1-2. Eaa a Iehova i anga ai ia tatou kia mataora me oronga ki tetai ke?

 KUA anga a Iehova i te tangata kia rauka ia ratou te mataora i te oronga atu e i te rave mai. (Anga. 20:35) Ko te aiteanga ainei e kare tatou e mataora me oronga mai tetai tangata i te apinga aroa kia tatou? Kare. Ka mataora tatou pouroa me orongaia mai tetai apinga aroa. Inara, e maata atu te mataora me oronga tatou ki tetai ke. E mea puapinga e kua anga a Iehova ia tatou na roto i teia tu. No teaa ra?

² No te mea kua anga a Iehova ia tatou kia mataora i te oronga ua. No reira, e akamanako i te au ravenga ka rauka ia tatou i te oronga ki tetai ke. Kare ainei e mea manea e kua anga a Iehova ia tatou na roto i teia tu?—Sala. 139:14.

3. Eaa a Iehova i kapikiia ai ei Atua mataora?

³ Te akakite maira te Pipiria e ka mataora te aronga tei oronga ki tetai ke. Ka tauturu teia ia tatou kia mārama i te tumu i kapikiia ai a Iehova ei Atua mataora. (1 Timo. 1:11) E Atua oronga ua a Iehova kare i aite ki tetai ua atu. Karanga te apotetoro ko Paulo e “nona oki to tatou ora, e i aaere ei, e i noo ei.” (Anga. 17:28) Pera katoa, ko “te au mea memeitaki i o maiia ra, e te au mea tika ravarai,” no ko mai ia Iehova.—Iako. 1:17.

4. Eaa te ka tauturu ia tatou kia maata atu te mataora?

⁴ Penei ka inangaro te maataanga ia tatou kia mataora no te oronga ua ki tetai ke. Ka rave tatou i teia na te aru anga i to Iehova tu oronga ua. (Ephe. 5:1) I roto i teia atikara, ka apii tatou i tona akaraanga manea no te oronga e eaa ta tatou ka rave me kare tetai ke e akameitaki ia tatou no te oronga atu kia ratou. Ka tauturu teia ia tatou kia oronga ua rai ki tetai ke ma te rekareka.

 ARU I TO IEHOVA TU ORONGA UA

5. Eaa te au mea e oronga mai ana a Iehova no tatou?

⁵ Eaa tetai au ravenga ka akaari mai a Iehova i te tu oronga ua? Akamanako ana i te au akaraanga. Ka oronga mai a Iehova i te au mea ta tatou i anoano. Penei kare aia e oronga mai i te au mea apinganui, inara te oronga maira aia i tei tau ua no tatou. Ei akaraanga, kua oronga mai aia i te kai, te kakau e te ngai nooanga no tatou. (Sala. 4:8; Mata. 6:​31-33; 1 Timo. 6:​6-8) Kare a Iehova i oronga ua mai i teia no te mea kua anoanoia aia kia rave i te reira. Eaa i reira a Iehova i rave ei i teia?

6. Eaa ta tatou ka apii mai mei ia Mataio 6:​25, 26?

⁶ Ka oronga mai a Iehova i ta tatou i anoano no tona inangaro ia tatou. Akamanako i ta Iesu i tuatua i roto ia Mataio 6:​25, 26. (E tatau.) Kua taangaanga a Iesu i te au akaraanga mei te au mea angaia. No te au manu o te reva, akakite a Iesu: “Kare ratou i tanu, kare oki i kokoti, kare oki o ratou are kai.” Aru mai, kua tuatua aia: “Na to kotou Metua i te ao ra i angai ia ratou.” E oti, karanga aia: “Kare aina e meitaki maata to kotou i to ratou?” Te apiianga? Akaperepere maata atu a Iehova i tona au tavini tiratiratu i te au manu tana i anga. No reira me akono a Iehova i te au manu, e mea papu ka akono katoa aia ia tatou! Mei tetai metua aroa, ka oronga mai a Iehova no tona inangaro ia tatou.—Sala. 145:16; Mata. 6:32.

