ATIKARA APII 5
“Taporoporo Marie i te Tuatau”
“Kia matakite i to kotou aerenga, eiaa mei ta te kite kore, mei ta te aronga pakari ra. Ma te taporoporo marie i te tuatau.”—EPHE. 5:15, 16.
IMENE 8 Ko Iehova to Tatou Akapuanga
I ROTO I TEIA APII *
1. Akapeea tatou me akapou i te taime kia Iehova?
E MATAORA ana tatou i te akapou i te taime ki te aronga ta tatou e akaperepere ra. E mataora ana tetai nga tokorua akaipoipo i te akapou i te taime ki tetai e tetai. E reka katoa ana te au mapu i te piri atu ki to ratou au oa. E e akaperepere maata ana tatou katoatoa i te taime ta tatou ka akapou ki te au taeake irinaki. Inara ko te mea maata rava atu, koia oki me akapou tatou i te taime ki to tatou Atua. Ka rave tatou i teia me pure kiaia, me tatau i tana Tuatua e me akamanako oonu no runga i tona akakoroanga e tona au tu manea. Ae, e mea akaperepere tikai te taime ta tatou ka akapou kia Iehova!—Sala. 139:17.
2. Eaa tetai turanga ngata te ka tupu kia tatou?
2 Noatu e mea reka na tatou i te akapou i te taime kia Iehova, kare i te mea māmā ua i te rave. E maata te au angaanga e te apainga i roto i te oraanga, e ka ngata i te akanoo i te taime no te au angaanga pae vaerua. Ko te angaanga moni e te au apainga a te ngutuare ka akapou maata i to tatou taime e penei ka manako tatou e kare o tatou taime kia pure, apii e te akamanako oonu.
3. Eaa tetai apinga ke atu te ka akapou i to tatou taime?
3 E apinga ke atu tetai te ka akapou maata i to tatou taime. Me kare tatou e matakite, penei ka varenga ua tatou i te rave i te au angaanga kare i te mea tarevake inara, ka akapou i to tatou taime no te akavaitata atu kia Iehova. Ei akaraanga, akamanako ana i te angaanga tarekareka. E mea meitaki no tatou pouroa kia akapou i te taime no teia. Penei Mase. 25:27; 1 Timo. 4:8.
e angaanga tarekareka meitaki ta tatou ka iki inara, me pou ua to tatou taime ki te reira, kare o tatou taime no te au angaanga pae vaerua. E akamaara tatou, kare ko te angaanga tarekareka te mea puapinga rava atu.—4. Eaa ta tatou ka uriuri?
4 I teia atikara, ka uriuri tatou i te tumu ka anoanoia kia iki eaa te au mea puapinga rava atu i roto i to tatou oraanga. Ka uriuri katoa tatou akapeea me akapou meitaki i to tatou taime kia Iehova, e akapeea tatou e puapinga ai me taporoporo marie i to tatou tuatau.
RAVE I TE IKIANGA MEITAKI; IKI I TE MEA PUAPINGA
5. Akapeea te akamanako anga ia Ephesia 5:15-17 me tauturu i te au mapu kia iki i te oraanga meitaki rava atu?
5Iki i te oraanga meitaki rava atu. E akamanako ua ana te au mapu eaa te ikianga meitaki rava atu ta ratou ka rave no to ratou oraanga. I tetai tua, penei ka akamaroiroi te au puapii e te au mema o te ngutuare kare i te Kite kia aere ratou ki te apii teitei, kia rauka mai tetai ngai angaanga meitaki e kia maata ta ratou moni. Ka riro teia ikianga ei akapou maata i to ratou taime. I tetai tua, penei ka akamaroiroi te nga metua e te au oa i roto i te putuputuanga i te au mapu kia akapou i to ratou oraanga i te tavini ia Iehova. Eaa te ka tauturu i tetai mapu tei inangaro ia Iehova kia rave i te ikianga meitaki rava atu? Ka puapingaia aia me tatau ia Ephesia 5:15-17 e me akamanako oonu i te reira. (E tatau.) Me tatau tetai mapu i teia au irava, penei ka ui aia kiaia uaorai: ‘Eaa “to te Atu ra anoano”? Eaa te ikianga te ka akamareka ia Iehova? E eaa te ikianga te ka tauturu iaku kia taporoporo meitaki i toku tuatau?’ E akamaara, “e tuatau kino teia,” e kua vaitata te openga o teia akatereanga tei tutaraia e Satani. Mea meitaki roa kia akapou i to tatou oraanga ei rave i te au mea tei akamareka ia Iehova.
