1-2. (a) Eaa te tu ka akaari tatou me akamanako ana i to Iesu oraanga e te angaanga tutu aere? (e) Eaa ta tatou ka uriuri i teia atikara?

 ME MATE to tatou akaperepere, ka mii tikai tatou iaia! I te akamataanga ka mamae ngakau tatou me kite i te au rā i vaitata atu ei ki tona mate, i tona mamae anga i mua ake ka mate ei aia. I muri mai ra, ka kite akaou tatou i te rekareka me akamaara tatou i tana au apiianga, tana i rave e i tuatua no te akamaroiroi ia tatou e kia kata kata akaou.

² Mei te reira rai, ka maromaroa tatou i te tatau no runga i to Iesu mamae anga e tona mate. I te tuatau o te Akamaaraanga, ka akamanako oonu tatou i te puapinga o tona atinga oko. (1 Kori. 11:24, 25) Ka rekareka maata tatou i te akamanako i te au mea ta Iesu i tuatua e i rave iaia i te enua nei. Ka akamaroiroiia tatou kia kite i tana e rave nei e te ka rave a te tuatau ki mua. Na te akamanako anga i teia e tona inangaro ia tatou ka akakeu ia tatou kia akaari i te ngakau aroa na roto i te au mataara tukeke, mei ta tatou ka kite i teia atikara.

3. Eaa te au tumu ka akaari tatou i te ngakau aroa no te atinga oko?

³ Ka akaari tatou i te ngakau aroa me akamanako ana i to Iesu oraanga e tona mate. Iaia e rave ra i tana angaanga tutu aere, kua apii a Iesu ki te tangata i te au akameitakianga ka akatupu te Patireia o te Atua. Ka āriki rekareka  tatou i teia au tuatua mou o te Patireia. Akameitaki maata tatou i te atinga oko no te mea kua akatuera te reira i tetai pirianga oa kia Iehova e Iesu. Ko te aronga tei akarongo kia Iesu tei ia ratou katoa te manakonakoanga no te ora mutu kore e te kite akaou i to ratou aronga akaperepere. (Ioa. 5:28, 29; Roma 6:23) Kare a tatou angaanga i rave kia akameitakiia no teia; kare katoa e rauka ia tatou i te tutaki i te Atua e Karaiti no ta raua i rave no tatou. (Roma 5:8, 20, 21) Ka rauka ra ia tatou i te akaari i to tatou ngakau aroa no raua. Akapeea ra?

4. Akapeea a Maria Magadala te akaari anga i te ngakau aroa no ta Iesu i rave nona? (Akara i te tutu.)

⁴ Akamanako ana i te akaraanga o te vaine ngati Iuda ko Maria Magadala. E turanga kino tona e no roto iaia e itu temoni. Kua manako paa aia e kare atu e ravenga ke. Akamanako ana i tona ngakau aroa i te akaora anga a Iesu iaia mei te au vaerua kino! Kua akakeu tona ngakau aroa iaia kia riro mai ei pipi na Iesu e kia akapou i tona taime, maroiroi, tana au apinga ei tauturu i te angaanga tutu aere. (Luka 8:1-3) Noatu kua āriki ngakau aroa a Maria i ta Iesu i rave, kare ra aia i kite ake i ta Iesu apinga aroa ka rave a muri mai. Ka oronga mai aia i tona oraanga no te tangata ravarai, “kia kore e mate te akarongo iaia” kia rauka ra te ora mutu kore. (Ioa. 3:16) Noatu rai, kua akaari a Maria i tona ngakau aroa no Iesu na te vai tiratiratu anga kiaia. Ia Iesu e mamae ra i runga i te rakau, kua tu a Maria i te pae mai, i te akamaroiroi iaia e tetai aronga. (Ioa. 19:25) I te mate anga a Iesu, kua apai mai a Maria e tetai au vaine i te manongi ki tona menema. (Mare. 16:1, 2) Kua akameitakiia to Maria tu tiratiratu. Kua mataora aia i te aravei ia Iesu tei akatuia mai e kua tuatua kiaia​—e akameitakianga kare tetai au pipi i kite ana.​—Ioa. 20:11-18.