7. Eaa tetai ravenga ka aru tatou i to Iehova tu oronga ua? (Akara katoa i te tutu.)

⁷ Mei ia Iehova, ka oronga tatou i te au mea tei anoanoia e tetai ke no to tatou inangaro ia ratou. Ei akaraanga, kua kite ainei koe i tetai taeake me kore tuaine tei inangaro i te kai e te kakau? Penei ka taangaanga a Iehova ia koe no te oronga i te tauturu kiaia. Ka viviki to Iehova iti tangata i te oronga i te tauturu me tupu te tumatetenga. Ei akaraanga, i te tuatau o te COVID-19, kua oronga te au taeake e te au tuaine i te kai, te kakau, e tetai au mea ki te aronga tei ngere. E maata katoa tei oronga i te moni tauturu no te angaanga i te ao katoa nei. Kua taangaangaia teia moni ei tauturu i te au taeake takapini i teianei ao tei rokoia e  te tumatetenga. Kua aru ratou i te au tuatua i roto ia Ebera 13:16: “Kareka te takinga-meitaki e te oronga, eiaa rava ïa e akatopaia: te pereperekavana ra oki te Atua i te reira atinga.”

8. Akapeea a Iehova me akamaroiroi mai ia tatou? (Philipi 2:13)

⁸ Ka oronga a Iehova i te maroiroi. E mana ririnui to Iehova e ka akamaroiroi aia i tona au tavini tiratiratu. (E tatau ia Philipi 2:13.) Kua pure ainei koe kia patoi i te au timataanga me kore te akakoromaki i te au turanga ngatā? Penei kua pure koe kia maroiroi i te rave i tetai angaanga no tera rā. Te pauia anga taau pure, ka āriki koe i ta Paulo i tata: “E tika iaku te au mea ravarai nei i te Mesia, ko tei akamaroiroi mai iaku nei.”—Phili. 4:13.

9. Akapeea tatou me aru i to Iehova tu oronga ua e te maroiroi? (Akara katoa i te tutu.)

⁹ Noatu to tatou tu apa ua, ka rauka ia tatou i te aru i to Iehova tu me akamaroiroi i tetai ke. Kare e rauka ia tatou i te oronga i to tatou maroiroi kia ratou. Inara ka rauka ia tatou i te akapou i to tatou maroiroi ei tauturu i tetai ke. Ei akaraanga, ka tauturu tatou i te aronga pakarikari e te aronga maki kia akono i to ratou ngutuare e te rave i tetai angaanga na ratou. Ka tauturu katoa tatou i te tamā e te akono i te Are Uipaanga Patireia. Me rave tatou i teia, ka puapingaia to tatou au taeake e te au tuaine.

10. Akapeea tatou me akamaroiroi i tetai ke na roto i ta tatou tuatua?

¹⁰ Auraka e ngaropoina e ka riro te au tuatua ei akamaroiroi i tetai ke. Ka rauka ainei ia koe i te akamanako i tetai tangata tei akamaroiroiia me akameitaki koe ia ratou? Kua kite ainei koe i tetai tei taitaia e te anoano ra kia akapumaanaia? Me koia ïa, e akakite kiaia e te inangaro ra koe iaia. Ka rauka ia koe i te atoro iaia, te ringi i runga i tereponi, te tata i tetai kāti, imere e te tuku karere. Eiaa e manata i taau ka tuatua kiaia. Ka akamaroiroi taau au tuatua akapumaana iaia kia vai tiratiratu e kia mataora.—Mase. 12:25; Ephe. 4:29.

11. Akapeea a Iehova me taangaanga i tona tu pakari?

¹¹ Oronga ua mai a Iehova i te pakari. Kua tata a Iakobo: “Kia ngere ra tetai tangata i te pakari, ka pati aia ki te Atua ra, ko tei oronga ua mai i ta te tangata ravarai ma te patoi kore.” (Iako. 1:5) Te akaari  maira teia irava e kare a Iehova e tāpu i tona tu pakari nona uaorai. Mari ra, ka oronga ua aia i te reira ki tetai ke. Kua karanga katoa a Iakobo e ka oronga ua mai a Iehova i te tu pakari “ma te patoi kore.” Kare aia e inangaro kia emiemi tatou me pati i tana aratakianga. Mari ra, e pati ua rai kiaia.—Mase. 2:​1-6.

