ATIKARA APII 4
IMENE 30 Toku Oa, Toku Atua e Toku Metua
E Aroa Takinga Meitaki to Iehova Noou
“Kua ki te Atu i te aroa e te takinga-meitaki maata.” —IAKO. 5:11.
AKAKOROANGA
Akapeea to Iehova aroa te akavaitata anga ia tatou kiaia e te tauturu ia tatou kia marū ua e kia mataora.
1. Eaa taau e akamanako ana no Iehova?
KUA akamanako ana ainei koe mei teaa to Iehova tu? Eaa taau e manako ana me tuatua koe kiaia na roto i te pure? Noatu kare a Iehova e kiteia e te tangata, akataka maira te Pipiria iaia na roto i te au tu tukeke. Kua kapikiia a Iehova “e rā oki e te paruru” e ei “ai kakai.” (Sala. 84:11; Ebe. 12:29) Kua akaaiteia aia ki te toka saphiro, te veo kanapanapa, e te anuanua manea. (Eze. 1:26-28) Ka umere tatou i teia au akatutuanga no Iehova e ka mataku tatou i te reira.
2. Eaa i ngatā ai i tetai pae kia akavaitata kia Iehova?
2 No te mea kare tatou e kite mata ana ia Iehova, ka ngatā i te irinaki e te aroa maira aia ia tatou. Manako tetai pae kare a Iehova e aroa mai ia ratou no to ratou oraanga i mua ana. Penei kare o ratou metua tane ei aroa mai ia ratou. Kua mārama a Iehova i te reira. Ei tauturu ia tatou kua akaari mai aia i tona tu manea i roto i tana Tuatua.
3. Eaa tatou ka apii meitaki atu ei no runga i to Iehova aroa?
3 Ko te aroa te akataka anga meitaki no Iehova. (1 Ioa. 4:8) Ko Iehova oki te aroa. Te akakeuia ra aia e te aroa. E aroa pumaana e te ririnui to te Atua e ka akaari katoa aia i te reira ki te aronga tei kore i inangaro iaia. (Mata. 5:44, 45) I teia atikara, ka apii meitaki tatou no runga ia Iehova e tona aroa. Te maata atu i ta tatou ka kite no runga Iaia, ka maata atu to tatou aroa iaia.
AKAPEREPERE A IEHOVA IA TATOU
4. Eaa toou manako no runga i to Iehova aroa? (Akara katoa i te tutu.)
4 “Kua ki te Atu i te aroa.” (Iako. 5:11) I roto i te Pipiria, kua akaaite a Iehova iaia uaorai ki tetai metua vaine aroa. (Isa. 66:12, 13) Akamanako ana i tetai metua vaine tei akaperepere i tana pepe. Ka tuku aia i tana pepe ki runga i tona turi e ka tuatua marū kiaia. Me aue e me mamae te pepe, ka akono meitaki te metua vaine iaia. Me mamae tatou, ka akono aroa mai a Iehova ia tatou. Mei ta te tata salamo i karanga: “I rotopu i toku nei manako mirimiri-ngata i roto iaku nei, na to akapumaana e akarekareka mai i toku vaerua.”—Sala. 94:19.
“Mei tei akapumaanaia e tona ra metua vaine, ko toku ïa akapumaana ia kotou” (Akara i te parakarapa 4)
5. Eaa te puapinga i to Iehova tu tiratiratu noou?
5 E tu tiratiratu to Iehova. (Sala. 103:8) Kare aia e akaruke ia tatou me rave tatou i te tarevake. Kua mamae a Iehova i ta Iseraela i rave; inara kua akakite aia i tona aroa ki tona iti tangata tei tataraara te na ko anga: “E apinga tumanava koe ki mua i oku mata, kua akateiteiia koe; no toku inangaro ia koe.” (Isa. 43:4, 5) Kare to te Atua aroa i taui. Kua papu ia tatou te reira. Noatu kua rave tatou i te ara kino, kare a Iehova e akaruke ia tatou. Me tataraara tatou e me oki kia Iehova, ka āriki aroa ua mai aia ia tatou. Kua taputou mai aia “te maata ra oki iaia te akakore i te ara.” (Isa. 55:7) Te akatutu ra te Pipiria i tana akakore anga ara ei “tuatau rekareka no mua . . . i te aroaro o te Atua.”—Anga. 3:19.
