1-2. Eaa ta te angera i akakite ki te au vaine i ko i te ngai tanumanga o Iesu, e eaa ta Iesu akauenga kia ratou?

I TE popongi maiata, ia Nisana 16, 33 T.N., ma te ngakau mamae, kua aere atu tetai pupu vaine mataku Atua i ko i te ngai tanumanga no tetai 36 ora, te ngai i akarukeia ai te kopapa o te Atu ko Iesu Karaiti. Me tae ratou ki reira, ka parai ratou i te kopapa ki te rakau kakara e te manongi, kua umere ratou i te kite e kare te kopapa o Iesu i reira! Akakite tetai angera ki te au pipi e kua akatuia a Iesu mei te mate, i te na ko anga: “Te aere atura aia na mua ia kotou ki Galilea; ei reira kotou e kite atu ei iaia.”—Mata. 28:1-7; Luka 23:56; 24:10.

² Te akaruke anga te au vaine i te ngai tanumanga, kua mama atura a Iesu kia ratou e kua tuatua e: “Ka aere, ka akakite atu ki taku au taeake, e aere ratou ki Galilea; ei reira ratou e kite mai ei iaku.” (Mata. 28:10) E ikuikuanga puapinga ta Iesu i oronga ki tana au pipi, ko te uipaanga mua te reira tana i akanoo no tona tuakaouanga!

3-4. No teaa tatou ka tuatua ai i te akauenga ia Mataio 28:19, 20, e kare no te au apotetoro anake ua? (Akara i te tutu mua.)

³ E tatau ia Mataio 28:16-20. I ko i te uipaanga ta Iesu i akanoo, kua akapapa aia i te angaanga tana ka oronga ki tana au pipi kia akaotiia mei te anere mataiti mua—ko taua angaanga rai teia ta ratou ka rave i teia tuatau. Karanga a  Iesu: “E teianei, ka aere kotou, e akariro i to te pa enua katoa ei pipi; . . . ma te apii atu ia ratou, kia akono i te au mea katoa taku i akaue atu kia kotou.”

⁴ Inangaro a Iesu i tana au pipi kia tutu aere. Kare aia i kotinga ua i teia akauenga ki te 11 apotetoro tiratiratu. Akapeea tatou i papu ei? Kare ko te apotetoro ua to reira i akaue ei a Iesu i teia akauenga kia akariro i te tangata ei pipi i te maunga i Galilea? Akamaara i ta te angera tuatua anga ki te au vaine: “Ei reira kotou e kite atu ei iaia [i Galilea].” No reira e au vaine tiratiratu tetai i reira. Inara kare ko tera ua. Kua akaari mai te apotetoro ko Paulo ia Iesu e kua “kitea aia e te au taeake e rima katoa anere e e ara.” (1 Kori. 15:6) Kiea?

5. Eaa ta tatou i apii mai mei 1 Korinetia 15:6?

⁵ E tumu meitaki to tatou kia kite i to Paulo manako no te uipaanga i Galilea tei akatakaia ia Mataio pene 28. Eaa te tumu? Te mea mua, te maata anga i ta Iesu au pipi no Galilea mai. No reira ko te maunga i Galilea—koia tetai ngutuare i Ierusalema—ko te ngai tikai no te akaputuputu mai i te maata anga o te tangata. Te rua, to Iesu tuakaouanga kua aravei takere aia i tana apotetoro e 11 i roto i tetai ngutuare i Ierusalema. Me kua inangaro a Iesu i te apii i te au apotetoro kia tutu aere e kia akariro i te tangata ei pipi, kua rave takere ana aia i te reira i Ierusalema, e kare aia e pati ia ratou, te au vaine e tetai ke tana i aravei i Galilea.—Luka 24:33, 36.

6. Akapeea a Mataio 28:20 te akaari anga mai i te akauenga kia riro te au tangata ei pipi i teia tuatau, e akapeea te tangata i te akarongo anga i teia akauenga?

⁶ Akamanako ana e toru au tumu puapinga. Ko te akauenga a Iesu kia akariro i te tangata ei pipi, kare i kotingaia ki te au Kerititiano e ora ra i te anere mataiti mua. Akapeea tatou i kite ei? Kua taopenga aia i tana ikuikuanga ki tana au apotetoro na te karanga anga e: “Tei vaitata ua ra au ia kotou, e tae ua atu ki te openga o teianei ao.” (Mata. 28:20) E tika rai ta Iesu tuatua, i teia tuatau te maata nei te tangata te akariroia nei ei pipi. E akamanako ana! Vaitata rai e 300,000 tangata tei papetitoia i te au mataiti tataki tai ei Au Kite no Iehova e kua riro mai ratou ei pipi na Iesu Karaiti!

