ATIKARA APII 3
IMENE 124 Ei tu Aroa Ua
Ka Tauturu a Iehova ia Koe i te Tuatau Ngatā
“[Ko Iehova] te mou o toou ra tuatau.”—ISA. 33:6.
AKAKOROANGA
Ta tatou ka rave kia rauka te tauturu a Iehova i te tuatau ngatā.
1-2. Eaa te au turanga ngatā e tupu ana ki te au tavini tiratiratu o Iehova?
KA TAUI viviki to tatou oraanga me rokoia tatou e te tumatetenga. Ei akaraanga, kua tu tetai taeake ko Luis a i te maki cancer kino tikai. Akakite te taote kiaia e kare e roa atu ana ka mate aia. Ko Monika e tana tane, te rave maroiroi ra raua i te angaanga pae vaerua. Inara i tetai rā, kua kite mai a Monika e te rave ra tana tane, e tangata pakari i roto i te putuputuanga, i te ara muna no tetai tuatau roa. Ko Olivia e tuaine kare i akaipoipo, kua anoanoia aia kia akaruke i tona kainga no te mea ka tupu tetai uriia maata. Te oki anga aia ki te kainga, kua pueu tona are. Kua tupu viviki ua teia au tumatetenga tei taui takiri i to ratou oraanga. Kua tupu ana teia kia koe? Kua taui takiri ainei toou oraanga no tetai tumatetenga?
2 Ei au tavini tiratiratu no Iehova, e tupu ana te au turanga ngatā e te maki kia tatou mei tei tupu ki te au tangata katoatoa. Pera katoa, ka akakoromaki tatou i te patoianga e te takinokino anga a te aronga tei makitakita i to te Atua iti tangata. Noatu kare a Iehova e paruru ia tatou mei teia au manamanata, taputou mai aia i te tauturu ia tatou. (Isa. 41:10) Me rave tatou i teia, ka rekareka tatou, ka rave i te au ikianga meitaki, e ka vai tiratiratu ki te Atua me na roto i te au turanga ngatā. I teia atikara, ka uriuri tatou e ā ravenga ka tauturu mai a Iehova ia tatou me tupu te tumatetenga. Ka akara katoa tatou i ta tatou ka rave e rauka ai tana tauturu.
KA PARURU A IEHOVA IA KOE
3. Me tupu tetai tumatetenga, eaa te mea ngatā kia rave?
3 Te timataanga. Me tupu te tumatetenga kia tatou, penei ka ngatā i te manako meitaki e te rave i te au ikianga. Eaa te tumu? Ka taitaia to tatou ngakau e ka tupu te manako apiapi. Penei ka ngaro to tatou manako e kare e papu ia tatou eaa ta tatou ka rave. Akamanako i te nga tuaine tei taikuia i mua ana. Karanga a Olivia: “Te takoreia anga toku are, kua manamanata au e kua taitaia.” Akakite a Monika no te tu pikikaa o tana tane: “Kua mamae tikai toku ngakau. Mei te mea rai e kua kō’ia au ki te matipi. E ngatā iaku i te rave i te au angaanga taku i mātau. Kare au i manako ana e ka tupu teia kiaku.” Me tupu te tumatetenga kia tatou, akapeea a Iehova me tauturu mai?
4. I roto ia Philipi 4:6, 7, eaa ta Iehova i taputou e ka rave aia?
4 Ta Iehova ka rave. Taputou mai te Pipiria e ka oronga mai aia i “te au o te Atua.” (E tatau ia Philipi 4:6, 7.) Te akataka ra teia ’au i te ngakau marū no to tatou pirianga akaperepere kia Iehova. Ko teia ’au “tei maata ua atu i te kite tangata”; e mea manea tikai te reira i ta tatou i manako. Kua poitirere ainei koe i te marū o toou ngakau te pure anga koe kia Iehova? Ko tera “te au o te Atua.”
5. Akapeea te ’au o te Atua me akamaroiroi mai i to tatou ngakau e te manako?
5 Karanga katoa te irava e na te ’au o te Atua “e akamaroiroi,” me kore e paruru “i to kotou ngakau e to kotou manako.” Ko te tuatua “e akamaroiroi mai,” te akataka ra i te au vaeau tei paruru i tetai oire mei te enemi. Kua moe meitaki te au tangata i reira te kite anga e te paruruia ra ratou e te au vaeau. Aite rai ki te ’au o te Atua tei paruru i to tatou ngakau e te manako. Ka maru tatou i te kite e te paruruia ra tatou. (Sala. 4:8) Mei ia Hana, noatu kare to tatou turanga e taui, ka kite rai tatou i te ngakau ’au. (1 Samu. 1:16-18) E me marū to tatou ngakau, ka māmā ua i te manako e te rave i te au ikianga meitaki.