6. Eaa ta Maria i iki, e eaa i riro ei tana ikianga ei mea meitaki?
6Iki i te mea puapinga. Tetai taime, kia taporoporo marie i to tatou tuatau, ka anoanoia tatou kia iki i rotopu i tetai nga angaanga kare i te mea tarevake. Ka kite tatou i teia mei tei tupu kia Iesu i te atoro anga aia ia Maria raua ko Mareta. Kare e ekoko, kua mataora tikai a Mareta e kua atoro a Iesu i to ratou ngutuare, no reira, kua akapapa aia i tetai umukai maata no Iesu. I taua atianga ra, kua akapou a Maria i te tuatau i te noo i te pae i tona Atu e te akarongo ki tana au apiianga. Noatu e akakoroanga meitaki to Mareta, kua iki ra a Maria “i taua tuanga meitaki nei.” (Luka 10:38-42) Aere ua rai, penei kua ngaropoina ia Maria eaa tana i kai i tera atianga inara, papu ia tatou, kare rava e ngaropoina iaia i tana i mou mai mei ia Iesu. Mei ia Maria rai, tei akaperepere i tona taime kia Iesu, ka akaperepere katoa tatou i to tatou taime kia Iehova. Akapeea tatou me taporoporo marie i te reira tuatau?
TAPOROPORO MARIE I TOOU TUATAU KIA IEHOVA
7. Eaa i puapinga ai te pure, te apii e te akamanako oonu?
7Kia mārama tatou e ko te pure, te apii e te akamanako oonu, e tuanga ïa no ta tatou akamorianga. Me pure tatou, te karangaranga ra tatou ki to tatou Metua i te rangi tei akaperepere maata ia tatou. (Sala. 5:7) Me apii i te Pipiria, ka “rauka ia [tatou] te kite i te Atua,” koia te Tumu o te pakari. (Mase. 2:1-5) E me akamanako oonu tatou, te akamanako ra tatou i to Iehova au tu manea e tona akakoroanga umere no tana au mea i anga e ta tatou tuanga i roto i tona akakoroanga. Ko teia te mataara meitaki rava atu no te akapou i to tatou taime. Inara eaa te ka tauturu ia tatou kia rave i teia au mea?
Ka rauka ainei ia koe te kimi i tetai ngai muteki ua no te rave i taau apii? (Akara i te parakarapa 8-9)
8. Eaa te apiianga ta tatou ka mou mai mei ta Iesu akapou anga i te tuatau i roto i te metepara?
8Me ka rauka, e kimi i tetai ngai muteki ua. Akamanako ana i te akaraanga o Iesu. I mua ake ka akamata ai aia i tana angaanga tutu aere, kua akapou aia e 40 rā i roto i te metepara. (Luka 4:1, 2) I tera ngai motutaa, kua pure a Iesu kia Iehova e kua akamanako oonu i te anoano o tona Metua nona. Kua tauturu teia ia Iesu kia akapapa no te au timataanga te ka tupu kiaia i te tuatau ki mua. Akapeea koe e puapinga ai mei te akaraanga o Iesu? Me e āka ngutuare toou, penei kare e rauka i te kimi i tetai ngai muteki ua i te kainga. Me koia ïa, penei ka kimi koe i tetai ngai muteki i vao. Ko teia ta Julie e rave ana me inangaro aia i te akapou i te taime kia Iehova e te pure kiaia. E noo ana raua ko tana tane i roto i tetai apatimani meangiti i Varani, e ka ngata i te noo koia anake ua ma te kore e tamanataia. “No reira i te au rā ravarai, ka aere au na tetai ngai e aere ana te tangata,” i akamārama mai ei a Julie. “Tei reira te ngai ko au anake ua, e ka mou toku manako e ka rauka iaku i te tuatua kia Iehova mei toku ngakau.”
