1-2. Eaa te au Kerititiano katoatoa ka mareka ai i te tuakaouanga no te rangi?

E MAATA te tangata e tavini nei ia Iehova, te manakonako atura i te noo mutu kore i te enua nei. Inara, ko te toenga o te au Kerititiano tei akatainuia ki te vaerua, te manakonako atura ratou kia akatuia ki te oraanga i te rangi. Te tapapa atu nei te aronga akatainuia e mei teaa rai to ratou tu oraanga a te tuatau ki mua, e akapeea te aronga e manakonakoanga to ratou no te enua? Mei ta tatou ka kite mai, ka taki atu te tuakaouanga no te rangi ki te au akameitakianga no te aronga e manakonakoanga mutu kore to ratou no te enua nei. Noatu me e manakonakoanga to tatou no te rangi me no te enua, ka anoanoia tatou kia mareka i te tuakaouanga no te rangi.

² Kua akauru te Atua i etai o ta Iesu au pipi o te anere mataiti mua kia tata no te manakonakoanga no te rangi. Akataka te apotetoro ko Ioane: “E tamariki tatou na te Atua i teianei, kare ra i kitea to tatou tu a muri atu: kua kite ra tatou e kia mama mai aia ra, e riro tatou mei iaia katoa te tu.” (1 Ioa. 3:2) No reira, kare te au Kerititiano akatainuia i kite mei teaa to ratou tu me akatuia ratou ki te rangi ma te kopapa vaerua. Inara, ka kite ratou ia Iehova me rauka ta ratou tutaki. Kare te Pipiria i akakite mai i te au mea ravarai no te tuakaouanga ki te rangi, inara kua oronga mai te apotetoro ko Paulo i tetai au akakiteanga no  te reira. Ka noo te aronga akatainuia i te pae ia Karaiti me “ope rava te aronga au, e te mana, e te maroiroi” i te takoreia. Kapiti mai “taua enemi openga ra, ko te mate.” I te openga, ka tuku a Iesu​—e tona au tutara​—ia ratou uaorai e te au mea katoa, kia Iehova. (1 Kori. 15:24-28) Mei teaa atura te rekareka! *

3. Mei tei akakiteia e 1 Korinetia 15:30-32, kua tauturu ta Paulo irinakianga i te tuakaouanga kia rave aia i teaa?

³ No to Paulo irinaki i te tuakaouanga kua tauturu te reira iaia kia akakoromaki i te au timataanga tukeke. (E tatau ia 1 Korinetia 15:30-32.) Akakite aia ki to Korinetia: “Te mate nei au i te au rā katoa nei.” Tata katoa a Paulo: “I kukumi na au i te au puaka taae i Ephesia.” Penei te tuatua ra aia no tana kukumi anga i te au manu taae i roto i te ngai tarekareka anga i Ephesia. (2 Kori. 1:8; 4:10; 11:23) Me kore penei te tuatua ra aia no te patoi anga a te ngati Iuda e tetai pae tei aite ki te “au puaka taae.” (Anga. 19:26-34; 1 Kori. 16:9) Noatu eaa te tu, kua akakoromaki a Paulo i te au manamanata kino. Ma te irinaki e ka mataora tona oraanga a te tuatau ki mua.—2 Kori. 4:16-18.

4. Akapeea te manakonakoanga o te tuakaouanga te akamaroiroianga i te au Kerititiano i teia tuatau? (Akara i te tutu i te kapi mua.)

⁴ Te noo nei tatou i te tuatau tumatetenga. Kua tupu te takinokino anga ki te au taeake. Te noo ra tetai pae i te au enua tamaki ma te tumatetenga. Noatu rai te tavini ra tetai pae ia Iehova ma te tumatetenga i te au enua te araiia ra te angaanga tutu aere e kua tāpuia. Noatu eaa te tu, te aruaru ra teia au taeake e te au tuaine i te akamori ia Iehova, ei akaraanga meitaki no tatou. Noatu e ka takake atu ratou i teia tuatau, irinaki ratou i ta Iehova taputou manea a te tuatau ki mua.

5. Eaa te manako kino te ka akaparuparu i to tatou akarongo no te tuakaouanga?

⁵ Akamatakite a Paulo i tona au taeake no te manako kino o tetai pae: “Kia kore e tu akaou tei mate ra? ‘e kai tatou, e e inu oki; apopo oki tatou e mate ei.’” Kua tupu rai teia manako i mua ake i to Paulo tuatau. Penei te taiku ra aia ia Isaia 22:13, tei taiku i te tu o te ngati Iseraela. Kare ratou i akavaitata ana ki te Atua, mari ra kua aruaru ratou i te oraanga akanavenave ia ratou uaorai. Te manako o taua ngati Iuda “navenave te oraanga i teia rā, ka mate atu ei apopo.” Tau rai kia akamaara i te angaanga kino tei raveia e te iti tangata Iseraela.​—2 Para. 36:15-20.

