I TE popongi Ruitoru, Tianuare 24, 2018, kua mataora te au taeake o Betela i Marike e i Kanata i te akarongo anga i tetai akakiteanga manea: Kua riro mai te Taeake Kenneth Cook, Jr., ei mema no te Pupu Akaaere o te Au Kite o Iehova.

Kua anauia e kua utuutuia mai te Taeake Cook i Pennsylvania, Marike. Kua apii aia i te tuatua mou mei tetai oa apii i mua ua ake ka akaoti ei aia i tana apii teitei e kua papetitoia ia Tiunu 7, 1980. Kua akamata aia i tana tavini anga ia Iehova ei painia tamou ia Tepetema 1, 1982. I muri ake i te painia anga e rua mataiti, kua patiia aia ki Betela, e kua akamata aia i te tavini i Betela i Wallkill, New York, ia Okotopa 12, 1984.

No te 25 mataiti i muri mai, kua rave ana te Taeake Cook i te au angaanga tukeke i roto i te ngai Neneianga e te Opati Betela. Kua akaipoipo aia i tana vaine ko Jamie i te mataiti 1996, e kua piri atu tana vaine kiaia i te tavini anga i Betela i Wallkill. Ia Titema 2009, kua tukuia te Taeake e te Tuaine Cook ki te Watchtower Educational Center i Patterson, New York, e kua tukuia te Taeake Cook kia angaanga i roto i te Tipatimani o te Writing Correspondence. Ia Aperira 2016, i muri ake i te oki poto anga ki Wallkill, kua tukuia te Taeake e te Tuaine Cook ki Brooklyn, New York. E rima marama i muri mai, kua tukuia raua ki te opati maata o teianei ao i Warwick, New York. Ia Tianuare 2017, kua ikiia te Taeake Cook kia tavini ei tauturu no te Kumiti Tataanga o te Pupu Akaaere.