1-2. (a) Te tataanga a Paulo i tetai reta ki te au Kerititiano i Iudea, eaa to ratou turanga i te reira taime? (e) Eaa teia reta i riro ei ei tauturu ia ratou?

 I MURI ake i to Iesu matenga i te 33 T.N., kua tumatetenga te au Kerititiano i Ierusalema e i Iudea. I te reira taime, kua akamataia te putuputuanga Kerititiano inara kua takinokino maataia ratou. (Anga. 8:1) E e 20 mataiti i muri mai, kua tupu te onge e te putaua. (Anga. 11:​27-30) Noatu ra i te 61 T.N., kua tupu te ’au ki te au Kerititiano inara kare e roa atu ana ka takinokinoia ratou. No reira, kua tata te apotetoro ko Paulo i tetai reta kia ratou tei riro ei akapapa ia ratou no te ka tupu.

² Kua tano meitaki te reta ki to Ebera no te mea ka kore te tuatau ’au ta te au Kerititiano e na roto ra. Kua oronga a Paulo i tetai akoanga ei tauturu ia ratou kia akakoromaki i te tumatetenga te ka tupu. Ko teia tumatetenga, ko te takoreanga i te akatereanga a te ngati Iuda mei ta Iesu i totou. (Luka 21:20) E tika, kare a Paulo e te au Kerititiano i Iudea i kite aea tikai e tupu ei te reira. Noatu ra, kua akapou te au Kerititiano i to ratou taime e toe ra i te akamatutu i to ratou akarongo e te akakoromaki.—Ebe. 10:25; 12:​1, 2.

3. Eaa te puka o Ebera i riro ei ei reta meitaki no te au Kerititiano i teia tuatau?

³ Kare e roa atu ana, ka na roto tatou i te au tumatetenga tei kino atu ki tei tupu ki te au Kerititiano Ebera.  (Mata. 24:21; Apo. 16:​14, 16) No reira, ka akamanako tatou i te akoanga ta Iehova i oronga ki teia au Kerititiano, e ka puapinga katoaia tatou.

“E AERE RAI TATOU KI MUA I TE PAKARI MOU”

4. Eaa te au tauianga ta te au Kerititiano ngati Iuda i na roto? (Akara katoa i te tutu.)

⁴ Kua na roto te au Kerititiano ngati Iuda i te au tauianga maata. I mua ana, kua ikiia te au ngati Iuda ei iti tangata no Iehova. Ko Ierusalema te oire i tutara ai te Patireia o te Atua i te enua nei, e ko te iero te ngai no te akamorianga mou. Kua aru te ngati Iuda i te Ture a Mose tei akamāramaia e to ratou au arataki akonoanga. Ko ta ratou au apiianga, te ō maira te ture no te kai, te peritome e pera te kapiti anga ki te aronga kare i te ngati Iuda. Inara i muri ake te mate anga a Iesu, kare a Iehova e āriki akaou i te au atinga i ko i te iero. E ngatā teia i te au Kerititiano ngati Iuda kia āriki no te mea kua mātau ratou i te aru i te Ture. (Ebe. 10:​1, 4, 10) E pera te au Kerititiano tukatau mei te apotetoro ko Petero, kua ngatā katoa iaia i te rave i te au tauianga. (Anga. 10:​9-14; Gala. 2:​11-14) No reira, kua takinokinoia te au Kerititiano e te au arataki ngati Iuda no to ratou irinakianga.

5. Eaa ta te au Kerititiano ka anoanoia kia matakite?

⁵ E rua pupu tangata tei takinokino atu i te au Kerititiano Ebera. Kua makitakita te au arataki akonoanga ngati Iuda ia ratou no te kua akaruke i te akonoanga. Karanga katoa tetai pae i roto i te putuputuanga kia aru te au Kerititiano i te Ture a Mose kia kore ratou e takinokinoia. (Gala. 6:12) Eaa te ka tauturu i te au Kerititiano kia noo tamou ki roto i te tuatua mou?