6. Akapeea te manakonakoanga no te tuakaouanga, kia matakite tatou i te au oa?

⁶ Taka meitaki, i te mea ka rauka ia Iehova i te akatu mai i te aronga tei mate, kia matakite tatou i to tatou au oa. Kua anoanoia te au taeake i Korinetia kia matakite i to ratou pirianga oa ki te aronga tei irinaki kore i te tuakaouanga. Te apiianga no tatou i teia tuatau: Puapinga kore te oraanga me iki tatou i te au oa ma te oraanga navenave i te au rā. Me piri tatou kia ratou, ka takino te reira i to tatou oraanga Kerititiano meitaki. Te tika, ka akavare teia ia tatou kia aru i te oraanga te rikarika ra te Atua—ko te ara. No reira, akamaroiroi a Paulo: “Kia ara e tikaʼi, auraka e rave i te ara.”​—1 Kori. 15:33, 34.

7. Eaa ta tetai pae uianga no te tuakaouanga ia 1 Korinetia 15:35-38?

⁷ E tatau ia 1 Korinetia 15:35-38.  Penei ka ui tetai tei ekoko i te tuakaouanga: “Akapeea te aronga mate me akatuia mai?” E mea meitaki i te akamanako i ta Paulo pauanga, no te mea e maata to te tangata manako no te oraanga i muri ake i te mate anga. Inara eaa ta te Pipiria e apii maira?

8. Eaa te akatutuanga te ka tauturu ia tatou kia mārama i te tuakaouanga ki te oraanga i te rangi?

⁸ Me mate tetai tangata, ka pe tona kopapa. Inara na Tei anga i te ao katoa e pini ua ake e oronga i tetai kopapa meitaki nona. (Gene. 1:1; 2:7) Kua taangaanga a Paulo i tetai akatutuanga tei akaari kare te Atua e anoanoia kia akaoki mai i taua kopapa. Akamanako ana i “te au,” me kore te “ua” rakau. Ka tupu te ua i roto i te one e ka riro mai ei rakau ou. E tuke rai te rakau ou ki te ua rikiriki. Kua taangaanga a Paulo i teia akaaiteanga ei akaari e ka rauka i Tei Anga ia tatou i te omai i tetai “tu [kopapa], tana i inangaro ra.”

9. Eaa ta 1 Korinetia 15:39-41 e karanga ra no te au tu kopapa?

⁹ E tatau ia 1 Korinetia 15:39-41. Akakite a Paulo e te vaira te au mea tukeke i roto i te au mea tei angaia. Ei akaraanga, te vaira te au kopapa tukeke, mei te puakatoro, te manu rere, e te ika. Akakite aia, ka kite tatou i te rangi, te tuke o te ra e te marama. Akakite aia “e tu ke oki to tetai etu i to tetai i te kakā.” Ae, noatu kare tatou e kite meitaki ana i te reira, karanga te aronga taieni, te vaira te au etu muramura e te mamaata, te au etu teatea e te rikiriki, e te au etu rengarenga, mei te ra. Akakite katoa a Paulo “e au kopapa rangi tetai, e e au kopapa enua tetai.” Mei teaa te tu? I te enua nei, e au kopapa kiko to tatou, inara i te rangi e au kopapa vaerua to reira, mei te au angera.

10. Eaa te tu kopapa o te aronga te ka akatuia ki te rangi?

¹⁰ Akara i ta Paulo i tuatua i teianei: “Koia katoa te tuakaouanga o tei mate ra:  i ruruia ei mea pe ua, i akatuia ei mea pe kore.” E tika, me mate tetai tangata, ka pe tona kopapa e ka oki akaou ki te one. (Gene. 3:19) Akapeea i reira te kopapa me “akatuia ei mea pe kore.” Kare a Paulo e tuatua ra no tetai tangata tei akatuia kia ora i te enua nei, mei ia Elia, Elisaia, e Iesu. Te tuatua nei a Paulo no tetai tangata tei akatuia ma te kopapa no te rangi, koia oki, “te kopapa vaerua.”​—1 Kori. 15:42-44.

11-12. Eaa te taui anga ta Iesu i kite te akatuia anga aia, e akapeea ra te aronga akatainuia?

¹¹ Te aaere anga a Iesu i te enua nei, e tangata ora aia. Inara te akatuia anga aia “e vaerua ora” aia e kua oki atura ki te rangi. Pera katoa te au Kerititiano akatainuia, ka akatuia ratou ki te oraanga vaerua i te rangi. Akataka a Paulo: “E mei te tu o to te one i vai ki runga ia tatou nei, e riro katoa ki runga ia tatou te tu o to te rangi.”​—1 Kori. 15:45-49.

