1. Akapeea tetai ako tei orongaia i ko i te uruoaanga i te 1935, te akakeu anga i tetai tangata mapu?

E TAI ngauru ma varu mataiti o tetai tangata mapu i papetitoia ai aia i te 1926. Ko tona nga metua tetai o te Aronga Apiipii Pipiria, te ingoa tera o te Au Kite o Iehova i mua ana. E toru a raua tamaroa e rua tamaine tei utuutuia kia tavini ia Iehova e kia aru i te akaraanga o Iesu Karaiti. Mei te Aronga Apiipii Pipiria rai i taua tuatau, kua kai teia tangata mapu i te varaoa e kua inu i te wina i te au mataiti ravarai i ko i te Kaikai Anga Aiai a te Atu. Inara, kua taui tona manakonakoanga te akarongo anga aia i te ako “Te Aronga Maata Rava.” Kua orongaia tera ako e te taeake J. F. Rutherford i ko i te uruoaanga i Washington, D.C., U.S.A. i te 1935. Eaa tei akakiteia i ko i tera uruoaanga?

2. Eaa ta te Taeake ko Rutherford i akamārama i roto i tana ako?

² I roto i tana ako, kua akamārama te Taeake ko Rutherford koai ma te “aronga maata rava” tei taikuia ia Apokalupo 7:9. I mua ana, kua manakoia e ko te rua teia o te pupu te ka aere ki te rangi, e kare ratou e tiratiratu roa ana mei te aronga akatainuia. Kua akamārama te Taeake ko Rutherford mei te Pipiria e ko te aronga maata rava, kare ratou i ikiia kia noo ki te rangi mari ra, ko ratou ta Karaiti mamoe ke * te ka ora mai mei te “mate maata” e ka  noo i te enua nei e tuatau ua atu. (Apo. 7:14) Taputou a Iesu, “E mamoe ke atu rai taku, kare no teianei koro: e arataki katoa mai au ia ratou e tikaʼi, e akarongo mai oki ratou i toku nei reo: kia okotai oki anana, okotai oki tiaki.” (Ioa. 10:16) Ko te mamoe ke, e Au Kite tiratiratu ratou no Iehova e e manakonakoanga to ratou i te noo i te Parataito i te enua nei e tuatau ua atu. (Mata. 25:31-33, 46) Akara tatou akapeea teia akamāramaanga ou a te Pipiria te taui anga i te oraanga o te iti tangata o Iehova, pera katoa te taeake e 18 ona mataiti.​—Sala. 97:11; Mase. 4:18.

3-4. I ko i te uruoaanga o te 1935, eaa ta te tauatini ua atu i mārama no runga i to ratou manakonakoanga, e no teaa ra?

³ Te tuanga puapinga o tera uruoaanga, ko te pati anga te vaa tuatua ki te katoatoa: “Te aronga e manakonakoanga to ratou no te enua nei e tuatau ua atu, ka tu mai ki runga?” Akakite tetai taeake, tere atu e 10,000 tangata tei tu ki runga. E oti, akakite te Taeake Rutherford: “Ka akara ana! Ko te aronga maata rava!” Kua rekareka te katoatoa ma te reo maata. Kua mārama te aronga tei tu ki runga e kare ratou i ikiia kia aere ki te rangi. Kua kite ratou e kare ratou i akatainuia ki te vaerua o te Atua. I tera mai ra o te uruoaanga e 840 Au Kite ou tei papetitoia, ko te maataanga e mamoe ke.

⁴ Muri ake i tera ako, kua akamutu te taeake mapu tei taikuia i mua ana, e te tauatini ua atu tei kai i te varaoa e tei inu i te wina i ko i te Kaikai Anga Aiai a te Atu. Kua aite te manako o tetai taeake ki te maataanga tei karanga: “Ko te Akamaaraanga o te 1935 te taime openga i kai ei au i te oroa. Mārama mai au e kare te manakonakoanga no te rangi i orongaia mai kiaku e te vaerua o Iehova; mari ra, kua rauka iaku te manakonakoanga kia noo i te enua nei e kia piri ki te angaanga no te akariro i te reira ei parataito.” (Roma 8:16, 17; 2 Kori. 1:21, 22) Mei te reira taime kua maata mai te numero o te aronga maata rava e kua angaanga kapiti ratou ki te toenga * o te aronga akatainuia.

