1. Eaa te au tavini o Iehova ka maromaroa ei i tetai au taime?

E MAROMAROA ana tetai pae ia tatou i tetai taime. Tetai pae, ka ngaro viviki teia tu. Ki tetai pae ka vai rai te reira no tetai tuatau. Penei kua maromaroa ana tatou noatu e maata te tangata i reira. E ngatā ana i tetai pae i te akaoa atu ki tetai i roto i tana putuputuanga ou. Tetai pae e kopu tangata piri vaitata to ratou, inara ka tupu te maromaroa me neke ratou ki tetai ngai mamao. Tetai pae, te mii ra ratou i to ratou au akaperepere tei mate. E tetai au Kerititiano ou tei āriki ua ake i te tuatua mou, ka manako ratou e ko ratou anake ua me kopae e me takinokinoia ratou e to ratou kopu tangata e te au oa.

2. Eaa te au uianga ka pau tatou?

² Kua kite e kua mārama a Iehova i to tatou turanga. Te kite maira aia i to tatou tu maromaroa e ka inangaro aia i te tauturu ia tatou. Akapeea a Iehova me tauturu ia tatou? Eaa ta tatou ka rauka i te rave? Akapeea tatou me tauturu i te aronga i roto i te putuputuanga tei manako e ko ratou anake ua? Ka pau tatou i teia au uianga.

3. Akapeea a Iehova te akaari anga i te tu akono kia Elia?

³ Te manako maira a Iehova i tona au tavini katoatoa. Te vaitata maira aia kia tatou tataki tai, e te kite maira me tupu te manako taitaia kia tatou. (Sala. 145:18, 19) Akamanako ana i ta Iehova i rave no tana peroveta ko Elia. Kua noo ana teia tangata tiratiratu i tetai tuatau ngatā i Iseraela. Kua takinga kinoia te au tavini o Iehova, e kua inangaro te au enemi o Iehova i te tamate ia Elia. (1 Ari.  19:1, 2) Te manamanata o Elia, kua manako aia e koia anake ua te peroveta e toe nei, te tavini ra ia Iehova. (1 Ari. 19:10) Kua kite mai te Atua ia Elia. Kua tono mai aia i tetai angera kia akapapu ki tana peroveta e kare koia anake ua—e maata rai te tangata i Iseraela te tavini tiratiratu ra Iaia!—1 Ari. 19:5, 18.

4. Akapeea a Mareko 10:29, 30, te akaari anga mai i to Iehova manako no tona au tavini tei ngere i te tauturu a te kopu tangata?

⁴ Kua mārama a Iehova e me iki tatou i te tavini iaia, e maata ta tatou au mea ka akaatinga. Penei ko tetai, ko te tauturu a te kopu tangata e te au oa kare i te Au Kite. Kua ui ana te apotetoro ko Petero kia Iesu: “Kua akaruke matou i te au mea katoa e kua aru mai ia koe, eaa te ka rauka ia matou?” (Mata. 19:27) Akapapu a Iesu ki tana au pipi e ka rauka ia ratou tetai kopu tangata pae vaerua i te ao nei. (E tatau ia Mareko 10:29, 30.) E kua taputou a Iehova, to tatou Metua i te rangi, e ka tauturu aia i te aronga tei inangaro i te tavini iaia. (Sala. 9:10) Ka akamanako ana tatou i tetai au mea ka rauka ia tatou i te rave kia tauturu mai a Iehova me manako koe e ko koe anake ua.

5. Eaa te puapinga ka rauka mai me akamanako koe akapeea a Iehova te tauturu anga ia koe?

⁵ Akamanako akapeea a Iehova te tauturu anga ia koe. (Sala. 55:22) Ka tauturu teia ia koe kia kite e kare ko koe anake ua. Karanga tetai tuaine ko Carol, * kare ona kopu tangata i roto i te tuatua mou, “Me akamanako au i ta Iehova tauturu anga iaku i toku au timataanga, kua akamaroiroi te reira iaku kia kite e kare ko au anake ua. Akapapu mai teia e ka tauturu a Iehova iaku a te tuatau ki mua.”

