“Te akamata anga toku cousin i te tā mai iaku, kua kukumi au i tona kaki. E inangaro tikai toku i te tā iaia.”—Paul.

“I te kainga, māmā ua iaku i te riri ma te kore e tumu anga. Ka vavai au i te au apinga i roto i te ngutuare, te apinga kangakanga e te vai atura.”—Marco.

Kare tatou e rave ana i te tā ua. Inara e ngata ia tatou i te akatere ia tatou i tetai taime. No teia tu, kua ara tatou katoatoa mei te tangata mua ko Adamu. (Roma 5:12) Mei ia Paul e Marco rai, e ngata ia raua i te akatere i to raua riri. Penei tetai pae e ākā angaanga i te akatere i to ratou manako. Penei te mataku ra ratou e te manamanata ra. Tetai pae e ākā angaanga ia ratou i te akaruke i te ainga tau kore, te inu maata i te kava e te kai i te apinga akakona.

Ko te aronga te akatika ra i to ratou manako, te navenave, e te vai atura, kare e rauka ia ratou i te akatere i to ratou oraanga. Inara ka rauka ia tatou i te kopae i te reira. Akapeea? Na te akatupu anga i te tu akono meitaki. Ei tauturu ia tatou, ka uriuri tatou e toru uianga: (1) Eaa te tu akono meitaki? (2) Eaa ka anoanoia ai? (3) Akapeea me akatupu i teia tu, o te ua o “te Vaerua”? (Gala. 5:22, 23) Ka uriuri tatou i ta tatou ka rave me ngere tatou i te tu akono meitaki.

Ko te tangata e tu akono meitaki tona kare ona manako rererere. Mari ra, ka tapupu aia i tana tuatua e te rave ra, kia kore e akamareka kore i te Atua.

Te akaari maira a Iesu kia tatou, eaa te ō maira ki te tu akono meitaki. Karanga te Pipiria: “Ko tei kore i akakino atu, kia akakinoia mai aia ra; e kia mate aia ra, kare aia i tuatua tutaki atu; kua tuku ra iaia uaorai kiaia nona te manako tika ra.” (1 Pete. 2:23) Kua taangaanga a Iesu i te tu akono meitaki i te avirianga te aronga patoi, iaia i runga i te rakau. (Mata. 27:39-44) Mua atu ana, akaari aia i te tu akono-meitaki, te uianga te au arataki akonoanga i tetai uianga kiaia i te tauta kia tuatua a Iesu i te tarevake. (Mata. 22:15-22) Eaa te akaraanga tana i akanoo te riri anga te au ngati Iuda iaia, e kua pei iaia ki te toka! Kare aia i riri ana ia ratou, kua “akangaro ua iorā Iesu . . . aere atura ki vao mai i te iero.”—Ioa. 8:57-59.

Ka rauka ainei ia tatou i te aru i te akaraanga o Iesu? Ae, ka rauka rai. Tata te apotetoro ko Paulo: “I mate katoa oki te Mesia uaorai no kotou; e kua vaoo oki i te akaraanga na kotou, kia aru kotou i tona takainga vaevae.” (1 Pete. 2:21) Noatu e aronga apa tatou, ka rauka ia tatou i te aru vaitata i to Iesu akaraanga no te tu akono meitaki. Eaa ta tatou ka anoano i te rave?

Ka anoano tatou i te tu akono meitaki kia marekaia tatou e Iehova. Noatu te tavini tiratiratu ra tatou ia Iehova no tetai tuatau roa, ka ngere tatou i te pirianga oa kiaia me kare tatou e akatere i ta tatou e rave ra e e tuatua ra.

Akamanako ana ia Mose, “e maru maata to taua tangata ra to Mose, i to te tangata ravarai o te ao katoa nei.” (Nume. 12:3) I muri ake i tona akakoromaki anga i te kopekope a to Iseraela, kua kore to Mose akatere anga iaia uaorai. Kua riri tikai aia ia ratou no te kopekope no te kore e vai. Kua tuatua riri aia ki te iti tangata, te karanga anga: “Ka akarongo mai ana, e tenana aronga meameaau; e tika aina ia maua kia apai atu i te vai na kotou no roto i teianei mato?”—Nume. 20:2-11.

Kua kore to Mose akatere anga iaia. Kare aia i oronga i te akameitakianga kia Iehova, te Tumu no te temeio. (Sala. 106:32, 33) Tei tupu, kare a Iehova i akatika ana ia Mose kia tomo ki roto i te Enua Taputou. (Nume. 20:12) Iaia e mate atura, kua tataraara a Mose no tei riri aia.—Deu. 3:23-27.

