ATIKARA APII 23
“E Matakite ko te Pou Aea Kotou”!
“E matakite ko te pou aea kotou i te tuatua pakari e te pikikaa puapinga kore a tetai tangata atu.”—KOLO. 2:8.
IMENE 96 E Mea Umere te Tuatua a te Atua
I ROTO I TEIA APII *
1. Kia tau kia Kolosa 2:4, 8, akapeea a Satani me tauta kia pou aea tatou iaia?
KA INANGARO a Satani kia patoi tatou ia Iehova. Ei akatupu i tona akakoroanga, ka tauta aia i te akakeu i to tatou manako ko te pou aea tatou te akarongo kiaia. Ka tauta aia i te akavare ia tatou na roto i to tatou au anoano.—E tatau ia Kolosa 2:4, 8.
2-3. (a) Eaa tatou ka akarongo meitaki ei ki te akamatakiteanga ia Kolosa 2:8? (e) Eaa ta tatou ka uriuri i roto i teia atikara?
2 Tei roto ainei tatou i te kino kia akavareia e Satani? Ae! Akamaara, kare a Paulo i tata ana i te akamatakiteanga ia Kolosa 2:8, ki te aronga tei kore i irinaki. Kua tata aia i te reira ki te au Kerititiano tei akatainuia ki te vaerua tapu. (Kolo. 1:2, 5) I te reira tuatau, tei roto te au Kerititiano i te kino e tei roto katoa tatou i te kino maata i teia tuatau. (1 Kori. 10:12) Eaa te tumu? Kua tiria mai a Satani ki te enua nei, e te akakoro nei aia i te akavare i te au tavini tiratiratu o te Atua. (Apo. 12:9, 12, 17) Pera katoa, te noo nei tatou i te tuatau te kino ua atura te tangata “e tupu rai to ratou kino, e e maata atu.”—2 Timo. 3:1, 13.
3 I teia atikara, ka uriuri tatou akapeea a Satani me taangaanga i “te pikikaa puapinga kore” kia tauta i te akakeu i to tatou manako. Ka akara tatou e toru “ravenga pakari,” me kore parani. (Ephe. 6:11) E oti, i te atikara ka aru mai, ka uriuri tatou akapeea me patoi i tetai ua atu tu tau kore e tana au ravenga no te takino i to tatou manako. Te mea mua, ka uriuri tatou, te akavare anga a Satani i te au Iseraela i to ratou tomo anga ki roto i te Enua Taputouia.
TIMATAIA KIA AKAMORI I TE AU ITORO
4-6. Ia Deuteronomi 11:10-15, eaa te au tu tanutanu tuke ta te au Iseraela i rave i te Enua Taputouia?
4 Kikite a Satani i te timata i te au Iseraela kia akamori i te au itoro. Akapeea aia i te raveanga i te reira? Kua kite aia i to ratou anoano no te kai. Te tomo anga te au Iseraela ki roto i te Enua Taputouia, kua anoanoia ratou kia taui i ta ratou ravenga no te tanutanu. I Aiphiti, kua pîpî te au Iseraela i ta ratou ngai tanutanu ki te vai no roto mai i te kauvai o Nile. Inara, kare te ngai tanutanu i te Enua Taputouia i pîpîia ana ki te vai no roto mai i tetai kauvai, mari ra no te au tuatau uaua e te au ei tamauu i te ngai tanutanu. (E tatau ia Deuteronomi 11:10-15; Isa. 18:4, 5) No reira, kua anoanoia te au Iseraela kia apii i te au ravenga ou no te tanutanu. Kare te reira i te mea māmā ua, no te mea kua mate te maata anga o te aronga tei kite i te tanutanu i roto i te metepara.
Akapeea a Satani te taui anga i te manako o te aronga tanutanu o Iseraela? (Akara i te parakarapa 4-6) *
5 Akamārama a Iehova ki tona iti tangata e kua taui to ratou turanga. E oti kua akakite aia i teia akamatakiteanga, i te akara anga kare te reira no runga i te angaanga tanutanu: “Kia matakite ia kotou uaorai, kia kore to kotou ngakau e vare, kia kore kotou e tatipake i te araara anga i te au atua ke ra, e te akamori anga atu ia ratou ra.” (Deu. 11:16, 17) Eaa a Iehova i karanga ai auraka e akamori i te au atua pikikaa, iaia e tuatua ra no runga i te au ravenga ou no te tanutanu?