6. Akapeea a 1 Petero 5:9,10 te akamaroiroi anga i te aronga ko ratou anake ua to roto i te tuatua mou?

⁶ Akamanako i ta Iehova tauturu anga i te aronga tei manako e ko ratou anake ua. (E tatau ia 1 Petero 5:9, 10.) Karanga a Hiroshi, e taeake koia anake ua te Kite i roto i tona ngutuare: “I roto i te  putuputuanga, e māmā ua i te kite e e manamanata to te katoatoa. Te kite anga e te tauta ra tatou i te tavini ia Iehova, kua akamaroiroi te reira ia matou, te aronga ko matou anake ua to roto i te tuatua mou.”

7. Akapeea te pure me tauturu ia koe?

⁷ Rave tamou i te angaanga pae vaerua. E akakite kia Iehova i toou au manako katoa. (1 Pete. 5:7) Karanga a Massiel, “Ko tetai mea puapinga tei tauturu iaku kia akakoromaki i toku turanga maromaroa, ko te pure putuputu kia Iehova.” E tuaine mapu teia tei kopaeia e tona ngutuare tangata, te iki anga aia i te tavini ia Iehova. “E Metua tika tikai aia kiaku, e ka pure au kiaia i te au rā ravarai ma te akakite i toku au manako katoa.”

8. Akapeea te tatau e te akamanako anga i te Tuatua a te Atua me tauturu ia koe?

⁸ E tatau putuputu i te Tuatua a te Atua, akamanako i te au tua tei akaari mai i to Iehova aroa noou. Akakite a Bianca, e tuaine tei akakoromaki i te au tuatua kino a tona kopu tangata, “Na te tatau e te akamanako anga i te Pipiria e te au tua oraanga o te au tavini o Iehova tei na roto ana i teia au turanga, kua tauturu te reira iaku.” Kua tamou ngakau tetai au Kerititiano i te au irava akapumaana, mei ia Salamo 27:10 e Isaia 41:10. Ki tetai pae, te akarongo anga ki te au rekoti akatangi o te au atikara apii, kua tauturu te reira ia ratou kia kore e maromaroa me akapapa ratou no te au uipaanga, e me rave i ta ratou tatau anga Pipiria.

9. Akapeea koe e puapingaia ai me aere koe ki te au uipaanga?

⁹ E tauta kia aere putuputu ki te au uipaanga. Ka akamaroiroi te reira ia koe, e ka kite meitaki koe i toou au taeake e te au tuaine. (Ebe. 10:24, 25) Karanga a Massiel, tei taikuia i mua ana, “Noatu toku tu akamā, kua iki au i te aere ki te au uipaanga katoatoa e kua paupau i reira. Tauturu teia iaku kia piri vaitata ki te au taeake e te au tuaine i roto i te putuputuanga.”

10. Eaa i puapinga ai kia akatupu i tetai pirianga oa ki te au Kerititiano tiratiratu?

¹⁰ Akatupu i te pirianga oa ki te au Kerititiano tiratiratu. E kimi i te au oa meitaki i roto i te putuputuanga te ka tauturu ia koe, noatu te tuke o to ratou mataiti e to ratou oraanga. Akakite te Pipiria e “tei te aronga taito te pakari.” (Iobu 12:12) Ka rauka katoa i te aronga ruaine i te apii mai mei te au mapu tiratiratu.  E mapu ake a Davida ia Ionatana, inara kare te reira i tāpu ia raua kia akatupu i tetai pirianga oa. (1 Samu. 18:1) Kua tauturu a Davida e Ionatana i tetai e tetai kia tavini ia Iehova i te au tuatau kino tikai. (1 Samu. 23:16-18) Karanga te tuaine ko Irina, koia anake ua te Kite i roto i tona ngutuare, “Ka riro te au taeake e te tuaine ei ngutuare pae vaerua no tatou. Kua oronga mai a Iehova ia ratou ei au metua, teina, tuakana e te tungane no tatou.”

