Akara akapeea te Pipiria me pau i teia au uianga.

Angaanga 24:15 te akakite maira kia tatou “e e tuakaouanga to tei mate, te aronga tuatua-tika e te aronga tuatua-tika kore.” Te aronga tuatua tika ko ratou tei akarongo ki te Atua i mua ake ka mate ei, no reira kua tataia to ratou ingoa ki roto i te puka ora. (Mala. 3:16) Te aronga tuatua tika kore ra ko te aronga kare i rava ana te tuatau no te apii no runga ia Iehova, no reira kare to ratou ingoa i tataia i roto i te puka ora.

Ioane 5:28, 29 te tou ra ki nga pupu e rua tei taikuia ia Angaanga 24:15. Karanga a Iesu ko “tei rave ana i te meitaki ra” ka aere mai ki vao “ei te tuakaouanga ora ïa ratou; e tei rave ana i te kino ra, ei te tuakaouanga akaapa ïa ratou.” Kua rave te aronga tuatua tika i te meitaki i mua ake ka mate ei. Ka aere mai ratou ki vao ki te tuakaouanga ora no te mea te vai ua ra to ratou ingoa i tataia i roto i te puka ora. Inara, kua rave te aronga tuatua tika kore i te kino i mua ake ka mate ei. Ka aere mai ratou ki vao ki te tuakaouanga akaapaanga. Kare i tataia ake to ratou ingoa ki roto i te puka ora, e ka na roto ratou i tetai tuatau akaapaanga, me kore ka akara matatioia. I taua tuatau, ka orongaia tetai atianga kia apii ratou no runga ia Iehova e kia tataia to ratou ingoa ki roto i te puka ora.

Apokalupo 20:12, 13 tei akamārama mai e ka anoanoia te katoatoa tei akatuia mai kia akono i te ‘au tuatua i tataia ki roto i te au pokaikai ra,’ koia oki, te au ture ou i roto i te ao ou. Ka akaateaia te aronga kare i akarongo ana.​—Isa. 65:20.

Daniela 12:2 tei totou mai e ko tetai pae tei moe i roto i te mate, ka ara mai ki ‘te ora mutu kore, e tetai pae ra, ei te akama ïa, e te akavaavaa mutu kore.’ Te tuatua ra teia irava no te akavaanga openga o to ratou tuakaouanga​—ki te “ora mutu kore” me kare ki te “akavaavaa mutu kore.” No reira i te openga o te 1,000 mataiti, e ora mutu kore to tetai pae e ka takore takiriia tetai pae.​—Apo. 20:15; 21:3, 4.

Akamanako ana i tetai akatutuanga. Penei ka akaaiteia te nga pupu e rua ki te aronga ke te inangaro ra i te noo ki tetai enua ke. Aite te aronga tuatua tika ki te aronga e visa angaanga me kore e visa enua to ratou kia kiteia e kia aere ua atu. Ei akatuke anga, aite te aronga tuatua tika kore ki te aronga ke e visa poto ua me kore e visa atoro ua to ratou. Ka akapapu te aronga ke e ka akatikaia ratou kia noo ki roto i te enua ou. Mei te reira rai te aronga tuatua tika kore, ka anoanoia ratou kia akarongo i ta Iehova au ture, e kia akapapu e e aronga tuatua tika ratou kia noo ki Parataito. E noatu eaa te tu visa ta te aronga ke ka rauka me tomo ratou ki roto i tetai enua, ka tae tetai pae e ka akaokiia tetai pae. Tei runga ua i to ratou tu mako i roto i te enua ou. Pera katoa, te akavaanga openga no te katoatoa tei akatuia mai, tei runga ua i to ratou akarongo e te tu mako i roto i te ao ou.

E Atua tangi aroa a Iehova e te Atua tika. (Deu. 32:4; Sala. 33:5) Ka akaari mai aia i tona aroa na te akatuanga mai i te aronga tuatua tika e te aronga tuatua tika kore. I taua taime rai ka akanoo aia i tana au turanga teitei no te oraanga tau e te tiama. Ko te aronga tei inangaro e tei akono i tana au turanga ko ratou te ka akatikaia kia noo ki roto i te ao ou.