1-2. (a) Akapeea te karere i roto ia Isaia 41:10 te akamaroiroi anga i tetai tuaine ko Yoshiko tona ingoa? (e) Kua akono a Iehova i te reira karere noai ma?

KUA tae mai te nuti kino ki tetai tuaine Kerititiano tiratiratu ko Yoshiko. Karanga tona taote e e rua rai ona marama toe. Eaa tana i rave? Kua maara ia Yoshiko tetai irava Pipiria akaperepereia, ia Isaia 41:10. (E tatau.) Kua akakite maru atu aia ki tona taote, e kare aia e mataku ana, no te mea te mou ra a Iehova i tona rima. * Kua riro te irava akapumaana ei tauturu i to tatou tuaine akaperepere kia irinaki pu tikai ia Iehova. Ka riro rai teia irava ei tauturu ia tatou kia noo maru ua me na roto atu i te au timataanga pakari. Kia mārama akapeea te reira me tupu, ka akara matatio tatou na mua, te tumu i oronga ai te Atua i teia karere kia Isaia.

² I te akamata anga, kua akakite a Iehova kia Isaia kia tata i teia au tuatua ei akamaroiroi i te ngati Iuda te ka apainaia ki Babulonia ei tuikaa. Inara, kua akono a Iehova i te reira karere kia puapingaia te au tuikaa ngati Iuda pera katoa tona iti tangata katoatoa, e tae mai ki teia tuatau. (Isa. 40:8; Roma 15:4) I teia rā, te noo nei tatou i te tuatau “kino maata,” e ka anoanoia te akamaroiroi anga i roto i te puka o Isaia.—2 Timo. 3:1.

3. (a) Eaa te au taputou i roto ia Isaia 41:10, tei ikiia ei irava mataiti no te 2019? (e) Eaa tatou ka anoano ei i te akapapu anga a teia au taputou?

³ I teia atikara, ka akara tatou e toru a Iehova taputou tei akaketaketa i te akarongo ia Isaia 41:10: (1) Tei ia Iehova tatou, (2) koia to tatou Atua, e te (3) ka tauturu aia ia tatou.  Ka anoano tatou i teia au akapapu anga, * no te mea mei ia Yoshiko rai, ka tupu te au timataanga kia tatou. Ka aro katoa atu tatou i te au taomianga o teianei ao. Tetai pae ia tatou, te akakoromaki nei i te au takinokino anga a te au kavamani ririnui. Ka uriuri tataki tai tatou e toru akapapu anga.

4. (a) Eaa te akapapu anga mua ta tatou ka uriuri? (Akara katoa i te tataanga rikiriki.) (e) Akapeea a Iehova te akaari anga mai i tona inangaro no tatou? (ng) Eaa toou manako i to te Atua inangaro noou?

⁴ Te akapapu mua maira a Iehova ia tatou ki teia au tuatua: “Auraka e mataku, te vaitata katoao au ia koe.” * Te akaari maira a Iehova e tei ia tatou aia, na te akapapu anga mai i tona inangaro pumaana ia tatou. Akamanako ana akapeea aia te akaari anga mai i tona tu maru e te manako oonu no tatou. “E apinga tumanava koe ki mua i oku mata,” karanga ai a Iehova. “Kua akateiteiia koe; no toku inangaro ia koe.” (Isa. 43:4) Kare e mana i teianei ao e pini ua ake e akakore i to Iehova aroa no te aronga tei tavini iaia; e ngaueue kore tona tu tiratiratu no tatou. (Isa. 54:10) Ka akatupu tona aroa e te pirianga oa ia tatou kia ngakau toa. Ka paruru aia ia tatou i teia rā, mei tana i paruru i tona oa ia Aberama (Aberahama). Karanga a Iehova kiaia: “Auraka e mataku, e Aberama: ko au toou paruru.”—Gene. 15:1.

5-6. (a) Akapeea tatou e kite ei e te inangaro maira a Iehova i te tauturu i to tatou au timataanga? (e) Eaa te apiianga ka rauka mai mei te akaraanga o Yoshiko?