6 Kua kite a Iehova e ka timata te pa enua ke i te au Iseraela kia apii i ta ratou au ravenga ou no te tanutanu. E tika, e karape atu te pa enua i te au Iseraela, e ka apii te iti tangata o te Atua i tetai au tu karape mei ia ratou, inara te vaira te kino. Kua akakeuia te manako o te aronga tanutanu o Kanaana e te irinaki i te atua ko Baala. Irinaki ratou e ko Baala te pu o te tiaorangi e te ua. Kare a Iehova e inangaro i tona iti tangata kia akavareia e teia au irinakianga pikikaa. Inara, kua iki putuputu te au Iseraela i te akamori ia Baala. (Nume. 25:3, 5; Akava 2:13; 1 Ari. 18:18) Ka akara ana akapeea a Satani i te akatuikaa anga i te au Iseraela.
E TORU A SATANI RAVENGA NO TE AKATUIKAA I TE AU ISERAELA
7. Eaa te timata anga o te akarongo tei tupu ki te au Iseraela, i te tomo anga ki roto i te Enua Taputouia?
7 Te ravenga mua ta Satani i taangaanga, ko te akakeu i te anoano tau kia tamauuia te one. Kare e maata ana te ua i te Enua Taputouia i te au mataiti mei te openga o Aperira kia Tepetema. I roto ia Okotopa, meitaki te oraanga i te tuatau uaua. Akavare a Satani i to Iseraela kia irinaki i teia, kua anoanoia ratou kia aru i te au peu a te au pa enua ke. Irinaki te iti tangata e ka anoanoia te reira au peu ei akapuapinga i to ratou atua e kia akatupu i te ua. Irinaki te aronga tei ngere i te akarongo ki roto ia Iehova e ko te ravenga anake kia kore te tuatau marō, koia oki kia raveia teia au peu akamori ei akangateitei i te atua pikikaa ko Baala.
8. Eaa te rua o te akavare anga ta Satani i taangaanga? Akamārama mai.
8 Te rua o te ravenga ta Satani i taangaanga ki rungao i te au Iseraela. Kua akakeu aia i te au anoano tau kore. Kua akamori te pa enua ke i to ratou atua na te rave anga i te au angaanga tau kore e te viivii. Kua tupu te akamori anga akaturi a te au vaine e te au tane i ko i te iero. Pera katoa te pirianga sodoma e te au tu ainga tau kore! (Deu. 23:17, 18; 1 Ari. 14:24) Irinaki te pa enua ke e ka riro teia au peu ei akamaroiroi i to ratou atua kia akapuapinga i te one. E maata te au Iseraela tei aru i te au peu ainga tau kore a teia pa enua ke e kua akavareia kia tavini i te au atua pikikaa. Te tika, kua akatuikaaia ratou e Satani.
9. Ia Hosea 2:16, 17, akapeea a Satani te akakeu anga i te au Iseraela kia akangaropoina ia Iehova?
9 Te toru o te ravenga ta Satani i taangaanga. Kua akapoiri aia i ta te au Iseraela akara anga ia Iehova. I te tuatau o te peroveta ko Ieremia, kua akakite a Iehova e kua akakoro te au peroveta pikikaa kia akangaropoina Tona iti tangata i Tona ingoa, no “Baala.” (Iere. 23:27) Kua akamutu te iti tangata o te Atua i te taangaanga i te ingoa o Iehova e kua tupau i te reira ki te ingoa o Baala, tona aiteanga Akaaere me kore Pu. Ka ngata i te au Iseraela i te kite i te tuke i rotopu ia Iehova e Baala, e ka māmā ua ia ratou i te kairo i te au peu a te akamorianga a Baala e te akamorianga a Iehova.—E tatau ia Hosea 2:16, 17.