7. Eaa ta tatou ka uriuri i teianei, e no teaa ra?

⁷ E maata te aronga apii Pipiria e tere nei ki mua e kia papetitoia. Inara, tetai aronga e apii putuputu nei i te Pipiria te ekoko nei kia riro mai ratou ei au pipi. Mataora ratou i te apii, inara kare e tere ana ki mua no te papetito. Me rave koe i tetai apii Pipiria, papu e ka tauturu koe i tetai tangata apii kia taangaanga i tana apii e kia riro mai aia ei pipi na Karaiti. Ka uriuri teia atikara akapeea koe me akakeu i te ngakau o te tangata apii e te tauturu iaia kia tere ki mua i te pae vaerua. Eaa ra tatou ka uriuri ei i teia tumu manako? No te mea i tetai taime, ka iki tatou me ka apii ua atu rai tatou e me kare.

8. Eaa i ngata ei i te itae i te ngakau o te tangata?

⁸ Inangaro a Iehova i te tangata kia tavini iaia no te mea e inangaro to ratou iaia. To tatou akakoroanga kia tauturu i te aronga apii, kia mārama e te akono maira a Iehova ia ratou tataki tai, e tona inangaro maata ia ratou. Ka inangaro tatou i te tauturu ia ratou kia kite ia Iehova “ko te Metua o te au matiroeroe, e te akava o te au vaine takaua.” (Sala. 68:5) Me āriki te aronga apii i to Iehova  inangaro, ka pakia to ratou ngakau e to ratou inangaro nona. Ka ngata i tetai au aronga apii i te kite ia Iehova ei Metua aroa, no te mea kare to ratou metua tane i akaari ana i te inangaro e te aroa. (2 Timo. 3:1, 3) Me rave koe i te apii, e akamanako i to Iehova au tu manea. Tauturu i taau tangata apii kia mārama e Atua aroa aia e te inangaro maira ia tatou kia rauka te ora mutu kore, e ka tauturu aia ia ratou kia akatupu i te reira akakoroanga. Eaa atu tetai ta tatou ka rave?

9-10. Eaa te au puka ta tatou ka taangaanga me rave i te au apii Pipiria, e eaa te tumu?

⁹ Taangaanga i te puka “Eaa ta te Pipiria ka Apii Mai ia Tatou?” e “Kia Noo Tamou Kotou i Roto i te Aroa o te Atua.” Kua tataia teia au puka ei tauturu ia tatou kia akakeu i te ngakau o te aronga apii. Ei akaraanga, ka pauia mai teia au uianga i te pene 1 o te puka Apii ia Tatou: Te manako maira ainei te Atua ia tatou?, Eaa to te Atua manako me taitaia te tangata?, Ka rauka ainei kia riro ei oa no Iehova?  Akapeea te puka Aroa o te Atua? Ka tauturu teia puka i te aronga apii kia mārama akapeea me taangaanga i te au kaveinga Pipiria i te akapapu i tona oraanga e te akavaitata iaia kia Iehova. Noatu e kua apii ua ana koe i teia puka ki tetai ke, e akapapa meitaki no te au apii tataki tai, e kia akamanako i te turanga o te tangata apii.

¹⁰ Penei ka inangaro taau tangata apii i tetai tumu manako tei uriuriia i roto i te puka, kare i roto i te au Apinga Apii. Penei ka akamaroiroi koe iaia kia tatau i te puka koia anake, kia rauka ia koe i te apii iaia i roto i ta tatou au puka apii Pipiria tei orongaia mai.

11. Eaa te taime tau no te akamata e te akaoti i tetai apii na roto i te pure, e akapeea koe me ui i tetai tumu manako?

¹¹ Akamata i te apii na roto i te pure. E mea meitaki kia akamata e kia akaoti i te apii na roto i te pure, i roto i te epetoma mua me akamata i taau apii. Ka tauturu tatou i te tangata apii kia kite i te Tuatua a te Atua ma te tauturu a Tona vaerua tapu. Ka ui tetai au puapii Pipiria i tetai tumu manako no te pure na te tatau anga ia Iakobo 1:5, karanga ra: “Kia ngere ra tetai tangata i te pakari, ka pati aia ki te Atua ra.” Ka ui i reira te puapii ki te tangata apii, “Akapeea tatou me pati ki te Atua no te pakari?” Ka āriki te tangata apii e ka pure tatou ki te Atua.

