‘E Akameitaki i te au Mea Katoa’
TE MANAKO ra ainei koe ia koe uaorai e e tangata meitaki? E akamanako tatou tataki tai i teia uianga. Akakite te Pipiria i to tatou tuatau, e e maata te tangata e akaari ra i te tu “mareka kore.” (2 Timo. 3:2) Penei kua aravei koe i tetai aronga tei akaari mai e ka rave ratou i tetai au angaanga, e te oronga i tetai au apinga kia ratou. Tera i reira kare ratou e anoanoia kia akamareka i ta ratou i rauka mai. Penei ka āriki koe e kare i te mea mataora kia piri ki te reira au tangata?
Kua akamaroiroiia te au tavini o Iehova: “Kia mareka oki kotou.” Kia rauka ia tatou i te “akameitaki i te Atua i te au mea katoa ra.” (Kolo. 3:15; 1 Tesa. 5:18) No reira e mea meitaki no tatou kia akaari ua rai i te tu akameitaki. E maata te au tumu no te reira.
TAKINGA MEITAKI E TE MANAKO TAU
Ko te mea puapinga roa atu no tatou kia akaari i te tu takinga meitaki koia oki kia rauka te manako tau ia tatou uaorai. Me oronga tetai tangata i te akameitaki anga kiaia ka rekareka aia, e ko tei āriki i te reira ka mataora aia. Eaa ta te tu mareka ua ka akatupu? Akamanako ana i tetai akaraanga: Me kite tatou i te tu puareinga ua ta tetai aronga i rave kia koe, kare ainei e e puapinga atu koe ia ratou? Ka akono ratou ia koe. Me kite koe i te reira tu akono, ka mataora koe. Ka akamanako ana tatou i te tua o Ruta. Kua akaari a Boaza i te tu oronga ua kia Ruta. Kare e ekoko anga, kua rekareka a Ruta e te manakoia maira aia e tetai ke.—Ruta 2:10-13.
E mea meitaki kia akamareka tatou i te Atua. Kare e ekoko, kua akamanako ana koe i te au turanga pae vaerua e te apinga aroa o te pae kopapa tana i oronga ua mai. (Deu. 8:17, 18; Anga. 14:17) Kore i reira e akamanako ua i te tu meitaki o te Atua no tana au akameitakianga i riringi mai ki rungao ia koe e te aronga taau i akaperepere. E akamanako oonu i te tu oronga ua o Tei Anga te ka akamaata atu i toou tu meitaki nona, tona aroa, e te tu āriki rekareka noou.—1 Ioa. 4:9.
Inara kare kia akamanako ua i tona tu oronga ua e te au akameitakianga, mari ra kia akameitakiia a Iehova no tona au tu meitaki. (Sala. 100:4, 5) Karanga tetai pae e, ko “te akameitaki i tetai ke ka akarekareka te reira i te tangata.”
TE TU TAKINGA MEITAKI KA AKAVAITATA I TE TANGATA
Ko tetai tumu no te tu takinga meitaki koia oki kia akaketaketa i toou pirianga oa. Ka anoanoia tatou pouroa kia akaari i te tu takinga meitaki. Me akameitaki koe i tetai tangata no tana angaanga i rave, ka riro mai korua ei oa piri vaitata. (Roma 16:3, 4) Pera katoa, e maata te aronga ka inangaro i te tauturu i tetai ke. Kua kite ratou i te tu takinga meitaki tei orongaia kia ratou e ka akakeu ia ratou kia na reira. Ae, ko te tauturu i tetai ke, ka taki atu te reira ki te mataora. Mei ta Iesu i tuatua: “E mea meitaki i te oronga atu i te rave mai.”—Anga. 20:35.