5. Eaa to Iehova manako no te aronga tei akamutu i te kai i te oroa Akamaaraanga?

⁵ Eaa to Iehova manako no te aronga tei akamutu i te kai i te oroa Akamaaraanga i muri ake i te 1935? Eaa tona manako no te Au Kite kua papetitoia i teia tuatau tei kai i te varaoa e tei inu i te wina i ko i te Kaikai Anga Aiai a te Atu, e i muri mai kua mārama e kare ratou i ikiia e te vaerua tapu? (1 Kori. 11:28) Kua kai tetai pae i te oroa no te mea kare ratou i mārama i to ratou manakonakoanga. Inara me kite tikai ratou i to ratou tarevake, me akamutu i te kai i te oroa e me tavini tiratiratu ua rai ia Iehova, ka ārikiia ratou ei tuanga no te mamoe ke. Noatu kare ratou e kai i te varaoa e te inu i te wina, ka aere rai ratou ki te Akamaaraanga ei akaari i to ratou āriki rekareka no ta Iehova e Iesu i rave.

6. Eaa ta Iesu i akaue i te au angera kia rave?

⁶ I te mate maata e vaitata maira, e mea meitaki no tatou kia akamanako eaa  ta Apokalupo pene 7 e akakite ra no runga i te au Kerititiano akatainuia e te aronga maata rava o te mamoe ke. Kua akaue a Iesu i te au angera kia tāpu ua atu rai i nga matangi kino e ā. Kare ratou e tuku i teia matangi kia arara ki runga i te enua kia ope roa te au Kerititiano akatainuia i te akairoia, koia oki ko ratou ta Iehova i kite mai e kua vai tiratiratu. (Apo. 7:1-4) Ei tutaki no to ratou tu tiratiratu, ka kapiti atu te au taeake akatainuia kia Karaiti ei au ariki e ei taunga i te rangi. (Apo. 20:6) Ka mataora a Iehova, a Iesu e te au angera i te kite i te 144,000 aronga akatainuia me rauka ta ratou tutaki i te rangi.

7. Ia Apokalupo 7:9, 10, koai ma ta Ioane i kite i roto i te orama, e eaa ta ratou e rave ra? (Akara i te tutu i te kapi mua.)

⁷ I muri ake i tona akakite anga no runga i te 144,000 au ariki e te taunga, kua kite atu a Ioane i tetai apinga manea, ko te “aronga maata rava” tei ora mai ia Aramagido. E tuke teia pupu ki te pupu mua, no te mea e maata atu te tangata i roto i te reira e kare i akatakaia tona numero. (E tatau ia Apokalupo 7:9, 10.) Kua akakakauia ratou ki te “kakau teatea,” te akaari maira e kare ratou i akaviiviiia e to Satani ao e kua vai tiratiratu ratou ki te Atua e Karaiti. (Iako. 1:27) Kua kapiki ratou ma te reo maata, kua ora ratou no ta Iehova e Iesu, te Punua Mamoe a te Atua i rave. Pera katoa te mou ra ratou i te au kikau nu tamara, te akaari maira e kua āriki rekareka ratou e ko Iesu te Ariki ta Iehova i akatainu.​—Akaaite kia Ioane 12:12, 13.

8. Eaa ta Apokalupo 7:11, 12 e akakite maira no runga i to Iehova ngutuare i te rangi?

⁸ E tatau ia Apokalupo 7:11, 12. Eaa tei tupu i runga i te rangi? Kua kite a Ioane i te au aronga pouroa i te rangi te rekareka anga i te kite i te aronga maata rava e kua akapaapaa ratou i te Atua. No reira, ka rekareka to Iehova ngutuare i te rangi me akatupuia teia orama, me ora mai te aronga maata rava mei te mate maata.

9. Ia Apokalupo 7:13-15, eaa ta te aronga maata rava e rave nei i teia tuatau?

⁹ E tatau ia Apokalupo 7:13-15. Tata a Ioane e kua orei te aronga maata rava “i to ratou kakau e kua akateatea i te toto o te Punua-mamoe ra.” Te aiteanga, e akava ngakau mā to ratou e te mareka maira a Iehova ia ratou. (Isa. 1:18) E au Kerititiano akatapuia e tei papetitoia, te akaari ra ratou i te akarongo ketaketa ki roto i to Iesu atinga oko e kua rauka tetai pirianga kia Iehova. (Ioa. 3:36; 1 Pete. 3:21) No reira kua tau ratou kia tu ki mua i te terono o te Atua e te akamori “iaia i te po e te ao” i runga i te enua nei. I teia tuatau te maroiroi nei ratou i te rave i te angaanga tutu aere i te Patireia e te akariro anga i te tangata ei pipi, no te mea ko te Patireia o te Atua te mea puapinga rava atu kia ratou.​—Mata. 6:33; 24:14; 28:19, 20.