12. Akapeea koe me taangaanga ia Salamo 139:2-4 kia tauturu i te tangata apii kia meitaki te tu o tana pure?

¹² Apii i te tangata apii akapeea me pure. Akamārama kiaia e te inangaro maira a Iehova i te akarongo i tana pure ngakau tae. I roto i ta tatou au pure, ka akakite tatou kia Iehova—i to tatou manako te ka emiemi tatou i te akakite ki tetai ke. E akamaara, e kua kite takere a Iehova i to tatou manako ngakau tae. (E tatau ia Salamo 139:2-4.) Ka akamaroiroi katoa tatou i ta tatou aronga apii kia pati i ta te Atua tauturu no te taui i te manako tarevake e kia autu i te tu kino. Ei akaraanga, penei kua roa tetai tangata i te apii anga, te reka ra rai aia i te au orote o teianei ao. Kua kite aia e e tarevake, inara ko te tika, te reka ua ra aia i te reira. E akamaroiroi iaia kia akakite taka meitaki kia Iehova i tona manako e kia pati akatenga no te tauturu kia inangaro i ta Iehova e inangaro ra.—Sala. 97:10.

13. (a) Eaa tatou ka pati ei i ta tatou tangata apii kia aere mai ki te au uipaanga? (e) Akapeea tatou me akapumaana i te tangata apii i ko i te Are Uipaanga Patireia?

¹³ Pati i te tangata apii Pipiria kia aere mai ki te au uipaanga. Ta te tangata apii ka akarongo e ka kite i ko i te uipaanga Kerititiano, ka akakeu te reira iaia kia tavini ia Iehova. Akaari i te vitio Eaa te Raveia Ana i ko i te Are Uipaanga Patireia? e te pati iaia kia aere mai ki te uipaanga. Ka oronga koe i te tauturu kia tae mai aia ki te uipaanga. E mea meitaki i te pati i tetai au papuritia tukeke ki taau apii. Na roto i teia, ka matau i reira aia ki tetai ke i roto i te putuputuanga, e ka inangaro aia i te aere mai ki te uipaanga.

14. Eaa te ka akakeu i te tangata apii kia tere ki mua i te pae vaerua?

¹⁴ To tatou akakoroanga kia tauturu i te tangata apii Pipiria kia tere ki mua i te pae vaerua. (Ephe. 4:13) Me āriki tetai i te apii Pipiria, penei ka inangaro ua aia i te apii kia puapingaia aia. Inara iaia e akatupu ra i te inangaro no Iehova, ka  akamata aia i te akamanako akapeea me tauturu i tetai ke, kapiti mai te aronga i roto rai i te putuputuanga. (Mata. 22:37-39) Me tau te taime, eiaa e emiemi i te taiku i to tatou tika anga i te turuturu i te angaanga Patireia na roto i te moni oronga ua.

15. Akapeea tatou me tauturu i te tangata apii me tupu te manamanata?

¹⁵ Tauturu i te tangata apii Pipiria me tupu mai te au manamanata. Ei akaraanga, penei ka akakite atu te tangata apii kia koe, e papuritia aia kare i papetitoia, e kua akaririia aia e tetai i roto i te putuputuanga. Eiaa e akatano atu i tona tarevake, mari ra e akamārama i ta te Pipiria e karanga ra? Ka akakore aia i te apa a te taeake, me kare aia e āriki, e aravei i te reira tangata ma te tu maru e te aroa, te akakoroanga kia “rauka ïa to taeake ia koe.” (Akaaite kia Mataio 18:15) Tauturu i te tangata apii kia akapapa i tana ka tuatua. Akaari kiaia akapeea me taangaanga i te JW Library^® app, te Research Guide for Jehovah’s Witnesses i te reo Papaa, e te jw.org^® kia kite aia akapeea me akatikatika i tona au manamanata. Te maata atu i tana ka apii i mua ake ka papetitoia ai aia, ka māmā ua iaia i te piri atu ki tetai ke i roto i te putuputuanga.