E pure ua rai no “te au o te Atua” kia akamaroiroi i toou ngakau e toou manako (Akara i te parakarapa 4-6)
6. Eaa ta tatou ka rave e rauka ai te ’au o te Atua? (Akara katoa i te tutu.)
6 Ta tatou ka rave. Mei te aronga o te oire tei paruruia e te au vaeau tei tiaki i te au ngutupa o te oire, e pure tatou e te pati kia Iehova i tana tauturu e kia oronga mai i Tona ’au. (Luka 11:9; 1 Tesa. 5:17) Akamārama mai a Luis, tei taikuia i mua ana, i tei tauturu ia raua ko tana vaine ko Ana. Te kite anga raua e ka mate a Luis, karanga aia: “Me tupu tera turanga kia koe, e ngatā i te rave i te au ikianga no te rapakau anga maki e tetai au mea ke. Inara kua rauka ia maua te ngakau ’au i tera tuatau tumatetenga no te mea kua pure maua.” Karanga a Luis e kua pure akatenga raua ma te putuputu, te pati kia Iehova kia oronga mai i te manako ’au, te ngakau maru, e te pakari no te rave i te au ikianga. E kua rauka mai Tana tauturu. Me na roto koe i tetai tumatetenga, e tamou marie i te pure e ka kite koe i te ’au o Iehova te paruru anga i toou ngakau e toou manako.—Roma 12:12.
KA AKATINAMOU A IEHOVA IA KOE
7. Eaa to tatou manako me na roto tatou i tetai tumatetenga?
7 Te timataanga. Me na roto tatou i tetai tumatetenga, penei kare e tinamou to tatou manako e ta tatou ka rave. Ka aite to tatou manako mei tetai paī rai i roto i te moana uriia. Kua tupu teia ki te tuaine ko Ana te takakeanga tana tane ko Luis. Karanga aia: “Kua tupu te manako taitaia e kua tangi au iaku uaorai. Kua riri katoa au te takakeanga aia.” Kapiti mai ki teia, kua maromaroa a Ana e te kinokino no te mea ka rave aia i te au ikianga ta Luis i akono ana i mua ana. I tetai au taime, kua manako aia e tei roto aia i te moana ngarungaru. Akapeea a Iehova me tauturu ia tatou me tupu teia au manako?
8. Mei tei taikuia i roto ia Isaia 33:6, eaa ta Iehova e akapapu maira kia tatou?
8 Ta Iehova ka rave. Ka akatinamou mai aia ia tatou. (E tatau ia Isaia 33:6.) Me uriia te moana, ka tauriuri te paī mei tetai tua ki tetai. Kia mou meitaki te paī i roto i te tai, e nga ama to raro ake te ka akatinamou i te paī. Ka paruru te reira i te au tangata i runga i te paī e ka maru ua to ratou tere. Inara, ka angaanga meitaki te nga ama me tere te paī ki mua. Mei te reira rai, ka akatinamou a Iehova ia tatou me tavini tiratiratu iaia i te tuatau ngatā.
Ka riro te au ravenga kimikimi ei tauturu ia koe kia marū (Akara i te parakarapa 8-9)
