1. Eaa ta Iehova i rave no tatou tataki tai?

KUA akavaitata a Iehova ia tatou tataki tai kiaia. (Ioa. 6:44) Akamanako ana i te aiteanga o teia. Ia Iehova e akara meitaki maira i te au tangata e pirioni ua atu i teianei ao, kua kite aia i te meitaki i roto ia koe​—te ngakau tiratiratu te ka akaperepere iaia. (1 Para. 28:9) Kua kite a Iehova ia koe, kua mārama aia i toou tu, e te inangaro maira aia ia koe. E mea pumaana tikai te reira!

2. Akapeea a Iesu i te akatutuanga mai i to Iehova inangaro no Tana mamoe tataki tai?

² Te manako maira a Iehova ia koe, e pera te au taeake e te au tuaine Kerititiano katoatoa. Ei akatutuanga, kua akaaite a Iesu ia Iehova ki tetai tiaki mamoe. Me aere ke e 1 mamoe mei te anana e 100, eaa ta te tiaki mamoe ka rave? Ka “vaoo [aia] i te iva ngauru e iva ara, ka aere ei ki runga i te maunga, e kimi i tei aere ke ra.” Me kitea mai tera mamoe, kare aia e takinga kino i te reira. Ka mataora ra aia. Eaa te apiianga? E puapinga maata te au mamoe tataki tai kia Iehova. Karanga a Iesu: “Koia katoa to kotou metua i te ao ra, kare ïa i inangaro e kia mate tetai o teianei au tangata rikiriki.”​—Mata. 18:12-14.

3. Eaa ta tatou ka uriuri i roto i teia atikara?

³ Kare rava tatou e inangaro i te akataitaia i to tatou au taeake e te au tuaine. Eaa ta tatou ka rave kia kore e akaturori i tetai ke? Eaa ta tatou ka rave me akamamae tetai tangata ia tatou? Ka pauia teia nga uianga i roto i teia atikara. Inara, ka apii ana tatou na mua no runga i “teianei aronga tangata rikiriki” i roto ia Mataio pene 18.

4. Koai ma “teianei aronga tangata rikiriki”?

⁴ Ko “teianei aronga tangata rikiriki” ko ta Iesu au pipi katoatoa. Noatu to ratou mataiti, kua aite ratou ki te au “tamariki” tei inangaro kia apiiia e Iesu. (Mata. 18:3) Noatu to ratou ngai i aere mai ei, ta ratou au peu, to ratou au manako tukeke, to ratou au tu, kua akarongo pouroa ratou kia Iesu. E kua akaperepere maata aia ia ratou.​—Mata. 18:6; Ioa. 1:12.

5. Eaa to Iehova manako me akaturoriia e me tamamaeia Tona iti tangata?

⁵ Kua akaperepere maata a Iehova i “teianei aronga tangata rikiriki.” Kia mārama i tona manako, ka akara tatou i te tu o te tamariki. Akaperepere maata tatou ia ratou. Ka paruru tatou ia ratou no te mea kare o ratou maroiroi, tu karape e te kite pakari mei te aronga mamaata rai. Te tika, kare tatou e reka i te kite atu i tetai e mamae ra, inara ka tupu te taitaia—te riri maata—me takinokinoia tetai tamaiti. Mei te reira rai, ka paruru a Iehova ia tatou. Ka makitakita aia—e ka riri—me akaturori e me tamamae tetai i Tona iti tangata!—Isa. 63:9; Mare. 9:42.

6. Ia 1 Korinetia 1:26-29, eaa to teianei ao manako no ta Iesu au pipi?

⁶ Akapeea ta Iesu au pipi i aite ei ki te “aronga tangata rikiriki”? Koai ma ta teianei ao i manako e ko te aronga puapinga? Ko te aronga moni, te aronga rongonui, e te aronga mana. Tuke ki ta Iesu au pipi, i te akara anga e aronga puapinga kore ratou, e e “aronga tangata rikiriki.” (E tatau ia 1 Korinetia 1:26-29.) Inara kare a Iehova e manako akapera ana ia ratou.

7. Eaa ta Iehova e inangaro maira kia akaari ki to tatou au taeake e te au tuaine?

⁷ E inangaro ana a Iehova i tona au tavini, noatu me e aronga ou me kore e aronga kua roa i te tavini anga iaia. Akaperepere maata a Iehova i te au taeake e te au tuaine, e kia akaperepere katoa tatou ia ratou. Kia “aroa atu [tatou] i te au taeake” ravarai, kare i tetai pae ua. (1 Pete. 2:17) Ka inangaro tatou i te paruru e te akono ia ratou. Me kite tatou e kua tamamae tatou i tetai ke, eiaa e kopae i te reira, ma te manako anga e kare te reira i te manamanata maata e ka anoanoia aia kia akangaropoina i te reira. Eaa ra tetai ka mamae ei? Penei no te tu i utuutuia mai ei ratou, e manako puapinga kore ana tetai au taeake e te au tuaine ia ratou uaorai. Penei e aronga ou tetai pae i roto i te tuatua mou; e kare ake ratou i kite akapeea me akono i te tu ara ua o te tangata. Noatu eaa te turanga, e rave tatou i tei anoanoia kia tupu te ‘au i rotopu i tetai e tetai. Pera katoa, ko te tangata e mamae putuputu ua ana i te tuatua a tetai ke, kia mārama aia e e tu paruparu rai tona e ka anoanoia aia kia akameitaki i te reira. Ka rave aia i teia kia rauka iaia te manako ‘au e kia meitaki katoa tetai pae.

