1-2. (a) Eaa tikai te tuatau ka akamaaraara tatou i tetai akaperepere tei mate? (e) Eaa ta Iesu i rave i te po i mua ake ka mate ei aia?

NOATU kua roa te tuatau i mate ei to tatou au akaperepere, ka akamaara ua rai tatou ia ratou. Ka akamaaraara tikai tatou ia ratou i te rā i mate ei ratou.

² I te au mataiti ravarai, ka akaputuputu tatou ma te mirioni ua atu tangata takapini i teianei ao no te akamaara i te rā i mate ei tetai tangata ta tatou i akaperepere—ko Iesu Mesia. (1 Pete. 1:8) Ka akaputuputu tatou ei akamaara iaia, tei oronga mai i tona ora ei atinga oko kia akaora ia tatou mei te ara e te mate. (Mata. 20:28) Te tika, kua inangaro a Iesu i tana au pipi kia akamaara i tona matenga. I te po i mua ake ka mate ei aia, kua akatumu aia i tetai kaikaianga aiai puapinga e kua akaue atu: “E akapera kotou ei manako anga iaku.” *—Luka 22:19.

3. Eaa ta tatou ka uriuri i teia atikara?

³ E iti ua te aronga tei tae mai ki te Akamaaraanga o te mate o Iesu, e manakonakoanga to ratou no te rangi. Inara, ka tae katoa mai e mirioni ua atu tangata e manakonakoanga to ratou no te enua nei. I roto i teia atikara, ka uriuri tatou i te au tumu ka inangaro maata teia nga pupu e rua kia tae mai ki te Akamaaraanga i te au mataiti ravarai. Ka uriuri katoa tatou akapeea tatou e puapinga ai me tae mai. Ka akamata tatou na te uriuri anga i tetai au tumu kia tae mai te aronga akatainuia.

4. Eaa te tumu i kai ei te aronga akatainuia i te varaoa e te inu i te uaina i ko i te Akamaaraanga?

⁴ I te au mataiti ravarai, ka tapapa te aronga akatainuia kia tae ki te Akamaaraanga ei aronga tei kai i te oroa. Eaa  ratou i kai ei i te varaoa e i inu ei i te uaina? Ei pau i te reira, akamanako ana eaa tei tupu i te po openga o to Iesu oraanga i te enua nei. I muri ake i te kaikaianga Pasa, kua akatumu a Iesu i tei kapikiia e ko te Kaikaianga Aiai a te Atu. Kua tuʼa aia i te varaoa e te uaina ki tana au apotetoro tiratiratu e 11 e kua karanga kia kai ratou e kia inu i te reira. Kua tuatua a Iesu kia ratou no runga i nga koremotu e rua—te koreromotu ou e te koreromotu Patireia. * (Luka 22:19, 20, 28-30) Ka akatuera teia nga koreromotu i te mataara no teia au apotetoro e tetai numero iti o te aronga ke kia riro mai ei ui ariki e ei kau taunga i te rangi. (Apo. 5:10; 14:1) Ko te toenga anake o te aronga akatainuia, * e tuanga ratou no teia nga koreromotu e rua e ka kai ratou i te varaoa e ka inu i te uaina i ko i te Akamaaraanga.

5. Eaa ta te aronga akatainuia i kite no runga i to ratou manakonakoanga?

⁵ Teia akaou tetai tumu ka inangaro maata te aronga akatainuia kia tae mai ki te Akamaaraanga: Ka tauturu te reira ia ratou kia akamanako i to ratou manakonakoanga. Kua oronga mai a Iehova i te manakonakoanga umere roa no ratou—kia rauka mai te oraanga mate kore e te kopapa pe kore i te rangi, kia tavini kapiti ratou e Iesu Mesia e te katoaanga o te 144,000 e tei maata rava atu, kia tae ki mua i te aroaro o te Atua ko Iehova! (1 Kori. 15:51-53; 1 Ioa. 3:2) Kua kite te aronga akatainuia e kua patiia ratou kia rauka mai teia tikaanga ngateitei i te rangi. Inara kia rauka ta ratou tutaki i te rangi, ka anoanoia ratou kia vai tiratiratu e tae ua atu ki to ratou mateanga. (2 Timo. 4:7, 8) Ka rekareka maata te aronga akatainuia me akamanako i to ratou manakonakoanga i te rangi. (Tito 2:13) Akapeea ra te “mamoe ke atu”? (Ioa. 10:16) Eaa tetai au tumu ka tae ratou ki te Akamaaraanga?