6. Eaa ta Zekaria 2:8 e apii maira no Iehova?
6 E tatau ia Zekaria 2:8. No tona aroa ia tatou, te mārama ra a Iehova i to tatou manako e ka paruru aia ia tatou. Me mamae tatou, ka mamae aia. No reira e pure tatou kiaia: “Tiaki mai koe iaku mei te koringo-mata ra.” (Sala. 17:8) E tuanga puapinga e te paruparu to tatou mata no te kopapa. Me akaaite a Iehova ia tatou ki tona mata, karanga aia: ‘Me tamamae tetai ia koe, e taku iti tangata, te tamamae ra aia i taku akaperepere.’
7. Eaa tatou ka irinaki ei i to Iehova aroa no tatou?
7 Ka inangaro a Iehova ia tatou kia kite e te akaperepere ra aia ia tatou. Inara, no to tatou oraanga i mua ana penei ka ekoko tatou i tona aroa. E penei te tupu nei te au turanga ngatā te ka timata i to tatou irinaki mei to Iehova aroa. Eaa te ka akamaroiroi ia tatou? Ka akara tatou akapeea a Iehova me akaari i tona aroa no Iesu, te aronga akatainuia e tatou katoatoa.
AKAPEEA A IEHOVA ME AKAARI I TONA AROA
8. Eaa a Iesu i papu ei i te aroa o tona Metua?
8 No tetai tuatau roa, kua tupu tetai pirianga vaitata e te aroa i rotopu ia Iehova e tana Tamaiti akaperepere. Kua roa to raua pirianga i to tetai ua atu. Ka kite tatou i to Iehova aroa no Iesu, me tatau tatou ia Mataio 17:5. Ka māmā ua ia Iehova te karanga, ‘Koia taku i mareka.’ Inara, kua inangaro aia kia kite tatou i tona akaperepere maata ia Iesu, na te karanga anga “ko taku Tamaiti akaperepere teia.” Kua ngakau parau a Iehova ia Iesu. (Ephe. 1:7) Kare a Iesu i ekoko ana i te aroa o tona Metua. E aroa mou to Iehova no Iesu e kua papu meitaki ia Iesu i te reira. Kua akakite putuputu aia i to te Metua aroa iaia.—Ioa. 3:35; 10:17; 17:24.
9. Eaa te tuatua te akakite ra i to Iehova aroa no te aronga akatainuia? Akamārama mai. (Roma 5:5)
9 Kua akakite katoa a Iehova i tona aroa no te aronga akatainuia. (E tatau ia Roma 5:5.) Akamanako i teia tuatua “kua riringiia mai.” Akamārama mai tetai tangata kimikimi i te reira “mei te kauvai ta’e rai te tu.” E aroa maata to Iehova no te aronga akatainuia! Kua kite ratou e te “akaperepere ra te Atua” ia ratou. (Iuda 1, NW) Kua akakite te apotetoro ko Ioane i te reira te na ko anga: “Ka akara na i te tu o to te Metua aroa ia tatou nei, ko tatou i tapaia mai e e tamariki na te Atua.” (1 Ioa. 3:1) Kua kotingaia ainei to Iehova aroa ki te aronga akatainuia? Kare, kua akakite mai a Iehova i tona aroa no tatou katoatoa.
10. Eaa te akapapuanga maata no to Iehova aroa noou?
10 Eaa te akapapuanga maata no to Iehova aroa? Te atinga oko—ko tona aroa maata rava atu tei akaariia ki te tangata i te ao nei! (Ioa. 3:16; Roma 5:8) Kua oronga mai a Iehova i tana Tamaiti akaperepere kia mate no te tangata ravarai ei akakore i ta tatou ara e kia riro tatou ei oa Nona. (1 Ioa. 4:10) Me akamanako ua rai tatou i ta Iehova e Iesu i rave, ka mārama tatou i to raua aroa no tatou. (Gala. 2:20) Kare te atinga oko i tutakiia mei tetai koreromotu kua akamanaia. Mari ra, e apinga aroa te reira. Akapapu a Iehova i tona aroa na te akaatinga anga i tei akaperepereia e ïa—ko Iesu. Kua akatika a Iehova i tana Tamaiti kia mamae e kia mate no tatou.
