutu kore ïa.” (Mata. 25:46) Inara kare e rauka vave te ora mutu kore i te aronga te ka ora atu ia Aramagido. Ka vai ua to ratou ingoa ki roto i te puka ora tei tataia ki te penitara ei akatutu anga. I te tuatau Tutaraanga Tauatini Mataiti, “e arataki oki [a Iesu] ia ratou ki te au pupui anga o te vai ora.” Te aronga tei akarongo ki te arataki anga a Karaiti e i te openga ra kua akavaia ma te tiratiratu kia Iehova, ka tata tinamouia to ratou ingoa ki roto i te puka ora.​—E tatau ia Apokalupo 7:16, 17.

8. Noai ma te ingoa kare e tataia ki roto i te puka ora, e eaa te ka tupu kia ratou?

⁸ Te toru o te pupu ko te au puakanio, te ka takoreia ia Aramagido. Kare to ratou ingoa i roto i te puka ora. Karanga a Iesu “ka aere ke ïa i te mate mutu kore.” (Mata. 25:46) I raro ake i te akauru anga, akakite mai a Paulo kia tatou “ka akautungaia [ratou] i te mate mutu kore.” (2 Tesa. 1:9; 2 Pete. 2:9) Pera katoa te aronga tei akakoro i te ara i te vaerua tapu, no tetai tuatau roa. E takore anga mutu kore to ratou, kare i te ora mutu kore. Taka meitaki, kare o ratou tuakaouanga. (Mata. 12:32; Mare. 3:28, 29; Ebe. 6:4-6) Ka akara vaitata tatou e rua pupu tangata te ka akatuia mai ki te enua nei.

TE ARONGA TE KA AKATUIA MAI

9. Mei tei akaariia ia Angaanga 24:15, eaa te nga pupu tangata e rua te ka akatuia mai ki te enua nei, e eaa te tuke i rotopu i teia nga pupu?

⁹ Te tuatua ra te Pipiria no nga pupu tangata e rua te ka akatuia mai ma te manakonakoanga kia noo ki te enua nei e tuatau ua atu, “te aronga tuatua-tika” e “te aronga tuatua-tika kore.” (E tatau ia Angaanga 24:15.) “Te aronga tuatua-tika” e aronga tiratiratu teia tei tavini ia Iehova ia ratou e ora ra. “Te aronga tuatua-tika kore” kare ratou i tavini tiratiratu ana ia Iehova. Te tika, e tu akono tau kore to ratou mei mua mai. Mei te mea ka akatuia mai teia nga pupu, ka karanga ainei tatou e kua tataia to ratou ingoa ki roto i te puka ora? Ei pau i teia uianga, ka uriuri tatou i teia nga pupu.

10. Eaa “te aronga tuatua-tika” ka akatuia mai ei, e eaa te akameitakianga ta ratou ka rekareka? (Akara i te “Au Uianga a te Aronga Tatau” no te tuakaouanga i te enua nei.)

¹⁰ “Te aronga tuatua-tika” te a o te pupu. I mua ake ka mate ei, kua tataia to ratou ingoa ki roto i te puka ora. Kua kiritiia ainei to ratou ingoa te mate anga ratou? Kare, no te mea te “ora” ra ratou i roto i to Iehova manako. “Kare oki [a Iehova] i te Atua no tei mate, no tei ora ra; te ora katoatoa ra iaia.” (Luka 20:38) Tera te aiteanga me akaoraia mai te aronga tuatua tika ki te enua nei ka kiteaia to ratou ingoa i roto i te puka ora, noatu e kua tataia te reira ki te “penitara.” (Luka 14:14) Kare e ekoko anga, ka rauka i teia aronga tei akatuia mai te akameitakianga kia tavini ei “akaariki i te pa enua katoa ra.”​—Sala. 45:16.

11. Eaa ta “te aronga tuatua-tika kore” ka anoanoia kia kite i mua ake ka tataia ai to ratou ingoa ki roto i te puka ora?