12. Eaa te au atianga ka akaari tatou ki tetai ke i ta tatou e apii ra no te tu pakari?

¹² Akapeea tatou? Ka rauka ainei ia tatou i te aru i to Iehova tu me oronga Aia i te pakari? (Sala. 32:8) E maata te au atianga ka rauka i te iti tangata o Iehova i te akaari ki tetai ke i ta ratou e apii ra. Ei akaraanga, ka tereni tatou i te au taeake ou i roto i te angaanga tutu aere. Ka tauturu te aronga pakari i te au tavini tauturu e te au taeake papetito kia kite akapeea me rave i ta ratou au angaanga i roto i te putuputuanga. E ko te aronga tei karape i te pātu are, ka tereni ratou i te aronga kare i kite kia rave i te au angaanga pātu are akamorianga.

13. Me tereni tatou i tetai ke, akapeea tatou me aru i to Iehova tu pakari?

¹³ E tauta i te aru ia Iehova me tereni koe i tetai ke. E akamaara, ka oronga ua a Iehova i te tu pakari. No reira, ka inangaro katoa tatou i te apii i to tatou kite e te tu karape kia ratou. Kare tatou e tāpu i te reira, mei te mea atura e ka monoia mai tatou e te tangata apii. Auraka katoa e manako e no te mea kare koe i tereniia, kare katoa koe e anoanoia kia tereni i tetai ke. Kare teia au peu e tau i roto i to Iehova iti tangata. Mari ra, ka mataora tatou i te akakite i ta tatou i apii mai e kia tereni atu i tetai ke. (1 Tesa. 2:8) Ka irinaki tatou e ka ‘tau [ratou] kia apii atu i etai ke.’ (2 Timo. 2:​1, 2) Me apii tatou i to tatou tu kite e te karape ki tetai e tetai, ka mataora tatou e ratou katoa.

ME KARE TATOU E AKAMEITAKIIA MAI

14. Eaa ta te maataanga o te tangata ka rave me oronga tatou i tetai apinga kia ratou?

¹⁴ Me oronga tatou ki te au taeake e te au tuaine, ka akameitaki mai ratou ia tatou. Penei ka tuku mai ratou i tetai kāti akameitakianga me kore ka akaari mai ratou na roto i tetai ravenga ke. (Kolo. 3:15) Me akameitaki ratou ia tatou, ka mataora tatou.

15. Eaa ta tatou ka akamaara me kare tetai pae e akameitaki ia tatou?

¹⁵ I tetai taime kare te tangata e akameitaki ana i ta tatou angaanga e rave ra no ratou. I tetai atianga, penei ka oronga tatou i to tatou taime, te maroiroi e te au apinga, inara kua ekoko tatou me kua ārikiia mai te reira. Me tupu teia, akapeea tatou me mataora ua e te kopae i te riri? E akamaara i te au tuatua ia Angaanga 20:35. Ka mataora ua tatou i te oronga ua noatu kare tatou e akameitakiia mai. Akapeea ra? Akamanako ana i teia au irava.

16. Eaa te ka tauturu ia tatou kia oronga ua ma te rekareka?

¹⁶ Tauta i te aru ia Iehova. Ka oronga aia i te au apinga meitaki ki te tangata, noatu ka āriki ratou e me kare. (Mata. 5:​43-48) Kua taputou a Iehova e me “oronga atu, auraka ua atu ei manako okooko; e tutaki maata ta kotou.” (Luka 6:35) No reira, auraka tatou e taitaia me kare te tangata e akameitaki mai ia tatou. E akamaara, ka tutaki ua a Iehova i taau angaanga meitaki no te tauturu i tetai ke me oronga koe ma te rekareka.—Mase. 19:17; 2 Kori. 9:7.