TA SATANI AKAVARE ANGA I TEIA TUATAU
10. Eaa te au akavare anga ta Satani e taangaanga ra i teia tuatau?
10 Te taangaanga ra rai a Satani i teia au tu akavare anga i teia tuatau. Te opu ra
aia i te tangata na te akakeu anga i to ratou au anoano natura, te akatupu anga i te ainga tau kore, e te akapoiri anga i ta te tangata akara anga ia Iehova. Ka uriuri ana tatou i te akavare anga openga na mua.11. Akapeea a Satani te akapoiri anga i ta te tangata akara anga ia Iehova?
11 Akapoiri a Satani i ta te tangata akara anga ia Iehova. I muri ake te mate anga te au apotetoro a Iesu, kua akamata tetai au Kerititiano akatutu ua i te akatotoa i te au apiianga pikikaa. (Anga. 20:29, 30; 2 Tesa. 2:3) Kua akapoiri teia aronga tei akaruke i te akarongo kia kore te Atua mou anake e kiteaia. Ei akaraanga, kua akamutu ratou i te taangaanga i te ingoa o te Atua i roto i te au Pipiria e kua tuku i te tuatua “Atu.” Na te akaatea anga i te ingoa o te Atua e kua tupau i te reira ki te “Atu,” kua ngata i te tangata tatau Pipiria kia kite e e tuke a Iehova mei te au “atu” i roto i te Tuatua Tapu. (1 Kori. 8:5) Kua taangaanga ratou i te tuatua, “Atu,” no Iehova e no Iesu, e e ngata kia mārama e e tuke a Iehova mei tana Tamaiti e e tuke katoa to raua taoonga. (Ioa. 17:3) No teia tuke i tupu ei te apiianga Toru Tai—kare teia apiianga i roto i te Tuatua a te Atua. Tei tupu mai, e maata tei irinaki e e Atua kitea koreia aia e kare tatou e kite koai aia. E pikikaa tikai teia!—Anga. 17:27.
Akapeea a Satani te taangaanga anga i te akonoanga pikikaa kia rave i te au anoano tau kore? (Akara i te parakarapa 12) *
12. Eaa ta te akonoanga pikikaa i akatupu, e eaa tei tupu, mei tei akatakaia ia Roma 1:28-31?
12 Akakeu a Satani i te au anoano tau kore. I te tuatau taito i Iseraela, kua taangaanga a Satani i te au akonoanga pikikaa ei akatupu i te au anoano tau kore. Pera katoa i teia tuatau. Te akatika ua ra te au akonoanga pikikaa i te angaanga tau kore. No reira, e maata tei tavini ana i te Atua e kua akaruke i tona au turanga tau. Akataka te apotetoro ko Paulo i tei tupu ki te au Roma i roto i tana reta. (E tatau ia Roma 1:28-31.) I roto i “te au mea tika kore” ko te au peu ainga tau kore katoatoa, kapiti mai te pirianga sodoma. (Roma 1:24-27, 32; Apo. 2:20) Mei teaa atura te puapinga kia aru tatou i te au apiianga taka meitaki a te Pipiria!
13. Eaa tetai akaou akavare anga ta Satani e taangaanga ra?
1 Timo. 5:8) Te maata anga o te taime ka rauka te au tu karape na te aere anga ki te apii ei aronga aruaru i te apii. Kia matakite ra tatou. Te apii ra te akatereanga apii i te au enua ke ke i te aronga apii, kia rauka te au tu karape e kia aru i te apiianga a te tangata. Akamaroiroiia te aronga apii kia ekoko e te vaira te Atua e kia kopae i te Pipiria. Akakiteia kia ratou e ko te apiianga o te au mea tupu ua, te pau anga no te akamata anga o te oraanga. (Roma 1:21-23) Te patoi ra te reira au apiianga i te “kite i te Atua.”—1 Kori. 1:19-21; 3:18-20.
13 Akakeu a Satani i te au anoano natura. E anoano natura to tatou kia apii i te au tu karape ei tauturu ia tatou i te akono i to tatou ngutuare tangata. (14. Eaa ta te apiianga a te tangata ka akatupu?