Te apiianga no tatou? Noatu kua roa tatou i roto i te tuatua mou, kare tatou e tuatua tau kore ki te aronga e akariri maira ia tatou me kore tei anoanoia kia akoia. (Ephe. 4:32; Kolo. 3:12) E tika, ia tatou e pakari atura, ka paruka to tatou tu akakoromaki i tetai taime. Inara e akamaara ia Mose. Kare tatou e inangaro i te takino i to tatou tuatau tavini tiratiratu anga no tei kore tatou i akono meitaki. Akapeea tatou me akatupu i teia tu?

Pure no te vaerua tapu. Eaa ra? No te mea ko te tu akono meitaki tetai ua o te vaerua o te Atua, e kua oronga mai a Iehova i tona vaerua ki te aronga e kimi iaia. (Luka 11:13) No tona vaerua, ka oronga mai a Iehova i tona maroiroi kia tatou. (Phili. 4:13) Ka tauturu aia ia tatou kia akatupu i te au ua o te vaerua, mei te inangaro, te ka akamaroiroi ia tatou no te tu akono meitaki.—1 Kori. 13:5.

Kopae i te au mea te ka akaparuparu i to tatou tu akono meitaki. Ei akaraanga, akaatea mai mei te au website Initaneti e te au tamataoraanga te rave ra i te au mea tarevake. (Ephe. 5:3, 4) E tika, ka rauka ia tatou i te kopae  i te au apinga te ka timata ia tatou kia rave i te tarevake. (Mase. 22:3; 1 Kori. 6:12) Ei akaraanga, ko te tangata e reka ra i te ainga tau kore, penei ka kopae aia i te tatau i te puka akainangaro e te akara teata.

Ka ngata ia tatou i te taangaanga i teia akoanga. Inara, me tauta tatou i te au mea ravarai, ka oronga mai a Iehova i tona maroiroi me anoano tatou i te akatere ia tatou uaorai. (2 Pete. 1:5-8) Ka tauturu aia ia tatou kia akatere i to tatou manako, tuatua, e te rave angaanga. Ei akapapuanga, kua taikuia a Paul raua ko Marco, kia apii raua roa ai i te akatere i to raua riri. Akamanako ana i tetai taeake e riri ua ana me akaoro, e ka kaitamaki ki tetai ke. Eaa tana i rave? “Kua pure au i te au rā ravarai. Kua tatau au i te au atikara no te tu akono meitaki e kua akamanako i te au irava i roto i te Pipiria. Noatu kua tauta pakari au i te akakore i te reira no tetai tuatau roa, e mea tau kia akamata au i toku rā ma te akakoroanga maru. E ka akaruke vave au no te aere ki te taote kia kore au e rapurapu.”

I tetai taime, ka ngere tatou i te tu akono meitaki. Me tupu te reira, penei ka akama tatou i te akakite kia Iehova na roto i te pure. Inara ka anoanoia tatou kia pure. No reira ka inangaroia tatou kia pure viviki. E pati akatenga kiaia kia akakore i ta tatou ara, e kimi i tana tauturu, kia kore e rave akaou i te tarevake. (Sala. 51:9-11) Eiaa e manako e kare a Iehova e akarongo mai i ta tatou pure. (Sala. 102:17) Te akamaara maira te apotetoro ko Ioane ia tatou e na te toto o te Tamaiti a te Atua i ‘mā ei ta tatou ara.’ (1 Ioa. 1:7; 2:1; Sala. 86:5) E akamaara te akakite maira a Iehova ki tona au tavini kia akakore putuputu i te ara a tetai ke. No reira ka papu ia tatou e ka rave aia i te reira no tatou.—Mata. 18:21, 22; Kolo. 3:13.

Kua mareka kore a Iehova ia Mose i tona ngere anga i te tu akono meitaki i roto i te metepara. Inara, kua akakore a Iehova iaia. E kua tuatua te Tuatua a te Atua ia Mose ei akaraanga meitaki no te akarongo. (Deu. 34:10; Ebe. 11:24-28) Kare a Iehova i akatika ana ia Mose kia tomo ki roto i te Enua Taputou, inara kua āriki Aia ia Mose ki roto i te enua Parataito, e ka oronga i te oraanga mutu kore kiaia. Ka mataora tatou i tetai oraanga meitaki me akatupu tatou i te tu akono meitaki.—1 Kori. 9:25.