ATIKARA APII 51
Kite Meitaki Ainei Koe ia Iehova?
“Te aronga i kite i toou ra ingoa, ka irinaki ia koe; ko tei kimi oki ia koe ra, e Iehova, ko tei kore roa ïa e akarukeia e koe ra.”—SALA. 9:10.
IMENE 56 Iki i te Oraanga o te Tuatua Mou
I ROTO I TEIA APII *
1-2. Eaa ta tatou tataki tai ka rave, mei tei akatutuia i roto i te tupuanga o Angelito?
KUA utuutuia ainei koe e te nga metua e Au Kite no Iehova? Me koia ia, e akamanako kare e tupu mai tetai pirianga oa noou kia Iehova, no ko mai ia raua. Noatu e, te tavini ra toou nga metua i te Atua e me kare, ka akaketaketa tatou tataki tai i tetai pirianga oa kia Iehova.
2 Akamanako ana i tetai tupuanga o te taeake ko Angelito. Kua utuutuia aia i roto i tetai ngutuare e Kite ratou. I tona meangiti anga, kare ona pirianga vaitata ki te Atua. Karanga aia, “Te tavini ra au ia Iehova no te mea te rave ra toku ngutuare tangata i te reira.” Inara, kua iki a Angelito i te akapou i tetai taime no te tatau i te Tuatua a te Atua e te akamanako oonu i te reira, e kua pure tamou aia kia Iehova. Tei tupu? Karanga a Angelito, “Ko te ravenga anake e akavaitata ei au ki toku Metua ko Iehova, kia kite meitaki au iaia.” Kua riro te tupuanga o Angelito kia ui i te au uianga puapinga: Eaa te tuke i te kite ua ia Iehova e te kite meitaki iaia? E akapeea tatou me kite meitaki ia Iehova?
3. Eaa te tuke i te kite ua ia Iehova e te kite meitaki iaia?
3 Penei ka manako tetai tangata e kua kite aia ia Iehova no te mea kua kite aia i to te Atua ingoa, me kore tetai o te au apinga Tana i tuatua e i rave. Inara e maata te ō
maira i te kite meitaki ia Iehova. Ka akapou tatou i tetai taime no te apii ia Iehova e tona au tu manea. Aru mai ka mārama tatou e eaa tana e tuatua ra e e rave ra. Ka tauturu teia ia tatou kia kite e kua mareka aia i to tatou manako, ikianga e te au angaanga ka rave. Me mārama tatou i to Iehova anoano no tatou, ka anoanoia tatou kia rave i ta tatou i kite mai.4. Eaa te akaraanga i roto i te Pipiria te ka tauturu ia tatou?
4 Tetai aronga ka aviri mai ia tatou no te inangaro i te tavini ia Iehova, e penei ka patoi ratou ia tatou me akamata tatou i te piri atu ki tona iti tangata. Inara me irinaki tatou ia Iehova, kare aia e akaruke ia tatou. Me akamou tatou i te tango ketaketa no te pirianga oa ki te Atua, ka vai te reira e tuatau ua atu. Ka rauka ainei ia tatou i te kite meitaki ia Iehova? Ae! Kua akanoo te aronga apa ua i te akaraanga, mei ia Mose e te Ariki ko Davida. Akamanako ana tatou i ta raua i rave, ka pau tatou e rua uianga: Akapeea raua te kite meitaki anga ia Iehova? Eaa te apiianga ka mou mai mei to raua akaraanga?
AKARA UA A MOSE I “TEI KORE E KITEA KIA AKARA RA”
5. Eaa ta Mose i iki kia rave?
5 Kua rave a Mose i tana i kite mai. I tona 40 mataiti, kua iki a Mose i te piri atu ki te iti tangata Epera o te Atua, e kare kia kitea ei “tamaiti a te tamaine a Pharao.” (Ebe. 11:24) Kua akaruke a Mose i tetai turanga teitei. Na te nooanga ki to te Epera, tei tuikaa i Aiphiti e kua kite aia e ka riri a Pharao, e tutara maata tei manakoia e atua. Akaari a Mose e e akarongo ketaketa tona! Kua irinaki a Mose ia Iehova. Kua riro teia ei tango puapinga no tetai pirianga vaitata kia Iehova.—Mase. 3:5.