11. Eaa taau ka rave no te akatupu tetai pirianga oa matutu?

¹¹ Kare i te mea māmā i te kimi i tetai au oa ou me e tu akamā toou. Karanga a Ratna, e tuaine akamā ua tei apii i te tuatua mou noatu te au patoianga, “Kua kite mai au e ka anoano au i te tauturu a toku ngutuare tangata pae vaerua.” E mea ngatā i te akakite i toou manako ki tetai tangata ke, inara me tuatua koe kiaia ka riro teia i te akatupu i tetai pirianga oa. Ka akamaroiroi e ka tauturu toou au oa ia koe, inara kia akakite koe akapeea ratou me rave i te reira.

12. Akapeea te angaanga tutu aere me tauturu ia koe kia kimi te au oa meitaki?

¹² Tetai ravenga meitaki no te kimi i te au oa, na te pirianga ki te au taeake i roto i te angaanga tutu aere. Karanga a Carol, tei taikuia i mua ana, “E maata toku au oa meitaki i roto i te angaanga tutu aere e te au angaanga pae vaerua. Kua tauturu mai a Iehova iaku na roto i teia au oa.” Ka puapingaia tatou me akatupu tatou i tetai pirianga oa ki te au Kerititiano tiratiratu. Ka taangaanga a Iehova i teia au oa kia tauturu ia koe i te tuatau tumatetenga, me manako koe e ko koe anake ua.—Mase. 17:17.

13. Eaa ta te katoatoa apainga i roto i te putuputuanga?

¹³ E apainga ta te katoatoa i roto i te putuputuanga kia akatupu i te aroa e te ‘au, kia kore tetai ua atu tangata e manako e koia anake ua. (Ioa. 13:35) Ta tatou ka rave e ka tuatua, kia riro te reira ei mea akamaroiroi. Teia ta tetai tuaine i tuatua: “Te apii anga au i te tuatua mou, kua riro te putuputuanga ei ngutuare tangata noku. Kua tauturu ratou iaku kia riro mai ei Kite no Iehova.” Eaa taau ka rave no te tauturu i te aronga ko ratou anake ua to roto i te tuatua mou, kia noo mai ki roto i te putuputuanga?

14. Eaa taau ka rave kia akariro i te aronga ou ei oa noou?

¹⁴ E akariro i te aronga ou ei oa noou. Kia akamata na te āriki pumaana mai i te aronga ou ki roto i te putuputuanga. (Roma 15:7) Inara, e maata atu ta tatou ka rave i te āriki ua mai ia ratou. Ka inangaro tatou i te akatupu i tetai pirianga oa meitaki kia ratou. No reira e akaari i te tu aroa e te takinga meitaki ki te aronga ou. Auraka e taakama ia ratou, mari ra e tauta kia mārama i to ratou turanga. Penei ka ngatā ia ratou i te akakite mai i to ratou manako, no reira auraka e māro ia ratou. E ui marū i te au uianga tau ma te akarongo meitaki ki ta ratou pauanga. Ei akaraanga, penei ka ui koe akapeea ratou te āriki anga i te tuatua mou?

15. Akapeea te au Kerititiano tukatau me tauturu i tetai ke i roto i te putuputuanga?

¹⁵ Ka ketaketa te akarongo o te putuputuanga me akaoa atu te au Kerititiano tukatau, te aronga pakari tikai,  ki te katoatoa. Karanga a Melissa, tei utuutuia mai i roto i te tuatua mou: “Ka akameitaki maata au i te au taeake tei riro ei metua tane pae vaerua noku. Me inangaro au i te akakite i toku manako, e tangata tetai te ka akarongo mai.” Karanga te taeake mapu ko Mauricio, tei maromaroa te akaruke anga tona puapii i te tuatua mou: “Kua riro te tu oaoa o te aronga pakari i te tauturu iaku. Ka aravei putuputu mai ratou iaku. Ka angaanga kapiti kiaku i roto i te angaanga tutu aere, ka akaari mai i te au irava manea mei ta ratou uaorai apii Pipiria, e ka tarekareka kapiti matou.” Teianei, te tavini tamou nei a Melissa e Mauricio ia Iehova.