⁵ Kua kite tatou e te inangaro maira a Iehova i te tauturu ia tatou kia akakoromaki i to tatou timataanga no te mea kua taputou aia ki tona iti tangata: “Kia aere koe na raro i te moana, ei vaitata rai au ia koe; e kia na raro i te vai taʼe, kare koe e ninaia; kia aere koe na roto i te ai, kare koe e pakapaka; kare oki te mura ai e mou mai ki runga ia koe.” (Isa. 43:2) Eaa te aiteanga o teia au tuatua?

⁶ Kare a Iehova i taputou mai kia akakore atu i te au akaaoanga ngata i te oraanga, mari ra kare aia e akatika i “te vai” kauvai o te manamanata kia akamaremo ia tatou me kore “te mura ai” o te au timataanga kia takino takiri ia tatou. Te akapapu maira aia e ka vai aia  ki o tatou nei, na te tauturu anga ia tatou ‘kia aere na roto’ i taua au akaaoanga. Eaa ta Iehova ka rave? Nana e akamaru i to tatou mataku e rauka ai ia tatou te akono tamou i to tatou tu tiratiratu kiaia, noatu me aro atu i te mate. (Isa. 41:13) Kua kite mai a Yoshiko, tei taikuia i mua ake, e e tika teia. Karanga tana tamaine: “Kua umere tikai matou i te tu maru o Mami. Kua kite tikai matou i to Iehova tu ‘au i runga iaia. Tae ua atu ki te taime i mate ei aia, kua tuatua a Mami ki te au neti e te aronga maki no runga ia Iehova e tana au taputou.” Eaa ta tatou i apii mai mei te akaraanga o Yoshiko? Me irinaki tatou i te taputou a te Atua “te vaitata katoao au ia koe,” ka ngakau toa rai tatou e te ketaketa me akakoromaki i te au timataanga.

7-8. (a) Eaa te rua o te akapapu anga ta tatou ka akamanako, e eaa te aiteanga o te reira? (e) Eaa a Iehova i karanga ai ki te au tuikaa ngati Iuda: “Auraka e taitaia”? (ng) Eaa te au tuatua ia Isaia 46:3, 4 tei akamaru i te ngakau o te iti tangata o te Atua?

⁷ Akamanako ana i te rua o te akapapu anga tei tataia e Isaia: “Auraka e taitaia, ko au oki toou Atua.” Eaa te aiteanga o teia tuatua, e taitaia? I roto i teia irava, ko te tuatua mua o te “taitaia,” tona aiteanga, “te akara ua anga ki muri, i tei arumaki mai ia koe” me kore “kia noo ru ua me rokoia e te tumatetenga.”

⁸ Eaa ra a Iehova i akakite ei ki te ngati Iuda te ka riro ei tuikaa i Babulonia e auraka “e taitaia”? No te mea kua kite aia e ka rokoia te iti tangata o te reira enua e te mataku. Eaa te ka akatupu i te mataku? Vaitata ki te openga o te 70 mataiti o te tuikaa o te ngati Iuda, ka tamakiia a Babulonia e te au vaeau ririnui o Madai e Peresia. Ka taangaanga a Iehova i teia nuku vaeau ei akarangatira i tona iti tangata mei te tuikaa kia Babulonia. (Isa. 41:2-4) Te kite anga to Babulonia e tetai au iti tangata ke i te pae mai e te vaitata maira to ratou enemi, kua tauta ratou i te akamaroiroi i tetai e tetai te karanga anga: “E akamaroiroi.” Kua maani katoa ratou i te au atua itoro, te manako anga e ka paruru teia ia ratou. (Isa. 41:5-7) I te reira taime, kua akamaru a Iehova i te ngakau o te au tuikaa ngati Iuda te na ko anga: “Ko koe ra, e Iseraela e, [kare i aiteia ki to kotou tangata tupu] ko toku ïa tavini . . . auraka e taitaia, ko au oki toou Atua.” (Isa. 41:8-10) Akamanako ana i ta Iehova i tuatua: “Ko au oki toou Atua.” Mei teia au tuatua, kua akapapu a Iehova i tona aronga akamori tiratiratu e kare aia i akangaropoina ia ratou—koia rai to ratou Atua, e ko ratou rai tona iti tangata. Akakite aia kia ratou: “E maranga kotou iaku . . . e naku e akaora” ia kotou. Kare e ekoko anga kua riro teia au tuatua papu ei akamaroiroi i te au tuikaa ngati Iuda.—E tatau ia Isaia 46:3, 4.

