1. Eaa to Davida manako no Iehova, e eaa tei akakeu iaia kia pera?

TATA te Ariki ko Davida: “E maatā Iehova e kia akapaapaa maataia.” (Sala. 145:3) Kua akaperepere aia ia Iehova, e kua akakeu tona aroa iaia kia akapaapaa i te Atua “i roto i te uipa anga ra.” (Sala. 22:22; 40:5) Kare e ekoko, te inangaro ra koe ia Iehova e kua akatika i ta Davida i tuatua: “Kia akameitakiia koe, e tuatau e tuatau ua atu, e te Atua o to matou metua o Iseraela, e Iehova.”—1 Para. 29:10-13.

2. (a) Akapeea tatou me akapaapaa ia Iehova? (e) Eaa te au manamanata ta tetai pae e aro atura, e eaa ta tatou ka uriuri?

² I teia tuatau, ko tetai mataara ka akapaapaa tatou ia Iehova, koia oki na te paupau anga i ko i te au uipaanga Kerititiano. Inara, te aro atura te au taeake e te au tuaine i te manamanata. Te inangaro ra ratou i te paupau i ko i te au uipaanga, inara e mataku to ratou. Eaa ta ratou ka rave no te reira? E eaa te ka tauturu ia tatou katoatoa kia oronga i te au pauanga akamaroiroi? I mua ake ka pau ei i teia au uianga, ka uriuri tatou na mua e ā tumu puapinga, ka paupau tatou i ko i te au uipaanga.

3-5. (a) Tei akamāramaia ia Ebera 13:15, eaa ra tatou ka paupau ei i ko i te au uipaanga? (e) Ka oronga ainei tatou e okotai rai tu pauanga? Akamārama mai.

³ Kua oronga mai a Iehova kia tatou katoatoa, te tikaanga kia akapaapaa iaia. (Sala. 119:108) E tuanga ta tatou paupau anga i ko i te au uipaanga no “te apai i te atinga ra, i te akameitaki,” e kare e na tetai e oronga i te reira atinga na  tatou. (E tatau ia Ebera 13:15.) Te māro maira ainei a Iehova i taua atinga ra, me kore pauanga, mei ia tatou tataki tai? Kare!

⁴ Kua kite a Iehova e e tukeke to tatou tu karape e te turanga, e te mareka maira aia i te au atinga ta tatou e oronga ra kiaia. Akamanako ana i te au tu atinga tana i āriki mei te au Iseraela. Kua rauka i tetai au Iseraela i te oronga i te mamoe me kore puakanio. Inara, kua oronga tetai Iseraela putaua ‘kia rua ake kukupa, e kia rua ake punua rupe.’ E me kare e rauka i tetai Iseraela e rua kukupa, ka āriki ua a Iehova i te ‘faraoa pueu e okotai omera.’ (Levi. 5:7, 11) E māmā ake te faraoa pueu, inara ka āriki ua rai a Iehova i te reira atinga, tera ua ei “faraoa pueu” meitaki ra.

⁵ Mei te reira katoa to te Atua tu takinga meitaki i teia tuatau. Me paupau tatou, kare aia e māro ia tatou pouroa kia karape i te tuatua mei ia Apolo rai, e kia rauka te tu akakeu mei ia Paulo rai. (Anga. 18:24; 26:28) Ta Iehova e inangaro maira, koia oki kia rave i ta tatou ka rauka i te paupau. Akamaara ana i te vaine takaua tei oronga e rua moni meangiti. Akaperepere tikai a Iehova iaia no te mea kua oronga aia i tana ka rauka.—Luka 21:1-4.

6. (a) Kia tau kia Ebera 10:24, 25, akapeea te au pauanga ta tatou e akarongo ra me akakeu ia tatou? (e) Akapeea koe me akaari e te āriki ra koe i te au pauanga tei akamaroiroi ia koe?

