ATIKARA APII 25
E Irinaki ia Iehova me Tupu te Taitaia
“Taitaia ua ra au.”—1 SAMU. 1:15.
IMENE 30 Toku Oa, Toku Atua e Toku Metua
I ROTO I TEIA APII *
1. Eaa ra tatou ka akarongo ei ki ta Iesu akamatakiteanga?
I ROTO i tana totou no te tuatau openga, akakite a Iesu: “E matakite ra ia kotou, ko te opue aea to kotou ngakau i te . . . pekapeka o teianei ao.” (Luka 21:34) Ka anoanoia tatou kia akarongo ki teia au akamatakiteanga. Eaa te tumu? No te mea, te tupu nei rai te pekapeka e te taitaia kia tatou katoatoa.
2. Eaa te au tu manamanata tukeke te tupu ra ki te au taeake e te au tuaine?
2 Tetai taime, ka maata te pekapeka e te tuke tuke o te au manamanata. Akamanako ana i teia akaraanga. Kua tuia a John * e Kite no Iehova, i te maki multiple sclerosis, kua tupu te maromaroa kiaia no te mea kua akaruke tana vaine akaipoipo iaia e 19 mataiti. E oti, kua akamutu tana nga tamaine i te tavini ia Iehova. Tuke rai to Bob raua ko Linda manamanata. Kua ngere raua i ta raua angaanga, e no te reira kare e rauka i te tutaki i to raua kainga. I te pae mai i teia, kua akakite te taote kia Linda, kua tu aia i tetai maki kino o te pukuatu te ka tamate iaia, e tetai au maki ke te ka akaparuparu i tona paruru anga.
3. I roto ia Philipi 4:6, 7, eaa ta teia e akapapu maira kia tatou?
3 Papu ia tatou e te mārama ra to tatou Metua aroa, ko Iehova Tei Anga ia tatou i to tatou turanga taitaia. Inangaro aia i te tauturu ia tatou kia akakoromaki i teia au turanga manamanata. (E tatau ia Philipi 4:6, 7.) Maata te au akaraanga i roto i te Tuatua a te Atua, te akakite maira i te au manamanata ta te au tavini i na roto ana, e kua akakoromaki ratou i te reira. Te akakite maira te reira akapeea a Iehova i te tauturu anga ia ratou kia akono i te reira, noatu te maata i te taitaia. Akamanako ana tatou i tetai au akaraanga.
“E TANGATA OKI A ELIA MEI IA TATOU KATOA TE TU”
4. Eaa te au timataanga ta Elia i na roto ana, eaa tona manako ia Iehova?
4 Kua tavini a Elia ia Iehova i te au tuatau ngata e te kino. Akaipoipo te Ariki ko Ahaba, tetai ariki tiratiratu kore o Iseraela ia Iezebela e vaine kino tei akamori ia Baala. Na roto ia raua kua akamata te tangata i te akamori ia Baala e kua tamate katoa raua i te au peroveta a Iehova. Kua oro atura a Elia. Kua ora mai aia mei te onge pakari na te irinaki anga ki runga ia Iehova. (1 Ari. 17:2-4, 14-16) Pera katoa, kua irinaki a Elia ki runga ia Iehova i tona tuatua anga ki te au peroveta e te aronga akamori ia Baala. Kua akamaroiroi aia i te au Iseraela kia tavini ia Iehova. (1 Ari. 18: 21-24, 36-38) Maata ta Elia akaraanga i tupu kiaia i te akapapu mai e te tauturu ra a Iehova iaia i tona tuatau taitaia.
Tono atura a Iehova i tetai angera i te akamaroiroi ia Elia (Akara i te parakarapa 5-6) *
5-6. Ia 1 Ariki 19:1-4, eaa to Elia manako, e akapeea a Iehova i te akaari anga e te akaperepere ra aia ia Elia?