5. Akapeea tatou me akaari i te ngakau aroa no ta Iehova e Iesu i rave?

 ⁵ Ka rauka katoa ia tatou i te akaari i te ngakau aroa kia Iehova e Iesu na te akapou anga i to tatou taime, maroiroi, e te moni kia tauturu i te au angaanga no te Patireia. Ei akaraanga, ka rauka ia tatou i te oronga ia tatou uaorai no te tauturu e te akonokono i te au are uipaanga no te akamorianga ma.

6. Eaa tatou ka karanga ai e e apinga aroa te atinga oko kia tatou tataki tai?

⁶ Me akamanako tatou i te oonu o to Iehova e Iesu aroa no tatou, ka akakeuia tatou kia akaperepere katoa ia raua. (1 Ioa. 4:10, 19) Ka akaperepere maata tatou ia raua me kite tatou e kua mate a Iesu no tatou tataki tai. Kua akakite mai a Paulo i teia e kua akaari mai i tona ngakau aroa i te tataanga aia ki to Galatia e: “Te Tamaiti a te Atua . . . ko tei aroa mai iaku, e kua oronga mai iaia uaorai noku.” (Gala. 2:20) No te atinga oko, kua akavaitata mai a Iehova ia koe kiaia kia riro koe ei oa nona. (Ioa. 6:44) Kare ainei e kua akapumaanaia koe e kua kite mai a Iehova i te meitaki i roto ia koe e kua tutaki i te reira ma te oko kia riro koe ei oa nona? Kare ainei e kua akamatutuia koe e toou inangaro ia Iehova e Iesu? Ka meitaki tatou i te ui, ‘Ka akakeu te reira aroa iaku kia rave i teaa?’

7. I roto i te tutu, akapeea tatou me akaari i to tatou aroa no Iehova e Iesu? (2 Korinetia 5:14, 15; 6:1, 2)

⁷ Ka akakeu to tatou inangaro i te Atua e Karaiti kia aroa i tetai ke. (E tatau ia 2 Korinetia 5:14, 15; 6:1, 2.) Ko tetai mataara ka akaari tatou i te aroa na te rave maroiroi anga i te angaanga tutu aere. Ka tuatua tatou ki tetai ua atu ka  aravei tatou. Kare tatou e iriiri i tetai noatu tona iti tangata, kopu tangata, turanga i te pae moni, e te ngai i aere mai ei aia. Na teia mataara, te angaanga rotai ra tatou i te akatupu i to Iehova akakoroanga ko “tei inangaro i te tangata katoatoa kia ora, e kia rauka te kite i te tuatua-mou.”​—1 Timo. 2:4.

8. Akapeea tatou me aroa i to tatou au taeake e te au tuaine?

⁸ Ka inangaro katoa tatou i te Atua e Karaiti na te aroa ua anga i te au taeake e te au tuaine. (1 Ioa. 4:21) Ka akamanako tatou i ta ratou i anoano e ka tauturu ia ratou i te au tuatau tumatetenga. Ka akapumaana tatou ia ratou me mate to ratou akaperepere, ka atoro ia ratou me rokoia e te maki, e ka akamaroiroi ia ratou me ngakau taitaia. (2 Kori. 1:3-7; 1 Tesa. 5:11, 14) Ka pure ua rai tatou no ratou, i te akamaara anga e ka riro “te pure a te tangata tuatua-tika i akatupu mouia ki roto ra, e mea manuia maata ïa.”​—Iako. 5:16.

9. Eaa tetai mataara ka aroa tatou i to tatou au taeake e te au tuaine?

⁹ Ka aroa katoa tatou i te au taeake e te au tuaine na te akatupu anga i te ’au kia ratou. Ka aru tatou i to Iehova akaraanga no te akakore i te ara. Me kua puareinga ua a Iehova i te tuku kia mate tana Tamaiti no ta tatou ara, kore i reira tatou e akakore ua atu i te ara a to tatou au taeake e te au tuaine me ara mai ia tatou? Kare tatou e inangaro kia aite mei te tavini kino i roto i ta Iesu parapore. Noatu kua akakore tona pu i tana āka kaiou, kare aia i akaari i teia tu ki tetai tavini e iti ua tana kaiou. (Mata. 18:23-35) Me tupu te manamanata ki tetai i roto i te putuputuanga, ka akatupu ainei koe i te ’au i mua ake ka aere ei koe ki te Akamaaraanga? (Mata. 5:23, 24) Me pera koe te akaari ra koe i te inangaro ia Iehova e Iesu.