⁶ Ka akamaroiroiia tetai e tetai na roto i ta tatou au pauanga. (E tatau ia Ebera 10:24, 25.) E reka pouroa ana tatou i te au pauanga tukeke i ko i ta tatou au uipaanga. E reka ana tatou i te au tuatua māmā ua ma te ngakau tae a te tamariki. Ka pakia to tatou ngakau me akarongo i te reo o tetai e pau ra i tetai tuatua mou tana i kite mai. E te mareka ra tatou i te aronga “i maroiroi ra” i te paupau, noatu e akama to ratou me kore te akamata ua ra i te apii i te tuatua mou. (1 Tesa. 2:2) Akapeea tatou me akaari e te āriki ra tatou i ta ratou tauta anga? Ka akameitaki tatou ia ratou i muri ake i te uipaanga, no ta ratou pauanga akamaroiroi. Tetai akaou mataara, kia paupau rai tatou. I reira, ka rauka mai te akamaroiroianga i ko i te au uipaanga, e ka rauka katoa i te oronga i te reira.—Roma 1:11, 12.

7. Akapeea tatou e puapingaia ai me paupau?

⁷ Ka puapingaia tatou me paupau. (Isa. 48:17) Akapeea ra? Te mea mua, me parani tatou i te oronga i tetai pauanga, ka akakeuia  tatou kia akapapa meitaki no te uipaanga. Me akapapa meitaki tatou, ka oonu atu to tatou mārama i te Tuatua a te Atua. Ko te oonu atu i to tatou mārama, ka taangaanga i reira tatou i te au mea i apiiia mai. Te rua, ka mataora maata atu tatou i te uipaanga no te mea kua ō tatou ki roto i te uriuri anga. Te toru, no te mea e tauta ana tatou i te paupau, ka maara ua rai ia tatou te au manako i muri ake i te uipaanga.

8-9. (a) Mei tei akakiteia ia Malaki 3:16, eaa toou manako i to Iehova manako no ta tatou paupau anga? (e) Eaa ta tetai pae e mataku ra?

⁸ Ka akamareka tatou ia Iehova me akakite aere i to tatou akarongo. Kua papu ia tatou e te akarongo maira a Iehova, e te āriki ra i ta tatou tauta anga i te paupau i ko i te au uipaanga. (E tatau ia Malaki 3:16.) Te akaari maira aia i tona tu āriki, na te akameitakianga ia tatou me tauta pakari i te akamareka iaia.—Mala. 3:10.

⁹ Te taka meitaki ra, e au tumu meitaki ta tatou kia paupau i ko i te au uipaanga. Noatu ra, te mataku ra tetai pae i te tāki i to ratou rima ki runga. Me ko toou manako ïa, eiaa e taitaia. Ka akara ana tatou i tetai au kaveinga Pipiria, tetai au akaraanga, e tetai au ravenga te ka tauturu ia tatou pouroa kia tauta i te paupau maata atu i ko i te au uipaanga.

10. (a) Eaa te tu mataku, ta te manganui ia tatou e kite ra? (e) Eaa te mataku no te paupau i riro ei ei akairo meitaki?

¹⁰ E ru ana ainei koe i te au taime ravarai me akamanako i te tāki i toou rima no te paupau? Me koia ïa, kare ko koe anake ua. Te tika, e ru ana te maata anga ia tatou me paupau. I mua ake ka autu ei koe i teia mataku, ka anoanoia koe kia kite i te tumu i mataku ei koe. Te mataku ra ainei koe e ka ngaropoina ia koe taau ka inangaro i te tuatua, me kore ka pau koe i te au pauanga tarevake? Te manata ra ainei koe e kare taau pauanga e meitaki ana mei ta tetai pae rai? Te tika, e akairo meitaki te mataku. Te akaari maira te reira e e tu akaaka toou e te akangateitei ra koe i tetai ke. E akaperepere  ana a Iehova i tera tu. (Sala. 138:6; Phili. 2:3) Inara, te inangaro katoa ra a Iehova ia koe kia akapaapaa iaia, e kia akamaroiroi i toou au taeake e te au tuaine i ko i te au uipaanga. (1 Tesa. 5:11) Te akaperepere ra aia ia koe e ka oronga mai i te tu ngakau toa taau ka anoano.

11. Eaa te au akamaaraanga Pipiria te ka tauturu ia tatou?

¹¹ Akamanako ana i tetai au akamaaraanga Pipiria. Karanga te Pipiria e ka tarevake rai tatou pouroa me tuatua, e e akapeea me tuatua. (Iako. 3:2) Kare a Iehova e tapapa mai ia tatou kia apa kore, e pera katoa to tatou au taeake e te au tuaine. (Sala. 103:12-14) E ngutuare pae vaerua ratou no tatou, e te inangaro ra ratou ia tatou. (Mare. 10:29, 30; Ioa. 13:35) Ka mārama ua ratou e kare ta tatou pauanga e tano tikai ana i tetai au taime.