14 Te kopae ra e te patoi ra te apiianga a te tangata i te au turanga tika o Iehova. Kare te reira e turu ana i te au ua o te vaerua o te Atua, mari ra, “te au angaanga a te kopapa.” (Gala. 5:19-23) Te akatupu ra te reira i te tu ngakau parau e te akatietie, e kua riro te tangata “ei akaperepere ia ratou uaorai.” (2 Timo. 3:2-4) I tetai tua te akamaroiroiia ra te au tavini o te Atua, kia akatupu i te tu akaaka. (2 Samu. 22:28) Kua akariro tetai au Kerititiano i te apii teitei kia taui i to ratou manako kia āriki i te manako o te tangata, kare i to te Atua. Ka uriuri tatou okotai akaraanga.
Akapeea to tatou manako me takinoia e te apiianga a te tangata? (Akara i te parakarapa 14-16) *
15-16. Eaa taau i apii mai mei te akaraanga o te tuaine?
15 Karanga tetai tuaine i roto i te tavini anga tamou e tere atu i te 15 mataiti e: “Ei Kite papetitoia, kua tatau ana au e kua rongo i te au kino e tupu ana i roto i te apii teitei, inara kua kopae au i te au akamatakiteanga. Manako au e kare te akoanga e tau kiaku.” Eaa te au akaaoanga tana i aro atu? Karanga aia: “Kua pou toku tuatau i te apii e kare oku taime no te pure kia Iehova mei taku i matau, kua roiroi roa au i te uriuri i te Pipiria ki tetai ke, e kua roiroi i te akapapa no te au uipaanga. I toku kite anga e kua riro taku apii teitei ei takino i toku pirianga kia Iehova, kite meitaki au e ka akamutu au i taku apii. Kua pera rai au.”
16 Eaa ta teia apii teitei i akatupu ki te manako o teia tuaine? “Akama tikai au i toku kite anga e kua riro taku apii ei kimi anga apa i tetai ke, te au taeake e te au tuaine tikai, e kia māro ia ratou, e kia akatakake iaku mei ia ratou. Kua roa toku kite anga mai e kare teia tu e tau ana. E kua kite mai au i te kino me kopae au i te au akamatakite anga a to tatou Metua i te rangi na roto mai i tana akaaerenga. Kite meitaki a Iehova i toku tu. Naringa ua au i akarongo kiaia!”
17. (a) Eaa ta tatou ka akamanako meitaki? (e) Eaa ta tatou ka uriuri i roto i te atikara ka aru mai?
17 Auraka e akatuikaaia e “te tuatua pakari e te pikikaa puapinga kore” a to Satani ao. Kia matakite ua rai i te au akavare anga a Satani. (1 Kori. 3:18; 2 Kori. 2:11) Auraka e akatika iaia kia akapoiri i toou manako no runga ia Iehova. E aru i te au turanga tau o Iehova. Auraka e akatika ia Satani kia akavare ia koe kia kopae i te akoanga a Iehova. Inara akapeea me kua kite koe e kua takino takereia toou manako e teianei ao? Na te atikara ka aru mai e akaari akapeea te Tuatua a te Atua me tauturu ia tatou “te uri anga i te au punanga ketaketa ki raro” o te au manako e te au tu o te tangata.—2 Kori. 10:4, 5.
IMENE 49 Akamareka i te Ngakau o Iehova
^ para. 5 E pu a Satani no te akavare i te tangata. Kua akavare aia i te tangata kia irinaki e e tu rangatira to ratou, inara te tika anga e tuikaa ratou. Ka akara matatio teia atikara i tetai au ravenga a Satani no te akavare i te tangata.
^ para. 48 AKATAKA ANGA TUTU: Te pirianga te au Iseraela ki to Kanaana, kua timataia ratou kia akamori ia Baala e kia rave i te ainga tau kore.
^ para. 51 AKATAKA ANGA TUTU: E tuatua akakite i vao i te are pure tei āriki ua i te aronga sodoma.
^ para. 53 AKATAKA ANGA TUTU: Aere tetai tuaine mapu ki te apii teitei. Irinaki aia e tona au oa apii i te manako o te puapii kite, e ka rapakau te kite taieni e te technology i te au manamanata o te tangata. I ko i te Are Uipaanga Patireia, e tu akaapa ua tona e te mareka kore.