5 E tatau ia 1 Ariki 19:1-4. Kua mataku a Elia i tona kite anga e kua inangaro te Ariki Vaine ko Iezebela i te tamate iaia. No reira kua oro aia ki Bere-seba. Kua taitaia maata aia e “kua pati atura i te mate.” Eaa ra aia i manako akapera ai? “E tangata oki a Elia mei ia tatou katoa te tu.” (Iako. 5:17) Penei no te maata o te taitaia e te roiroi o te kopapa. Kua manako a Elia e kare i puapinga ana tana angaanga no te tauturu i te tangata kia akamori ia Iehova, e kare to Iseraela turanga i meitaki mai, e koia ua te akamori ra ia Iehova. (1 Ari. 18:3, 4, 13; 19:10, 14) Penei ka poitirere tatou e kua manako akapera teia peroveta tiratiratu. Inara kua mārama a Iehova i to Elia tu.
6 Kare a Iehova i ako ana ia Elia no tona manako. Mari ra, kua akamaroiroi aia ia Elia. (1 Ari. 19:5-7) Muri maira, kua akatikatika maru a Iehova i to Elia manako na te akaari anga i Tona mana ririnui. E oti, kua akakite a Iehova kiaia e te vaira e 7,000 tangata i Iseraela tei patoi i te akamori ia Baala. (1 Ari. 19:11-18) Na teia mataara, kua akaari a Iehova kia Elia e te akaperepere ra Aia iaia.
AKAPEEA A IEHOVA ME TAUTURU IA TATOU
7. Eaa te akapapu anga ka kite mai tatou mei ta Iehova tauturu anga ia Elia?
7 Te na roto ra ainei koe i tetai turanga taitaia? Mei teaa te pumaana i te kite e kua mārama a Iehova i to Elia au manako ngakau! Papu ia tatou e kua mārama katoa aia i to tatou turanga taitaia. Kua kite aia i to tatou au kotinga, ta tatou e manako ra e to tatou manako ngakau. (Sala. 103:14; 139:3, 4) Me aru tatou ia Elia na te irinaki anga ia Iehova, ka tauturu aia ia tatou kia akakoromaki i to tatou turanga taitaia.—Sala. 55:22.
8. Akapeea a Iehova me tauturu ia koe kia akakoromaki i toou turanga taitaia?
8 Ka akatupu te taitaia ia koe kia manako tau kore, e kia akaparuparu. Me tupu te reira, e akamaara ka tauturu a Iehova ia koe kia akakoromaki i toou turanga taitaia. Akapeea aia me tauturu ia koe? Te pati maira aia ia koe kia akakite i toou manamanata kiaia. E ka akarongo mai aia i taau kapiki anga kiaia. (Sala. 5:3; 1 Pete. 5:7) No reira e pure putuputu kia Iehova no toou manamanata. Kare aia e tuatua tika mai kia koe mei tana i rave kia Elia, mari ra ka tuatua aia kia koe na roto i tana Tuatua, te Pipiria, e tana akaaerenga. Taau tuanga i tatau i roto i te Pipiria, ka akapumaana ia koe e ka akamaroiroi ia koe. Pera katoa, ka akamaroiroi katoa toou au taeake e te au tuaine ia koe.—Roma 15:4; Ebe. 10:24, 25.
9. Akapeea tetai oa mou me tauturu ia koe?
9 I te akakite anga a Iehova kia Elia kia oronga i tetai angaanga kia Elisaia, kua oronga mai Aia i tetai taeake inangaroia no Elia, tei tauturu iaia e tei akamaroiroi iaia kia rave i tana angaanga. Pera katoa, me tuatua tatou ki tetai oa mou, ka rauka iaia i te akamaroiroi mai ia tatou. (2 Ari. 2:2; Mase. 17:17) Me kite koe kare oou taeake te ka tuatua pumaana mai kia koe, e pure kia Iehova kia tauturu ia koe kia kitea tetai taeake Kerititiano tiratiratu te ka akamaroiroi ia koe.
10. Akapeea to Elia akaraanga i te oronga anga mai i te manakonakoanga no tatou, e akapeea te taputou i roto ia Isaia 40:28, 29 me tauturu ia tatou?
