1-2. Eaa ta tatou ka rave i muri ake i te papetitoanga? Akamārama mai.

 EIA taime ka tamā koe i toou are? Penei i mua ake ka neke atu koe ki reira, ka tamā meitaki koe i te reira. Eaa te ka tupu mai me kare koe e tamā akaou i te are? Ka kite tatou e ka oki akaou mai te repo. No reira, kia mā ua rai toou are, ka tamā putuputu koe i te reira.

² Ka anoano katoaia tatou kia akatikatika ua rai i to tatou manako e to tatou tu. Ae i mua ake ka papetitoia ai, ka tauta pakari tatou i te taui i to tatou oraanga kia ‘tamā tatou ia tatou uaorai i te au viivii katoa o te kopapa e te vaerua.’ (2 Kori. 7:1) Inara, ka anoanoia tatou kia aru i te akoanga a te apotetoro ko Paulo e “kia akaouia oki.” (Ephe. 4:23) Eaa tatou ka akatikatika ua rai ia tatou? No te mea ka taviivii te tu o teianei ao ia tatou. Kia akamareka ua rai ia Iehova, ka akatanotano tatou i to tatou manako, to tatou tu, e to tatou anoano.

3. Eaa te aiteanga kia ‘akaouia to kotou ngakau’? (Roma 12:2)

³ Eaa ta tatou ka rave kia akaou i to tatou ngakau, koia oki kia taui i to tatou aerenga manako? (E tatau ia Roma 12:2.) Te tuatua Ereni tei uriia “te akaou anga i to kotou ngakau” ka tau kia uriia ko te “akatuke anga i to kotou manako.” No reira, kare tatou e rave ua i te au angaanga meitaki i roto i to tatou oraanga. Mari ra, ka akamanako tikai i to tatou tu e kia rave i te au tauianga i roto i to tatou  oraanga kia tau ki to Iehova au turanga. Ka rave putuputu tatou i teia akatikatikaanga.

4. Akapeea tatou me kopae i ta teia ao akakeu anga i to tatou manako?

⁴ Me tae tatou ki te turanga apa kore, ka rauka ia tatou i te akamareka ia Iehova i roto i te au mea ravarai ka rave tatou. No reira ka tauta pakari tatou kia taeria taua akakoroanga. Akara ana i te pirianga i rotopu i ta Paulo tuatua no te akaou anga i to tatou manako e te kite anga i to te Atua anoano ia Roma 12:2. Kare tatou e tuku i teia ao kino kia akakeu ia tatou, ka akara tatou na mua ia tatou uaorai i te akapapu e te tuku ra tatou i to te Atua manako​—kare i to teianei ao—​kia akakeu i to tatou akakoroanga e te au ikianga.

5. Akapeea tatou me akapapu ki to tatou manako e te vaitata maira te rā o Iehova? (Akara i te tutu.)

⁵ Akamanako i tetai akaraanga. Te inangaro ra a Iehova ia tatou kia ‘tamou vaitata ki te manako te taenga mai o taua ra o Iehova ra.’ (2 Pete. 3:12, NW) Ui kia koe uaorai: ‘Te akaari maira ainei toku oraanga e te mārama nei au e kare e roa atu ka ope teia ao kino? Te akaari maira ainei taku au ikianga no te apii e te angaanga e ko te tavini anga ia Iehova te mea puapinga maata i roto i toku oraanga? Te irinaki ra ainei au e ka tauturu mai a Iehova iaku e toku ngutuare tangata, me kare te apiapi maata ra ainei au i te au mea o te kopapa?’ Mareka tikai a Iehova me kite mai aia e te tauta ra tatou i te akono tikai i tona anoano i roto i to tatou oraanga.​—Mata. 6:25-27, 33; Phili. 4:12, 13.

6. Eaa ta tatou ka rave ua atu?

⁶ Ka anoanoia tatou kia akara putuputu i to tatou manako e kia rave tatou i te au tauianga tei anoanoia. Kua akakite a Paulo ki to Korinetia: “E kimi matatio ia kotou uaorai i to kotou akarongo; e akara  matariki ia kotou uaorai.” (2 Kori. 13:5) Te aite anga kia rauka te “akarongo” kare ko te aere ua anga ki te au uipaanga Kerititiano e kia piri ki roto i te angaanga tutu aere. Te kapiti katoa maira i ta tatou e manako ra, anoano ra, e e akakoro ra. No reira ka anoanoia tatou kia akaou i to tatou manako na te tatau anga i te Tuatua a te Atua, te akamanako anga i tana e manako ra e kia rave i te au mea ka anoanoia kia tau ki to Iehova anoano.​—1 Kori. 2:14-16.