11. Eaa te apiianga mei roto mai ia Ieremia 31:3?
11 Mei ta tatou i kite mai, kare a Iehova e uuna i tona aroa, ka akaari ua rai aia i te reira. (E tatau ia Ieremia 31:3.) Kua akavaitata a Iehova ia tatou kiaia no tona aroa ia tatou. (Akaaite ia Deuteronomi 7:7, 8.) Kare e apinga e akatakake ia tatou mei tona aroa. (Roma 8:38, 39) Eaa toou manako i tona aroa? E tatau ia Salamo 23, e e akara i to Iehova aroa no Davida e te aiteanga o te reira no tatou.
EAA TOOU MANAKO I TO IEHOVA AROA?
12. Akapeea koe me akamārama ia Salamo 23?
12 E tatau ia Salamo 23:1-6. E imene a Salamo 23 tei akakite mai i to Iehova aroa e te takinga meitaki. Kua akamārama te tata o teia salamo ko Davida i tona pirianga vaitata ki tona Tiaki ko Iehova. Kua aratakiia a Davida e Iehova, e kua irinaki papu aia Iaia. Kua kite a Davida e ka vai ua rai to Iehova aroa nona. Eaa aia i papu ei?
13. Eaa a Davida i papu ei i to Iehova aroa?
13 “Kare rava au e ngere.” Kua kite meitaki a Davida i ta Iehova akono anga iaia. Kua mataora katoa a Davida i to Iehova pirianga oa. Kua papu iaia e noatu eaa te ka tupu kiaia a te tuatau ki mua, ka akono ua rai a Iehova i tona au anoano. No to Davida irinaki ki to Iehova aroa nona, kua tauturu te reira iaia kia kore e taitaia e kia mataora ua.—Sala. 16:11.
14. Akapeea a Iehova me aroa mai ia tatou?
14 Te aroa maira a Iehova ia tatou, me tupu te au mea kino i roto i to tatou oraanga. Kua taitaia tikai a Claire, a tei tavini i Betela e 20 mataiti, te tupu anga te au manamanata ki tona ngutuare tangata. Kua tuia tona papa e te maki akaparuparu o te kopapa koia te stroke, kua akaateaia tona teina, kua kino te pitiniti a te pamiri e kua okoia to ratou are. Akapeea a Iehova te akono anga ia ratou? Karanga a Claire: “Kua akono a Iehova i toku pamiri i te au rā tataki tai. Kua oronga ua mai a Iehova i ta ratou i anoano tei maata atu i taku i manako! Ka akamaara au i to Iehova aroa e te takinga meitaki, e ka akaperepere au i te reira. Kua tauturu teia iaku kia akakoromaki.”
15. Eaa a Davida i maroiroi ei? (Akara katoa i te tutu.)
15 “E akaoki rai aia i toku vaerua.” Kua taitaia a Davida no tona au manamanata e te timata anga. (Sala. 18:4-6) Kua riro to Iehova aroa takinga meitaki ei akaoraora iaia. Kua arataki a Iehova iaia ki “te au ngai ngangaere ruperupe” e “na te pae i te vai ta’e marie.” Tei tupu, kua maroiroi a Davida e kua rave ua atu i tana angaanga.—Sala. 18:28-32.
Ia Davida e oro ra, kua akamaroiroi to Iehova aroa e te takinga meitaki iaia (Akara i te parakarapa 15)
16. Akapeea to Iehova aroa me akamaroiroi ia koe?
16 I teia tuatau, “no te aroa tini o Iehova i kore ei tatou i pou” me tupu ake te au manamanata o te oraanga. (Aue 3:22; Kolo. 1:11) Akamanako ana i te akaraanga o Rachel. Kua taitaia aia te akaruke anga tana tane iaia e Iehova i te tuatau o te maki COVID-19. Eaa ta Iehova i rave nona? Karanga aia: “Kua aroa mai a Iehova iaku. Kua koropiniia au e te au taeake tei akono iaku, apai mai i te kai, tuku karere mai e te au irava akamaroiroi, te mata katakata, e te akakite mai i to Iehova inangaro iaku. Akameitaki tikai au ia Iehova no toku pamiri aroa.”