10 Kua tauturu a Iehova ia Elia kia akakoromaki i tona turanga taitaia e kia tavini tiratiratu no tetai tuatau roa. Oronga mai to Elia akaraanga i te manakonakoanga no tatou. Tetai taime ka tupu te au tu taitaia kia tatou, te ka akaroiroi tikai ia tatou i te pae kopapa e te manako ngakau. Inara, me irinaki tatou ia Iehova, ka oronga mai aia i te maroiroi no te tavini iaia.—E tatau ia Isaia 40:28, 29.
IRINAKI A HANA, DAVIDA, E “ASAPHA” KI RUNGA IA IEHOVA
11-13. Akapeea te tu taitaia i te akatupu anga i te tu mareka kore ki te tavini e toru o te Atua?
11 Kua na roto katoa tetai au tangata i roto i te Pipiria i te au turanga taitaia. Ei 1 Samu. 1:2, 6) Kua taitaia tikai a Hana i tona turanga e kua aue otooto iora e kare akera e kaikai.—1 Samu. 1:7, 10.
akaraanga, kua akakoromaki a Hana i tona turanga pa e kua akakoko e kua akakino mai te rua o te vaine iaia. (12 Tetai au taime, kua taitaia kino te Ariki ko Davida. Akamanako ana i te au akaaoanga tana i aro atu. Kua taitaia maata aia no tana au tarevake i rave. (Sala. 40:12) Kua patoitoi tana tamaiti akaperepere ko Abasaloma iaia, e kua tamateia atura a Abasaloma. (2 Samu. 15:13, 14; 18:33) Kua pikikaa tetai oa piri mou o Davida iaia. (2 Samu. 16:23–17:2; Sala. 55:12-14) Te maata anga o te aereanga manako i roto i te au taramo ta Davida i tata, te akakite maira i tona manako taitaia e tona irinakianga mou ki runga ia Iehova.—Sala. 38:5-10; 94:17-19.
Eaa tei tauturu i te tata taramo kia tavini rekareka akaou ia Iehova? (Akara i te parakarapa 13-15) *
13 Muri maira, kua akamata tetai tata taramo i te vareae i te tu oraanga o te aronga kino. Penei no roto mai aia i te uanga o te ngati Levi ko Asapha, e tei tavini i “te ngai-tapu a te Atua ra.” Tupu te taitaia maata ki teia tata taramo, e kua mareka kore aia i tona oraanga. Kua ekoko aia i te au akameitakianga no ko mai i te tavini anga i te Atua.—Sala. 73:2-5, 7, 12-14, 16, 17, 21.
14-15. Eaa ta tatou ka apii mai mei te akaraanga Pipiria e toru kia pati tauturu kia Iehova?
14 Te au tavini akamori tokotoru tei taikuia, kua irinaki ratou ki runga i te tauturu a Iehova. Akakite ratou i to ratou turanga taitaia kiaia na roto i te pure akatenga. Kua tuatua ua ratou i to 1 Samu. 1:9, 10; Sala. 55:22; 73:17; 122:1.
ratou manako taitaia kiaia. E kua aere putuputu ratou ki to Iehova ngai akamori anga.—15 Kua akaaroa maru mai a Iehova ia ratou. Kua rauka ia Hana te manako ‘au. (1 Samu. 1:18) Tata a Davida: “Manganui to te tangata tuatua-tika ra mate; e akaoraia ra aia e Iehova i taua au mea katoa ra.” (Sala. 34:19) E kua kite mai te tata taramo e kua mou mai a Iehova i tona “rima katau” te arataki anga iaia ma te aroa. Kua imene aia: “E mea meitaki ra iaku kia akavaitata atu ki te Atua: kua irinaki au i te Atu ra, ia Iehova.” (Sala. 73:23, 24, 28) Eaa ta tatou i kite mai mei te au akaraanga? Tetai au taime, ka tupu te taitaia e te manamanata kia tatou. Inara ka rauka ia tatou te pumaana me akamanako oonu tatou akapeea a Iehova me tauturu i tetai ke, irinaki iaia na roto i te pure, e te akarongo iaia na te rave anga i tana e pati maira.—Sala. 143:1, 4-8.