9-10. Eaa te tumu kare tatou e anoanoia kia mataku? Akatutu mai.

⁹ I teia taime tikai, te taitaia nei te tangata no te au turanga kino o teianei ao. E tika, ka tupu katoa teia au manamanata kia tatou. Inara kare tatou e anoanoia kia mataku. Te akakite maira a Iehova kia tatou: “Ko au oki toou Atua.” Eaa ra teia tuatua i riro ei ei tuatua akamaroiroi kia noo maru ua?

¹⁰ Akamanako ana i teia akatutuanga: E rua patete i runga i te pairere, ko Jim e Ben, te tukitukiia ra to raua pairere e te matangi ririnui. I te matangi e tuki ra i te pairere ki runga e ki raro, kua tuatua mai te tangata akarere pairere ki te katoatoa: “E tamou ua i to kotou kiri nooanga. Ka na roto tatou i tetai reva kino no tetai tuatau poto.” Kua manata tikai a Jim. E oti karanga mai te pilot e: “Auraka e taitaia. Ko to kotou pilot teia e tuatua atu nei.” I te reira taime, takirikiri a Jim i tona  katu, te na ko anga, “Tuke ua ake rai tera akapapu anga?” Akara atu au ia Ben, kare aia e manata ana. Kua ui atu a Jim kiaia: “Eaa koe i rangi marie ua ai?” Katakata ua a Ben te karanga anga: “No te mea kua kite meitaki au i tera pilot. Ko toku papa tera!” E oti karanga a Ben: “Ka akakite atu au no runga i toku papa. Papu iaku me kite koe iaia e tona au tu karape, ka noo rangi marie rai koe.”

11. Eaa te au apiianga ta tatou i kite mai mei te akatutuanga o te nga patete e rua?

¹¹ Eaa te au apiianga ka kite tatou mei teia akatutuanga? Mei ia Ben rai, kia noo maru tatou no te mea kua kite meitaki tatou i to tatou Metua i te rangi, ko Iehova. Kua kite tatou e ka arataki meitaki aia ia tatou na roto i te au manamanata uriia, i teia tuatau openga o teia akatereanga. (Isa. 35:4) Ka irinaki tatou ia Iehova e ka noo maru ua tatou, koi rokoia ai teianei ao e te mataku. (Isa. 30:15) Ka rave katoa tatou mei ia Ben rai me tutu aere ki to tatou tangata tupu no runga i te tumu kia irinaki i te Atua. Ka papu katoa ia ratou e noatu eaa te au akaaoanga ta ratou ka aro atu, ka turu rai a Iehova ia ratou.

12. (a) Eaa te toru o te akapapu anga ta tatou ka akamanako? (e) Te akamaara maira te aiteanga i to Iehova “rima” i teaa?

¹² Akamanako ana i te toru o te akapapu anga ta Isaia i tata: “E akamaroiroi au ia koe; koia ïa, e tauturu au ia koe.” Kua akataka takere a Isaia akapeea a Iehova me akamaroiroi, me kore me akaketaketa, i tona iti tangata, te karanga anga: “E aere mai te Atu ra ko Iehova ma te mana, e na tona uaorai rima e akatupu i tana.” (Isa. 40:10) Kua taangaanga putuputu te Pipiria i te tuatua “rima” ei akaaiteanga no te tu ririnui. No reira te akamaara maira teia tuatua ia tatou, i to Iehova “rima” tutara e ko Iehova rai te Ariki mana ririnui. Kua taangaanga aia i tona ririnui maata ei turu e te paruru i tona au  tavini i mua ana, e te akamaroiroi nei e te paruru nei rai aia i te aronga tei irinaki iaia i teia tuatau.—Deu. 1:30, 31; Isa. 43:10.

13. (a) Aea tikai a Iehova e akono ei i tana taputou kia akamaroiroi ia tatou? (e) Eaa te akapapu anga tei akamaroiroi ia tatou ma te irinaki iaia?

¹³ Me takinokino te au enemi ia tatou, ka akono a Iehova i tana taputou: “E akamaroiroi au ia koe.” I tetai au tuanga o teianei ao i teia rā, te tauta pakari nei to tatou au enemi i te tāpu i ta tatou angaanga tutu aere me kore te arai i to tatou akaaerenga. Noatu ra, kare tatou e taitaia pakari roa i teia au arairai anga. Kua oronga mai a Iehova i te akapapu anga tei akamaroiroi ia tatou ma te irinaki iaia. Taputou mai aia: “Te taoonga ra noou i angaiaʼi ra, kare ïa e manuia.” (Isa. 54:17) Te akamaara maira teia au tuatua, e toru au apinga puapinga.