 ¹¹ Te openga, akamanako ana i te rima o te pupu, “te aronga tuatua-tika kore.” Penei kare ratou i aru i te au ture a Iehova e kare ratou i noo ana i te oraanga tuatua tika i mua ake ka mate ei. No reira kare to ratou ingoa i tataia ki roto i te puka ora. Me akatuia mai ratou, ka oronga te Atua i tetai tuatau kia rauka to ratou ingoa i te tataia ki roto i te puka. Ka anoano maataia te tauturu no “te aronga tuatua-tika kore.” I to ratou oraanga i mua ana, kua rave ratou i te au angaanga kikino. No reira ka anoanoia ratou kia apii i ta Iehova au turanga tuatua tika. E rauka ai te reira, ka akanoo te Patireia o te Atua i tetai apiianga maata rava atu i roto i te tuatua enua o te tangata nei.

12. (a) Naai e apii i te aronga tuatua tika kore? (e) Eaa te ka tupu ki te aronga tei patoi i te apiianga?

¹² Naai e apii i te aronga tuatua tika kore? Na te urupu maata e te aronga tuatua tika tei akatuia mai. Kia tataia te ingoa o te aronga tuatua tika kore ki roto i te puka ora, ka anoanoia ratou kia piri vaitata kia Iehova e kia akatapu ia ratou uaorai kiaia. Ka akara matatio a Iesu Karaiti e tona au taeake akatainuia mei te rangi e te peea ra te aronga tuatua tika kore. (Apo. 20:4) Ko tetai ua atu tei patoi i teia patianga aroa, ka takoreia​—noatu e e 100 o ratou mataiti. (Isa. 65:20) Ka rauka ia Iehova e Iesu i te tatau i te ngakau e kare rava raua e akatika i tetai ua atu kia takino i te ao ou.​—Isa. 11:9; 60:18; 65:25; Ioa. 2:25.

TUAKAOUANGA ORA E TE AKAAPA

13-14. (a) I te tuatau i topa, akapeea tatou me mārama i ta Iesu tuatua ia Ioane 5:29? (e) Eaa ta tatou ka akamanako meitaki i teia au tuatua?

¹³ Kua tuatua katoa a Iesu no te aronga te ka akatuia mai ki te enua nei. Ei akaraanga, karanga aia: “Te vaitata mai nei oki  te ora, e akarongo ei te aronga katoa i roto i te rua i tona reo, E kua aere mai ki vao; tei rave ana i te meitaki ra, ei te tuakaouanga ora ïa ratou; e tei rave ana i te kino ra, ei te tuakaouanga akaapa ïa ratou.” (Ioa. 5:28, 29) Eaa te aiteanga o ta Iesu tuatua?

¹⁴ I te tuatau i topa, kua mārama tatou i ta Iesu tuatua e ko te au angaanga a te aronga tei akatuia mai ka rave i muri ake i to ratou tuakaouanga; koia oki, ka ora tetai pae e ka rave i te au mea meitaki e tetai pae ka ora ma te rave i te au angaanga kikino. Inara, kare a Iesu i karanga ana e ka rave te aronga tei aere mai ki vao i te au menema akamaaraanga i te au mea meitaki me kore ka rave i te au mea kikino. Kua taangaanga aia i tei raveia. Kua tuatua aia no te aronga “tei rave ana i te meitaki,” e te aronga “tei rave ana i te kino.” Te akaari maira e kua rave ratou i teia au angaanga i mua ake i te mate anga. Kua tano te reira, kare ainei? Mei te mea, kare e tangata e akatikaia te rave i te au mea kikino i roto i te ao ou. Kua rave te aronga tuatua tika kore i teia au angaanga kikino i mua ake i to ratou mate anga. Akapeea i reira, tatou me mārama i ta Iesu tuatua no “te tuakaouanga ora” e “te tuakaouanga akaapa”?

15. Koai mā ka rauka “te tuakaouanga ora,” e no teaa ra?

¹⁵ Te aronga tuatua tika, tei rave i te au mea meitaki i mua ake i to ratou mate anga, ka rauka ia ratou “te tuakaouanga ora” no te mea kua tata takereia to ratou ingoa ki roto i te puka ora. Tera te aiteanga ko te tuakaouanga o “tei rave ana i te meitaki,” i roto ia Ioane 5:29 kua aite te reira ki te tuakaouanga o “te aronga tuatua-tika” tei taikuia ia Angaanga 24:15. Te rotai ra teia ki te tuatua i roto ia Roma 6:7, tei karanga: “Ko te tangata oki i mate ra, kua matara ïa aia i te kino nei.” Kua akakoreia te ara a teia aronga tuatua tika te mate anga ratou, inara ka vai ua to ratou oraanga tiratiratu. (Ebe. 6:10) E tikai, ka anoanoia teia aronga tuatua tika kia vai tiratiratu kia vai ua to ratou ingoa ki roto i te puka ora.