16-17. Eaa te au ravenga tukeke ka rauka ia tatou i te tauturu i tetai ke?

¹⁶ Tauturu na roto i te au ravenga tukeke. (Gala. 6:10) Karanga a Leo, te tavini ra ei mitinari i tetai enua mamao mei tona kopu tangata, “Ko te mea maata, kia akaari i te tu takinga meitaki i te tuatau tau. Maara nei iaku i tetai rā, kua ū au i roto i toku motoka. I te taime i tae ei au ki te kainga, kua taitaia tikai au. Kua pati mai tetai tokorua iaku kia aere ki to raua kainga no te kaikai. Kare e maara iaku eaa ta matou i kai, inara maara iaku e kua akarongo ua mai raua e kua pumaana tikai toku ngakau.”

¹⁷ E reka ana tatou i te aere ki te au uruoaanga e te au akaputuputuanga, no te mea ka noo kapiti tatou ki tetai ke, e ka uriuri no runga i te porokaramu. Karanga a Carol, tei taikuia i mua ana, “E ngatā tikai iaku i te aere ki te au akaputuputuanga e te uruoaanga.” No teaa ra? Karanga aia, “Noatu e anere me kore e tauatini tuma ua atu au taeake e te au tuaine i reira, te noo kapiti ra ratou ki to ratou uaorai ngutuare tangata. E maromaroa ana au no te mea ko au anake ua.” Ka ngatā i tetai pae i te aere ki te uruoaanga e te akaputuputuanga i muri ake te mateanga to ratou au akaperepere. Kua kite ainei koe i tetai tangata te na roto ra i teia turanga? E mea meitaki kia pati iaia kia aere kapiti e toou ngutuare tangata ki te uruoaanga e te akaputuputuanga.

18. Akapeea tatou me taangaanga ia 2 Korinetia 6:11-13 me akaari i te tu takinga meitaki?

 ¹⁸ Akapou i tetai taime ki te au taeake. I te tuatau tamataora, e tauta i te akapou i tetai taime ki te au taeake e te au tuaine, te aronga tikai ko ratou anake ua. Ka inangaro tatou “kia maora” to tatou ngakau kia ratou. (E tatau ia 2 Korinetia 6:11-13.) Karanga a Melissa, tei taikuia i mua ana, “E mataora ana matou me pati mai te au taeake ia matou ki to ratou kainga, me kore kia aru ia ratou ki tetai ngai ke.” E tangata ainei tetai i roto i taau putuputuanga ka rauka ia koe i te akaari i te tu takinga meitaki?

19. Eaa te tuatau tau no te akapou i tetai taime ki te au taeake Kerititiano?

¹⁹ E mataora ana to tatou au taeake Kerititiano me kapiti atu tatou kia ratou. Penei kare tetai pae e reka ana i te kapiti atu ki to ratou kopu tangata, kare i te Au Kite, i te au tuatau orote. Tetai pae, ka riro tetai au rā, mei te rā i mate ei to ratou akaperepere, ei mea mamae ngakau kia ratou. Me akapou tatou i tetai taime ki te au taeake e te au tuaine te na roto ra i teia au manamanata, te akaari ra tatou i te tu “akono tikai.”—Phili. 2:20.

20. Akapeea ta Iesu tuatua ia Mataio 12:48-50 te tauturu anga me manako tatou e ko tatou anake ua?

²⁰ E maata te tumu ka manako tetai Kerititiano e koia anake ua. Inara, auraka e ngaropoina e te kite maira a Iehova i to tatou manako. Ka oronga mai aia i ta tatou ka anoano na roto i to tatou au taeake Kerititiano. (E tatau ia Mataio 12:48-50.) No reira, kia akaari tatou i te tu akameitaki kia Iehova no tana akanoonooanga manea, na te tauta anga i te tauturu i to tatou ngutuare tangata pae vaerua. Noatu eaa ta tatou ka manako, kare ko tatou anake ua no te mea te vaitata maira a Iehova kia tatou!