Kare te Tiaporo i akakite ana kia Eva e, me kai aia i te ua rakau ta te Atua i tuatua mai, ka mate aia, inara ko tetai tuanga kitea koreia iaia (ta tetai pae e irinaki ra i teia tuatau e e oraanga mate kore) ka ora ua atu te reira. Tuatua anga na roto i te ovi, karanga a Satani me kai a Eva i te ua rakau, ‘kare aia e mate.’ Karanga aia e ka ora ua atu a Eva, e ka mataora i tetai oraanga meitaki rava i te enua nei, e oraanga takake mei te Atua.—Gene. 2:17; 3:3-5.

No te mea kare te apiianga pikikaa o te oraanga mate kore tei apiiia i teia tuatau i akamata mai i te aua i Edene, noea mai te reira? Kare i papu ia tatou. Papu ra ia tatou e kua takoreia te au akonoanga pikikaa i te Vaipuke i to Noa tuatau. Kua takoreia te au apiianga akonoanga i te Vaipuke, no te mea ko Noa ua e tona ngutuare tangata—te aronga akamori i te Atua mou—tei ora mai.

I teianei, te apiianga o te oraanga mate kore o tetai tangata kua akamata mai te reira i muri ake i te Vaipuke. Te taui anga te Atua i te au reo i Babela e kua akapueurikiriki i te tangata ki “te enua katoa e pini ua ake,” kua apai rai ratou i ta ratou apiianga e e oraanga mate kore to te tangata. (Gene. 11:8, 9) Noatu e noea mai teia apiianga pikikaa i akamata mai ei, papu ia tatou e kua turuturu te “metua oki no te pikikaa,” ko Satani te Tiaporo i teia, e kua mareka aia e kua totoa teia apiianga.—Ioa. 8:44.