9. Akapeea ta tatou au ravenga kimikimi me tauturu ia tatou kia rauka te manako tinamou? (Akara katoa i te tutu.)
9 Ta tatou ka rave. Me oripu ua toou manako mei te uriia rai, tauta i te akanoo i te taime no taau angaanga pae vaerua. Penei, e iti ua taau ka rauka i te rave mei to mua ana, inara e akamaara ka āriki a Iehova i taau ka rauka. (Akaaite ia Luka 21:1-4.) Penei ka akanoo koe i te taime no taau uaorai apii e no te akamanako oonu i te reira. Eaa te tumu? No te mea na roto i tana akaaerenga, kua oronga mai a Iehova i te au atikara e te au vitio ei tauturu ia tatou kia akatere i to tatou au manako apiapi. Kia rauka mai te reira, e taangaanga i te au ravenga kimikimi i roto i toou reo mei te JW Library® app, Watch Tower Publications Index, e te Research Guide for Jehovah’s Witnesses. Kua taangaanga a Monika tei taikuia i mua ana, i te au ravenga kimikimi te kiteanga aia e te tupu ra te au manako kino e te mamae. Kua kimi aia no runga i te tuatua “riri.” I tetai au atianga ke, kua kimi aia i te tuatua “pikikaa” e te “tiratiratu.” E oti kua tatau aia i tana i kite mai e tei tupu, kua marū tona ngakau. Karanga aia: “Te akamataanga au i taku kimikimi anga kua apiapi tikai au. Inara iaku e tatau ra kua maru mai toku ngakau. Mei te mea rai e te takave maira a Iehova iaku. Kua mārama Aia i toku manako taitaia e kua tauturu iaku.” No reira ma te tauturu a Iehova, ka tinamou to tatou manako e ka marū to tatou ngakau.—Sala. 119:143, 144.
KA TAUTURU A IEHOVA IA KOE
10. Eaa to tatou manako i muri ake i tetai tumatetenga?
10 Te timataanga. I muri ake i tetai tumatetenga, penei ka paruparu tatou i te pae manako e te pae kopapa. Ka aite tatou mei tetai tangata maroiroi i te tipoti kua ati tona vaevae, e kare e rauka iaia i te oro. Penei e ngatā ia tatou i te rave i te au angaanga ta tatou i mātau e kare o tatou inangaro i te rave i te au angaanga ta tatou i mataora ana i mua ana. Mei ia Elia, ka ngatā ia tatou i te tu ki runga e ka inangaro tatou kia moe ua. (1 Ari. 19:5-7) Eaa ta Iehova e taputou maira ka rave aia me manako paruparu tatou?
11. Eaa tetai ravenga ka rauka ia Iehova i te tauturu ia tatou? (Salamo 94:18)
11 Ta Iehova ka rave. Taputou mai aia i te tauturu ia tatou. (E tatau ia Salamo 94:18.) Mei te tangata tipoti kua ati tona vaevae e ka anoano i te tauturu no te aaere, ka anoano katoa tatou i te tauturu i te rave ua atu i ta Iehova angaanga. Akapapu mai a Iehova: “Ko au oki to Atua ra, ko Iehova, ko tei akamaroiroi i to rima katau ra; ko tei tuatua atua ia koe e, Auraka e mataku, naku koe e tauturu.” (Isa. 41:13) Kua rauka i te Ariki ko Davida teia tauturu. Te tupu anga te timataanga kiaia e te patoianga a te au enemi, kua karanga aia kia Iehova: “Na to rima katau i tauturu mai iaku.” (Sala. 18:35) Akapeea ra a Iehova me tauturu ia tatou?
Āriki i te tauturu a toou kopu tangata, au oa e te aronga pakari (Akara i te parakarapa 11-13)
12. Me paruparu tatou, koai ta Iehova ka taangaanga ei tauturu ia tatou?
12 Ka tauturu mai a Iehova na te akakeu anga i tetai ke kia akamaroiroi ia tatou. Ei akaraanga, i tetai atianga kua paruparu a Davida e kua aravei tona oa ko Ionatana iaia ei tauturu e ei akamaroiroi iaia. (1 Samu. 23:16, 17) Mei te reira katoa, kua iki a Iehova ia Elisaia kia tauturu ia Elia. (1 Ari. 19:16, 21; 2 Ari. 2:2) I teia tuatau, ka taangaanga a Iehova i to tatou kopu tangata, te au oa e te aronga pakari kia tauturu ia tatou. Inara, me taitaia tatou, penei kare tatou e inangaro i te piri atu ki te tangata, e ka noo ua ko tatou anake. E tu mātau ua teia. Eaa ta tatou ka rave e rauka ai te tauturu a Iehova?