IRINAKI KIA IEHOVA E RAUKA AI TE AKAKOROMAKI
Te akamataanga, kua akatakake tetai tuaine iaia, inara kua meitaki mai tona turanga i te tauturu anga aia i tetai ke (Akara i te parakarapa 16-17)
16-17. (a) Eaa te tumu kia kore e akatakake ia tatou? (e) Akapeea tatou e maroiroi akaou ei?
16 Apii mai teia akaraanga e toru i tetai apiianga puapinga—auraka tatou e akatakake Mase. 18:1) Ko Nancy, tei rokoia e te taitaia maata e kua akaruke tana tane iaia, karanga aia e: “Tetai au taime kare au e inangaro i te tuatua e te kite atu i tetai tangata. Inara ko te maata atu i taku akatakake anga iaku, kua maata atu toku maromaroa.” Kua taui te turanga i te tauturu anga a Nancy i te aronga e taitaia ra. Karanga aia: “Kua akarongo au ia ratou e akakite maira i to ratou manamanata kiaku. I toku akaaroa anga ia ratou, kua iti mai toku au manako taitaia.”
ia tatou mei ia Iehova e tona iti tangata. (17 Ka maroiroi akaou tatou me aere tatou ki te au uipaanga putuputuanga. Ia tatou i te au uipaanga, ka oronga tatou i te au tuatau kia Iehova kia ‘tauturu mai e kia akapumaana mai’ ia tatou. (Sala. 86:17) I reira ka akamatutu mai aia ia tatou na roto i tona vaerua tapu, tana Tuatua, e tona iti tangata. Ka riro te au uipaanga ei ‘akapumaana i te akarongo, i to tetai e tetai.’ (Roma 1:11, 12) Kua karanga tetai tuaine ko Sophia e: “Kua riro a Iehova e te au taeake ei akamaroiroi iaku. Te mea maata kiaku, kia aere au ki te au uipaanga a te putuputuanga. Kua kite mai au ko te maata atu i taku tutu aere e te aere ki te uipaanga, kua tauturu teia iaku kia akakoromaki i toku turanga taitaia.”
18. Me rokoia tatou e te taitaia, eaa ta Iehova ka oronga mai?
18 Me taitaia tatou, e akamaara kua taputou mai a Iehova i te akakore i te taitaia a te tuatau ki mua e te oronga maira aia i te tauturu akapeea tatou me akakoromaki i te taitaia i teianei. Oronga mai aia kia tatou “i te inangaro e te rave, mei tana i anoano ra” kia akakoromaki i te au tu taitaia e te manakonakoanga puapinga kore.—Phili. 2:13.
19. Eaa te akapapu anga ta Roma 8:37-39 e oronga maira kia tatou?
19 E tatau ia Roma 8:37-39. Akapapu mai te apotetoro ko Paulo kia tatou e kare e apinga e akatakake ia tatou mei te aroa o te Atua. Akapeea tatou me tauturu i to tatou au taeake e te au tuaine kia akakoromaki i te au tu taitaia? Ka uriuri te atikara ka aru mai, akapeea tatou me aru i to Iehova tu akaaroa e te tauturu i to tatou au taeake e te au tuaine me rokoia ratou e te taitaia.
IMENE 44 Te Pure a Tei Akaaka
^ para. 5 Me maata te taitaia e te roa i te reira, ka akatupu teia i te kino i te pae kopapa e te pae ngakau. Akapeea a Iehova me tauturu ia tatou? Ka apii tatou akapeea a Iehova i te tauturu anga ia Elia i tona turanga taitaia. Akaari mai tetai au akaraanga Pipiria kia tatou i te puapinga kia uri kia Iehova me tupu te taitaia.
^ para. 2 Tauiia te ingoa.
^ para. 53 AKATAKA ANGA TUTU: Akaara marie ta Iehova angera ia Elia e kua oronga i te varaoa e te vai nana.
^ para. 55 AKATAKA ANGA TUTU: Rekareka te tata taramo, e uanga no Asapha, i te imene e te tata i te au taramo ki tona au taeake Levi.