1. Ia Koheleta 7:20, eaa te tuatua mou ta te Ariki ko Solomona i akakite?

 TATA te Ariki ko Solomona: “Kare takiri e tangata tuatua-tika i te enua nei, ko tei rave i te tuatua meitaki, e kare rava e ara.” (Kohe. 7:20) Tika rava! E aronga ara pouroa tatou. (1 Ioa. 1:8) No reira ka anoano tatou kia akakore te Atua i ta tatou ara e ta te au taeake.

2. Eaa toou manako me akakore tetai oa piri mou i taau ara?

² Kare e ekoko anga ka maara ia koe i toou akakino anga i tetai oa piri mou. Kua inangaro koe i te akatikatika i te reira e te ripea i to korua pirianga, kua tataraapa atu koe ma te ngakau tae. Eaa toou manako te akakore anga toou oa i taau ara? Kua maru ainei koe? Ae, e te mataora!

3. Eaa ta tatou ka uriuri i teia atikara?

³ Ka inangaro tatou ia Iehova ei Oa piri mou, noatu eaa te tu, ka tuatua me kore ka rave tatou i tetai apinga te ka akariri iaia. Eaa tatou i papu ei, e te inangaro ra a Iehova i te akakore i ta tatou ara? Mei teaa te umere o ta Iehova akakore anga i te ara me akaaiteia ki ta tatou? E te openga, koai mā ta te Atua ka akakore?

4. Akapeea tatou i papu ei e kua papa ua a Iehova i te akakore i te ara?

⁴ Te akapapu maira te Tuatua a te Atua e te papa ua  ra a Iehova i te akakore i te ara. Te akaari anga a Iehova iaia uaorai kia Mose i te Maunga i Sinai, karanga Aia na roto i te angera: “Ko Iehova, Ko Iehova, e Atua takinga-meitaki, e te aroa ua, e te akakoromaki maata, e te meitaki maata, e te tuatua-mou, E te vaoo marie i te aroa e tausani ua atu, e te akakore i te tuatua-tika kore, e te ara, e te kino.” (Exo. 34:6, 7) E Atua takinga meitaki e te akaaroa a Iehova e kua papa ua i te akakore i te aronga tei ara.—Nehe. 9:17; Sala. 86:15.

5. Ia Salamo 103:13, 14, eaa ta Iehova kiteanga oonu i te tangata ka akakeu iaia kia rave?

⁵ No te mea nana i Anga ia tatou, kua kite a Iehova ia tatou. Akamanako ana! Kua kite aia i te au mea ravarai no tetai tangata. (Sala. 139:15-17) Te kite ra aia i te au tu apa ua tei iri mai mei to tatou nga metua. E kua kite aia i te au mea katoatoa tei tupu i to tatou oraanga. Eaa ta teia kiteanga oonu i te tangata ka akakeu ia Iehova kia rave? Te akakeu ra te reira iaia kia akaaroa mai ia tatou.—Sala. 78:39; e tatau ia Salamo 103:13, 14.

6. Akapeea a Iehova te akaari anga e kua inangaro aia i te akakore i te ara?

⁶ Kua akaari mai a Iehova e te inangaro ra aia i te akakore i te ara. Kua mārama aia e na te tangata mua ko Adamu, i taumaaia ai tatou ki te ara e te mate. (Roma 5:12) Kare atu e ravenga kia matara tatou mei te reira taumaa. (Sala. 49:7-9) Inara, kua tangi aroa mai te Atua ia tatou e kua akarangatira ia tatou. Eaa tana i rave? Mei ta Ioane 3:16 i akakite, kua tono mai a Iehova i tana tamaiti anau tai kia mate no tatou. (Mata. 20:28; Roma 5:19) Kua mamae a Iesu no tatou—na roto i te utunga o te mate—kia akarangatira i tetai ua atu tei akarongo kiaia. (Ebe. 2:9) Mei teaa atura te mamae te kite anga a Iehova i tana Tamaiti akaperepere i te mate anga i tetai mate rikarika! Papu, kare rava a Iehova e akatika i tana Tamaiti kia mate naringa kare Aia e inangaro i te akakore i ta tatou ara.

