IRINAKI tatou pouroa e te arataki nei a Iehova ia tatou e te tauturu ra i tona iti tangata i te pae vaerua i te “tuatau openga.” (2 Timo. 3:1) Tei ia tatou tataki tai i te akarongo. Kua akaaiteia to tatou turanga ki to Iseraela i roto i te metepara. Kua akarongo ratou i te akatangi anga pu.

Karanga a Iehova kia Mose kia anga e rua pu ario “ei akaputuputu anga naau te uipaanga, e no te au puakapa oki kia aere.” (Nume. 10:2) Ka akatangi te au taunga i te au pu na roto i tetai au tu tukeke kia akakite eaa te anoanoia ra no te iti tangata. (Nume. 10:3-8) I teia tuatau, kua orongaia mai tetai aratakianga ki te iti tangata o te Atua na roto i tetai ravenga ke. Akamanako ana e toru ravenga te ka akamaara tatou no te akatangi anga pu i te tuatau taito. Kua patiia te iti tangata o te Atua i teia tuatau ki tetai akaputuputuanga maata, kua tereniia te au taeake akaaere, kua apiiia ratou i te akanoonooanga ou teokaratiki no te putuputuanga katoatoa.

Me inangaro a Iehova i “te uipaanga katoa” kia akaputuputu mai ki te ngutupa i te tua itinga o te tapenakara, ka akatangi te au taunga i nga pu. (Nume. 10:3) Ko te au kopu e noo ra takapini i te tapenakara i roto i te tuanga e a, ka rongo ratou i te akatangi anga pu tukeke. Ko te aronga e vaitata ra ki te pae i te ngutupa ka akarongo ratou e ka ariu ki te reira i nga miniti. Tetai pae e mamao ratou e ka anoano maataia tetai tuatau no ratou kia tae mai. Noatu teiea ratou, ka inangaro a Iehova ia ratou pouroa kia akaputuputu mai e kia puapingaia.

I teia tuatau, kare tatou e akaputuputu ana i ko i te tapenakara, inara te akamatakiteia maira tatou kia akaputuputu ki te iti tangata o te Atua. Kapiti mai ki te uruoaanga e tetai au putuputuanga takake, i reira tatou e apiiia ai te au manako puapinga e te aratakianga. I tetai au enua takapini i teia ao, e mataora ana te iti tangata o Iehova i te aru i taua porokaramu. Ko te aronga tei ariu mai ki teia patianga, ka mataora ratou i te piri mai ki teia akaputuputuanga. Tetai pae e aere mai ana ratou mei te ngai mamao. Inara ko te aronga tei āriki i te patianga, kua puapingaia to ratou akakoroanga.

Akapeea te aronga i te ngai mamao me akaputuputu mai ki teia ngai? Mari ua ake teia au apinga technology, e manganui tei puapingaia mei teia porokaramu e kua riro ratou ei tuanga  no tetai akaputuputuanga maata. Ei akaraanga, i te tuatau i atoro mai tetai o te opati maata, ko te opati Betela i Benin tei oronga i teia porokaramu ki Arlit, Nigeria, e oire meangiti i roto i te Sahara Desert. E 21 taeake e te au tuaine, e te aronga tei inangaro i te akaputuputu mai. E ngai mamao teia, inara kua taokotaiia ratou ki te akaputuputuanga maata mei te 44,131. Tata tetai taeake: “Meitaki maata e kua orongaia mai teia porokaramu. Te akaari maira teia i to kotou inangaro maata ia matou.”

Me akatangi te au taunga Iseraela i te pu, “ko te au tutara ïa no rungao i te au tausani,” te ka akaputuputu mai ki te puakapa uipaanga. (Nume. 10:4) Ka apiiia ratou te au apiianga e ka tereniia e Mose. Ka tauturu te reira ia ratou no te akono i ta ratou apainga i roto i to ratou kopu. Me ko koe tetai o teia au tutara, ka rauka ainei ia koe i te rave katoatoa i teia kia tae ki reira e kia puapingaia?

I teia tuatau, kare te aronga pakari o te putuputuanga i te “tutara”; kare katoa ratou e akaueue i te anana a te Atua. (1 Pete. 5:1-3) Inara ka rave ratou i te ka rauka i te akono i te anana. I na, kua papa ratou i te ariu atu ki te patianga no tetai terenianga, mei te Apii Tereni Orometua. Me raveia teia apiianga, ka apii te aronga pakari akapeea me akono i te au angaanga i roto i te putuputuanga. No te mea ka puapingaia te katoatoa i roto i te putuputuanga e ka akavaitata atu ki te Atua. Noatu kare koe i patiia ki tetai o teia apii, ka puapingaia koe mei te aronga tei aere ana.

E rave ana te au taunga Iseraela i te akatangi anga pu tukeke. Te akakite ra te reira e te inangaro ra a Iehova i te uipaanga kia neke. (Nume. 10:5, 6) Kua riro te neke anga o te uipaanga ei akaraanga meitaki no te akaaerenga, e ka inangaroia tetai au tangata kia akono i te katoatoa. Tetai pae ka manako ekoko ratou no runga i teia. No teaa ra?

Penei ka manako tetai pae e putuputu e kare e anoanoia teia kapiki anga kia neke. “E koia katoa kia po tai ua taua tumurangi ra i te noo anga, e ao ake.” I tetai taime, “e po rua atura, e mate atura te marama, e ope atura.” (Nume. 9:21, 22) Eia taime e neke ana te iti tangata? Kua taiku a Numero pene 33 e e 40 ngai ta te Iseraela i noo puakapa.

I tetai taime, ka kimi tetai pae i te ngai maru. Ka tau te reira noo anga i “taua medebara maata rikarika ra.” (Deu. 1:19) Penei ka tupu te manako ekoko e ka kino to ratou neke anga ki te reira ngai.

I te iti tangata e akamata ra i te neke, penei ka anoanoia tetai pae kia tiaki marie i to ratou taime kia neke. Ka akarongo ratou i te tangi anga o te pu, inara kare ratou e neke ana i te taime okotai. Ka akatangiia te pu ki te kopu ka noo i te tua itinga, te ngati Iuda, Isakara, e to Zebuluna ka aere. (Nume. 2:3-7; 10:5, 6) I muri ake ka neke ei, ka akatangi te au taunga i te pu no te rua o te taime, kia kite te kopu e toru e ka noo ratou ki te tua tonga. Kua rave ua atu te au taunga i teia e kua neke te uipaanga katoatoa.

Penei kua ngata ana ia koe i te āriki i te au akatikatika anga ou a te akaaerenga. Penei ka manako koe e maata roa te au tauianga. Me kore e reka ana koe i te au mea i mua ana, e kare e inangaro kia tauiia. Noatu eaa te tumu, ka timataia toou tu akakoromaki, e ka roa rai te tuatau. Inara, me ariu tatou ki teia tauianga ka kite tatou i ta te Atua akameitakianga.

I to Mose tuatau, kua paruru a Iehova e mirioni ua atu tane, vaine, e te tamariki ia ratou i roto i te metepara. Me kore tana akono anga e te aratakianga, kare ratou e ora mai. I teia tuatau, te ora nei tatou i te pae vaerua no te aratakianga a Iehova. Te tika, te tauta nei tatou! No reira, e manganui ia tatou te tauta nei kia akarongo ki te akatangi anga o te pu mei ia Iseraela tiratiratu!