1. Eaa ta tatou ka rave kia mataora a Iehova?

 AKAMANAKO ana me oronga koe i tetai apinga aroa ki taau i akaperepere e e mea manea tikai te reira. Inara, ka kinokino koe me tuku aia i taau apinga aroa ki roto i te ngai vairanga apinga, kare aia e akamanako atu i te reira! I tetai tua, me taangaanga aia i te apinga aroa e te akameitaki ia koe, ka rekareka koe. Eaa te apiianga? Kua oronga mai a Iehova i tana Tamaiti kia mate no tatou. No reira, ka mataora a Iehova me akaperepere tatou i tana apinga aroa koia oki ko te atinga oko!—Ioa. 3:16; Roma 5:​7, 8.

2. Eaa ta tatou ka uriuri i teia atikara?

² I te au mataiti ka aereia mai, penei kare tatou e akaperepere akaou i ta te Atua apinga aroa o te atinga oko. Ka aite mei te tuku anga i te reira ki roto i tetai ngai vairanga apinga, e kare tatou e akamanako atu i te reira. Kia kopae i tera tu, ka anoanoia tatou kia akaketaketa i to tatou inangaro i te Atua e Iesu. Ka tauturu teia atikara ia tatou kia rave i te reira. Ka uriuri tatou akapeea tatou e puapingaia ai mei te atinga oko o Iesu i teianei e a te tuatau ki mua. Pera katoa, akapeea tatou me akaari ua rai i te akameitaki anga kia Iehova i te tuatau o te Akamaaraanga.

PUAPINGAIA TATOU I TEIANEI

3. Eaa tetai ravenga e puapingaia ai tatou mei te atinga oko o Iesu i teianei?

³ Te puapingaia nei tatou mei to Iesu atinga oko. Ei akaraanga, na roto i te atinga oko, kua akakore a Iehova i ta tatou au ara. Kare aia e anoanoia i te akakore i ta tatou ara. Inara kua inangaro aia i te rave i te reira. Kua imene  akameitaki te tata salamo ia Iehova e kua karanga: “Te meitaki ra oki koe, e te Atu, e kua tika ia koe i te akakore mai i te ara.”—Sala. 86:5; 103:​3, 10-13.

4. Kua oronga a Iehova i te atinga oko o Iesu kiaai ma? (Luka 5:32; 1 Timoteo 1:15)

⁴ Ka manako tetai pae e kare a Iehova e akakore mai i ta ratou ara. Inara, ko te tika e aronga ara pouroa tatou. Karanga a Paulo e “kare oki au e tau kia karangaia e, e aposetolo.” Kua taiku ra aia: “Toku nei ra tu e vai nei, no te aroa ua ïa o te Atua.” (1 Kori. 15:​9, 10) Me tataraara tatou, ka akakore a Iehova i ta tatou ara. Eaa te tumu? No tona inangaro ia tatou. No reira, me ō mai te manako ekoko e kare taau ara e akakoreia, e akamaara kua oronga mai a Iehova i te atinga oko o Iesu ei akaora i te aronga ara tei tataraara.—E tatau ia Luka 5:32; 1 Timoteo 1:15.

5. Ka anoanoia ainei a Iehova kia akakore i ta tatou ara? Akamārama mai.

⁵ Me kua tavini ana tatou ia Iehova no tetai au mataiti, auraka tatou e manako e ka akakore mai aia i ta tatou ara. E tika, kare e ngaropoina ia Iehova ta tatou angaanga e rave ra nona. (Ebe. 6:10) Kua oronga mai aia i tana Tamaiti ei apinga aroa, kare e kia tutaki mai i ta tatou tavinianga iaia. No reira, eiaa tatou e manako no te maata i taau angaanga na Iehova, kua tau rai taau ara kia akakoreia. Me pera tatou, e puapinga kore i reira to Iesu matenga no tatou.—Akaaite kia Galatia 2:21.

6. Eaa a Paulo i angaanga maroiroi ei na Iehova?

⁶ Kua kite a Paulo e noatu te maata i tana angaanga i rave na Iehova, kare a Iehova e akakore ua i tana ara. Inara, eaa i reira a Paulo i angaanga maroiroi ei? Kia akaari i tona inangaro e kua aroa takinga meitaki mai a Iehova iaia. (Ephe. 3:7) Mei ia Paulo, ka tavini ua rai tatou ia Iehova e te akameitaki iaia no tona aroa takinga meitaki ia tatou.

7. Eaa tetai ravenga ka puapingaia tatou mei te atinga oko o Iesu i teianei? (Roma 5:1; Iakobo 2:23)

⁷ Tetai ravenga ka puapingaia tatou mei te atinga oko o Iesu i teianei, koia oki kia rauka ia tatou i te akavaitata atu kia Iehova. a Mei tei taikuia i te atikara i mua, te anau anga tatou, kare o tatou pirianga ki te Atua. Inara na roto i te atinga oko, ka rauka ia tatou te ’au mei ko mai i te Atua e ka piri vaitata tatou kiaia.—E tatau ia Roma 5:1; Iakobo 2:23.