7. Eaa tetai au akaraanga Pipiria ta Iehova i puareinga ua i te akakore i te ara?

⁷ Kua ki te Pipiria i te au akaraanga o  te aronga ta Iehova i akakore ua i te ara. (Ephe. 4:32) Koai ratou? Penei te akamanako ra koe i te Ariki ko Manase. Kua ara te reira tangata kino ia Iehova. Kua rave aia i te akamorianga pikikaa. Kua tamate aia i tana uaorai tamariki, kua akaatinga ia ratou ki te au atua pikikaa. E kua tarai aia i tetai itoro akatikitikiia o tetai atua pikikaa ki roto i te iero tapu o Iehova. Karanga te Pipiria nona: “E ravenga kino maata tana i mua i te aroaro o Iehova, ei akakoko iaia kia riri mai.” (2 Para. 33:2-7) Inara, te tataraara anga a Manase ma te ngakau tae, kua puareinga ua a Iehova i te akakore i tana ara. Kua akaoki katoa te Atua i tona taoonga kiaia ei ariki. (2 Para. 33:12, 13) Penei kua manako katoa koe i te Ariki ko Davida, tei rave i te au ara kino, pera te akaturi e te tā tangata. Inara, kua tataraara mou tikai a Davida e kua tataraapa i tana ara, no reira kua akakore katoa a Iehova i tana ara. (2 Samu. 12:9, 10, 13, 14) Ae, papu ia tatou e ka inangaro a Iehova i te akakore i te ara. E mei ta tatou ka kite, e mea umere tana akakore anga i te ara me akaaiteia ki ta te tangata.

8. Akapeea to Iehova tu umere ei Akava te akakeu anga iaia kia akakore i te ara?

⁸ Ko Iehova “te Akava i to te ao katoa nei.” (Gene. 18:25) Ka anoanoia tetai akava meitaki kia mārama tikai i te ture. Kua tika te reira no Iehova no te mea koia to tatou Akava, e nana i Tuku mai i ta tatou Ture. (Isa. 33:22) Kare atu i te pae ia Iehova e mārama oonu tona no te tu tika e te tarevake. Eaa atu ta tetai akava meitaki ka anoano? Ka anoanoia aia kia akara i te au tika pouroa no tetai akavaanga i mua ake ka tuku ei i te utunga. Na teia tu, kua papa meitaki a Iehova ei Akava.

9. Eaa ta Iehova i kite me ka akakore aia i te ara a tetai e me kare?

⁹ Kare aia i aite mei te au akava tangata, kua mārama meitaki a Iehova i te au tika ravarai no tetai akavaanga. (Gene. 18:20, 21; Sala. 90:8) Kare aia i aite ki ta te tangata e kite ra e e rongo ra. Kua mārama meitaki aia akapeea te angaanga a tetai te akakeuanga iaia na roto i tona au tu, te utuutuanga, te ngai no reira mai aia e pera te manako ngakau. Te tatau katoa ra a Iehova i te ngakau. Te mārama meitaki ra aia i te au akakeuanga, te au inangaro, e te anoano o tetai tangata. Kare e apinga ngaro ia Iehova. (Ebe. 4:13) No reira, ka akanooia to Iehova tu akakore i te ara ki runga i tona tu kite oonu i te turanga.

10. Eaa tatou ka karanga ai e e tika ua e te tau ta Iehova au akavaanga? (Deuteronomi 32:4)

¹⁰ E tika ua ana e te tau ta Iehova au akavaanga. Kare ona tu papaki tai. Kare rava tona tu akakore i te ara e akanooia ki runga i te akara anga o tetai tangata, te apinganui, te taoonga, e tona au tu karape. (1 Samu. 16:7; Iako. 2:1-4) Kare a Iehova e māroia e kia tutakiia. (2 Para. 19:7) Kare tana au tukuanga tika e takinoia e te tu riri me kore te tu papaki tai. (Exo. 34:7) Kare e ekoko anga, na to Iehova tu mārama e te kite oonu i riro ei aia ei Akava meitaki.—E tatau ia Deuteronomi 32:4.