10. Eaa tei papu i te aronga maata rava, e eaa te taputou ta ratou e tiaki nei?

¹⁰ Ko te aronga maata rava te ka ora mai mei te mate maata, kua papu e ka akonoia ratou e te Atua, koia “tei noo ki runga i te terono ra e noo ki rotopu ia ratou.” Te tiaki nei te mamoe ke i teia taputou kia akatupuia: “E nana [te Atua] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa.”​—Apo. 21:3, 4.

11-12. (a) Ia Apokalupo 7:16, 17, eaa te akameitakianga ka rauka i te aronga maata rava? (e) Eaa ta te mamoe ke ka rave i ko i te Akamaaraanga, e no teaa ra?

 ¹¹ E tatau ia Apokalupo 7:16, 17. Teia tuatau, te pongi nei tetai pae o to Iehova iti tangata no te mea kare e rava ana ta ratou moni no te oko kai, e no te au manamanata o te tangata e te tamaki. Kua tiriaia tetai pae ki roto i te are auri no to ratou akarongo. Inara, kua kite te aronga maata rava e me ora mai ratou mei te takore anga o teia akatereanga kino, kare rava ratou e pongi akaou i te pae kopapa e te pae vaerua. Me takoreia to Satani ao kino, ka paruruia te aronga maata rava mei “te veravera” o to Iehova riri te ka riringiia ki runga i te au pa enua. I muri ake i te mate maata, ka arataki a Iesu i te aronga tei ora mai i te enua nei ki “te vai ora [mutukore].” Akamanako ana: E manakonakoanga manea tikai teia no te aronga maata rava. No te pirioni ua atu tangata e ora nei kare rava ratou e mate!​—Ioa. 11:26.

¹² Ka akameitaki te mamoe ke ia Iehova e Iesu no to ratou manakonakoanga manea. Noatu kare ratou i ikiia kia aere ki te rangi, kua aite to Iehova aroa no ratou e te aronga akatainuia. Ka rauka i te aronga akatainuia e te mamoe ke i te akapaapaa i te Atua e Karaiti. Ka rave ratou i te reira na te aere anga ki te Kaikai Anga Aiai a te Atu.

13-14. Eaa ra tatou pouroa ka aere ei ki te Akamaaraanga o te mate o Karaiti?

¹³ Te au mataiti i aereia mai, i roto i te 1,000 tangata te ka aere ki te Akamaaraanga, e okotai tangata te ka kai i te varaoa e te inu i te wina. Te maataanga o te au putuputuanga takapini i te ao, kare e tangata e kai i te oroa i ko i te Akamaaraanga. To ratou manakonakoanga, ka noo ratou i te enua nei. Eaa i reira ratou ka aere ei ki te Kaikai Anga Aiai a te Atu? Kua aite te reira ki te aere anga ki te akaipoipo o tetai oa. Ka aere ratou i te akaari i to ratou aroa e te turu i te nga tokorua te ka akaipoipo. Mei te reira rai, ka aere te mamoe ke ki te Akamaaraanga no te akaari i to ratou aroa e te turu ia Karaiti e te aronga akatainuia. Ka aere katoa te mamoe ke i te akaari i to ratou āriki  rekareka no to Iesu atinga oko. No teia atinga oko, kua rauka ia ratou i te noo ki te enua nei e tuatau ua atu.

¹⁴ Ko tetai tumu puapinga i aere ei te mamoe ke ki te Akamaaraanga, no te mea te akarongo ra ratou ki ta Iesu akaueanga. Te rave anga a Iesu i te Kaikai Anga mua a te Atu ki tana au apotetoro tiratiratu, akakite aia kia ratou: “E pera kotou ei manako anga iaku.” (1 Kori. 11:23-26) No reira ka aere ua ratou ki te Kaikai Anga Aiai a te Atu me te ora ua ra rai tetai o te aronga akatainuia i te enua nei. E ka pati te mamoe ke i te katoatoa kia aru ia ratou ki te Akamaaraanga.