6. Eaa ta Paulo i rave no te akamaroiroi i tona au taeake irinaki? (Ebera 5:14–6:1)

⁶ I roto i tana reta ki to Ebera, kua akamaroiroi a Paulo i tona au taeake  irinaki kia apii e kia akamanako oonu i te Tuatua a te Atua. (E tatau ia Ebera 5:14–6:1.) Kua akamārama a Paulo mei te au Tuatua Tapu Ebera i te tumu i meitaki atu ei te akamorianga ia Iehova a te au Kerititiano ki te akamorianga a te ngati Iuda. a Kua akamaroiroi a Paulo i te au Kerititiano kia mārama meitaki i te au mea tika i roto i te irava, kia kite ratou i te au apiianga tarevake e kia patoi i te reira.

7. Eaa te au manamanata te tupu nei kia tatou i teia tuatau?

⁷ Mei tei tupu ki te au Kerititiano Ebera, ka akakiteia mai kia tatou te au tuatua tarevake e te pikikaa no runga i to Iehova turanga tuatua tika. Ka taumāro te aronga patoi i to tatou irinakianga no te pirianga ainga. Inara, kua kino takiri te au tu e te peu o teianei ao e kua patoi i to te Atua au turanga. (Mase. 17:15) No reira e mea puapinga kia kite tatou i te au manako tarevake e kia patoi i te reira. Auraka tatou e tuku i te aronga patoi kia timata ia tatou kia akamutu i te tavini ia Iehova.—Ebe. 13:9.

8. Eaa te ka tauturu ia tatou kia riro mai ei au Kerititiano tukatau?

⁸ Ka aru tatou i ta Paulo akoanga ki te au Kerititiano Ebera, kia riro mai ei au Kerititiano tukatau. Tera te aiteanga, ka apii meitaki tatou i te Pipiria e kia mārama tikai i to Iehova manako. Ka rave ua atu tatou i teia i muri ake i to tatou akatapuanga e te papetitoanga. Noatu eaa te roa ia tatou i roto i te tuatua mou, ka anoano pouroaia tatou kia tatau e te apii putuputu i te Pipiria. (Sala. 1:2) Me rave tatou i teia, ka tauturu te reira ia tatou kia akatupu i te akarongo ta Paulo i akakite i roto i tana reta ki to Ebera.—Ebe. 11:​1, 6.

KIA “RAUKA TE AKARONGO E ORA ATU EI TE VAERUA”

9. Eaa i anoanoia ai te akarongo ketaketa no te au Kerititiano Ebera?

⁹ Ka anoanoia te akarongo ketaketa no te au Kerititiano Ebera, e ora ai ratou i te tumatetenga i Iudea. (Ebe. 10:​37-39) Kua akamatakite a Iesu i tana au pipi, kia oro ki te maunga me kite ratou i te au nuku vaeau e takapini ra ia Ierusalema. Kua tau rai tana akoanga no te au Kerititiano e noo ra i roto i te oire o Ierusalema me kore i vao ake ia Iudea. (Luka 21:​20-24) I tera tuatau, me tamaki mai te nuku vaeau i te tangata, ka oro ratou ki roto i te oire ei akaruruanga. I te akaraanga, kare i te mea meitaki kia oro atu ki te maunga. No reira kua anoanoia ratou kia akarongo kia Iesu.

10. Akapeea te akarongo ketaketa me akakeu i te au Kerititiano? (Ebera 13:17)

¹⁰ Ka anoano katoaia te au Kerititiano Ebera kia irinaki i te aronga ta Iesu e taangaanga ra kia arataki i te putuputuanga. Ka oronga ratou i te au ikuikuanga taka meitaki no te ngai ka oro ratou e akapeea e tae ei ki reira. (E tatau ia Ebera 13:17.) Ia Ebera 13:​17, ko te tuatua Ereni “e akarongo,” te akakite ra no runga i tetai tangata tei akarongo no te mea kua irinaki aia i te tangata tei oronga i te aratakianga. Ka rauka te  irinaki iaia no te mea koia tei akamanaia kia oronga i te aratakianga. No reira, ka anoanoia te au Kerititiano Ebera kia irinaki i te aronga e arataki ra i mua ake ka tupu ei te tumatetenga. Me akarongo ratou ki te aronga pakari i te tuatau ’au e te marū, ka māmā ua ia ratou i te kauraro i te tuatau ngatā.

