1-2. (a) Eaa tatou kare e poitirere e ka tupu te au timataanga? (e) Eaa ta tatou ka uriuri i teia atikara?

 EI ITI tangata no Iehova, kare tatou e poitirere me tupu te au timataanga kia tatou. Kua kite tatou mei ta te Pipiria e akakite maira, e ka “na roto tatou i te mate maata e tikaʼi ka o atu ei ki te basileia o te Atua ra.” (Anga. 14:22) Kua kite katoa tatou e kare to tatou au manamanata e ngaro kia tae roa mai te ao ou o te Atua, i reira e “kore rava te mate, e te aue, e te mii; e te mamae oki, e kore katoa ïa.”​—Apo. 21:4.

² Kare a Iehova e paruru ia tatou mei te au timataanga. Ka tauturu ra aia ia tatou kia akakoromaki. Akara i ta Paulo i tuatua ki te au Kerititiano i Roma. Mea mua kua taiku mai aia i te au timataanga e tupu ra kiaia e tona au taeake. E oti kua tata mai aia: “Ka riro ra te re i taua au mea katoa nei ia tatou i tei aroa mai ia tatou nei.” (Roma 8:35-37) Tera te aiteanga ka rauka ia Iehova i te akameitaki ia koe noatu e te tupu ra te au timataanga. Akara tatou akapeea a Iehova i te tauturu anga ia Iosepha kia meitaki mai e akapeea Aia me tauturu ia koe.

3. Eaa te taui anga poitirere tei tupu i roto i to Iosepha oraanga?

³ Akaari a Iakobo e kua akaperepere tikai aia i tana tamaiti ko Iosepha. (Gene. 37:3, 4) No te reira, kua vareae te au tamariki tamaroa mua a Iakobo i to ratou teina. Te rauka anga te atianga ia ratou, kua oko atu ratou ia Iosepha ki  tetai pupu aronga okooko o Midiana. Kua apai atu te reira pupu aronga ia Iosepha e anere kiro mita te mamao ki Aiphiti, i reira kua oko akaou ratou iaia​—kia Potiphara, te rangatira vaeau o Pharao. Kua taui viviki to Iosepha oraanga, mei tetai tamaiti akaperepereia e tona metua tane ki te turanga tuikaa ki te tangata Aiphiti!​—Gene. 39:1.

4. Eaa te au timataanga ka tupu kia tatou mei to Iosepha rai?

⁴ Karanga te Pipiria e e “tupu ana te au mea kino ki te katoatoa.” (Kohe. 9:11, Holy Bible​—Easy-to-Read Version) E tupu ana te manamanata kia tatou “mei ta te tangata nei” i matau—​te au timataanga ki te au tangata. (1 Kori. 10:13) Penei te mamae ra tatou no te mea e pipi tatou na Iesu. Ei akaraanga, ka aviriia tatou, ka patoiia, e ka takinokinoia no to tatou akarongo. (2 Timo. 3:12) Noatu toou timataanga, na Iehova koe e akameitaki atu. Akapeea aia i te akameitaki anga ia Iosepha?

5. Eaa ta Potiphara i kite mai e kua akameitakiia a Iosepha? (Genese 39:2-6)

⁵ E tatau ia Genese 39:2-6. Kua kite mai a Potiphara no runga ia Iosepha e e tangata meitaki aia e te maroiroi i te angaanga. Kua kite katoa aia i te tumu. Kua kite a Potiphara e “tei iaiā Iehova; e te au mea katoa [ta Iosepha] i rave ra, kua akamanuia ïa.” b I te openga ra, kua iki taua tangata Aiphiti ia Iosepha ei rima raverave nona. E kua riro katoa a Iosepha ei tangata maata i roto i tona are. Tei tupu mai? Kua puapingaia a Potiphara.