15. Akapeea tatou me akapaapaa i te Atua e Karaiti i ko i te Akamaaraanga?

¹⁵ I ko i te Akamaaraanga, ka akapaapaa tatou i te Atua e Karaiti na roto i te imene e te pure. Ko te ako te ka orongaia i teia mataiti, koia oki, “Āriki Rekareka i ta te Atua e Karaiti i Rave Noou!” Ka akamaata atu teia i to tatou āriki rekareka no Iehova e Karaiti. Me orongaia mai te oroa, ka rauka ia tatou i te akamanako i ta te reira e akatutu maira—te kopapa e te toto o Iesu. Ka akamanako tatou i te aroa ta Iehova i akaari na te tukuanga mai i tana tamaiti kia mate no tatou e kia rauka ia tatou te ora. (Mata. 20:28) Ko te aronga pouroa tei inangaro i to tatou metua i te rangi e tana tamaiti, ka aere ratou ki te Akamaaraanga.

16. Na teea tu i aiteite ei te aronga akatainuia ki te mamoe ke?

¹⁶ Ki te Atua, e aiteite ua te pupu akatainuia e te mamoe ke. Kare aia e akaperepere maata atu i tetai pupu ki rungao i tetai. No te mea, kua oko aia i te aronga akatainuia e te mamoe ke ki te toto o tana Tamaiti. Ko te tuke ua o teia nga pupu, ko to raua manakonakoanga. Inara, ka anoanoia teia nga pupu kia vai tiratiratu ki te Atua e Karaiti. (Sala. 31:23) E akamaara, ka aiteite ua te vaerua o te Atua me angaanga ki runga ia tatou pouroa. Ko te aiteanga, ka oronga mai a Iehova i tona vaerua tapu kia tatou tataki tai kia tau ki tei anoanoia.

17. Eaa ta te toenga o te aronga akatainuia e tapapa atu ra?

¹⁷ Kare te au Kerititiano Akatainuia i anauia ma te manakonakoanga kia noo ki te rangi. Na te Atua i akatupu i te reira ki roto i to ratou ngakau. Ka akamanako e ka pure ratou no te reira, e ka tapapa atu kia rauka ta ratou tutaki i te rangi. Kare ratou i kite mei teaa te tu o to ratou kopapa vaerua. (Phili. 3:20, 21; 1 Ioa. 3:2) Noatu te reira, te tapapa nei ratou i te aravei ia Iehova, Iesu, te au angera e  te aronga akatainuia. E te noo i to ratou ngai i roto i te Patireia i te rangi.

18. Eaa ta te mamoe ke e tapapa atu ra?

¹⁸ Te akaperepere ra te mamoe ke i te manakonakoanga ta te tangata e inangaro ra kia noo ki te enua nei e tuatau ua atu. (Kohe. 3:11) Te tapapa atu nei ratou ki te rā ka tauturu ratou i te taui i te enua ei parataito. Kia rauka i te pātu i to ratou au are, tanu i te au kainga ki te kai, e te utuutu i ta ratou tamariki i roto i tetai oraanga apa kore. (Isa. 65:21-23) Te inangaro nei ratou i te tutaka i te au ngai tukeke o te enua kia akara—i te au maunga, vao rakau, e te au moana—e no te apii i ta Iehova au apinga katoatoa i anga. Tei maata atu, ka rekareka pouroa ratou i te kite e ka matutu ua atu rai to ratou pirianga kia Iehova.

19. Eaa ta tatou ka rave i te tuatau o te Akamaaraanga, e aea te reira e raveia ai i teia mataiti?

¹⁹ Kua oronga a Iehova ki tona au tavini tiratiratu tetai manakonakoanga manea no te tuatau ki mua. (Iere. 29:11) Kua riro te Akamaaraanga o to Karaiti matenga ei atianga meitaki no tatou tataki tai kia akapaapaa i te Atua e Karaiti, no ta raua i rave kia rauka ia tatou te ora mutukore. Kare e ekoko, ko te Akamaaraanga i te au mataiti ravarai te uipaanga puapinga rava atu ki te au Kerititiano mou. Ka raveia te reira i muri ake i te opunga rā i te Maanakai, Mati 27, 2021. I teia mataiti e maata te tangata i te au ngai tukeke te ka aere ki teia uipaanga puapinga. Ka aere tetai pae noatu te au takinokino anga, e ka akamaara katoa tetai pae i te reira noatu tei roto ratou i te are auri. Te akara maira a Iehova, Iesu, e to te Atua ngutuare i te rangi, no reira kia mataora te au putuputuanga, au pupu, e te aronga tataki tai me rave ratou i te Akamaaraanga!