9. Noatu e maata tana apainga, akapeea a Iesu te akaari anga e kua akaperepere aia i tona pirianga kia Iehova?
9 E maata ta Iesu apainga i roto i tona oraanga. I te tuatau i tana angaanga tutu aere i te enua nei, kua aru te urupu tangata iaia i tana au ngai ravarai i aere, e kua inangaro ratou pouroa kia akarongo aia kia ratou. I tetai atianga, “kua uipa katoa maira to te oire ravarai i te ngutupa” kia aravei iaia. Noatu ra, kua akanoo a Iesu i tetai taime nona uaorai kia pure kia Iehova. I te popongi akirata, kua kimi aia i “tetai ngai motutaa” kia akapou i te taime ko raua ua ko tona Metua.—Mare. 1:32-35.
10-11. Ia Mataio 26:40, 41, eaa te akoanga puapinga ta Iesu i oronga ki tana au pipi i te aua o Getesemane, inara eaa tei tupu?
10 I te po openga o tona oraanga i te enua nei, vaitata ki te openga o tana angaanga tutu aere, kua kimi a Iesu i tetai ngai muteki ua no te akamanako oonu e te pure. Kua kitea te reira ngai i roto i te aua o Getesemane. (Mata. 26:36) I taua atianga ra, kua oronga a Iesu i te akoanga puapinga ki tana au pipi no runga i te pure.
11 Akamanako ana i tei tupu. Penei kua tae ratou ki te aua o Getesemane i muri ake i te turuaipo. Karanga a Iesu ki tana au apotetoro “e ara tatou,” e kua aere aia e Mata. 26:37-39) Inara iaia e pure ra, kua varea ratou e te moe. Kia rokoia ratou e Iesu, te moe ua ra, kua akamaroiroi akaou a Iesu ia ratou “e ara, e e pure oki.” (E tatau ia Mataio 26:40, 41.) Kite a Iesu e kua taitaia maata ratou e kua roiroi. Ma te ngakau tangi aroa, kua āriki a Iesu “te parukaua nei ra te kopapa.” Noatu ra, e rua akaou taime kua aere a Iesu e kua pure, kia oki mai ra aia i te akara i tana au pipi, te moe ra ratou e kare e pure ana.—Mata. 26:42-45.
kua pure. (Ka rauka ainei ia koe te akanoo i tetai taime no te pure me vai araara ua koe? (Akara i te parakarapa 12)
12. Eaa ta tatou ka rave me taitaia roa me kore me roiroi roa tatou i te pure?
12Iki i te taime tau tikai. Tetai taime, penei ka taitaia maata tatou me kore ka roiroi roa no te pure. Me kua tupu teia kia koe, kare ko koe anake ua. Eaa i reira taau ka rave? Tetai aronga tei mātau i te pure kia Iehova i te openga o te rā, kua tauturuia na te akanoo anga i te taime no te pure i te aiai, i te tuatau kare ratou e roiroi roa. Kite mai tetai pae e ka rauka i te akamou i te manako me pure ratou ma te noo tu ua me kore me tuturi ki raro. Akapeea ra me kua apiapi roa me kore kua taitaia roa koe no te pure? E akakite i toou manako kia Iehova. Ka papu ia koe e te mārama ra to tatou Metua aroa ia koe.—Sala. 139:4.