6. Eaa ta tatou ka apii mai mei to Mose akaraanga?
6 Eaa te apiianga no tatou? Mei ia Mose rai, ka rave tatou i tetai ikianga: Ka iki ainei tatou i te tavini i te Atua e te kapiti atu ki tona iti tangata? Penei me rave tatou i te au atinga no te tavini i te Atua, penei ka patoiia tatou e te aronga kare i kite ia Iehova. Me irinaki tatou i to tatou Metua i te rangi, ka tauturu mai aia ia tatou!
7-8. Eaa ta Mose i apii ua atu?
7 Kua apii ua atu a Mose no runga i to Iehova au tu e te rave i Tona anoano. Ei akaraanga, i to Mose aratakianga i te iti tangata Iseraela mei te tuikaa, kua ngere aia i te tu karape e kua akakite putuputu kia Iehova e kare aia i tukatau. Kua ariu atu te Atua ma te tu tangi aroa, na te tauturu anga ia Mose. (Exo. 4:10-16) Tei tupu, kua rauka ia Mose i te akakite i te karere akavaanga pakari kia Pharao. Kua kite a Mose i to Iehova mana na te akaora anga i to Iseraela e te takore anga ia Pharao e tona au nuku vaeau i roto i te Tai Muramura.—Exo. 14:26-31; Sala. 136:15.
8 I muri ake i to Mose aratakianga i to Iseraela ki vao ia Aiphiti, kua kimi ratou i tetai au kopekope anga. Noatu te reira, kua akara ua a Mose i to Iehova akakoromaki maata, i te akono anga i teia iti tangata Tana i akarangatira mei te tuikaa. (Sala. 78:40-43) Kua kite katoa a Mose i te akaari anga a Iehova i tona tu akaaka, te taui anga Aia i Tona manako i te pati akatenga anga a Mose kiaia i muri mai.—Exo. 32:9-14.
9. Ia Ebera 11:27, eaa te vaitata i to Mose pirianga kia Iehova?
9 I muri ake i te Exodo (te akaruke anga), kua piri vaitata a Mose kia Iehova mei te mea atura te kite ra aia i tona Metua i te rangi. (E tatau ia Ebera 11:27.) Karanga te Pipiria i tetai pirianga vaitata: “E kua karangaranga ua mai a Iehova kia Mose ko te mata e te mata, mei te tangata e tuatua ua ki tona taunga.”—Exo. 33:11.
10. Kia kite meitaki ia Iehova, eaa ta tatou ka rave?
10 Eaa te apiianga no tatou? Kia kite meitaki ia Iehova, kare tatou e apii ua i tona au tu, mari ra kia rave katoa i tona anoano. Ko to Iehova anoano i teia tuatau ko te “inangaro i te tangata katoatoa kia ora, e kia rauka te kite i te tuatua-mou.” (1 Timo. 2:3, 4) Tetai ravenga ko te rave i to te Atua anoano na te apiianga i tetai ke no runga ia Iehova.
11. Me apii tatou i tetai ke no runga ia Iehova, akapeea tatou me kite meitaki iaia?
11 Me apii putuputu tatou i tetai ke no runga ia Iehova, ka kite meitaki atu tatou iaia. Ei akaraanga, ka kite tatou i to Iehova tu tangi aroa me arataki aia ia tatou ki te aronga ngakau tika. (Ioa. 6:44; Anga. 13:48) Ka kite tatou i te mana o te Tuatua a te Atua ia ratou e apii ra, te akarangatira anga ia ratou mei te au tu kino e kia akatangata ou ia ratou. (Kolo. 3:9, 10) E kua kite mai tatou i to te Atua tu akakoromaki na te oronga anga i te tuatau no te tangata kia apii no runga iaia e kia ora.—Roma 10:13-15.
12. Ia Exodo 33:13, eaa ta Mose i pati e no teaa ra?
12 Akaperepere a Mose i tona pirianga kia Iehova. Noatu kua rave a Mose i te au angaanga temeio no to te Atua ingoa, kua pati ngateitei a Mose kia kite meitaki atu aia ia Iehova. (E tatau ia Exodo 33:13.) E 80 o Mose mataiti i tona patianga i teia, inara kua apii ua atu aia no runga i tona Metua aroa i te rangi.