8. Eaa tatou ka akameitaki ei ia Iehova no te tikaanga kia pure kiaia?

⁸ Ko te pure tetai tuanga puapinga no te akavaitata atu kia Iehova. Ka akarongo aia i te au pure a tona au tavini i te au uipaanga e pera ta tatou au pure tataki tai. Me pure tatou kiaia, ka marū to tatou ngakau e kare tatou e apiapi, inara kare ko tera anake ua. Ka akaketaketa te pure i to tatou pirianga oa ki te Atua. (Sala. 65:2; Iako. 4:8; 1 Ioa. 5:14) Iaia i te enua nei, kua pure putuputu a Iesu, no te mea kua kite aia te akarongo maira a Iehova iaia e ka akaketaketa te reira i tona pirianga ki tona Metua. (Luka 5:16) Na roto i te atinga oko o Iesu i rauka ai te akameitakianga kia riro tatou ei au oa no Iehova e te tuatua Kiaia na roto i te pure!

 PUAPINGAIA TATOU NO TE TUATAU KI MUA

9. Akapeea te au tavini tiratiratu o Iehova e puapingaia ai mei te atinga oko o Iesu a te tuatau ki mua?

⁹ Akapeea te au tavini tiratiratu o Iehova e puapingaia ai mei te atinga oko o Iesu a te tuatau ki mua? Ka oronga a Iehova i te ora mutu kore kia ratou. Inara, kua manako te tangata e kare e rauka te reira no te mea te matemate nei te tangata i teia tuatau. Ko to Iehova akakoroanga kia ora te tangata e tuatau ua atu. Naringa kare a Adamu i ara, ka ora rai te katoatoa. Noatu e ngatā i te akamanako i te reira, e irinaki ka tupu tera no te mea kua oronga mai a Iehova i tana Tamaiti kia rauka te ora ia tatou e tuatau ua atu.—Roma 8:32.

10. Eaa ta te aronga akatainuia e te mamoe ke atu ka tapapa no te tuatau ki mua?

¹⁰ Noatu ka rauka ia tatou te ora mutu kore a te tuatau ki mua, inangaro a Iehova kia akamanako tatou i te reira i teia taime tikai. Te tapapa nei te aronga akatainuia i te oraanga mutu kore i te rangi ia ratou e tutara ra ma Karaiti ki rungao i te enua. (Apo. 20:6) E ko te mamoe ke atu ka noo ratou ki runga i te enua parataito, kare e mamae e te taitaia. (Apo. 21:​3, 4) Ko koe ainei tetai te ka noo ki runga i te enua e tuatau ua atu? E manakonakoanga manea te reira! Kua anga a Iehova ia tatou kia noo ki runga i te enua, kia mataora tatou e tuatau ua atu.

11-12. Eaa tetai au akameitakianga i te Parataito ta tatou ka tapapa atu? (Akara katoa i te tutu.)

¹¹ Akamanako ana i toou oraanga i runga i te enua Parataito. Kare koe e manamanata i te maki e te mate. (Isa. 25:8; 33:24) Ka oronga mai a Iehova i te au mea pouroa taau e anoano ra. Ka inangaro ainei koe i te apii ua atu no runga i te au manu? Te akatangi imene? E akapeea me torō tutu? E mea papu, ka anoanoia te aronga parani are, pātu are e te aronga tanu kai. I te parataito, ka inangaroia te tangata kia tanu e kia  maani i te kai, te apinga no te ngutuare e te akono meitaki i te reira. (Isa. 35:1; 65:21) No reira, ia koe e noo ra a te tuatau ki mua, e maata toou taime i te rave i tetai ua atu apinga taau ka inangaro.

¹² Ka mataora tatou i te aravei i te aronga te ka akatuia mai mei te mate! (Anga. 24:15) E akamanako katoa i toou rekareka te apii maata atu no runga ia Iehova e te au mea pouroa tana i anga. (Sala. 104:24; Isa. 11:9) E tei maata atu, e mea pumaana i te akamori ia Iehova ma te kore e taitaia! Ka taui ainei koe i teia au akameitakianga no te tuatau ki mua ki “te navenave poto ua o te tuatua kino”? (Ebe. 11:25) Kare rava! E puapinga maata atu teia au akameitakianga, kare e aite ki ta tatou ka rauka i teianei. E akamaara, kare te enua Parataito i te manakonakoanga ua no te tuatau ki mua. Mari ra, ka noo tatou ki reira i te au rā tataki tai. Ka rauka teia au mea pouroa no to Iehova inangaro ia tatou e kua oronga mai aia i tana Tamaiti ei atinga oko!