10-11. Akapeea te aronga pakari me akaari i te aroa no Iehova e Iesu? (1 Petero 5:1, 2)

¹⁰ Akapeea te aronga pakari me akaari i to ratou aroa kia Iehova e Iesu? Na te akono anga i te au mamoe a Iesu. (E tatau ia 1 Petero 5:1, 2.) Kua akakite meitaki a Iesu i teia manako ki te apotetoro ko Petero. I muri mai te kopae anga a Petero ia Iesu e toru taime, kua akakeuia a Petero kia akapapu i tona aroa no Iesu. I muri mai i tona tuakaouanga, kua ui a Iesu kia Petero e: “E Simona a Iona e, te anoano na koe iaku?” Papu ia tatou ka rave ua a Petero i tetai angaanga ei akaari i tona inangaro akaperepere i tona Pu. Kua akakite a Iesu kiaia: “Ka angai i taku au punua mamoe.” (Ioa. 21:15-17) No te katoa anga o tona oraanga, kua akono maru a Petero i te mamoe a te Atu, te akaari anga i tona inangaro ia Iesu.

¹¹ E te aronga pakari, i te tuatau o te Akamaaraanga, akapeea kotou me akaari i te puapinga o ta Iesu tuatua kia Petero? Ka akaperepere maata kotou ia Iehova e Iesu na te rave putuputu i te angaanga tiaki e te aravei i te aronga paruparu kia oki mai kia Iehova. (Eze. 34:11, 12) E aravei katoa i te aronga apii Pipiria e te aronga ou tei aere mai ki te Akamaaraanga, na te āriki maoraora anga ia ratou ka riro mai ei au pipi.

12. Eaa i riro ei ei akamaroiroi anga kia akamanako tatou i ta Iesu au tuatua i te po i mua ake ka mate ei aia? (Ioane 16:32, 33)

¹² I te po i mua ake ka mate ei aia, kua akakite a Iesu ki tana au pipi: “E tumatetenga to kotou i teianei ao: ka akamaroiroi  ra, kua riro te re o teianei ao iaku.” (E tatau ia Ioane 16:32, 33.) Eaa tei tauturu ia Iesu kia ngakau toa i mua i tona au enemi e kia tiratiratu? Kua irinaki aia ia Iehova. Te kite anga e ka tupu te reira timataanga ki tana au pipi, kua pati a Iesu kia Iehova kia akara mai ia ratou. (Ioa. 17:11) Eaa i riro ei teia ei akamaroiroi anga ia tatou? No te mea e ririnui atu a Iehova i to tatou au enemi. (1 Ioa. 4:4) Kare e mea e ngaro iaia. Papu ia tatou me irinaki tatou kia Iehova, ka rauka ia tatou i te autu i to tatou mataku e kia ngakau toa.

13. Akapeea a Iosepha no Arimatea te akaari anga i te tu ngakau toa?

¹³ Akamanako ana i te akaraanga o Iosepha no Arimatea. E tangata akangateiteiia e te ngati Iuda. E mema aia no te Sunederi, e ngai akavanui o te ngati Iuda. I te tuatau e tutu aere ra a Iesu, kare a Iosepha i akaari ana i te tu ngakau toa. Karanga a Ioane e e “pipi oki aia na Iesu, i mou poiri ua ra i te mataku i te ngati Iuda ra.” (Ioa. 19:38) Noatu te reka ra a Iosepha i te au karere Pipiria, kua uuna aia i tona irinakianga ia Iesu. Kare e ekoko anga kua mataku aia e ka ngere iaia tona turanga teitei i te ngai tangata. Noatu tona turanga, te akakite maira te Pipiria i muri ake i te mate anga a Iesu, e “ma te mataku kore, e pati atura [a Iosepha] i te kopapa o Iesu.” (Mare. 15:42, 43) Teianei kare a Iosepha i uuna i tana angaanga tauturu ia Iesu.