13. Eaa tetai ravenga e papu ei ia tatou e puapinga to tatou pirianga ki te Atua?
13 Eaa te apiianga no tatou? Noatu eaa te roa i to tatou tavini anga ia Iehova, eiaa tatou e takino i to tatou pirianga kiaia. Tetai ravenga, ka akapapu tatou i to tatou pirianga oa ki te Atua na te pure anga kiaia.
14. Eaa te pure i puapinga ai no te apii maata atu no runga i te Atua?
14 Ka riro te karangaranga anga meitaki ei akatupu i te pirianga ketaketa. No reira e akavaitata ki te Atua na roto i te pure putuputu, e te akakite i toou au manako oonu kiaia. (Ephe. 6:18) Karanga a Krista tei noo ana i Turkey: “Kua tupu toku inangaro e toku irinaki ia Iehova me akakite au i toku manako na roto i te pure e kua kite au i tana tauturu. Na te kite anga ia Iehova i te pau anga mai i taku pure, kua tauturu iaku kia kite ia Iehova ei Metua e te Oa noku.”
E TANGATA TAU I TO IEHOVA NGAKAU
15. Akapeea a Iehova i te kapiki anga i te Ariki ko Davida?
15 Kua anauia te Ariki ko Davida ki roto i tetai iti tangata tei akatapuia ki te Atua ko Iehova. Inara e maata atu ta Davida i rave i te aru ua i te peu akonoanga a tona ngutuare tangata. Kua akaketaketa aia i tona pirianga ki te Atua, Anga. 13:22) Akapeea a Davida i te piri vaitata anga kia Iehova?
e kua akaperepere a Iehova iaia. Kua kapiki a Iehova ia Davida “e tangata e tau i [Tona] ngakau.” (16. Eaa ta Davida i apii no runga ia Iehova na te akara anga i te au mea i angaia?
16 Apii a Davida no runga ia Iehova mei tana au mea i anga. Ia Davida e mapu ra, kua akapou aia i tona taime i te akono i te mamoe a tona metua tane. Penei ko te taime te reira i tona akamanako oonu anga i te au mea ta Iehova i anga. Ei akaraanga, kua akara a Davida ki runga i te rangi i te po, kua kite aia e manotini ua atu etu e kua kite aia i te au tu o Tei Anga i te au mea ravarai. Kua akakeuia a Davida kia tata: “Te tuatua nei te au rangi i te kakā o te Atua; e te akakite nei te reva i te angaanga a tona rima.” (Sala. 19:1, 2) I te akamanako anga a Davida i te au tu manea o te tangata i angaia, kua kite meitaki aia i to Iehova tu pakari e te umere. (Sala. 139:14) Ia Davida e akamanako ra i te au angaanga a Iehova, kua taakaaka aia iaia uaorai.—Sala. 139:6.
17. Eaa ta tatou ka apii me akamanako oonu tatou no te au mea i angaia?
17 Eaa te apiianga no tatou? E akamanako i te au mea i angaia. E akara aere i teia ao manea ta Iehova i anga; e mea umere tikai! E akamanako oonu ua rai i te au mea i angaia takapini ia koe—te au tiare, te au manu, e te tangata—te apii maira te reira ia Iehova. E maata ua atu te au apiianga no runga i to tatou Metua aroa. (Roma 1:20) E i te rā tataki tai, ka maata atu toou aroa nona.
18. Ia Salamo 18, eaa ta Davida i kite mai?
18 Kite a Davida e te tauturu ra a Iehova iaia. Ei akaraanga, i te paruru anga a Davida i te mamoe a tona papa mei te riona e te daba, kua kite aia i te tauturu a Iehova te tamate anga i te au manu taae. I tona autu anga i te tuputupua ko Golia, kua kite meitaki a Davida i te aratakianga a Iehova. (1 Samu. 17:37) I tona oroanga mei te ariki vareae ko Saula, kua kite a Davida e na Iehova aia i akaora. (Sala. 18, tataanga i runga ake) Penei ka āriki ua tetai tangata parau e nana i rave i teia au angaanga. Inara kua taakaaka a Davida iaia, e kua kite i to Iehova rima tauturu i roto i tona oraanga.—Sala. 138:6.