8. Eaa te au tu matauia tei akakeu i te au pipi a Iesu?

⁸ Eaa a Iesu i tuatua ai no runga i “teianei aronga tangata rikiriki”? Kua ui tana au pipi kiaia: “Koai te ka maata i te basileia o te ao?” (Mata. 18:1) E manako ana te au ngati Iuda e e puapinga maata te au turanga e te taoonga teitei. Karanga tetai tangata kite: “Kua ora e kua mate te tangata no te aruaru i te au turanga teitei, te ingoa meitaki, rongonui, kia marekaia, e kia akangateiteiia.”

9. Eaa tei anoanoia e ta Iesu au pipi kia rave?

 ⁹ Kua kite a Iesu e ka anoanoia tana au pipi kia kiriti tumu mei to ratou ngakau i te au tu tau kore e akaariia ra e te iti tangata ngati Iuda. Akakite aia kia ratou: “Ko tei maata i roto ia kotou na, kia arite katoa ïa i tei iti; e tei mana ra, kia arite katoa ïa i te tavini.” (Luka 22:26) Ka aite tatou ki “tei iti” me “manako akameitaki atu [tatou] tetai ki tetai.” (Phili. 2:3) Me akaari putuputu tatou i teia tu, ka tauturu te reira ia tatou kia kore e akaturori i tetai ke.

10. Eaa ta Paulo akoanga kia akamanako meitaki tatou?

¹⁰ E meitaki atu to tatou au taeake e te au tuaine ia tatou. Ka kite tatou i te reira me akamou tatou ki runga i to ratou au tu memeitaki. E akamanako meitaki tatou i ta Paulo akoanga ki to Korinetia: “Naai oki koe e akatu ke? e eaa taau kare te mea i rauka ia etai ke ra? e i rauka taau ia etai ke ra, eaa koe i akatietie ei, mei te mea e, kare taau te mea rauka mai na etai ke?” (1 Kori. 4:7) Kia matakite tatou i te au ereere no te akateitei ia tatou uaorai e te manako e e meitaki atu tatou i tetai ke. Me karape tetai taeake i te oronga i te ako, me kore e meitaki tetai tuaine i te akamata i tetai apii Pipiria, kia akameitaki viviki raua ia Iehova.

11. Eaa te apiianga o ta Iesu akatutuanga no te ariki e tona tavini?

¹¹ Muri ake i te akamatakite anga a Iesu i tana au pipi e eiaa e akaturori i tetai ke, kua akakite aia i te akatutuanga o tetai ariki e tona tavini. Kua takore te ariki i te kaiou maata a te tavini tei kore i rauka i te tutaki. I taua rā rai, kare te reira tavini i akakore ana i te kaiou meangiti a tona taeake. I te openga, kua titiri te ariki i teia tavini aroa kore ki roto i te are auri. Te apiianga? Karanga a Iesu: “E akapera katoa mai taku metua i te ao ra ia kotou katoa, kia kore kotou e akakore ma te ngakau katoa i te apa a tona taeake.”​—Mata. 18:21-35.

12. Me kare tatou e akakore i te ara a tetai ke, akapeea te reira me tamamae ia ratou?

¹² Kua akatupu te tavini i te mamae kiaia uaorai e ki tetai ke. Mea mua, kua takinga kino aia i tona taeake tavini “kika atura ki roto i te are tapekaanga, e kia tutaki na iaia taua ou ra.” Te rua, kua akatupu aia i te mamae ki te au tavini tei kite i tana i rave. “Kite akera te aronga taeake tavini nona ra i reira, tangi rava atura” ratou. Mei te reira katoa, ka akatupu ta tatou e rave ra i te mamae ki tetai ke. Me tamamaeia tatou e tetai ke e me kare tatou e akakore i tana ara, eaa te ka tupu? Mea mua, ka tupu te mamae kiaia me kare tatou e akakore i tana ara e te akaari i te aroa. Te rua, ka akatupu tatou i te mamae i roto i te putuputuanga me kite mai ratou e kare tatou e ‘au ana ki to tatou taeake.