16. Eaa “te tuakaouanga akaapa” te tuatuaia nei?

¹⁶ Akapeea te aronga tei rave i te au mea kikino i mua ake ka mate ei? Noatu e kua akakoreia ta ratou ara i te mate anga, kare ratou i noo ake i tetai oraanga tiratiratu. Kare to ratou ingoa i tataia ki roto i te puka ora. No reira, kua aiteite te tuakaouanga o “tei rave ana i te kino” ki te tuakaouanga o “te aronga tuatua-tika kore” tei taikuia e Angaanga 24:15. E “tuakaouanga akaapa” * to ratou. Ka akavaia te aronga tuatua tika kore e ka akara matatioia e Iesu. (Luka 22:30) Ka pou te tuatau me akavaia ratou kia tataia to ratou ingoa ki roto i te puka ora. Me akaruke teia aronga tuatua tika kore i to ratou oraanga kino i mua ana e ka akatapu ia ratou uaorai kia Iehova, ka tataia to ratou ingoa ki roto i te puka ora.

17-18. Eaa ta te katoatoa te ka akatuia mai kia ora i te enua nei ka rave, e eaa te “au angaanga” tei akakiteia e Apokalupo 20:12, 13?

¹⁷ Noatu to ratou tu tuatua tika me kore tuatua tika kore i mua ana, ka anoanoia  te aronga tei akatuia mai kia akarongo ki te au ture i roto i te au pokaikai ou te ka akatueraia i te tuatau o te 1000 mataiti. Kua akakite te apotetoro ko Ioane i tana i kite i roto i te orama: “E kite atura oki au i tei mate ra, ko te tangata rikiriki e te aronga mamaata, i te tu anga ki mua i te Atua, e eeuia iora nga buka ra, e eeuia iora oki tetai buka ke, koia te buka ora ra: e akavaia iora taua aronga i mate ra i te au tuatua i tataia ki roto i taua nga buka ra, i ta ratou au angaanga.”​—Apo. 20:12, 13.

¹⁸ Eaa te “au angaanga” me akavaia te aronga te ka akatuia mai? Ko te angaanga ainei ta ratou i rave i mua ake ka mate ei? Kare! Akamaara, kua akakoreia ta ratou ara i mua ana i to ratou mate anga. I konei, “ta ratou au angaanga,” kare ko te oraanga i mua ana. Mari ra, te tou ra teia ki ta ratou angaanga i āriki i roto i te ao ou. Pera te au tane tiratiratu mei ia Noa, Samuela, Davida, e Daniela ka apii ratou no runga ia Iesu Karaiti ma te taangaanga i te akarongo ki roto i tona atinga. Mei teaa atura te aronga tuatua tika kore kia pera!

19. Eaa te tupuanga openga no te aronga tei patoi i teia akameitakianga manea?

¹⁹ Eaa te tupuanga openga no te aronga tei patoi i teia akameitakianga manea? Akakite maira a Apokalupo 20:15 kia tatou: “E te tangata ravarai kare i kitea tona ingoa i te tata angaia ki roto i te buka ora ra, kua uriia ïa ki roto i te roto ai ra.” Ae, ka takore takiriia ratou e tuatau ua atu. Mei teaa atura te puapinga, kia akapapu e kia tataia to tatou ingoa ki roto i te puka ora e kia vai ua te reira ki reira!

20. Eaa te angaanga mataora ka raveia i te tuatau o te Tutaraanga Tauatini Mataiti? (Akara i te tutu i te kapi mua.)

²⁰ Mei teaa atura te mataora i te Tutaraanga Tauatini Mataiti! Ka kapiti mai tetai porokaramu apiianga maata rava atu i te enua nei. Ka riro katoa te reira ei tuatau me akara matatioia te tu o te aronga tuatua tika e te aronga tuatua tika kore. (Isa. 26:9; Anga. 17:31) Akapeea teia porokaramu apiianga me raveia? Na te atikara ka aru mai e akamārama mai e kia āriki tatou i teia akameitakianga manea.