6. Eaa to Iosepha manako i tona turanga?

⁶ Akamanako ana i te reira turanga mei to Iosepha manako. Eaa tikai tana i inangaro maata? Kia akaraia mai ainei e kia akameitakiia e Potiphara? Te inangaro ra a Iosepha kia tukunaia aia e kia oki ki tona metua tane. Noatu te au akameitakianga tei rauka iaia i roto i te are o Potiphara, e tangata tuikaa a Iosepha i raro i tetai akaaere. Kare a Iehova i akakeu ana ia Potiphara kia tuku ia Iosepha kia aere. Kare e roa atu ka taui akaou to Iosepha turanga ma te kino tikai.

7. Na teea tu i kino roa atu ei to Iosepha turanga? (Genese 39:14, 15)

⁷ Tei akakiteia mai i roto ia Genese pene 39, kua akainangaro te vaine a Potiphara ia Iosepha e kua tauta putuputu i te akameamea iaia. I te au taime ravarai, kua patoi a Iosepha. E aere ua rai, kua riri te vaine a Potiphara ia Iosepha e kua akaapa e kua moe a Iosepha kiaia. (E tatau ia Genese 39:14, 15.) Te kite anga mai a Potiphara i teia, kua pei aia ia Iosepha ki roto i te are auri, i reira aia e noo ei no tetai au mataiti. (Gene. 39:19, 20) Mei teaa rai tona turanga i roto i te are auri? Te tuatua Epera ta Iosepha i taiku no te “vaarua” te aiteanga e “ana,” e “rua,” e ngai poiri e kua taitaia aia i tona turanga. (Gene. 40:15) Akakite katoa mai te Pipiria e kua tapekaia te vaevae o Iosepha e tei roto katoa tona kaki i te auri. (Sala. 105:17, 18) Kua kino roa atu to Iosepha turanga. Mei tetai tangata tuikaa irinakiia aia ki tetai mouauri kino.

8. Noatu e ka kino atu te timataanga, eaa ta tatou i papu?

⁸ Kua ō ana koe ki roto i tetai turanga taitaia tikai noatu taau pure akatenga? Ka tupu rai teia. Kare a Iehova e paruru ia tatou mei te au timataanga i roto i to Satani ao. (1 Ioa. 5:19) Noatu rai, ka papu ia koe: Te kite maira a Iehova i toou turanga, e te tangi maira aia ia koe. (Mata. 10:29-31; 1 Pete. 5:6, 7) Pera katoa, kua taputou mai aia: “Kare rava au e akaruke atu ia koe, kare oki au e taka ke ia koe, kare, kare rava atu.” (Ebe. 13:5) Ka tauturu a Iehova ia koe kia akakoromaki me akaraanga puapinga kore toou turanga. Akara ana tatou i to Iosepha turanga.

9. Eaa te akaari maira e tei ia Iosepha a Iehova i tona tuatau i roto i te are auri? (Genese 39:21-23)

⁹ E tatau ia Genese 39:21-23. Iaia i roto i teia turanga kino, kua akameitaki ua rai a Iehova ia Iosepha. Akapeea? Aere ua rai, kua irinaki te rangatira tiaki are auri ia Iosepha e kua akangateitei iaia, mei ia Potiphara rai. Kua akariro te rangatira tiaki are auri ia Iosepha ei tangata maata ki te au mouauri. Te akakite maira te Pipiria e “kare rava taua tiaki are tapekaanga ra i akara ua atu i te au mea katoa i [to Iosepha] rima ra.” E mea ou tei tupu ei akamanako anga na Iosepha​—koia oki kia angaanga maroiroi. E tupuanga umere tikai! Akapeea i rauka ai i tetai mouauri tei akaapaia no te moe ki te vaine a tetai tangata taoonga i orongaia ai tetai turanga meitaki? Okotai ua rai tumu. Mei ta Genese 39:23 e karanga ra, “Tei [ia Iosepha] oki a Iehova, e tana i rave ra, na Iehova ïa i akariro ei mea meitaki.”