7. Mei ta Ephesia 4:31, 32 e akakite maira, eaa ua atu ta tatou ka rave, e eaa i riro ei ei mea ngatā?

⁷ E tatau ia Ephesia 4:31, 32. Tetai taui anga ka rave tatou, koia oki “kia akatangata ou oki” tatou. (Ephe. 4:24) Te kapiti maira teia i te tauta anga pakari. I roto i tetai au tu, ka tauta pakari tatou i te akakore i te au peu kino mei te maru kore, te rotoriri, e te makitakita. Eaa te reira i riro ei ei mea ngatā? No te mea tei ia tatou teia au tu kino. Ei akaraanga, karanga ra te Pipiria e ka ‘akatupu te tangata i te rotoriri’ e te “riri maata.” (Mase. 29:22) Me te tupu ra teia au tu kino ki tetai tangata, penei ka tauta pakari aia i te taui i tona tu, noatu kua papetitoia, mei ta te akaraanga ka aru mai e akaari maira.

8-9. Akapeea to Stephen akaraanga i te akaari mai e ka anoanoia tatou kia kopae i te tu tangata taito?

⁸ Kua ngatā i tetai taeake ko Stephen i te akamaru i tona riri. “Noatu kua papetitoia au,” i nana ai, “kua tauta pakari au i te akamaru i toku riri. Ei akaraanga, i tetai rā ia matou e tutu aere ra mei tetai are ki tetai, kua arumaki atu au i tetai keikeia tei keia i te ratio i roto i toku motoka. Iaku e vaitata ra kiaia, kua titiri aia i te ratio e kua oro. Iaku e akakite ra ki tetai pae akapeea i peke mai ei taku ratio kiaku, kua ui mai tetai tangata pakari o to matou pupu kiaku, ‘E Stephen, eaa taau ka rave me mou ia koe taua tangata ra?’ Kua akamanako au i taua uianga e kua akakeuia au kia tauta pakari i te akatupu i te ʼau.” b

⁹ Mei to Stephen akaraanga e akaari maira, ka tupu viviki mai te tu kino kia tatou, noatu e kua manako tatou e kua kopae tatou i te reira. Me tupu te reira kia koe, auraka e taitaia i te manako anga e e tangata kino koe. Kua āriki katoa te apotetoro ko Paulo i teia: “E kia anoano au i te rave i te mea meitaki ra, te vaitata ua nei te kino iaku i reira.” (Roma 7:21-23) Ka oki ua mai rai teia tu kino ki te au Kerititiano apa katoatoa mei te repo e putunga ra i roto i to tatou are. Ka anoanoia tatou kia vai mā ua. Akapeea tatou me rave i te reira?

10. Akapeea tatou me akakore atu i te au tu tau kore? (1 Ioane 5:14, 15)

¹⁰ E pure kia Iehova no te tu e ngatā ra ia koe i te taui, na te irinaki anga e ka akarongo e ka tauturu mai aia ia koe. (E tatau ia 1 Ioane 5:14, 15.) No te mea kare a Iehova e tangaro i taua tu, ka rauka iaia i te akaketaketa ia koe kia kore e tuku i te ʼau. (1 Pete. 5:10) I teianei, e aru rotai ki taau au pure kia kore koe e rave i te au mea te ka akatupu akaou mai i taua tu taito. Ei akaraanga, e matakite me akarakara i te au teata, tivi me kore te tatau anga i te au tua te akangateitei ra i te tu taito taau e tauta ra i te akakore. Auraka e akamou i toou manako ki runga i te au anoano tau kore.​—Phili. 4:8; Kolo. 3:2.