14. Eaa taau ka rave me mataku koe i te tangata?

¹⁴ Kua kite ainei koe i to Iosepha tu mataku i te tangata? I ko i te apii, i te angaanga, ka akamā ainei koe i te akakite e e Au Kite koe no Iehova? Te kopae ra ainei koe kia riro mai ei papuritia me kore kia papetitoia penei no ta tetai aronga ka manako mai? Auraka e tuku i te reira kia tāpu ia koe kia rave i taau i kite e e mea puapinga. E pure akatenga kia Iehova. E pati kiaia kia oronga mai i te tu ngakau toa kia rave i tona anoano. Ia koe e kite ra ia Iehova e pau ra i taau pure, ka matutu ua atu koe e ka ngakau toa.​—Isa. 41:10, 13.

15. Muri ake i te mama mai anga a Iesu ki tana au pipi, eaa ta te rekareka i akakeu ia ratou kia rave? (Luka 24:52, 53)

¹⁵ Kua maromaroa te au pipi i te mate anga a Iesu. Ka akamanako ana ia koe i roto i to ratou turanga. Kua takake to ratou oa akaperepere e kua manako katoa ratou e kare o ratou manakonakoanga. (Luka 24:17-21) I te mama mai anga a Iesu  kia ratou, akapou aia i te tuatau i te tauturu kia mārama ratou i tana i akatupu no te au totou Pipiria. Kua oronga aia i tetai angaanga puapinga kia rave ratou. (Luka 24:26, 27, 45-48) I te aere anga a Iesu ki te rangi e 40 rā i muri maira, kua taui te tu maromaroa o te au pipi ki te rekareka. Te kite anga e kua ora mai to ratou Pu e kua papa aia i te tauturu ia ratou kia akatupu i ta ratou angaanga ou, mataora tikai ratou. Kua akakeu to ratou rekareka ia ratou kia akapaapaa ua rai ia Iehova.​—E tatau ia Luka 24:52, 53; Anga. 5:42.

16. Akapeea tatou me aru i te au pipi a Iesu?

¹⁶ Akapeea tatou me aru i te au pipi a Iesu? Ka mataora tatou i te akamori ia Iehova kare anake ua i te tuatau o te Akamaaraanga pera katoa i te au mataiti ravarai. Ka anoanoia tatou kia tuku i te Patireia o te Atua na mua i roto i to tatou oraanga. Ei akaraanga, e manganui tei akatanotano i ta ratou angaanga kia rauka ia ratou i te tutu aere, kia aere ki te au uipaanga, e te rave putuputu i te akamorianga a te ngutuare. Tetai pae kua akaruke i te au mea o te kopapa ta tetai i manako e mea puapinga, kia taangaangaia ratou i roto i te putuputuanga e i te au ngai te anoanoia ra te au papuritia o te Patireia. Noatu e ka anoano tatou i te tu akakoromaki kia tavini ua rai ia Iehova, kua taputou mai aia i te akameitaki ia tatou me tuku tatou i te anoano o te Patireia na mua.​—Mase. 10:22; Mata. 6:32, 33.

17. Eaa taau ka tauta i te rave i teia tuatau Akamaaraanga? (Akara i te tutu.)

¹⁷ Te tapapa atu nei tatou i te akono i te Akamaaraanga a te Ruirua, Aperira 4. Inara, auraka e tiaki kia tae ki te reira taime no te akamaara i to Iesu oraanga, tona mate, e to raua inangaro ko Iehova ia tatou. E akapou i te tuatau o te Akamaaraanga kia rave i teia. Ei akaraanga, e akanoo i tetai tuatau no te tatau e te akamanako i te au tupuanga no te epetoma openga o to Iesu oraanga i te enua nei i roto i te atikara “Akapeea Koe me Akapapa no te Akamaaraanga?” o te Oraanga Kerititiano e te Angaanga Orometua​—Puka Angaanga no te Uipaanga, Aperira 2019. Ia koe e rave ra i teia, akara i te au irava te ka akamatutu i toou tu ngakau rekareka, te aroa, te ngakau toa e te mataora. E oti, e akara i te au mataara ka akaari koe i te ngakau aroa. Papu ia koe ka akaperepere a Iesu i taau i rave no te akamaara iaia i te tuatau o te Akamaaraanga.​—Apo. 2:19.