11. Eaa te mea umere i to Iehova tu akakore i te ara?

¹¹ Kua kite mai te aronga tata o te au Tuatua Tapu Epera e e umere tikai to Iehova  tu akakore i te ara. I tetai au tu, kua taangaanga ratou i tetai tuatua Epera, te na ko ra te akakiteanga e “kua akanooia te reira kia akakore te Atua i te tangata ara, e kare rava te reira tu akakore i te ara e taangaangaia mei ta te tangata e rave ra ki tetai.” Tei ia Iehova anake te mana, kia akakore i te ara a tetai tangata tei tataraara mou tikai. Eaa te ka tupu me akakore a Iehova i ta tatou ara?

12-13. (a) Eaa ta tetai tangata ka rekareka me akakoreia tana ara e Iehova? (e) Eaa te roa o te puapinga me akakore a Iehova i te ara?

¹² Me āriki tatou e kua akakore a Iehova i ta tatou ara, ka mataora tatou i “te tuatau rekareka,” pera te ‘au o te manako e te akava ngakau mā. Kare te reira tu akakore i te ara e rauka i te tangata mari ra no ko mai te reira i “te aroaro o te Atua.” (Anga. 3:19) Me akakore a Iehova i ta tatou ara, ka rauka akaou tetai pirianga mou kiaia mei te mea atura kare rava tatou i ara ana.

¹³ Me akakore a Iehova i ta tatou ara, kare rava aia e akaapa ia tatou me kore e akautunga akaou ia tatou no te reira ara. (Isa. 43:25; Iere. 31:34) Ka tuku a Iehova i ta tatou ara “mei te itinga o te rā e taka ke i te opunga o te rā.” * (Sala. 103:12) Me akamanako tatou i to Iehova tu akakore maata i te ara, mataora tikai tatou ma te akangateitei iaia. (Sala. 130:4) Inara koai mā ta Iehova ka akakore i te ara?

14. Eaa ta tatou i apii mai i teianei no te tukuanga tika a Iehova kia akakore i te ara?

¹⁴ Mei ta tatou i kite mai, kare ta Iehova tukuanga tika no te akakore i te ara i akanooia ki runga i te maata me kore te meangiti o te ara. Kua apii katoa mai tatou kua taangaanga a Iehova i tona kite, nana i Anga ia tatou, ei Tuku Ture, e ei Akava e me ka akakore aia i te ara. Eaa te au mea ta Iehova ka akara?

15. Ia Luka 12:47, 48, eaa tetai apinga e akamanako ana a Iehova?

¹⁵ Tetai apinga e akamanako ana a Iehova e me kua kite te tangata tei ara e te  rave ra aia i te tarevake. Kua akataka meitaki a Iesu i teia, i roto ia Luka 12:47, 48. (E tatau.) Ko tetai ua atu tangata tei akakoro kia rave i te kino e kua kite meitaki aia e te akariri ra aia ia Iehova, kua ara kino aia. Penei kare rava tana ara e akakoreia. (Mare. 3:29; Ioa. 9:41) E tika, i tetai au taime kua kite tatou e kua rave tatou i te tarevake. E manakonakoanga ainei to tatou? Ae! Ka uriuri katoa tatou i tetai atu apinga e akamanako ana a Iehova.