6. Eaa te tumu ka tae mai ei te au mamoe ke ki te Akamaaraanga i te au mataiti ravarai?

⁶ Ka tae mai te au mamoe ke ki te Akamaaraanga, kare kia kai i te oroa mari ra, ka mataora ua ratou kia tae mai. I te 1938, ko te taime mua teia i patiia ai te aronga e manakonakoanga to ratou no te enua nei kia tae mai ki te Akamaaraanga. Akakite mai te Watchtower o Mati 1, 1938: “Mea meitaki e te tau tikai no te [mamoe ke] kia tae mai ki teia uipaanga e kia akarakara eaa te ka raveia. . . . E atianga rekareka katoa teia no ratou.” Mei te au taeake rai tei patiia ki tetai oroa akaipoipo, ka mataora katoa te au mamoe ke kia tae mai ki te Akamaaraanga.

7. Eaa ra te au mamoe ke i tapapa ai i te akoanga Akamaaraanga?

⁷ Pera katoa, ka akamanako te au mamoe ke i to ratou manakonakoanga. Ka tapapa ratou i te akoanga Akamaaraanga no runga i ta Iesu e ta te 144,000 tutara ka rave no te aronga tiratiratu i te tuatau o te Tutaraanga Tauatini Mataiti. I raro ake i te aratakianga a to ratou Ariki ko Iesu Mesia, ka tauturu teia au tutara i te rangi i te akariro i te enua ei parataito e te tauturu i te tangata kia apa kore akaou. E mea umere tikai no te mirioni ua atu tangata tei tae mai ki te Akamaaraanga kia akamanako i te akatupu anga o te au totou Pipiria no te tuatau ki mua, mei tei akatakaia mai ia  Isaia 35:5, 6; 65:21-23; e Apokalupo 21:3, 4. Me akamanako ia ratou uaorai e to ratou akaperepere i roto i te ao ou, ka ketaketa atu to ratou manakonakoanga no te tuatau ki mua e to ratou inangaro auraka rava kia akamutu i te tavini ia Iehova.—Mata. 24:13; Gala. 6:9.

8. Eaa tetai akaou tumu kia tae mai te au mamoe ke ki te Akamaaraanga?

⁸ Akamanako ana i tetai akaou tumu ka tae mai te au mamoe ke ki te Akamaaraanga. Ka inangaro ratou i te akaari i to ratou aroa e kia turuturu i te aronga akatainuia. Kua totou te Tuatua a te Atua i te pirianga vaitata i rotopu i te aronga akatainuia e te aronga e manakonakoanga to ratou no te enua. Akapeea ra? Ka uriuri tatou i tetai nga akaraanga.

9. Eaa ta te totou ia Zekaria 8:23 e akataka maira no te pirianga i rotopu i te au mamoe ke e te aronga akatainuia?

⁹ E tatau ia Zekaria 8:23. Teia totou, te pēni ra i te tutu manea no te manako o te au mamoe ke i to ratou au taeake e te au tuaine akatainuia. Te akataka ra te tuatua “tetai ngati Iuda” e “kotou” i te pupu okotai—te toenga o te aronga akatainuia. (Roma 2:28, 29) Te akatutu ra te “nga tangata tino ngauru, no roto i te au reo katoa o te pa enua ra” i te au mamoe ke. Ka “opu mai” ratou—ka piri vaitata ratou ki te pae—i te aronga akatainuia na te kapiti atu kia ratou i roto i te akamorianga mou. No reira i te po o te Akamaaraanga, ka akaari te au mamoe ke i to ratou pirianga vaitata ki te aronga akatainuia na te tae anga mai ki te Akamaaraanga.