17. Eaa a Davida i kore ei i “mataku i te kino”?
17 “Kare rai au e mataku i te kino: tei vaitata katoao koe iaku.” Kua tupu te kino kia Davida e e maata tona au enemi. Inara, kua riro to Iehova aroa ei akono e te paruru iaia. Kua kite a Davida e tei te pae a Iehova iaia e kua akapumaana katoa iaia. No reira aia i imene ei: “Kua akaora [a Iehova] iaku i te au mea katoa taku i mataku.” (Sala. 34:4) Noatu kua mataku a Davida i tetai au taime, kua autu ra aia no to Iehova aroa nona.
18. Akapeea to Iehova aroa te akamaroiroi anga ia tatou me mataku tatou?
18 Akapeea to Iehova aroa te akamaroiroi anga ia tatou me mataku tatou? Akakite tetai painia ko Susi i to raua manako ko tana tane te tamate anga ta raua tamaiti iaia uaorai: “Me tupu tetai tumatetenga poitirere kia koe, ka tupu te tu parukaua e te taitaia. Kua riro to Iehova aroa takinga meitaki ei tamarū e te paruru ia maua.” Maara ia Rachel, tei taikuia i mua ana: “I tetai po kua mamae tikai toku ngakau e kua aue maata au kia Iehova. Kua akamarū mai aia i toku ngakau, mei tetai mama e mou ra i tana pepe, e kua varea au e te moe. Kare e ngaropoina iaku te reira.” E ā mataiti o tetai tangata pakari ko Tasos i roto i te are auri no te patoi i te angaanga vaeau. Akapeea aia te kite anga i to Iehova aroa e te takinga meitaki? Karanga aia: “Kua akono meitaki a Iehova i toku au anoano. Kua akamaroiroi teia iaku kia irinaki ua rai kiaia. Na roto i tona vaerua tapu, kua oronga mai a Iehova i te rekareka noatu te turanga taitaia. E me akavaitata atu au kiaia, ka kite ua rai au i tona meitaki. I muri mai kua tavini au ei painia tamou i roto i te are auri.”
AKAVAITATA ATU KI TOOU ATUA AROA
19. (a) Akapeea te aroa o te Atua te akakeu anga i ta tatou au pure? (e) Eaa te irava taau i reka no te aroa o Iehova? (Akara i te pia “ Tauturu Kia Kite Tatou i to Iehova Aroa Pumaana.”)
19 Te akaari maira te au tupuanga tei uriuriia e tei te pae a Iehova, “te Atua nona te aroa,” ia tatou! (2 Kori. 13:11) Te akaperepere maira aia ia tatou tataki tai. Kua papu ia tatou “ka pini takakaiia [tatou] e te aroa.” (Sala. 32:10) Me akamanako oonu tatou i tona aroa, ka akavaitata atu tatou kiaia. Ka pure tatou e ka pati kiaia kia aroa mai ia tatou. E akakite ua rai i to tatou manamanata kiaia ma te irinaki e ka tauturu mai aia ia tatou.—Sala. 145:18, 19.
20. Akapeea to Iehova aroa me akavaitata ia tatou kiaia?
20 Mei ia tatou e akavaitata ra ki tetai a’i maana i te po anu, ka akavaitata katoa tatou ki to Iehova aroa pumaana. E ririnui to Iehova aroa e te marū katoa. No reira e āriki tatou i to Iehova aroa pumaana e kia karanga: “E inangaro toku ia Iehova”!—Sala. 116:1.
AKAPEEA KOE ME PAU?
-
Akapeea koe me akataka i to Iehova aroa?
-
Eaa koe i papu ei e te akaperepere ra a Iehova ia koe?
-
Eaa toou manako i to Iehova aroa noou?
IMENE 108 To te Atua Aroa Tiratiratu
a Tauiia te au ingoa.