17. Eaa te tumu puapinga ka inangaro tatou i te oronga ki tetai ke? (Luka 14:​12-14)

 ¹⁷ Tetai ravenga no te aru i to Iehova tu oronga, na te taangaanga anga i ta Iesu i tuatua i roto ia Luka 14:​12-14. (E tatau.) Kare i te mea tarevake i te akaari i te tu meitaki e te oronga ki te aronga ka akameitaki mai ia tatou. Inara, akapeea me oronga ua tatou ki tetai ke e ka inangaro tatou kia tutakiia mai te reira? E tauta i te rave i ta Iesu i akakite mai. Ka akaari tatou i te tu meitaki ki tetai ke, noatu kare e rauka ia ratou i te tutaki mai. Ka mataora i reira tatou me aru tatou ia Iehova. E me kare tatou e anoano kia tutakiia mai, ka mataora ua tatou i te oronga ki tetai ke, noatu kare ratou e akameitaki mai ia tatou.

18. Eaa te ka tauturu ia tatou kia akamanako meitaki i tetai ke?

¹⁸ Eiaa e manako kino atu i tetai ke. (1 Kori. 13:7) Me kare tetai pae e akameitaki ia koe, penei e ui kia koe uaorai: ‘Kua mareka kore ainei ratou me kua ngaropoina ia ratou i te akameitaki ia koe?’ Penei e tumu ke atu tetai i kore ei ratou i akameitaki mai ia koe. Kua āriki ratou i taau i rave inara e ngatā ia ratou i te akameitaki ia koe. Penei kua akamā ratou i taau tauturu no te mea kua oronga ratou i te tauturu i mua ana. Noatu e inangaro maata to tatou i te au taeake e te au tuaine, kare tatou e manako kino ia ratou e ka oronga ua tatou ma te rekareka.—Ephe. 4:2.

19-20. Eaa i puapinga ai kia tiaki marie me oronga tatou ki tetai ke? (Akara katoa i te tutu.)

¹⁹ E tiaki marie. No runga i te tu oronga ua, kua tata te Ariki ko Solomona: “E titiri i taau kai ki runga i te vai; e manganui akera te rā i topa, rauka akaou atura ia koe.” (Kohe. 11:1) Te akataka maira teia au tuatua e ka akameitaki tetai pae ia tatou i tetai tuatau roa i muri mai. Ko teia tei tupu ki tetai tuaine.

²⁰ I tetai au mataiti i aereia, kua tata te  vaine a te akaaere kotinga i tetai reta ki te tuaine tei papetitoia ei akamaroiroi iaia kia vai tiratiratu. E varu mataiti i muri mai, kua pau te tuaine i tana reta e kua karanga aia: “Kare koe i kite i teia, ka inangaro au i te akameitaki ia koe no taau tauturu iaku i teia au mataiti i aereia. Kua tata koe i te au tuatua akapumaana e kare i ngaropoina iaku te irava taau i taiku.” a Kua akamārama aia i te au manamanata tei tupu kiaia i te au mataiti i aereia, e oti kua tuatua aia: “I tetai taime kua inangaro au i te tuku i te ’au e kia akamutu i te tavini ia Iehova. Inara, kua maara iaku taau irava e kua akamaroiroiia au kia vai tiratiratu. No reira i teia varu mataiti i aereia mai, kua akamaroiroi te reira iaku.” E akamanako ana i te tu rekareka o te vaine a te akaaere kotinga te tatau anga i teia reta i “te au rā i topa”! Ka tupu katoa teia kia tatou i muri ake i tetai tuatau roa me rave tatou i te meitaki ki tetai ke.

21. Eaa te ka akamaroiroi ia tatou kia aru i to Iehova tu oronga ua?

²¹ Mei tei taikuia, kua anga a Iehova ia tatou na roto i tetai ravenga takake. Noatu te mataora i te āriki i tetai apinga aroa, ka mataora atu tatou i te oronga ki tetai ke. Ka rekareka katoa tatou i te tauturu i te au taeake e te au tuaine. E ka mataora tatou me akameitakiia mai tatou. Noatu ka akameitakiia mai koe e me kare, kia rekareka tatou e kua rave tatou i te au mea meitaki. Auraka e ngaropoina e ko taau e oronga ra, “e tika ia Iehova kia akaoki mai e maata ua atu.” (2 Para. 25:9) E tutaki maata ta Iehova ka oronga mai kia koe! Me tutaki mai a Iehova ia tatou ko te reira te tutaki maata rava atu. No reira kia akamaroiroi ua rai tatou i te aru i to tatou Metua oronga ua i te rangi ko Iehova.