TA TATOU KA RAVE NO TE AKAMEITAKI ATU I TO IEHOVA AROA

13. Eaa ta tatou ka rave no te akameitaki atu i to Iehova aroa? (2 Korinetia 6:1)

¹³ Eaa ta tatou ka rave ei akameitaki atu ia Iehova no tei oronga mai i te atinga oko o Iesu? Na te tavini anga iaia na mua i roto i toou oraanga. (Mata. 6:33) Kua mate a Iesu “kia kore te aronga e ora ra e akono akaou ia ratou uaorai i te ora anga nei, kia akono ra iaia i tei mate e tei tu akaou no ratou.” (2 Kori. 5:15) E Atua takinga meitaki a Iehova e te akakore i ta tatou ara. Na te tavini maata anga iaia, te akaari ra tatou i te tu āriki rekareka no tana i rave no tatou.—E tatau ia 2 Korinetia 6:1.

14. Akapeea tatou te irinaki e te aru anga i ta Iehova aratakianga?

¹⁴ Ka rauka katoa ia tatou i te akameitaki atu i to Iehova aroa na te irinaki e te aru anga i tana aratakianga. Akapeea ra? Me rave tatou i tetai ikianga no te apii teitei me kore te ngai angaanga, ka anoanoia tatou kia akamanako eaa ta Iehova e inangaro maira ia tatou kia rave. (1 Kori. 10:31; 2 Kori. 5:7) Me irinaki tatou ia Iehova, ka ketaketa atu to tatou pirianga kiaia. E ka tinamou to tatou manakonakoanga no te tuatau ki mua.—Roma 5:​3-5; Iako. 2:​21, 22.

15. Eaa ta tatou ka rave no te akaari i to tatou āriki rekareka i te tuatau o te Akamaaraanga?

¹⁵ E ravenga ke atu tetai no te akaari i to tatou āriki rekareka no to Iehova aroa. Koia te rave anga i ta tatou ka rauka i te epetoma i mua ake e i muri ake i te tuatau Akamaaraanga. Ka pati tatou i tetai ke kia tae mai ki te Akamaaraanga. (1 Timo. 2:4) Ka akamārama tatou ki te aronga ta tatou i  pati eaa te raveia ana i ko i te Akamaaraanga. E akaari i te nga vitio Eaa a Iesu i Mate Ei? e te Akamaara i te Mate o Iesu i runga i te jw.org. Ka pati katoa te aronga pakari i te aronga tei paruparu to ratou akarongo. Akamanako ana i te rekareka o te rangi e te enua me oki mai te au mamoe ngaro a Iehova! (Luka 15:​4-7) No reira, ka aruaru tatou i te aravei i tetai e tetai e pera tikai te aronga ou me kore te aronga ka tai nei ka oki akaou mai ei no tetai tuatau roa ki te Akamaaraanga. Ka inangaro tatou kia mataora ratou!—Roma 12:13.

16. Eaa tatou ka tavini maata atu ei ia Iehova i te tuatau o te Akamaaraanga?

¹⁶ Ka rauka ainei ia koe i te tavini maata atu ia Iehova i te tuatau o te Akamaaraanga? E atianga meitaki te reira no te akaari i toou āriki rekareka i ta te Atua e Karaiti i rave noou. Me tavini maroiroi tatou ia Iehova, ka kite tatou i tana tauturu e te ka tupu, ka ketaketa atu to tatou irinaki ki roto iaia. (1 Kori. 3:9) Pera katoa, e aru i te papaanga no te tatau Pipiria no te Akamaaraanga i roto i te puka Akara Matatio i te Tuatua Tapu i te au Rā me kore te puka angaanga no te uipaanga. Ka rauka katoa ia koe i te apii maata atu no runga i te reira au irava.

17. Eaa te ka akamareka ia Iehova? (Akara katoa i te pia “ Akaari i te Akameitaki Anga Kia Iehova.”)

¹⁷ E tika, penei no toou turanga kare e rauka ia koe i te rave maata atu i taau tavini anga ia Iehova. Inara e akamaara, kare a Iehova e akaaite i te maata o taau ka rave ki ta tetai ke. Kua kite aia i toou ngakau e toou aroa iaia. Kua mareka aia i taau e rave ra no te akaari i toou aroa takinga meitaki no tana apinga aroa, koia te atinga oko o Iesu.—1 Samu. 16:7; Mare. 12:​41-44.

18. Eaa tatou ka akameitaki ua rai ia Iehova e Iesu?

¹⁸ Na roto i te atinga oko o Iesu i rauka ai i te akakore i ta tatou au ara, te pirianga oa kia Iehova e te manakonako anga no te ora mutu kore e tuatau ua atu. Kia akaari ua rai tatou i te akameitaki anga kia Iehova no tona aroa e te oronga anga mai i te au akameitakianga no tatou. (1 Ioa. 4:19) E akameitaki katoa tatou ia Iesu, no tona aroa maata ia tatou kua oronga aia i tona uaorai ora no tatou!—Ioa. 15:13.