11. Eaa te au takainga ka rave tatou ei akatupu i te tu tangata ou?

¹¹ Noatu kua akakore koe i te tu tangata  taito, e mea puapinga kia akatupu i te tu tangata ou. Akapeea koe me rave i teia? E iki ei akakoroanga naau i te aru ia Iehova ia koe e apii ra no runga i tona au tu. (Ephe. 5:1, 2) Ei akaraanga, me tatau koe i tetai papaanga Pipiria te akaari maira e kua akakore a Iehova i te ara, ui kia koe uaorai, ‘Te akakore ra ainei au i te ara a tetai ke?’ Me tatau koe no runga i to Iehova tangi aroa no te aronga putaua, ui kia koe uaorai, ‘Aite ainei toku manako no toku au taeake te inangaro ra i te au apinga, e te akaari ra au i te reira na te rave anga i te angaanga?’ Tauta ua rai i te akaou i toou manako na te akatupu anga i te tu tangata ou, ka akaari koe i te tu akakoromaki ia koe e rave ra i te reira.

12. Akapeea a Stephen te kite mai anga i te mana taui anga a te Pipiria?

¹² Aere ua rai kua kite mai a Stephen, tei taikuia i mua ana, e ka rauka iaia i te akatupu i te tu tangata ou. Karanga aia: “Mei toku papetito anga mai, e maata te au mea kino tei tupu kiaku. Kua kite mai au e e meitaki i te akaatea mai mei te au tangata te akakoko maira iaku me kore kia akakore atu i te manamanata i mua ake ka kino atu ei. Maata te au tangata, e taku vaine, tei akameitaki mai iaku no te ariu maru anga au ki teia au manamanata. Kua poitirere rai au! Kare au e akapaapaa nei iaku no teia au tauianga o toku tu. Mari ra, te irinaki nei au e e akakiteanga ïa i te mana taui anga a te Pipiria.”

13. Eaa te ka tauturu ia tatou kia akatupu i te au anoano tau? (Galatia 5:16)

¹³ E tatau ia Galatia 5:16. E tauturu ei ia tatou kia rave i te tika, ka oronga mai a Iehova i tona vaerua tapu. Me apii tatou i te Tuatua a te Atua, te tuku nei tatou ia tatou uaorai i raro ake i te akakeuanga a taua vaerua ra. Ka oronga katoaia mai kia tatou te vaerua tapu me aere tatou ki te au uipaanga. I ko i te akaputuputu anga Kerititiano, ka akapou tatou i te taime ki to tatou au taeake e te au tuaine, te tauta pakari ra ratou i te rave i te mea tika mei ia tatou rai, tei riro ei akamaroiroi anga. (Ebe. 10:24, 25; 13:7) E me pure akatenga tatou kia Iehova e te pati anga kiaia kia tauturu mai ia tatou i roto i tetai au ngai paruparu, ka oronga mai aia i te vaerua tapu ei akaketaketa ia tatou kia patoi atu i te reira. Penei kare teia au angaanga e akangaro atu i te au inangaro, ka tauturu mai ra te reira ia tatou kia kore tatou e rave i taua au anoano ra. Mei ta Galatia 5:16 e karanga ra, ko te aronga te akatupu ra i ta te vaerua kare ratou “e akatupu i to te kopapa ra inangaro.”

14. Eaa i puapinga ai kia akatupu i te au anoano tau?

¹⁴ Me akanoo tatou i tetai papaanga tau no te au angaanga pae vaerua, e mea puapinga kia rave tamou i te reira e kia akatupu i te au anoano tau. No teaa ra? No te mea kare to tatou au enemi e akamutu ana i te patoi mai. Ko te timata anga a taua enemi ra kia rave tatou i te tarevake. E i muri ake te papetito anga penei ka kite mai tatou ia tatou uaorai e reka ra i te au mea te anoanoia ra kia kopae tatou, kapiti mai te pere moni, kai kava me kore te akara i te au mea viivii. (Ephe. 5:3, 4) Karanga tetai taeake mapu Kerititiano: “Ko tetai mea ngatā iaku i te akakore ko toku inangaro i te piri ki tetai tane. Manako au e ka ngaro te reira, inara te tupu ua nei rai taua au manako.” Eaa te ka tauturu ia koe me tupu mai taua inangaro tau kore ra?

15. Eaa ra i riro ei akamaroiroi anga i te kite e ko te au anoano tau kore e mea “matauia ki te tangata nei”? (Akara i te tutu.)