10. Akamārama mai i te tumu i manako ei a Iosepha kare aia i meitaki ana i te au mea katoa tana i rave.

¹⁰ Akamanako ana i te reira turanga mei to Iosepha manako. I toou manako i muri mai i te pikikaaia anga aia e kua peiia ki roto i te are auri, kua manako meitaki ainei a Iosepha i te au mea katoa tana i rave? Eaa tikai ta Iosepha e inangaro ra? Kia mareka ainei te rangatira tiaki are auri iaia? Papu e kua inangaro a Iosepha e kia akakoreia tana apa e kia akarangatiraia. Kua pati aia ki te tangata mouauri ka akaruke i te are auri kia tuatua nona kia Pharao e kia rauka katoa iaia i te akaruke. (Gene. 40:14) Inara, kare te reira tangata i tuatua ana kia Pharao. No te reira, kua noo ua atu a Iosepha ki roto i te are auri e rua akaou mataiti. (Gene.  40:23; 41:1, 14) Noatu rai, kua akameitaki ua a Iehova i tona aerenga. Akapeea?

11. Eaa tei rauka ia Iosepha mei ia Iehova, akapeea teia i te akatupu anga i ta Iehova akakoroanga?

¹¹ Ia Iosepha i roto i te are auri, kua akatupu a Iehova e kia moe te ariki o Aiphiti e rua moemoea rikarika. Inangaro tikai a Pharao i te kite i te aiteanga o te reira. I te kite mai anga te ariki e ka rauka ia Iosepha i te akamārama mai i te au moemoea, kua tonoia aia kia aere mai. Ma te tauturu a Iehova, kua akakite a Iosepha i te aiteanga o te moemoea e kua akakite kia Pharao i tana ka rave. Tona kite anga e tei ia Iehova teia mapu tane, kua iki a Pharao ia Iosepha ei tangata akaaere i te au kai no Aiphiti katoa. (Gene. 41:38, 41-44) I muri maira, kua tupu te onge kino ki te au enua katoa i Aiphiti e to Kanaana, te ngai e noo ra to Iosepha ngutuare tangata. I reira kua rauka ia Iosepha te atianga no te akaora i tona ngutuare e kia akaora katoa i te kopu ka na roto mai te Mesia.

12. Na teea au mataara i akameitaki ei a Iehova i to Iosepha aerenga?

¹² Akamanako ana i te au tupuanga tukeke i roto i to Iosepha oraanga. Naai i akakeu ia Potiphara kia akamanako meitaki ia Iosepha, e tavini ua nei? Naai i akakeu i te rangatira tiaki o te are auri kia akono ia Iosepha, e tangata mouauri ua nei? Naai i akakeu kia moe a Pharao i te au moemoea rikarika e kua oronga i te tikaanga kia Iosepha kia akamārama atu i te reira? Naai i akakeu e kia ikiia a Iosepha ei tangata akaaere i te au kai o Aiphiti? (Gene. 45:5) Akaraanga na Iehova i akameitaki i te au mea katoa no Iosepha. Aere ua rai, kua taui a Iehova i te au angaanga kino a te ai tuakana o Iosepha ei ravenga kia rauka Iaia i te akatupu i Tona akakoroanga.

13. Ka tauturu mai ainei a Iehova ia tatou e na roto ra i te au turanga ngatā? Akamārama mai.

¹³ Eaa ta tatou ka apii mai mei te akaraanga o Iosepha? Ka tauturu ainei a Iehova ia tatou e na roto ra i te au turanga ngatā? Te akatere ra ainei aia i te au mea katoa i roto i to tatou oraanga, e e tumu rai tetai i tupu ei te au mea kino? Kare, kare te  Pipiria e apii ana i te reira. (Kohe. 8:9; 9:11) Inara, kua kite tatou i teia: Me tupu te timataanga kia tatou, te kite maira a Iehova e te akarongo maira i ta tatou kapiki anga. (Sala. 34:15; 55:22; Isa. 59:1) Tei maata atu, ka tauturu a Iehova ia tatou kia akakoromaki i te au turanga ngatā. Akapeea?