12-13. Eaa ta tatou i apii mai mei te akaraanga o Nehemia e Iona?

¹² Akamanako ana i tetai au akaraanga Pipiria te ka tauturu ia tatou kia autu i to tatou mataku. E akamaara ia Nehemia. Kua tavini ana aia i te paepae o tetai ariki ririnui. Kua maromaroa a Nehemia no te mea kua akarongo aia e kua takoreia te patu e te ngutupa o Ierusalema. (Nehe. 1:1-4) Akamanako ana i tona mataku te pati anga te ariki kiaia kia akamārama i te tumu i maromaroa ei aia! Kua pure viviki a Nehemia e oti kua oronga i tana pauanga. Tei tupu mai, kua tauturu te ariki i te iti tangata o te Atua. (Nehe. 2:1-8) E akamanako katoa ia Iona. Te pati anga a Iehova kia tuatua aia ki te iti tangata o Nineve, kua mataku a Iona e kua oro na tetai mataara ke. (Iona 1:1-3) Inara, ma te tauturu a Iehova, kua akarongo a Iona e kua rave i tana angaanga. E kua riro tana tuatua ei mea meitaki ki te iti tangata o Nineve. (Iona 3:5-10) Mei ia Nehemia, ka apii tatou i te puapinga o te pure i mua ake ka pau ei. E mei ia Iona, ka apii tatou e ka tauturu mai a Iehova kia tavini tatou iaia noatu te mataku. Ko te tika, e putuputuanga ainei tetai te ka mataku atu tatou mei ia Nineve rai?

¹³ Eaa te au ravenga te ka tauturu ia koe kia oronga i te au pauanga akamaroiroi i ko i te au uipaanga? Ka uriuri ana tatou i teia au manako.

14. Eaa te tumu ka akapapa meitaki ei tatou no te au uipaanga, e aea tatou e rave ei i te reira?

¹⁴ E akapapa no te au uipaanga tataki tai. Me akapapa koe ma te parani meitaki i mua ake, ka inangaro maata atu koe i te paupau. (Mase. 21:5) E tika, kare ta tatou tu akapapa anga e aiteite ana. Ko Eloise, e takaua, e 80 tuma mataiti, e akapapa ana aia i te Apii Punanga Tiaki i te akamata anga o te epetoma. Karanga aia, “Ka reka maata atu au i te au uipaanga me apii vave au i mua ake.” E angaanga tamou ana a Joy, tei akanoo i tetai tuatau i te Maanakai no te apii i tana Punanga Tiaki. “E māmā ake iaku i te akamaara i taku i apii,”  i karanga ai aia. Karanga a Ike, e tangata pakari maroiroi e e painia, “Kite mai au e e meitaki atu i te apii no tetai au tuatau potopoto i te epetoma, e kare no tetai tuatau roa.”

15. Akapeea koe me akapapa meitaki no te uipaanga?

¹⁵ Eaa te ō maira ki roto i te akapapa meitaki anga no te uipaanga? E akamata i taau apii tataki tai na te pati anga kia Iehova no te vaerua tapu. (Luka 11:13; 1 Ioa. 5:14) E oti, e akara meitaki i te apiianga. E akara matatio i te tumu manako, te au tumu tuatua, te au tutu, e te au pia apiianga. Ia koe e apii ra i te au parakarapa tataki tai, e tatau i te au irava tei taikuia. E akamanako oonu i te au apiianga, ma te akara meitaki i te au manako taau ka inangaro i te pau. Ko te meitaki atu i taau akapapa anga, ko te maata atu ïa taau ka rauka mai e ka māmā ua ia koe i te paupau.—2 Kori. 9:6.

16. Eaa te au apinga tauturu uira tei rauka ia koe, e akapeea koe me taangaanga i te reira?

¹⁶ Me ka rauka ia koe, e taangaanga i te au tauturu uira (digital tools), i te reo taau i kite. Kua oronga mai a Iehova, na roto i tana akaaerenga, te au apinga tauturu uira kia akapapa ia tatou no te au uipaanga. Na roto i te JW Library^® app, ka rauka ia tatou i te kopi mai i te au puka apii ki roto i ta tatou au apinga uira apaipai. E oti ka rauka ia tatou i te apii—te tatau e te akarongo i te reira—i tetai ua atu taime e te ngai. Te taangaanga ra tetai pae i teia JW Library^® app, ei apii i te tuatau kaikai i te ngai angaanga, i te apii, e me aere ki te ngai mamao. E māmā tikai i te kimikimi meitaki i te au manako taau ka inangaro i te apii i roto i te Watchtower Library e te Watchtower ONLINE LIBRARY.^™

17. (a) Eaa ra i meitaki ei kia maata taau pauanga ka akapapa? (e) Eaa taau i apii mai mei te vitio Kia Riro ei oa no Iehova—Akapapa i Taau ka Tuatua?