 ¹⁵ Ia koe e patoi ra i te anoano tarevake pakari tikai, e akamaara e kare ko koe anake ua. Karanga ra te Pipiria: “Kare e timata anga i apuku ia koe mari ua tei matauia ki te tangata nei.” (1 Kori. 10:13a, NW) Te karanga ra tetai urianga no teia irava e: “Kare te timataanga i autu ia koe tei tuke ki te tangata nei.” Te tou ra taua tuatua ki te tane e te vaine Kerititiano e noo ra i Korinetia. Mei te reira oki tetai papaki ia ratou, e aronga akaturi, piri tane ki te tane, e te konā kava. (1 Kori. 6:9-11) I toou manako e i muri ake i to ratou papetito anga, kare rava te anoano tau kore e tupu ana kia ratou? Kua tupu te reira kia ratou. Noatu e au Kerititiano akatainuia ratou, e aronga apa ua ratou. Kare e ekoko ka tauta ua rai ratou i te patoi i taua au anoano tau kore i te au taime katoatoa. Ka riro te reira ei akamaroiroi anga kia tatou. No teaa ra? No te mea te akaari maira te reira e noatu eaa te anoano tau kore e tupu nei kia tatou, kua rauka i tetai ke i te patoi atu i te reira. Tika rai, ka rauka ia koe i te vai ‘akarongo turori kore, kua kite oki koe e, tei toou au taeake katoa i te ao nei taua au mate ra.’​—1 Pete. 5:9.

16. Eaa te tu kino ka kopae tatou, e no teaa ra?

¹⁶ E kopae i te manako e kare tetai ua atu tangata e mārama ana i te manamanata te tupu ra kia koe. Me manako koe i te reira ka tupu mai te manako e e puapinga kore ua toou turanga e kare e rauka ia koe i te patoi atu i te au anoano tau kore. Tuke ki ta te Pipiria i akakite mai. Karanga ra te reira: “Te akono meitaki ra te Atua, e kare aia e tuku ia koe kia timataia e tere roa atu i taau ka rauka i te akakoromaki, inara i te pae i te timata anga ka rauka katoa iaia te arataa ki vao e raukaʼi ia koe i te akakoromaki i te reira.” (1 Kori. 10:13e, NW)  No reira, noatu ka pakari mai te anoano tau kore, ka rauka tikai ia tatou i te vai tiratiratu. Ma ta Iehova tauturu anga, ka rauka ia tatou i te tauta pakari kia kore e rave i te tarevake.

17. Noatu e kare e rauka ia tatou i te akakore atu i te au mea tau kore, eaa ta tatou ka rauka i te akatere?

¹⁷ Akamaara ua rai i teia: Ei tangata apa ua, penei kare e rauka ia koe i te kopae i te au anoano tau kore. Inara me tupu mai te reira, ka rauka ia koe i te akakore takiri atu i te reira, mei ta Iosepha i rave i tona oro viviki anga mei te vaine a Potiphara. (Gene. 39:12) Kare koe e anoanoia kia rave i te au mea tau kore!

18-19. Eaa te au uianga ka ui tatou kia tatou uaorai ia tatou e tauta ra i te akaou anga i to tatou ngakau?

¹⁸ Ko te aiteanga kia akaou i to tatou ngakau koia oki, kia akarotai i to tatou manako e to tatou tu ki to Iehova anoano. No reira, e akara matatio tatou ia tatou uaorai e kia ui e: ‘Te akaari ra ainei au e kua kite au e te noo nei tatou i te tuatau rapurapu? Te tere ra ainei au ki mua no te akatupu anga i te tu tangata ou? Te akatika ra ainei au i to Iehova vaerua kia arataki i toku oraanga kia rauka iaku i te kopae atu i te au anoano o te kopapa?’

¹⁹ Ia koe e akatanotano ra i toou tu, e akatau ki toou tere anga ki mua. Me kite mai koe te anoanoia ra te akatikatika anga, auraka e taitaia. Mari ra, e aru i te akoanga i roto ia Philipi 3:16: “Ko ta tatou ngai i rauka maira, na reira tatou i te aere na taua akairo rai, kia akono oki tatou i te mea okotai.” Me aru koe i te reira, te akapapu maira e ka akameitaki mai a Iehova i taau tauta anga kia akaouia toou ngakau.