13. Eaa taau i apii mai mei te akaraanga o tetai painia?

¹³ Me akakore tatou i te ara a te au taeake e te au tuaine, ka puapingaia tatou e tetai ke. Kua tupu teia ki tetai tuaine painia ko Crystal. Kua mamae aia no te tuatua a tetai tuaine. Akakite a Crystal: “Kua mamae tikai toku ngakau no tana tuatua kino. I roto i te angaanga tutu aere, kare au e inangaro i te aere atu ki roto i te motoka me koia tetai i reira. Kua akaparuparu teia iaku.” Manako a Crystal e kua tau rai aia kia riri. Kare aia i akamoupuku e te manako kino i te tuaine. Kua taangaanga aia i te akoanga a te Pipiria i roto i te  atikara “E Akakore Ara Mei to Ngakau Mai” o Te Punanga Tiaki o Okotopa 15, 1999. Kua akakore aia i te ara a tona tuaine. Karanga a Crystal: “Kite mai au i teianei e te aruaru nei te katoatoa i te akameitaki mai i to ratou tu e ka akakore a Iehova i ta tatou ara i te au rā ravarai. Pumaana tikai au i te kite i teia. Kua mataora tikai au.”

14. Ia Mataio 18:21, 22, eaa tei ngatā i te apotetoro ko Petero i te rave, e eaa ta tatou i apii mai mei ia Iesu?

¹⁴ Kite tatou e mea tau kia akakore i te ara a tetai ke. Inara ka ngatā i tetai taime. Kua manako akapera ana te apotetoro ko Petero. (E tatau ia Mataio 18:21, 22.) Eaa te ka tauturu ia tatou? Mea mua, e akamanako ana akapeea a Iehova i te akakore anga i ta tatou ara. (Mata. 18:32, 33) Kare e tau kia akakoreia ta tatou ara, inara kua rave aia i te reira. (Sala. 103:8-10) Pera katoa, “kia aroa katoa tatou ia tatou uaorai e tikaʼi.” No reira, kia akakore ua rai tatou i te ara no te mea e kaiou te reira ki to tatou au taeake e te au tuaine. (1 Ioa. 4:11) Te rua, e akamanako eaa te ka tupu me akakore tatou i te ara. Ka tauturu teia i tetai tei akaapa ia tatou, ka akaʼau i te putuputuanga, ka paruru i to tatou pirianga kia Iehova, e ka kore to tatou tu taitaia. (2 Kori. 2:7; Kolo. 3:14) Te toru, e pure kia Iehova tei inangaro ia tatou kia akakore i te ara. Auraka e tuku ia Satani kia akatupu i te ke i roto i te au taeake. (Ephe. 4:26, 27) Ka anoano tatou i ta Iehova tauturu kia kore e ō ki roto i te ereere a Satani.

15. Ia Kolosa 3:13, eaa ta tatou ka rave me manamanata tatou i ta tetai taeake me kore tuaine i rave?

¹⁵ Akapeea me kua rave tetai taeake i te kino e kua manamanata koe? Eaa taau ka rave? E aruaru i te akatupu i te ‘au. E pure  akatenga kia Iehova. E pati kiaia kia akameitaki i te taeake e te tauturu ia koe kia akara i te au tu manea o te taeake—ta Iehova e akaperepere ra. (Luka 6:28) Penei me kare e rauka ia koe i te akakore i te ara a toou taeake, e akamanako e akapeea koe me aravei akaou iaia. E mea meitaki kia manako e kare i te mea akakoro na te taeake i te akariri ia koe. (Mata. 5:23, 24; 1 Kori. 13:7) Me aravei koe iaia, e akamou ki runga i tona au tu meitaki. Akapeea i reira me kare aia e inangaro i te akatupu i te ‘au? “E tauturu atu tetai ki tetai” na te akakore anga i tana ara. Akaari i te tu akakoromaki. (E tatau ia Kolosa 3:13.) Mea puapinga rava atu, auraka e akamoupuku no te mea ka takino te reira i toou pirianga kia Iehova. Eiaa e tuku i tetai apinga kia akaturori ia tatou. Me rave koe i te reira, te akaari ra koe i toou inangaro maata ia Iehova.—Sala. 119:165.

16. Eaa ta tatou apainga?

¹⁶ Ka akaperepere maata tatou i te tikaanga kia tavini ia Iehova ei “okotai oki anana” i raro ake i te “okotai oki tiaki”! (Ioa. 10:16) Akakite te puka Akaaereia no te Rave i to Iehova Anoano, kapi 165: “E apainga taau i te akapapu e kia vai ua rai te [tu rotai].” No reira, e “tereni ia tatou kia aru i to Iehova aerenga manako i te akaperepere i to tatou au taeake e te au tuaine.” Kia Iehova, e “aronga tangata rikiriki” akaperepere maataia tatou. Ko teia ainei toou manako no toou au taeake e te au tuaine? Te kite maira a Iehova e te akaperepere ra i taau e rave ra no te tauturu e te akono ia ratou.​—Mata. 10:42.

17. Eaa ta tatou ka umuumu i te rave?

¹⁷ Inangaro maata tatou i to tatou au taeake. No reira “auraka ei turorianga e tukuia mai ki mua i tetai taeake.” (Roma 14:13) Kia manako tatou e e meitaki atu to tatou au taeake e te au tuaine ia tatou, e ka anoanoia tatou kia akakore i ta ratou ara mei to tatou ngakau. Eiaa e tuku i tetai ke kia akaturori ia tatou. Mari ra, e iki kia “umuumu tatou i te tuatua i akatupu i te au, e te tuatua e meitaki kapipiti ei ra.”​—Roma 14:19.