Ia 1 Korinetia 15:8, karanga a Paulo: “E te openga iora, kitea katoa iora iaku, mei te mea e e maemo au.” I mua ana, kua akamārama atu matou e te tuatua ra a Paulo ki tei tupu kiaia, te kite anga aia i tetai orama no Iesu i te rangi kakā. Mei te mea atura kua orongaia kiaia te tu ngateitei kia anauia, me kore kia akatuia mai, ki tetai oraanga vaerua, e anere ua atu mataiti i mua ake ka tupu ei te reira tuakaouanga. I muri ake i tetai kimikimi anga, kua anoanoia tetai akatikatika anga ki teia irava.

E tika te taiku ra a Paulo i tei tupu i te tuatau i riro mai ei aia ei Kerititiano. Eaa ra te aiteanga te tuatua anga aia “mei te mea e e maemo au”? E maata te tumu.

E viviki e te umere tona tauianga. E mea poitirere te anau anga viviki. Ia Saula (tei kiteaia ko Paulo i muri mai) e aere atura ki Damaseko kia takinokino i te au Kerititiano, kare aia i manako ana e ka kite aia i tetai orama no Iesu tei akatuia mai. E mea poitirere to Paulo tauianga kiaia uaorai e ki te au Kerititiano tana e inangaro ra i te takinokino i roto i te oire. No te poitirere e te umere i teia taui anga kua matapo atura aia no tetai tuatau poto.​—Anga. 9:1-9, 17-19.

Kua tauiia aia “i te tuatau tarevake.” Te tuatua Ereni tei uriia “mei te mea e e maemo” ka uri katoaia “tei anauia i te tuatau tarevake.” Te akakite ra The Jerusalem Bible e: “Mei te mea rai e kua anauia au e kare i manakoia atu ana.” I te taime i taui ei a Paulo, kua oki ke ana a Iesu ki te rangi. Kare mei te aronga ta Paulo i taiku i roto i te au irava i mua atu ana, kare aia i kite ana ia Iesu tei akatuia mai i mua ake ka aere ei a Iesu ki te rangi. (1 Kori. 15:4-8) Na roto i to Iesu tu anga manako koreia ki mua ia Paulo i rauka ai iaia te kite ia Iesu noatu e e “tuatau tarevake” te reira.

Tuatua aia nona uaorai ma te tu akaaka. Karanga tetai aronga kite, e tuatua tau kore ta Paulo i taangaanga i konei. Me ko ta Paulo te reira i manako, te akakite ra aia e kare e tau kia orongaia teia tikaanga kiaia. Te tika, karanga katoa aia: “E iti oki au i te au aposetolo ravarai, kare oki au e tau kia karangaia e, e aposetolo, no te mea kua takinga-kino au i te ekalesia a te Atua. Toku nei ra tu e vai nei, no te aroa ua ïa o te Atua.”​—1 Kori. 15:9, 10.

No reira, penei te akakite ra a Paulo i te tu viviki e te umere, to Iesu tu anga ki mua iaia, tona taui anga manako koreia me kore kare aia i manako ana e kua tau te reira orama umere kiaia. Noatu eaa te tu, kua akaperepere maata a Paulo i teia akameitakianga. Kua akapapu te reira kiaia e kua akatuia a Iesu mei te mate. No reira aia i taiku putuputu ei i teia tupuanga umere, me tutu aere aia ki tetai ke no to Iesu tuakaouanga.​—Anga. 22:6-11; 26:13-18.