Akakite a Iehova e kia riro te ngati Iseraela ei iti tangata tapu. Ei akatapu ia ratou, kua karanga aia: “Auraka koe e monomono korero aere na roto i to iti-tangata na: auraka oki koe e tu ki runga ei tapepe pikikaa i to tangata tupu kia mate: ko au ko Iehova.”—Levi. 19:2, 16.

E urianga meitaki teia irava “e tu ki runga” i roto i te reo Ebera, inara eaa tona aiteanga? Akakite tetai puka ngati Iuda no te puka a Levitiku: “E ngata i te mārama i teia irava no te mea . . . e ngata i te mārama i te aiteanga o te tuatua Ebera, te na ko ra ‘auraka oki koe e tu ki runga, i te pae, vaitata mai.’”

Manako mai tetai aronga kite e aite teia tuatua ki te irava 15, te na ko ra e: “Auraka kotou e akatika i te tuatua-tika kore i te akava anga: auraka koe e uri ki te tangata rikiriki, auraka oki e tatomo atu ki te tangata mamaata: ka akava koe i to tangata tupu ma te tuatua-tika ra.” (Levi. 19:15) Me koia ïa, te aiteanga o te akauenga i te irava 16, “auraka oki koe e tu ki runga” i tetai tangata, koia oki, auraka te aronga Iseraela e rave i te mea tika kore i te akavaanga, te angaanga moni e te ngutuare, e auraka aia e rave i te mea tika kore kia puapinga iaia uaorai. E tika, eiaa tatou e rave i te reira inara, e akamārama anga meitaki atu tetai no teia tuatua i roto i te irava 16.

Akamanako ana i te akamataanga o tera irava. Akaue te Atua i tona iti tangata, auraka e monomono korero aere na roto i te iti tangata. E tika, me urutoe tetai tangata i tetai ke, ka akatupu te reira i te manamanata, inara me monomono korero aere, koia oki me akakino aia i tetai ke, e kino roa atu te reira. (Mase. 10:19; Kohe. 10:12-14; 1 Timo. 5:11-15; Iako. 3:6) Ka riro te tuatua a te tangata akakino ei tapepe pikikaa e te takinokino i te ingoa o tera tangata. Penei ka riro te tangata akakino ei kite pikikaa no te akaapa i tetai tangata, noatu e ka tamateia tera tangata. E akamaara, kua tapepe pikikaa te aronga akakino ia Nabota, tei taki ki te pei anga iaia ki te toka kia mate atu. (1 Ari. 21:8-13) No reira, ka tu te tangata akakino ki runga ei tapepe pikikaa i tona tangata tupu kia mate, mei tei taikuia i te tuanga rua o Levitiku 19:16.

Pera katoa, penei ka tapepe pikikaa tetai i tona tangata tupu no te mea te makitakita ra aia i tera tangata. Ia 1 Ioane 3:15, ka tatau tatou: “Ko tei makitakita i tona taeake, e ta tangata ïa: kua kite oki kotou e, kare o te ta tangata ra e ora mutu kore e vai i roto iaia.” Te mea umere, i muri ake i te irava 16, kua akakite te Atua: “Auraka koe e riri ua i to taeake i roto i to ngakau.”—Levi. 19:17.

Te riro ra te akauenga takake ia Levitiku 19:16 ei ako pakari i te au Kerititiano. Auraka tatou e akatika i te manako kino ei tapepe e te akakino i tetai ke. No reira me “tu [tatou] ki runga ei tapepe pikikaa i to [tatou tangata tupu] kia mate” te akatika ra tatou i te riri me kore te vareae kia akakino i tera tangata, e akapapuanga te reira e te makitakita ra tatou i to tatou taeake. Auraka rava te au Kerititiano e akapera.—Mata. 12:36, 37.