14. Eaa tatou ka kore ei e poitirere me tamaki mai te au enemi o te Atua ia tatou?

¹⁴ Mea mua, ei au pipi na Karaiti, ka tapapa atu tatou kia makitakitaia mai. (Mata. 10:22) Akakite a Iesu ki tana au pipi e ka takinokino pakariia ratou i te tuatau openga. (Mata. 24:9; Ioa. 15:20) Te rua, akamatakite mai te totou a Isaia e e maata atu ta te au enemi ka rave kia tatou; ka taangaanga ratou i te au apinga tamaki ki runga ia tatou. Taua au apinga tamaki ra ka kapiti mai te pikikaa kitea koreia, te pikikaa kino tikai, e te takinokino pakari tikai. (Mata. 5:11) Kare a Iehova e tapu i to tatou enemi me taangaanga ratou i te au apinga kia tamaki ia tatou. (Ephe. 6:12; Apo. 12:17) Inara kare tatou e anoanoia kia mataku. Eaa te tumu?

15-16. (a) Eaa te toru o te apinga ka anoanoia tatou kia akamaara, e akapeea a Isaia 25:4, 5 te turu anga i teia? (e) Akapeea a Isaia 41:11, 12 te akataka anga i te tupuanga openga o te aronga te ka tamaki mai ia tatou?

¹⁵ Akamanako ana i te toru o te apinga ka anoanoia tatou kia akamaara. Karanga a Iehova e ‘kare e taoonga’ tei taangaangaia ki runga ia tatou “kare ïa e manuia.” Mei te patu e paruru ra ia tatou mei te ririnui o tetai uriia kino, ka paruru a Iehova ia tatou mei “te riri  o tei matakuia ra.” (E tatau ia Isaia 25:4, 5.) Kare rava to tatou au enemi e autu me takinokinoia tatou.—Isa. 65:17.

¹⁶ Te akamatutu maira a Iehova i to tatou irinaki na te akataka meitaki anga i te ka tupu ki “te aronga ravarai i riri mai” ia tatou. (E tatau ia Isaia 41:11, 12.) Noatu eaa te kino me tamaki mai to tatou au enemi ia tatou e noatu te kino o te tamaki, ka aiteite rai te tupuanga openga: Ka “pou ïa” te au enemi katoatoa o te Atua.

17-18. (a) Akapeea te tatau anga Pipiria me akamaata i to tatou irinaki i te Atua? Oronga mai i tetai akaraanga. (e) Akapeea te akamanako oonu anga i te irava mataiti 2019 me tauturu ia tatou?

¹⁷ Ka irinaki pakari atu tatou ia Iehova na te kite meitaki anga iaia. Ko te ravenga e kite tikai ei tatou i te Atua, na te tatau meitaki anga i te Pipiria e te akamanako oonu i ta tatou e tatau ra. Tei roto i te Pipiria te au manako papu akapeea a Iehova te paruru anga i tona iti tangata i mua ana. Ka riro te reira ei akapapu ia tatou e te manako maira aia ia tatou i teianei.

¹⁸ Akamanako ana i te akaraanga o te tuatua manea a Isaia tei akatutu e akapeea a Iehova me paruru ia tatou. Te taiku ra aia ia Iehova ei tiaki, e ki te au tavini o te Atua ei au mamoe. Karanga a Isaia no Iehova: “E akaputu aia i te au punua i tona rima, e ei runga ratou i tona umauma kia apai.” (Isa. 40:11) Me kite tatou i te rima ririnui o Iehova te takave anga mai ia tatou, ka kite tatou i tona rima paruru ma te maru. Ei tauturu ia tatou kia noo maru ua noatu te manamanata, kua iki te tavini akono meitaki e te pakari ia Isaia 41:10 ei irava mataiti no te 2019, “Auraka e taitaia, ko au oki toou Atua.” E akamanako oonu i teia au tuatua akapapu anga. Ka akamaroiroi teia ia koe me aro atu i te au akaaoanga e tu maira.