10. Eaa ta Iehova i rave ei akatupu i te totou ia Ezekiela 37:15-19, 24, 25?

¹⁰ E tatau ia Ezekiela 37:15-19, 24, 25. Kua akatupu a Iehova i teia totou na te topiri anga i te aronga akatainuia ki te au mamoe ke kia angaanga kapiti teia nga pupu. Te taiku ra te totou i nga rakau e rua. Akaaiteia te aronga e manakonakoanga to ratou no te rangi ki te rakau “na Iuda” (te kopu i ikiia ai te au ariki o Iseraela), e ko te aronga e manakonakoanga to ratou no te enua nei, ko ratou te rakau “o Epharaima.” * Ka akataokotai a Iehova i teia nga pupu kia “okotai rai rakau.” Ko te aiteanga, ka tavini taokotai ratou i to ratou Ariki okotai ko Iesu Mesia. I te au mataiti ravarai, ka tae mai te aronga akatainuia e te au mamoe ke ki te Akamaaraanga, kare ei nga pupu takake mari ra, ei “okotai oki anana” i raro i te “okotai oki tiaki.”—Ioa. 10:16.

11. Eaa te mataara maata ka tauturu “te mamoe” tei taikuia ia Mataio 25:31-36, 40 i te au taeake o Iesu?

¹¹ E tatau ia Mataio 25:31-36, 40. Te akatutu maira “te mamoe” i roto i teia parapore i te aronga tuatua tika i te tuatau openga e manakonakoanga to ratou i te enua nei—koia oki te au mamoe ke. Ka tauturu tiratiratu ratou i te toenga o to Iesu au taeake akatainuia. Tetai mataara maata, na te tauturu anga kia akono i tetai apainga teiaa—te angaanga tutu aere i te ao katoa e te akariro i te tangata ei pipi.—Mata. 24:14; 28:19, 20.

12-13. Eaa atu tetai au mataara ka tauturu te au mamoe ke i to Iesu au taeake?

¹² I te au mataiti ravarai, i te au epetoma i mua ake i te Akamaaraanga, ka turuturu te au mamoe ke i te au taeake o Iesu na te rave pu tikai i tetai akakoroanga puapinga i te ao katoa ei pati i te tangata kia aere mai ki te Akamaaraanga. (Akara i te pia “ Te Parani ra Ainei Koe no te Tuatau Akamaaraanga?”) Ka tauturu katoa ratou i te rave i te  au akanoonooanga no te Akamaaraanga i roto i te au putuputuanga katoatoa takapini i teianei ao, noatu kare e aronga akatainuia i roto i te maataanga o teia au putuputuanga. Mataora tikai te au mamoe ke i te tauturu i te au taeake o Iesu na roto i teia au mataara. Kua kite teia au mamoe e te manako ra a Iesu i ta ratou e rave nei no tona au taeake akatainuia mei te mea e, kua pera ratou iaia.—Mata. 25:37-40.

¹³ Eaa tetai au tumu ke ka tae tatou ki te Akamaaraanga noatu eaa to tatou manakonakoanga?

14. Akapeea a Iehova e Iesu te akaari anga i te aroa maata no tatou?

¹⁴Akameitaki tatou ia Iehova e Iesu no te aroa ta raua i akaari mai no tatou. E maata te mataara tukeke i akaari mai ei a Iehova i tona aroa no tatou inara, okotai mataara puapinga rava atu. Kua akaari to tatou Atua i tona aroa maata rava atu e te noinoi kore na te tono anga i tana Tamaiti akaperepere ki te enua nei kia mamae e kia mate no tatou. (Ioa. 3:16) Pera katoa kua akaari a Iesu i tona aroa maata na te oronga puareinga ua i tona oraanga no tatou. (Ioa. 15:13) Kare rava e rauka ia tatou i te tutaki ia Iehova e Iesu no te aroa ta raua i akaari mai kia tatou. Inara ka akaari tatou i to tatou tu akameitaki na te akamareka anga ia raua i roto i to tatou oraanga i te au rā ravarai. (Kolo. 3:15) No reira ka tae tatou ki te Akamaaraanga ei akamaara i to raua aroa no tatou e kia akaari i to tatou aroa no raua.

15. Eaa te tumu i akaperepere maata ai te aronga akatainuia e te au mamoe ke i te apinga aroa o te oko?

¹⁵Akaperepere tikai tatou i te apinga aroa o te oko. (Mata. 20:28) Akaperepere maata te aronga akatainuia i te oko no te mea kua akatumuia to ratou manakonakoanga manea ki runga i te reira. No to ratou akarongo i te atinga o Iesu, kua akatika a Iehova ia ratou ei aronga tuatua tika e kua akatamariki aia ia ratou ei tamariki nana. (Roma 5:1; 8:15-17, 23) Āriki rekareka katoa te au mamoe ke i te oko. No to ratou akarongo i te toto akamaringiia o Iesu, e turanga mā to ratou i mua i te Atua, ka akamori ratou iaia e e manakonakoanga to ratou kia “aere mai mei roto i te mate maata.” (Apo. 7:13-15) Tetai mataara ka akaari te aronga akatainuia e te au mamoe ke i to ratou tu āriki rekareka no te oko, kia tae ratou ki te Akamaaraanga i te au mataiti ravarai.

