Eiaa tatou e manako e no te mea kare ratou i te pae ia Iesu te akanooanga aia i te Kaikai Anga Aiai a te Atu, e kua akaruke te au pipi e 70 iaia. Mari ra, kua inangaro a Iesu i te kapiti atu ki tana au apotetoro i tera atianga.

Kua āriki a Iesu i teia au pipi e 12 e te 70. Mei ia ratou, kua iki a Iesu e 12 au pipi tana i kapiki e ko te au apotetoro. (Luka 6:​12-16) Iaia i Galilea “kua akaputuputu maira aia i te au pipi tino ngauru ma rua” e “kua tono atura aia ia ratou kia tutu aere i te basileia no te Atua, e e akaora oki i te aronga maki.” (Luka 9:​1-6) E i Iudea, “kua akataka a Iesu e itu ngauru, toko rua i te tono anga ia ratou i te au oire.” (Luka 9:51; 10:1) No reira, e au pipi ta Iesu i te au ngai tukeke tei tutu aere no runga iaia.

Ko te au ngati Iuda tei riro mai ei au pipi na Iesu, kua akono ratou i te Pasa ma to ratou ngutuare tangata. (Exo. 12:​6-11, 17-20) I to Iesu mate e vaitata maira, kua aere aia e tana au apotetoro ki Ierusalema. Inara, kare aia i pati i tana au pipi pouroa mei Iudea, Galilea e Perea kia tae mai no te akamaara i te Pasa. Taka meitaki, kua inangaro a Iesu i tana au apotetoro kia kapiti kiaia i teia atianga. Akakite aia kia ratou: “E anoano maata toku i te kai i teianei pasa, ko au e ko kotou katoa, ka mate atu ei au.”—Luka 22:15.

E tumu meitaki tana no te rave i te reira. Kare e roa atu ka mate a Iesu ei “Punua-mamoe a te Atua, ko tei apai ke atu i te ara a to te ao!” (Ioa. 1:29) Ka mate aia i Ierusalema i te ngai e orongaia ana te au atinga ki te Atua. Kua riro te mamoe Pasa ei akamaara ki te ngati Iseraela i to Iehova akaora anga ia ratou mei Aiphiti. Na roto i te atinga oko o Iesu e maata atu tana ka akatupu. Ka akarangatira aia i te tangata ravarai mei te ara e te mate. (1 Kori. 5:​7, 8) Na roto i to Iesu atinga, kua riro te apotetoro e tino ngauru ma rua ei tango no te putuputuanga Kerititiano. (Ephe. 2:​20-22) Te mea umere, kua tataia ki runga i te patu o te oire tapu o Ierusalema te “raungauru ma rua tumu” e “te ingoa o te au Aposetolo a te Punua-mamoe tino ngauru ma rua.” (Apo. 21:​10-14) E tuanga puapinga ta te au apotetoro tiratiratu no te akatupu i ta te Atua akakoroanga. No reira, ka mārama tatou i te tumu i inangaro ei a Iesu kia kapiti mai te au apotetoro kiaia no te Pasa openga, koia oki te Kaikai Anga Aiai a te Atu.

Ko te 70 e tetai au pipi ke atu, kare ratou i te reira kaikaianga ma Iesu. Noatu ra, ka puapingaia te au pipi tei vai tiratiratu kiaia, mei te Kaikai Anga Aiai a te Atu. Ka ō katoa te au pipi tei akatainuia ki roto i te koreromotu no te patireia, ta Iesu i papau ki te au apotetoro i tera po.—Luka 22:​29, 30.