Au Uianga a te Aronga Tatau
Karanga te Pipiria ka anoanoia e rua tangata no te akatikatika i tetai manamanata. (Nume. 35:30; Deu. 17:6; 19:15; Mata. 18:16; 1 Timo. 5:19) Inara i raro i te Ture, me kua kukumi-vaine tetai tangata “i te ngai motutaa ra,” e kua kapiki maata te vaine, kare aia i apa, ko te tangata ra tei rave i te kino. No te mea kare e tangata i kite ana i teia tarevake, eaa ra teia vaine kare i apa i te ture e ko te tangata tei rave i te kino tei apa?
Te akaraanga i roto ia Deuteronomi 22:25-27, kare te reira no te akapapu anga i te kino a te tangata tei rave i te kino, no te mea kua apa takere aia. Mari ra kua akamou te ture ki runga i te tumu kare te vaine i apa. Akamanako ana i teia.
Akakite maira te nga irava i mua ake, no tetai tangata tei moe ki te vaine te ka akaipoipo i tona taeake “i te oire.” No te rave anga i teia kua akaturi te tangata tei rave i te kino, no te mea kua manakoia te reira vaine ei vaine akaipoipo. Akapeea i reira tera vaine? “Kare rai aia i kapiki.” Naringa aia i pera, ka akarongo mai tetai ke e ka tauturu mai iaia. Inara kare aia i kapiki maata. No reira, kua apa aia i te akaturi e kua tau rai raua kia tamateia.—Deu. 22:23, 24.
Aru mai kua akakite te Ture i tetai turanga ke: “Kia rokoia atura te paretenia i momokoia ra e tetai tangata i te ngai motutaa ra, e kua opu taua tangata ra iaia, kua moe iora kiaia; ko taua tane anake i moe kiaia ra te ka mate i reira: Auraka ra koe e akautunga ua atu i taua vaine ra; kare oki a taua vaine ra e ara e tau ei te mate: e arite oki te reira ki te tangata e tu ua ki runga e kua rave e ta ua i tona taeake ra, koia katoa oki te reira: Rokoia atu oki aia e ia i te ngai motutaa, e kua kapiki ua oki taua paretenia i momokoia ra, e kare e tangata i te akaora iaia.”—Deu. 22:25-27.
I roto i teia turanga, kua irinaki te au akava i tei tupu ki te paretenia tei momokoia. Na teea tu? “Kua kapiki ua oki taua paretenia i momokoia ra, e kare e tangata i te akaora iaia.” No reira, kare aia i apa. Ko te tangata ra tei rave i te kukumi-vaine e te akaturi kua apa aia, no te mea “kua opu taua tangata ra iaia, kua moe iora kiaia.”
Noatu kua akamou te ture ki runga i te turanga kare te vaine i apa, kua akamārama mai teia akaraanga e kua apa te tangata tei rave i te kukumi-vaine e te akaturi. Papu ia tatou e kua “ui meitaki” te au akava e kua iki i ta ratou ikianga kia tau ki ta te Atua ture tuatua mou e te taka meitaki.—Deu. 13:14; 17:4; Exo. 20:14.