16. Eaa tetai akaou tumu kia tae tatou ki te Akamaaraanga?

¹⁶ Tetai akaou tumu ka inangaro tatou kia tae ki te Akamaaraanga, koia oki inangaro tatou kia akarongo kia Iesu. Noatu eaa to tatou manakonakoanga no te tuatau ki mua, ka akarongo tatou ki te akauenga a Iesu i te po i akamata ai aia i te Akamaaraanga: “E akapera kotou ei manako anga iaku.”—1 Kori. 11:23, 24.

17. Akapeea te Akamaaraanga me tauturu ia tatou kia akavaitata atu kia Iehova?

¹⁷Ka akavaitata atu tatou kia Iehova. (Iako. 4:8) Mei ta tatou i apii mai, ka riro te Akamaaraanga ei tuatau no te akamaaraara i te manakonakoanga ta Iehova i oronga mai, e kia akamanako oonu i tona aroa maata no tatou. (Iere. 29:11; 1 Ioa. 4:8-10) Me akamanako i to tatou manakonakoanga tinamou no te tuatau ki mua e to te Atua aroa mou no tatou, ka akaoonu atu te reira i to tatou aroa no Iehova e ka akaketaketa i to tatou pirianga kiaia.—Roma 8:38, 39.

18. Me akamanako oonu i to Iesu akaraanga, eaa ta tatou ka akakeuia kia rave?

 ¹⁸Akakeuia tatou kia aru i te akaraanga o Iesu. (1 Pete. 2:21) I te au rā i mua ake i te Akamaaraanga, ka akamou tatou ki runga i te au tua Pipiria no runga i to Iesu epetoma openga i te enua nei, tona matenga e tona tuakaouanga. E i te aiai o te Akamaaraanga, ka akamaara te akoanga ia tatou i to Iesu aroa no tatou. (Ephe. 5:2; 1 Ioa. 3:16) Me tatau tatou no runga i to Iesu akaraanga noinoi kore e me akamanako oonu i te reira, ka akakeuia tatou kia “akaarite i [to tatou] uaorai aerenga mei tona katoa ra aerenga e tikaʼi.”—1 Ioa. 2:6.

19. Akapeea tatou me vai tamou ua i roto i te aroa o te Atua?

¹⁹Inangaro tatou kia vai tamou ua i roto i te aroa o te Atua. (Iuda 20, 21) Ka vai tamou tatou i roto i te aroa o te Atua me tauta pakari i te akarongo kiaia, te akatapu i tona ingoa e te akarekareka i tona ngakau. (Mase. 27:11; Mata. 6:9; 1 Ioa. 5:3) Ka akakeu te Akamaaraanga ia tatou kia inangaro i te akamareka ia Iehova i roto i to tatou oraanga i te au rā katoa mei te mea e, te karanga ra tatou kia Iehova, ‘Inangaro au kia vai tamou ua i roto i toou aroa e tuatau ua atu!’

20. Eaa te au tumu meitaki kia tae tatou ki te Akamaaraanga?

²⁰ Me e manakonakoanga to tatou kia noo e tuatau ua atu i te rangi me kore i te enua nei, e au tumu meitaki teia kia tae tatou ki te Akamaaraanga. Me akaputuputu tatou i te au mataiti ravarai i taua rā ra, ka akamaara tatou i te matenga o to tatou akaperepere ko Iesu Mesia. Mea puapinga, ka akamaara tatou i te aroa maata rava atu—te aroa ta Iehova i akaari mai no tatou na te oronga mai anga i tana Tamaiti ei oko. I teia mataiti, ka raveia te Akamaaraanga i te aiai o te Varaire, Aperira 15, 2022. Akaperepere tatou ia Iehova e Iesu, no reira i te rā o te Akamaaraanga i te mate o Iesu, kare e mea puapinga atu kia tatou mari ra kia tae mai ki te Akamaaraanga.