Eaa taau ka rave kia kore e pau atu i te au karere e te imere i te tuatau o te au uipaanga? (Akara i te parakarapa 13-14)
13. Akapeea te apinga apaipai me tamanamanata i to tatou taime kia Iehova?
13 Patoi i te tamanamanata anga me rave i te apii. Kare ko te pure anake te ravenga no te akaketaketa i to tatou pirianga kia Iehova. Me apii i te Pipiria e me aere ki te au uipaanga a te putuputuanga, ka tauturu katoa teia ia tatou kia akavaitata atu ki te Atua. E apinga ainei tetai taau ka rauka i te rave kia akapou meitaki i toou tuatau no te apii e i ko i te au uipaanga a te putuputuanga? E ui kia koe uaorai, ‘Eaa tetai apinga te ka tamanata iaku i ko i te au uipaanga me kore me rave au i taku apii?’ Kare ainei me ringi mai tetai tangata, me tuku karere mai e me imere ia koe i runga i taau tereponi apaipai me kore apinga electronic? I teia tuatau, e pirioni ua atu tangata e apinga apaipai ta ratou. Akakite mai tetai aronga kimikimi e me vai ua taau tereponi apaipai i te pae ia koe, ka tavarengaia koe. “Kare koe e akamou i toou manako ki runga i taau e rave ra,” i karanga ai tetai tangata kimi kite no te manako. “E ngai ke ua te manako.” I mua ake i te au
akaputuputuanga e te uruoaanga, e akakiteia ana ki te katoatoa kia akatanotano i ta ratou apinga apaipai kia kore e tamanamanata i tetai ke. Ka rauka ainei ia tatou kia akapera me ko tatou anake ua, kia kore ta tatou apinga apaipai e tamanamanata i to tatou taime kia Iehova?14. Ia Philipi 4:6, 7, akapeea a Iehova me tauturu ia tatou kia akamou i te manako?
14 Pati ia Iehova kia tauturu ia koe kia akamou i te manako. Me kite mai koe e ka aere ke ua toou manako i te tuatau no te apii me kore i ko i te uipaanga putuputuanga, e pati ia Iehova kia tauturu ia koe. Me kua manamanata me kore kua apiapi koe, penei e ngata kia kopae i te manako apiapi e kia akamou ki runga i te au mea pae vaerua. Inara, e puapinga tikai kia akapera koe. Pure no te ‘au te ka paruru i toou ngakau e toou “manako.”—E tatau ia Philipi 4:6, 7.
KA PUAPINGAIA TATOU ME AKAPOU I TE TAIME KIA IEHOVA
15. Eaa tetai akameitakianga me akapou i te taime kia Iehova?
15 Me akapou koe i te taime kia pukapuka, akarongo e kia akamanako oonu no runga ia Iehova, ka puapinga maataia koe. Akapeea ra? Mea mua, ka rave koe i te au ikianga meitaki. Te akapapu maira te Pipiria “ko tei kapiti katoa i tona aerenga ki to te aronga pakari ra, ka pakari katoa ïa.” (Mase. 13:20) No reira, me akapou koe i te taime ki te Tumu o te pakari ko Iehova, ka pakari katoa koe. Ka mārama meitaki atu koe akapeea me akamareka iaia e ka kopae koe i te au ikianga te ka tamamae iaia.
16. Akapeea te akapou anga i te taime kia Iehova me tauturu ia tatou kia riro ei puapii meitaki atu?
16 Te rua, ka riro mai koe ei puapii meitaki atu. Me apii tatou i te Pipiria ki tetai tangata, to tatou akakoroanga puapinga roa atu, kia tauturu i te tangata apii kia akavaitata atu kia Iehova. Te maata atu i ta tatou karangaranga ki to tatou Metua i te rangi, ka tupu maata atu to tatou aroa nona e ka tukatau atu tatou i te tauturu i te tangata apii kia inangaro iaia. Ko teia ta Iesu i rave. Kua akataka aia i tona Metua na roto i te au tuatua pumaana e te aroa e kua tauturu te reira i tana au pipi tiratiratu kia inangaro katoa ia Iehova.—Ioa. 17:25, 26.