16. Eaa te au turanga taau i kite mai me pati i tetai papuritia kia piri atu ki te apii?

¹⁶ Pati i tetai ke i roto i te putuputuanga—e te akaaere kotinga me atoro mai i te putuputuanga—kia piri mai ki te apii. No teaa ra? Tei taikuia i mua akenei, ka rauka ua i tetai au papuritia i te tauturu i taau tangata apii me kare e rauka ia koe i te apii. Ei akaraanga, ka tauta tetai tangata apii kia akamutu i te kai avaava, inara e ngata te reira. E pati i tetai Kite, tei rauka iaia i te taui i tona turanga kia piri atu ki taau apii. Penei ka rauka i toou taeake Kite i te oronga i tetai au tauturu te ka anoanoia kia akarongo te tangata apii. Me ko korua ko tetai taeake e angaanga kapiti ra e pati iaia kia rave i te apii. Me pati koe i tetai ke kia piri atu ki taau apii, ka puapingaia taau tangata apii mei teia au tupuanga. E akamaara, to tatou akakoroanga kia tauturu i te tangata apii kia tere ki mua i te pae vaerua.

17-18. Eaa taau ka akamanako me ka iki koe no te akamutu i te apii?

¹⁷ Me kare taau tangata apii Pipiria e taui i tona au turanga, e ui koe kia koe uaorai, ‘Ka akamutu ainei au i te apii?’ Akara meitaki i te turanga o te tangata apii. Tetai aronga apii ka roa rai ratou me tere ki mua, i tetai. Ui kia koe uaorai: ‘Te tere ra ainei te tangata apii ki mua?’ ‘Te akamata ra ainei aia i te “akono” me kore te taangaanga i te au mea tana e apii ra?’ (Mata. 28:20) Ka marie rai tetai tangata apii, inara ka anoanoia aia kia rave i tetai tauianga.

 ¹⁸ Inara eaa ta tatou ka rave me kua apii ana tetai tangata no tetai taime, e kare i akaari ana i tona inangaro i tana apii? Akamanako ana i teia tupuanga: Kua akaoti te tangata apii i te puka Apii ia Tatou, e penei kua akamata i te puka Aroa o te Atua, inara kare aia i tae mai ki te uipaanga a te putuputuanga—pera te Akamaaraanga! E penei ka akaruke aia i tana apii no tetai mai epetoma. Me rave aia i te reira, e mea tau kia uriuri meitaki koe kiaia. *

19. Eaa taau ka tuatua me kare aia e reka ana i tana apii Pipiria, e eaa taau ka akamanako?

¹⁹ Penei ka ui koe kiaia, ‘Eaa te mea ngata kia riro mai koe ei Kite no Iehova?’ Ka pau mai te tangata apii, ‘Ka inangaro rai au i te apii Pipiria, inara kare au e riro mai ei Kite no Iehova!’ Me ko tera tona tu e apii ra no tetai tuatau, e puapinga ainei kia rave ua atu rai i tana apii? I tetai taime, ka akakite mai te tangata apii i te tumu kare aia e tere ana ki mua. Ei akaraanga, penei kare aia e inangaro i te tutu aere mei tera are ki tera are. I teianei, kua kite koe i tona manako, ka rauka i reira ia koe i te tauturu iaia.

20. Akapeea a Angaanga 13:48 te tauturu anga ia tatou kia iki e koai ta tatou ka apii?

²⁰ Te mea maromaroa, kua aite tetai tangata apii mei te ngati Iseraela rai i to Ezekiela tuatau. Akakite a Iehova kia Ezekiela: “E i na, kua riro koe mei te peʼe inangaro maataia no ratou ra, e mei te tangata reo meitaki ra, e tei tika kia akatangi meitaki i te apinga tangi ra: te akarongo ra oki ratou i taau au tuatua, kare ra ratou e rave i taua au tuatua ra.” (Eze. 33:32) Kare i te mea māmā no tatou i te akakite ki tetai tangata e te akamutu nei koe i tana apii. Inara, “te poto nei te tuatau.” (1 Kori. 7:29) Kare kia akapou ua i te taime i te apii i tetai kare e tere ki mua, mari ra kia kimi tatou i tetai ke te inangaro ra i “te ora mutu kore.”—E tatau ia Angaanga 13:48.

21. Eaa ta tatou irava mataiti no te 2020, e eaa te ka tauturu ia tatou?

²¹ I te mataiti 2020, ka tauturu te irava mataiti ia tatou, kia akamaata atu i to tatou karape i te akariro i te tangata ei pipi. Kapiti mai i ta Iesu tuatua i tona rave anga i tetai uipaanga puapinga i te maunga i Galilea: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou.”—Mata. 28:19.