19. Eaa ta tatou ka apii mai mei to Davida akaraanga?
19 Eaa te apiianga no tatou? Ka anoanoia tatou kia rave maata atu i te pati i ta Iehova tauturu. Kia kite katoa tatou aea e akapeea aia me tauturu ia tatou. Me kite akaaka tatou i to tatou kotinga, ka kite meitaki tatou i ta Iehova tauturu. Me kite tatou i ta Iehova tauturu i te au taime ravarai, ka matutu atu to tatou pirianga kiaia. Kua tupu teia kia Issac, e taeake i Viti tei tavini ia Iehova no tetai tuatau roa. Karanga aia: “Me akamanako au i toku oraanga, te kite nei au i to Iehova rima tauturu mei te tuatau i apii ei au i te Pipiria e tae mai ki teia tuatau. Tei tupu, e Atua tika tikai a Iehova kiaku.”
20. Eaa ta tatou ka apii mai mei te pirianga o Davida ki te Atua?
20 Aru a Davida i to Iehova au tu. Kua anga a Iehova ia tatou kia akaari i tona au tu. (Gene. 1:26) Me apii maata atu tatou i teia au tu o Iehova, ka meitaki atu tatou. Kua kite meitaki mai a Davida i tona Metua i te rangi, e kua aru aia i Tona tu na te akono anga i tetai ke. Akamanako ana i tetai akaraanga. Kua ara a Davida ia Iehova i tona akaturi anga kia Bate-seba e kua tamate atu i tana tane. (2 Samu. 11:1-4, 15) Inara kua tangi aroa a Iehova ia Davida, e tangata tei akaari i teia tu ki tetai ke. No to Davida pirianga meitaki kia Iehova, kua riro mai aia ei ariki akaperepereia ta Iehova i akaaite ki tetai au ariki ke o Iseraela.—1 Ari. 15:11; 2 Ari. 14:1-3.
21. Ia Ephesia 4:24 e te 5:1, eaa te tupuanga me ‘aru tatou i te Atua’?
21 Eaa te apiianga no tatou? Ka anoanoia tatou kia ‘aru i te Atua.’ Me rave tatou i teia ka puapingaia tatou e ka tauturu ia tatou kia kite meitaki iaia. Me aru tatou i tona au tu ka riro tatou ei tamariki nana.—E tatau ia Ephesia 4:24; 5:1.
E APII UA ATU KIA KITE MEITAKI IA IEHOVA
22-23. Eaa te ka tupu me taangaanga tatou i ta tatou i apii no runga ia Iehova?
22 Mei ta tatou i kite mai, kua akaari a Iehova iaia na roto i tana au mea i anga e tana Tuatua te Pipiria. E au akaraanga manea to roto i teia puka umere no te au tavini tiratiratu o te Atua ta tatou ka aru, mei ia Mose e Davida. Kua rave a Iehova i tana tuanga. Tei ia tatou kia akamou i to tatou mata, te taringa e te akatuera i te ngakau kiaia.
23 Kare tatou e akamutu i te apii ua atu ia Iehova. (Kohe. 3:11) Te mea puapinga kare kia kite ua iaia, mari ra kia taangaanga i te reira. Me apii tatou e te tauta i te aru i to tatou Metua aroa, ka piri vaitata mai aia kia tatou. (Iako. 4:8) Na roto i tana Tuatua, te akapapu maira e kare aia e akaruke i te aronga e kimi ra iaia.
IMENE 80 “Ka Tongi Ana Kia Kite i te Meitaki o Iehova”
^ para. 5 Maata te aronga e irinaki ra e te ora ra te Atua, inara kare ratou i kite meitaki tikai iaia. Eaa te aiteanga kia kite meitaki ia Iehova, e eaa ta tatou ka apii mai mei ia Mose e te Ariki ko Davida e akapeea me akaketaketa i tetai pirianga oa Kiaia? Ka pau teia atikara i teia au uianga.