16. Eaa te tataraara, e eaa i puapinga ai kia akakore a Iehova i ta tatou ara?

¹⁶ Tetai atu apinga e akamanako ana a Iehova koia oki me kua tataraara mou tikai te tangata tei ara. Eaa te aiteanga kia tataraara? Te aiteanga “kia taui tetai i tona manako, tu, e te akakoro anga.” Me kua tataraapa tetai tangata e kua maromaroa tikai i te au mea kino tana i rave e kare i rave i te meitaki. E mii ana tetai tangata tei tataraara, kare no te au tarevake anake ua tei raveia mari ra no tona tu apikepike i te pae vaerua. Akamaara ana i te ara kino a te nga Ariki ko Manase e Davida; kua akakore a Iehova i ta raua ara no te mea kua tataraara mou tikai raua. (1 Ari. 14:8) Ae, na mua a Iehova kia kite i te tu tataraara, e rauka ai iaia i te akakore i te ara. Inara kare e rava ua kia tataraapa tatou. Kia papa ua tatou kia rave i te taui anga. * E ko teia akaou tetai apinga ka akamanako a Iehova.

17. Eaa te aiteanga o te taui anga, e eaa i puapinga ai auraka tatou e rave ua i te ara? (Isaia 55:7)

¹⁷ Tetai akaou apinga puapinga ta Iehova e akamanako ana koia oki te taui anga. Te aiteanga o te taui anga ko “te anga ke mai.” Mei tera te tu, ka anoanoia tetai tangata kia taui i tona oraanga na te akaruke anga i te peu kino e kia aruaru i to Iehova aerenga. (E tatau ia Isaia 55:7.) Ka anoanoia te reira tangata kia taui i tona manako e kia aratakiia aia e Iehova. (Roma 12:2; Ephe. 4:23) Ka anoanoia aia kia akaruke i tona  oraanga kino, te manako e tana e rave ra. (Kolo. 3:7-10) E tikai, na te akarongo ki roto i te atinga oko o Karaiti e rauka ai ia Iehova i te akakore ia tatou e kia tāma i ta tatou ara. Kua akatae mai a Iehova i te puapinga o te reira atinga kia tatou me kite aia e te tauta tikai ra tatou i te taui i to tatou oraanga.—1 Ioa. 1:7.

18. Eaa ta tatou i uriuri mai no to Iehova tu akakore i te ara?

¹⁸ Ka akara poto tatou i tetai au manako puapinga tei uriuriia. Ko Iehova tikai Tei Akakore Maata i te ara i te ao katoa e pini ua ake. Eaa tatou i tuatua ai i te reira? Mea mua, kua papa ua aia i te akakore i te ara? Te rua, kua kite meitaki aia ia tatou. Kua kite aia i to tatou tu, e ka rauka iaia i te akara me kua tataraara mou tikai tatou. E te toru, me akakore a Iehova i ta tatou ara, ka tāma takiri aia i te reira. Ka rauka ia tatou tetai akava ngakau mā e kia marekaia tatou.

19. Noatu e tu apa ua to tatou e ka rave i te ara, eaa tatou ka mataora ai?

¹⁹ E tika, e tu apa ua to tatou, no reira ka rave ua tatou i te ara. Inara, ka akapumaanaia tatou e te au tuatua i roto i te Insight on the Scriptures, Volume 2, kapi 771: “Mei te mea te akamanako ra a Iehova i te tu paruparu o tona au tavini ma te tangi aroa, kare ratou e anoanoia kia mataku kino i to ratou au tarevake no to ratou tu ara ua. (Sala. 103:8-14; 130:3) Me te manako ra ratou i te aaere i to Iehova au tu, ka mataora ratou. (Phili. 4:4-6; 1 Ioa. 3:19-22).” Mei teaa atura te akamaroiroianga!

20. Eaa ta tatou ka uriuri i te atikara ka aru mai?

²⁰ Rekareka tatou e kua papa ua a Iehova i te akakore i ta tatou ara me tataraara mou tikai tatou. Inara, akapeea tatou me aru i to Iehova tu akakore i te ara? Eaa te au tu te aiteite ra to tatou tu akakore i te ara ki to Iehova, inara eaa te au tuke? Eaa i puapinga ai te reira tuke? Ka pauia teia au uianga i te atikara ka aru mai.