17. Eaa te tumu ka tauturu te pure e te apii i te akaketaketa i to tatou akarongo?
17 Te toru, ka ketaketa atu toou akarongo. Akamanako ana eaa te ka tupu me pati koe i te Atua no te aratakianga, te akapumaana e te tauturu e me pau mai a Iehova i taau pure. Ka ketaketa roa atu toou akarongo iaia. (1 Ioa. 5:15) Eaa atu te ka akaketaketa i toou akarongo? Ko taau uaorai apii. “Na te kite mari e raukaʼi te akarongo.” (Roma 10:17) Inara, kia akaketaketa i to tatou akarongo, kare e rava ua kia rave i te apii kia rauka mai te kite. Eaa atu ta tatou ka rave?
18. Akatutu mai i te tumu ka anoanoia tatou kia akamanako oonu.
18 Ka anoanoia tatou kia akamanako oonu i ta tatou e apii ra. Akamanako ana eaa tei tupu ki te tata o Salamo 77. Kua tumatetenga aia no te mea kua manako aia e kua akaruke a Iehova iaia e tona au taeake Iseraela. Kare aia e varea e te moe i te po no tona au manako apiapi. (Irava 2-8) Eaa i reira tana i rave? Akakite aia kia Iehova: “Ka akamaaraara rai au i taau ra au angaanga katoa, ka tuatua rai au i taau i rave ra.” (Irava 12) Te tika, kua kite meitaki te tata salamo i ta Iehova i rave no Tona iti tangata i te tuatau i topa, inara kua ui teia tangata apiapi: “Kua ngaropoina ainei to te Atua aroa? kua papani ainei aia i tona aroa i te riri?” (Irava 9) Kua akamanako oonu te tata salamo i ta Iehova i rave i te tuatau i taito e pera katoa to te Atua aroa e te tu tangi. (Irava 11) Tei tupu? Kua papu roa i te tata salamo e kare a Iehova e akaruke i Tona iti tangata. (Irava 15) Mei te reira katoa, ka ketaketa roa atu toou akarongo me akamanako oonu koe i ta Iehova i rave no tona iti tangata e tana i rave noou.
19. Eaa atu te puapinga ka rauka mai me akapou i te taime kia Iehova?
19 Te ā, e te mea puapinga rava atu, ka tupu maata toou inangaro no Iehova. Ko te aroa te tu puapinga roa atu te ka akakeu ia koe kia akarongo kia Iehova, kia rave i te au atinga ei akamareka iaia, e kia akakoromaki i tetai ua atu timataanga. (Mata. 22:37-39; 1 Kori. 13:4, 7; 1 Ioa. 5:3) Kare atu e mea akaperepere mari ua ko to tatou pirianga vaitata e te aroa kia Iehova!—Sala. 63:1-8.
20. Akapeea koe me taporoporo marie i toou taime kia Iehova?
20 E akamaara, e tuanga te pure, te apii e te akamanako oonu no te akamorianga. Mei ia Iesu, e kimi i tetai ngai muteki ua kia akapou i te taime kia Iehova. Akaatea i te au apinga te ka tamanata ia koe. Pati ia Iehova kia tauturu ia koe kia akamou i te manako me rave koe i te angaanga pae vaerua. Me taporoporo marie koe i toou tuatau i teianei, ka akameitaki a Iehova ia koe ma te oraanga mataora e tuatua ua atu i roto i te ao ou o te Atua.—Mare. 4:24.
IMENE 28 Kia Riro ei Oa no Iehova
^ para. 5 Ko Iehova to tatou Oa meitaki rava atu. Akaperepere tatou i to tatou pirianga oa kiaia e ka inangaro kia kite meitaki atu iaia. Ka pou tetai tuatau kia kite meitaki i tetai tangata. Mei te reira katoa me inangaro tatou kia akatupu i te pirianga vaitata ki to tatou Oa ko Iehova. No te maata i te angaanga i roto i te oraanga i teia tuatau, akapeea tatou me akanoo i te taime no te akavaitata atu ki to tatou Metua i te rangi, e akapeea tatou e puapinga ai me rave i te reira?