13. Eaa ta tatou ka rave kia puapingaia mei te tauturu a Iehova? (Akara katoa i te tutu.)
13 Ta tatou ka rave. E kopae i te timataanga i te noo ko tatou anake. Me pera tatou, ka pou ua to tatou manako ki runga ia tatou uaorai e to tatou au manamanata. Kare i reira tatou e rave i te ikianga meitaki. (Mase. 18:1) Ka anoanoia tetai tuatau no tatou uaorai me tupu te au tumatetenga i roto i te oraanga. Inara, me roa te tuatau i te noo ua ko tatou anake, penei ka kopae tatou i ta Iehova ravenga no te tauturu ia tatou. No reira noatu te ngatā, e āriki i te tauturu a toou kopu tangata, te au oa e te aronga pakari. Penei te taangaanga nei a Iehova ia ratou ei tauturu ia koe.—Mase. 17:17; Isa. 32:1, 2.
KA AKAPUMAANA A IEHOVA IA KOE
14. Eaa tetai au turanga e tupu ana te mataku kia tatou?
14 Te timataanga. Penei ka na roto tatou i tetai au turanga mataku. I roto i te Pipiria, kua na roto te au tavini tiratiratu o te Atua i te au turanga taitaia e te mataku no to ratou au enemi e te au taomianga ke. (Sala. 18:4; 55:1, 5) Penei ka patoi katoaia tatou i te apii, te ngai angaanga, te kopu tangata me kore te kavamani. Ka mataku tatou i te mate me tu’ia e tetai maki kino. Me tupu teia, ka aite tatou mei tetai tamaiti meangiti tei mataku. Akapeea a Iehova me tauturu ia tatou i roto i teia au turanga?
15. Eaa ta Salamo 94:19 e akamaroiroi maira ia tatou?
15 Ta Iehova ka rave. Ka akapumaana aia ia tatou. (E tatau ia Salamo 94:19.) Ka tauturu teia salamo ia tatou kia akamanako i tetai manga tamaine tei mataku e kare e varea e te moe no te mangungu e te uriia. Kua aere mai tona papa ki roto i tona pia moe, kua mou e kua takave iaia e kua varea tana tamaine i te moe. Noatu te aruru ra rai te mangungu, kua akapumaanaia aia. Me mataku tatou, ka anoano tatou i te akapumaana a to tatou Metua i te rangi ei tamarū i to tatou ngakau. Eaa ta tatou ka rave kia rauka te akapumaana no ko mai ia Iehova?
Ka akapumaana toou Metua i te rangi ia koe na roto i te au Irava (Akara i te parakarapa 15-16)
16. Eaa ta tatou ka rave kia puapingaia mei ta Iehova akapumaana anga? (Akara katoa i te tutu.)
16 Ta tatou ka rave. E pure putuputu kia Iehova e e tatau i tana Tuatua. (Sala. 77:1, 12-14) Me rave koe i teia, ka uri ua kia Iehova no te tauturu me tupu te manako apiapi. E akakite i taau e mataku ra e toou au manamanata kia Iehova. E oti e akarongo kiaia na te tatau anga i tana Tuatua. (Sala. 119:28) Me tatau koe i tetai au tuanga o te Pipiria, ka riro te reira ei akapumaana ia koe i te tuatau mataku. Ei akaraanga, penei ka akamaroiroiia koe mei te puka o Iobu, Salamo, Maseli e ta Iesu i tuatua ia Mataio pene 6. Me pure koe kia Iehova e te tatau i tana Tuatua, ka akapumaana aia ia koe.
17. Eaa te akapapu anga no tatou?
17 E mea papu ka tauturu mai a Iehova ia tatou me tupu te tumatetenga i roto i to tatou oraanga. Kare ko tatou anake ua. (Sala. 23:4; 94:14) Kua taputou mai a Iehova i te paruru, akatinamou, tauturu e te akapumaana ia tatou. Karanga a Isaia 26:3 no runga ia Iehova: “Ko tei ngaueue kore te manako ra, taau ïa e tiaki, e ei au nuingangare tona, koia i irinaki ia koe.” No reira, e irinaki ia Iehova e e taangaanga meitaki i tana au ravenga no te tauturu ia koe. Me rave koe i teia, ka rauka te maroiroi noatu te turanga ngatā.
AKAPEEA KOE ME PAU?
-
Eaa te taime tau ka inangaroia te tauturu a Iehova?
-
Eaa te au ravenga e ā ka tauturu mai a Iehova me tupu te tumatetenga?
-
Eaa ta tatou ka rave kia puapingaia mei te tauturu a Iehova?
IMENE 12 Te Atua Ngateitei ko Iehova
a Kua tauiia te ingoa.