11. Eaa i puapinga ai te akarongo ketaketa no te au Kerititiano i teia tuatau?

¹¹ Mei te au Kerititiano Ebera, ka anoano katoaia tatou kia akarongo. Te noo nei tatou i te tuatau te patoi nei te maata anga o te tangata i te akamatakite anga a te Pipiria no te openga o teianei ao. (2 Pete. 3:​3, 4) Noatu te akakite maira te Pipiria i te ka tupu i te mate maata, e maata atu te au mea kare tatou i kite. No reira, ka anoanoia te akarongo ketaketa me iki a Iehova i te tuatau tau no te takore i teianei ao e ka paruru Aia ia tatou.—Haba. 2:3.

12. Eaa te ka akaora ia tatou me tupu ake te mate maata?

¹² Ka anoano katoaia te akarongo ketaketa kia aru i te aratakianga a “te tavini akono meitaki e te pakari” i teia tuatau. (Mata. 24:45) Me tupu te mate maata, ka orongaia mai te au aratakianga ei akaora ia tatou, mei tei orongaia ki te au Kerititiano Ebera te tae anga mai te nuku o Roma ki Ierusalema. E mea puapinga kia irinaki tatou ki te aronga e arataki nei i te akaaerenga a Iehova. Me kare tatou e irinaki e te akarongo i te au aratakianga i teianei, ka ngatā atu ia tatou i te akarongo ki te au aratakianga me tae mai te mate maata.

13. Eaa i puapinga ai te akoanga i roto ia Ebera 13:5?

¹³ Ia ratou e tiaki ra i te aratakianga kia oro, ka anoano katoaia te au Kerititiano Ebera kia kore e noinoi moni e kia akamou i to ratou oraanga i te tavini ia Iehova. (E tatau ia Ebera 13:5.) Tetai pae ia ratou kua na roto ana i te turanga onge e te putaua. (Ebe. 10:​32-34) Noatu kua akakoromaki ratou i te au turanga ngatā no te akakite i te nuti meitaki, penei kua manako tetai pae e ka paruru te moni ia ratou. Inara kare te moni i akaora ia ratou i te takoreia anga a Ierusalema. (Iako. 5:3) No reira, ko te aronga tei inangaro i te au apinga materia, ka ngatā ia ratou i te akaruke i to ratou au are e te au apinganui e kia oro.

14. Akapeea te akarongo ketaketa me tauturu ia tatou kia rave i te au ikianga meitaki no te au apinga materia?

¹⁴ Ka akakeuia tatou kia patoi i te au apinga materia me ketaketa to tatou akarongo e te vaitata maira te openga o teianei ao. I te tuatau o te mate maata, ka “akaruke [te tangata] i ta ratou ario ki roto i te arataa,” no te mea kua kite ratou e “kare oki ratou e ora i ta ratou ario, e ta ratou auro, i te rā o to Iehova riri otooto ra.” (Eze. 7:19) No reira, auraka tatou e akaputu maata i te moni, mari ra ka akono tatou i te oraanga māmā e te tau. Te ō maira te kopae anga i te kaiou me kore te akapou i te taime no te akaputu i te au apinga materia. Auraka katoa tatou e akariro i te au apinga materia ei mea puapinga rava atu i roto i to tatou oraanga. (Mata. 6:​19, 24) Ia tatou e tiaki nei i te openga o teianei ao, ka timataia to tatou akarongo no te au apinganui e tetai au mea ke atu.

 KA ANOANOIA TE AKAKOROMAKI

15. Eaa te au Kerititiano Ebera i anoanoia ai kia akakoromaki?

¹⁵ Kua anoanoia te au Kerititiano Ebera kia akakoromaki i te tavini ia Iehova no te mea ka tupu te tumatetenga. (Ebe. 10:36) Noatu kua takinokinoia tetai pae ia ratou, e maata tei riro mai ei Kerititiano i te tuatau e tupu ra te ’au. No reira, kua akamaara a Paulo ia ratou kia akakoromaki i te au takinokinoanga e tae ua atu ki to ratou matenga, mei ta Iesu i na roto ana. (Ebe. 12:4) E maata te au ngati Iuda tei makitakita ia ratou no te maata o te tangata tei riro mai ei Kerititiano. I tetai au mataiti i mua, kua takinokino te aronga patoi ia Paulo no te tutu aere i Ierusalema. Kua taeria e 40 ngati Iuda tei “tuatua taumaa ia ratou uaorai, i te na ko anga e, kare ratou e kaikai, e kare oki e inu, kia mate rā Paulo ia ratou.” (Anga. 22:22; 23:​12-14) Noatu ka makitakita e ka takinokinoia te au Kerititiano, ka anoanoia ratou kia akamori kapiti, kia tutu aere i te nuti meitaki e kia akaketaketa i to ratou akarongo.