¹⁷ Me ka rauka, e akapapa kia maata te au pauanga no te apiianga tataki tai. Eaa te tumu? No te mea, penei kare koe e kapikiia mai kia pau. Penei ka tāki mai tetai pae i to ratou rima i taua taime rai, e penei ka kapiki te arataki apii i tetai ia ratou. Kia akamutu te uipaanga i te ora tau, penei ka anoanoia te arataki apii kia akaiti mai i te numero o te au pauanga no tetai tuanga o te apii. No reira, auraka e riri me kore e taitaia me kare aia e kapiki mai ia koe i te akamata anga o te apii. Me e maata taau pauanga i akapapa mai, ka maata atu toou tuatau no te paupau. Tetai pauanga ka rauka ia koe i te akapapa, koia oki, ko te tatau i te irava. Me ka rauka ia koe, e akapapa katoa i te paupau na roto i taau uaorai au tuatua. *

18. Eaa te tumu ka tapoto ei koe i taau pauanga?

¹⁸ E oronga i te au pauanga potopoto. I te maata anga o te taime, ko te pauanga potopoto e te māmā ua, te pauanga akamaroiroi  roa atu. No reira e tauta i te oronga i te au pauanga potopoto ua. E tauta i te tapoto i te reira ki te 30 tekoni. (Mase. 10:19; 15:23) Me kua paupau ana koe i ko i te au uipaanga no tetai au mataiti, e akamaara—e akanoo i tetai akaraanga meitaki na te tapoto anga i taau pauanga. Me ka oronga koe i te au pauanga ngata te ka akapou i te ora, penei ka mataku tetai pae, te manako anga e kare rava e rauka ia ratou i te paupau mei taau rai. Pera katoa, ka riro te au pauanga potopoto i te oronga i tetai tuatau no te katoatoa kia piri ki te apii a te uipaanga. Me ka kapikiia mai koe na mua, e oronga i tetai pauanga māmā, koia oki, e pau tika i te uianga. Auraka e akakite i te au manako pouroa i roto i te parakarapa. Me oti te manako maata i te uriuriia i roto i te parakarapa, penei ka rauka ia koe i te oronga i tetai manako ke.—Akara i te pia “ Eaa Taku ka Pau?”

19. Akapeea te arataki apii me tauturu ia koe, inara eaa taau ka anoanoia i te rave?

¹⁹ E akakite ki te arataki apii e ka inangaro koe i te pau i tetai parakarapa. Me ka inangaro koe, e aere i te akakite ki te arataki apii i mua ake ka akamata ai te uipaanga. Me tae ki te taime no te pau i te reira parakarapa, e tāki viviki i toou rima kia teitei ki runga, kia kite mai te arataki apii.

20. Akapeea tetai uipaanga a te putuputuanga me akaaiteia ki tetai kaikai anga ki te au taeake?

²⁰ E akamanako ana i te au uipaanga a te putuputuanga, mei tetai kaikai anga ki toou au taeake meitaki. Akamanako ana e kua parani te putuputuanga i tetai umukai na te putuputuanga e kua pati mai kia akapapa koe i tetai manga kai. Eaa taau ka rave? Penei ka manga apiapi rai koe, inara ka rave koe i taau ka rauka kia apai i tetai kai te ka rekaia e te katoatoa. Kua oronga mai a Iehova, to tatou Pu ngutuare, i tetai kaingakai meitaki na tatou i ko i ta tatou au uipaanga. (Sala. 23:5; Mata. 24:45) Te mareka ra aia me apai tatou i tetai apinga aroa meangiti, tei rauka ia tatou. No reira e akapapa meitaki, e e paupau ua rai i taau ka rauka. Ka apai koe i tetai apinga aroa kia oronga ki te putuputuanga e ka angai katoaia koe i te kaingakai a Iehova.