Ko Robert Emmons, te tangata maata o te apii University o California tei apii i te tu takinga meitaki, karanga aia: “Ka anoanoia kia mārama e kia irinaki tatou ki tetai ke, tetai taime ka oronga tatou e i tetai taime ka orongaia mai ta tatou.” Ko to tatou oraanga, ka tauturuia mai e tetai ke na roto i tetai au ravenga tukeke. Ei akaraanga, ka oronga mai ratou i tetai kai e te au vairakau 1 Kori. 12:21) Ka āriki te tangata takinga meitaki i te tauturu a tetai ke. Na roto i te reira, kua akaari ainei koe i te tu takinga meitaki mei ta tetai i rave noou?
rapakau. (AKAARI I TE TU TAKINGA MEITAKI NO TE ORAANGA
Tetai tumu kia akaari i te tu takinga meitaki, ka tauturu ia koe kia akamou i toou manako ki te au mea meitaki kare i te mea kino. Tera te tu, ka angaanga ua toou roro mei te filter rai. Ka tauturu te reira ia tatou kia akamanako ua ki runga i te au mea meitaki e kare i te au mea kino. Me kite koe i te au mea meitaki, ka iti mai toou manako ki te au manamanata. Te maata atu i toou tu takinga meitaki, ka kite maata atu koe i te meitaki, e ka tupu maata atu te reira. Me akamou koe ki te au tu takinga meitaki, ka tauturu te reira ia koe kia rave mei ta te apotetoro ko Paulo i karanga: “E rekareka i te Atu ra, aua e tivata.”—Phili. 4:4.
Ka tauturu te tu takinga meitaki ia koe kia kore e akamanako atu i te au mea kino. E mea ngata ainei kia manako meitaki, i te reira taime te ō maira te tu vareae, te maromaroa, te riri? Ko te aronga takinga meitaki kare ratou e anoano maata atu i te au apinga materia. Ka mareka ua ratou i te ka rauka mai, e eiaa e akatinamou kia maata atu.—Phili. 4:12.
TARE I TAAU AU AKAMEITAKIANGA!
Ei au Kerititiano, to Satani anoano kia maromaroa e kia akaparuparu ia tatou na roto i te au timata anga i teia tuatau openga. Ka rekareka aia me akaari tatou i te tu kino e te kopekope no te au mea ravarai. Me tangata akapera koe, kare te tangata e akarongo mai ki te nuti meitaki. Ko te tu takinga meitaki tetai o te ua o te vaerua o te Atua, kapiti mai te mataora ta te Atua i oronga mai kia koe, e te akarongo ki tana au taputou.—Gala. 5:22, 23.
Ei iti tangata no Iehova, penei ka akatika koe i tei tuatuaia i roto i teia atikara no te tu takinga meitaki. Inara, kare i te mea māmā ua i te akameitaki, e kia akapapu e e tika te reira. Auraka e akariro i te reira ei akaparuparu ia koe. Ka rauka ia koe i te akaari e te akatinamou i te tu takinga meitaki. Akapeea ra? E akamanako ana i te au apinga puapinga i toou oraanga taau e mareka ana. Te maata atu i taau ka rave, ka maata atu te au akameitakianga ka rauka mai. Ka mataora atu koe ki tetai aronga e ngata ra te oraanga. Akamanako ki runga i te au mea meitaki ta te Atua e tetai ke e akamaroiroi ra ia koe, e te mataora ra koe. Penei ka akamata koe i te tata i te reira. Ka tata koe e rua me kore e toru apinga te ka akamareka ia koe no te reira rā.
Karanga tetai aronga kimikimi, “me putuputu tatou i te akameitaki i tetai ke, ka taui te reira i te tu e angaanga ana to tatou roro, e ka māmā ua to tatou oraanga.” Te tangata e tu takinga meitaki tona, e tangata mataora. No reira e tare i te au akameitakianga taau i rauka mai, kia mataora i toou oraanga e kia akameitaki ua rai! E mea meitaki teia au apinga i orongaia mai, “e akapaapaa ia Iehova: e meitaki oki tona.” Ae, “e akameitaki i te Atua i te au mea katoa.”—1 Para. 16:34; 1 Tesa. 5:18.