16. Akapeea te reta ki to Ebera me tauturu ia tatou kia akakoromaki i te tumatetenga? (Ebera 12:7)

¹⁶ Eaa te ka tauturu i te au Kerititiano Ebera kia akakoromaki i te patoianga? Kua tauturu a Paulo i te au Kerititiano kia kite i te puapinga me akakoromaki ratou i te au tumatetenga. Kua akamārama aia me tupu te tumatetenga ki te au Kerititiano, ka tereni te reira ia ratou. (E tatau ia Ebera 12:7.) Ka tauturu te reira ia ratou kia apii e kia akameitaki atu i to ratou au tu kia akamareka ia Iehova. Na te akamou anga ki runga i te puapinga tei tupu mai, ka māmā ua i te au Kerititiano i te akakoromaki.—Ebe. 12:11.

17. Eaa ta Paulo i apii no te akakoromaki i te takinokinoanga?

 ¹⁷ Kua akamaroiroi a Paulo i te au Kerititiano Ebera kia kore e tuku i te ’au. Kua oronga aia i te au akoanga meitaki no te akakoromaki. I mua ake ka riro mai ei aia ei Kerititiano, kua takinokino ana aia i te au Kerititiano e kua kite aia i te kino o te reira. Kua akakoromaki katoa aia i te au takinokinoanga i te riro mai anga aia ei Kerititiano. (2 Kori. 11:​23-25) No reira kua kite meitaki a Paulo eaa tei anoanoia kia akakoromaki. Kua akamaara aia ki te au Kerititiano me akakoromaki ratou i te au timataanga e te irinaki ia Iehova. Kua tuatua a Paulo ma te ngakau toa e: “Ko Iehova toku tauturu, kare au e mataku.”—Ebe. 13:6.

18. Eaa te ka tauturu ia tatou kia akakoromaki i te au takinokinoanga a te tuatau ki mua?

¹⁸ Tetai pae o to tatou au taeake, te akakoromaki nei i te au takinokinoanga. Ka tauturu tatou ia ratou na roto i ta tatou au pure e i tetai taime ka oronga tatou i te tauturu. (Ebe. 10:33) Inara te akataka maira te Pipiria “e te aronga katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa.” (2 Timo. 3:12) No tera tumu, ka anoanoia tatou pouroa kia akapapa me tupu te tumatetenga. Kia irinaki tikai tatou kia Iehova i teianei e ka tauturu Aia ia tatou kia akakoromaki i tetai ua atu au timataanga. Kare e roa atu ana, ka akaora aia i tona au tavini tiratiratu.—2 Tesa. 1:​7, 8.

19. Eaa ta tatou ka rave kia akapapa no te tuatau o te mate maata? (Akara katoa i te tutu.)

¹⁹ E mea papu e kua tauturu te reta a Paulo i te au Kerititiano mua, kia akapapa no te tumatetenga. Kua akamaroiroi a Paulo i tona au taeake kia apii i te tuatua mou e kia mārama meitaki i te reira. Ka tauturu teia ia ratou kia kite i te au manako tarevake e te pikikaa e kia patoi i te reira, no te mea ka takino te reira i to ratou akarongo. Kua akamaroiroi aia ia ratou kia akaketaketa i to ratou akarongo e kia aru i te aratakianga a Iesu e te aronga e arataki ra i te putuputuanga. Kua tauturu katoa aia i te au Kerititiano kia kite i te puapinga kia akakoromaki i te au timataanga e kia tereniia e to ratou Metua aroa. Ka taangaanga katoa tatou i teia akoanga mei roto i te Pipiria. Ka rauka i reira ia tatou i te akakoromaki e tae ua atu ki te openga.—Ebe. 3:14.