¹² Te taopenga ra a Paulo i tana uriuri anga no te tuakaouanga. E mea puapinga i te akamanako e kare a Iesu i akatuia mai ei kopapa tangata. Karanga a Paulo: “Kare te kopapa toto nei e te kiko e noo ki te basileia o te Atua.” (1 Kori. 15:50) Kare te au apotetoro e te aronga akatainuia e akatuia ki te rangi ma te kopapa toto e te kiko pe ua. Aea ratou e akatuia ai? Akakite a Paulo e te vaira te reira tuakaouanga a te tuatau ki mua; kare ratou e kite i te reira i muri ake i te mate anga. I te taime i tata ei a Paulo ia 1 Korinetia, kua “moe ra tetai papaki” pipi na te ara o te mate, mei te apotetoro ko Iakobo. (Anga. 12:1, 2) Kare e roa ka “moe” rai na te ara o te mate tetai au apotetoro e te aronga akatainuia.​—1 Kori. 15:6.

13. Akapeea e kitea ai te tuatau e rokoia mai ei e Iesu?

¹³ Kua totou a Iesu e Paulo i tetai tuatau puapinga ki mua​—to Karaiti mama  anga mai. Ka kiteaia te reira na roto i te au akairo o te tamaki, te ngaruerue enua, te maki mate, e te au tu kino e tupu ra i teianei ao. Kua kite tatou i teia totou Pipiria te akatupuia anga mei te 1914 mai. Te vaira tetai apinga puapinga mei te reira akairo. Karanga a Iesu e ka tutu aereia te nuti meitaki o te Patireia o te Atua “e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mata. 24:3, 7-14) Karanga a Paulo, i te tuatau e “rokoia mai ei e te Atu,” e tuatau katoa te reira no te tuakaouanga o te au Kerititiano akatainuia tei “moe” ra na te ara o te mate.​—1 Tesa. 4:14-16; 1 Kori. 15:23.

14. Eaa ta te aronga akatainuia ka kite me ope ratou i te akatukeia i te tuatau e rokoia mai ei e Karaiti?

¹⁴ Te aronga akatainuia tei akaoti i ta ratou angaanga i te enua nei, ka akatu vivikiia ratou ki te oraanga i te rangi. Kua akapapuia teia e te au tuatua a Paulo ia 1 Korinetia 15:51, 52: “Kare tatou e ope i te moe, e ope ra tatou i te akatu keia, kare e mamia, mei te kamo anga mata nei, kia tae ki te pu openga ra.” Te akatupuia nei teia au tuatua totou a Paulo i teianei! I to ratou tuakaouanga, ka rekareka maata te au taeake o Karaiti; “ka noo mou atu ei [ratou] i vaitata uao i te Atu e tuatau ua atu.”​—1 Tesa. 4:17.

15. Eaa te angaanga te tiaki maira i te aronga te ka akatukeia “mei te kamo anga mata nei”?

¹⁵ Akakite maira te Pipiria i ta ratou angaanga i te rangi me akatukeia ratou “mei te kamo anga mata nei.” Karanga a Iesu kia ratou: “E te riro iaia te re ra, e te tāpu i taku tuatua e tae ua atu ki te openga ra, e oronga atu au i te mana nona ki rungao i te pa enua: E e tutara aia  i rungao ia ratou ma te sepeta auri ra; e e ungaungā rava ratou mei te kapu a te potera ra: mei tei tukuia mai e taku Metua iaku nei.” (Apo. 2:26, 27) Ka aru ratou i to ratou Rangatira​—ma te tutara i te pa enua ma te sepeta auri.​—Apo. 19:11-15.

16. Akapeea te tangata e re ei ki rungao i te mate?

¹⁶ Taka meitaki, ka re te aronga akatainuia ki rungao i te mate. (1 Kori. 15:54-57) Mei to ratou tuakaouanga, ka ō ratou ki roto i te tamaki anga i te kino i te enua nei, i te tuatau o te tamaki o Aramagido. E mirioni ua atu au tane e te au vaine Kerititiano te ka “aere mai mei roto i te mate maata,” e ka ora atu ki roto i te ao ou. (Apo. 7:14) Te aronga te ka ora mai i te enua nei, e au kite ratou no tetai akaou re ki rungao i te mate​—te tuakaouanga o te pirioni ua atu tangata tei mate i te tuatau i topa. Akamanako ana i to tatou mataora me tupu te reira! (Anga. 24:15) Pouroa te aronga tei tiratiratu kia Iehova ka re ratou ki rungao i te mate. Ka ora ratou e tuatau ua atu.

17. Ia 1 Korinetia 15:58, eaa ta tatou ka rave i teianei?

¹⁷ Pouroa te au Kerititiano e ora nei i teianei ka rekareka ratou i ta Paulo i tata ki to Korinetia no te tuakaouanga. Ka tau tatou kia āriki i ta Paulo akamaroiroianga kia angaanga pakari i “te angaanga a te Atu.” (E tatau ia 1 Korinetia 15:58.) Me piri maroiroi tatou ki roto i te reira angaanga, ka tapapa atu tatou i tetai oraanga mataora a te tuatau ki mua. E mataora atu te reira oraanga i ta tatou i kite i teianei. Ka akapapu mai te reira e kare ta tatou angaanga pakari na te Atu i puapinga kore.