14. Akapeea a Iehova me tauturu ia tatou i te au tuatau ngatā?

¹⁴ Tetai mataara e tauturu mai ana a Iehova ia tatou koia oki na roto i te reo akapumaana e te akamaroiroi anga, i te taime tau tikai. (2 Kori. 1:3, 4) Kua tupu teia kia Eziz, e taeake i Turkmenistan tei akautungaia e rua mataiti i roto i te are auri no tona akarongo. “I te popongi o toku akavaanga,” i nana mai ei, “kua akaari mai tetai taeake i teia irava Isaia 30:15 kiaku, te na ko ra: ‘Tei te akatupua ua e te irinaki e maroiroi ei kotou.’ Kua tauturu teia irava iaku kia noo maru e kia irinaki kia Iehova no te au mea katoa. Na te akamanako anga i teia irava kua riro ei tauturu iaku kia akakoromaki i roto i te are auri.” Ka rauka ainei ia koe i te akamanako i tetai tuatau i toou oraanga kua akaora a Iehova ia koe na te akapumaana anga e te akamaroiroi anga ia koe i te tuatau tau tikai?

15-16. Eaa taau i kite mai mei to Tori akaraanga?

¹⁵ I muri ua ake i te akamanako anga tatou i tetai turanga ngatā i kite ei tatou i ta Iehova tauturu kia akakoromaki tatou. Kua tupu teia ki te tuaine ko Tori. Kua tuia tana tamaiti ko Mason, e te maki cancer no tetai ono mataiti e kua mate aia. Kua mamae atingakau tikai a Tori. Karanga mai aia, “Kare atu e turanga mamae kino kiaku ei metua vaine mei teia rai.” I nana ei, “Papu iaku e ka āriki katoa te au metua i te kite anga i ta ratou tamaiti e mamae ra, e e kino roa atu ïa i te ka tupu kiaia.”

 ¹⁶ Noatu te kino o te reira tumatetenga kua akamanako a Tori i muri mai i te au ravenga ta Iehova i rave kia akakoromaki aia. “I te akaraanga,” karanga mai aia, “kua kite au i to Iehova rima aroa i te tuatau e maki ra taku tamaiti. Kua kino tikai te maki o Mason e kare e maroiroi i te aravei i te au manuiri, ka aere mai te au taeake e te au tuaine e rua ora te mamao ki te are maki. Te tiaki ua maira tetai i te ngai no te manuiri​—tei papa ua i te tauturu mai e te inangaro ra. Pera katoa i te pae kopapa kua akonoia maua. I te au tuatau kino tikai, kare maua i ngere ana i te meitaki.” Kua oronga tikai mai a Iehova kia Tori i tana i anoano ra kia akakoromaki, e pera katoa kia Mason.​—Akara i te pia “ Kua Oronga Tikai Mai a Iehova i ta Maua i Anoano Ra.”

17-18. Eaa te ka tauturu ia tatou kia kite e kia āriki i ta Iehova tauturu i te au tuatau tumatetenga? (Salamo 40:5)

¹⁷ E tatau ia Salamo 40:5. Te akakoroanga o tetai tangata piki maunga kia taeria iaia te take maunga. Inara, e maata te au ngai akangaroi anga iaia e aere ra ki reira, ka tāpu e ka akamanako i tana e akara ra. Pera katoa, e tāpu marie e te akamanako akapeea a Iehova i te akameitakianga i toou aerenga ia koe e akakoromaki ra i te au turanga ngatā. I te openga o te au rā tataki tai, e ui kia koe: ‘Na teea tu i kite ei au i te akameitakianga a Iehova i teia rā? Noatu e te tupu nei rai te timataanga, akapeea a Iehova i te tauturu anga mai iaku kia akakoromaki?’ Akara me ka rauka ia koe i te kite e tai akameitaki anga no ko mai ia Iehova tei akapuapinga i toou aerenga.

¹⁸ E tika, penei te pure ra koe kia ope toou timataanga. E mea mārama uaia e te tau. (Phili. 4:6) Inara kia kite katoa tatou i te au akameitakianga i teianei. No te mea kua taputou mai a Iehova i te akamatutu ia tatou e te tauturu kia akakoromaki. No reira auraka e ngaropoina e te tauturu maira a Iehova ia koe. I reira koe e kite ei ia Iehova i te akameitakianga ia koe, mei ia Iosepha rai, kia autu i te au tumatetenga.​—Gene. 41:51, 52.