“MEITAKI tikai te aroa takinga meitaki o te au taeake e te au tuaine Kerititiano,” i karanga ai a Lisa. * Te akakite maira aia i tei akakeu iaia kia āriki i te tuatua mou. Aiteite katoa kia Anne, karanga aia, “Kua pakia toku ngakau no te aroa takinga meitaki i akaariia mai, kare no te apiianga.” Te mataora nei teia nga tuaine i te tatau e te akamanako oonu i te Pipiria, inara na te aroa takinga meitaki i akakeu maata ia raua.

Akapeea tatou me akaari i te aroa takinga meitaki te ka akakeu i te ngakau o te aronga takapini ia tatou? Ka uriuri tatou e rua ravenga: to tatou arero e ta tatou au angaanga. Aru mai ka uriuri tatou e koai mā kia aroa takinga meitakiia.

Te vaine akono meitaki i akatakaia i roto ia Maseli pene 31 tei tona arero “te ture ra i te takinga-meitaki.” (Mase. 31:26) Aru aia i teia “ture” no tana ka tuatua e tona tangi anga reo. Ka meitaki katoa te au metua tane me aru ratou i teia “ture” no to ratou arero. Kua kite te au metua i te kino me tuatua reo maata e te māro ki ta ratou tamaiti. Me tuatua viviki e te riririri te au metua, papu kare ta ratou tamaiti e akarongo mai. No reira kia āriki marekaia mai, ka tauta te au metua i te tuatua ma te aroa takinga meitaki.

Me e metua koe e me kare, akapeea koe me tuatua ma te aroa takinga meitaki? Ka kitea te tauturu i roto i te tuanga mua o Maseli 31:26: “E tuatua tona vaa i te pakari.” Ka ō mai ki te ikianga meitaki i ta tatou kupu i te tangi anga reo me tuatua i te reira. Ka meitaki i te ui kia tatou uaorai, ‘Ka akatupu ainei taku tuatua i te riri, me ka tamaru i te reira turanga?’ (Mase. 15:1) Ae, e mea pakari i te akamanako na mua.

Akakite katoa ra tetai maseli: “Te tangata vaa karea ua ra, e tau ïa ki te koputaputa koke ra.” (Mase. 12:18) Me akamanako tatou i ta tatou tuatua e te tangi anga o to tatou reo, ka viviki ua tatou i te akatere i to tatou arero. Na te aru anga i “te ture ra i te takinga-meitaki” ka tauturu ia tatou kia kore e tuatua i te au tuatua vaa karea ua e te akakino. (Ephe. 4:31, 32) Mari ra ka tuatua tatou i te tuatua maru, takinga meitaki e te akamaroiroi. Kua akaari mai a Iehova i te akaraanga i te akamaroiroi anga aia i tona tavini matakutaku ko Elia. Te angera tei mata ia Iehova kua tuatua aia ma te “reo iti poepoe maira.” (1 Ari. 19:12) Inara, e maata atu te ō maira ki te au tuatua aroa takinga meitaki. Kia rave katoa tatou i te au angaanga takinga meitaki. Akapeea ra?

Me aru tatou ia Iehova, ka kapiti tatou ki ta tatou tuatua takinga meitaki i te au angaanga takinga meitaki. (Ephe. 4:32; 5:1, 2) Ko Lisa, tei taikuia i mua ana, kua akakite mai aia i te aroa takinga meitaki o te Au Kite. “Kua māroia to matou ngutuare  kia akaruke viviki i to matou kainga, kua aere mai e rua tokorua o te putuputuanga i te tauturu ia matou. I te reira taime kare au i apii ake i te Pipiria!” Kua akakeu te reira au angaanga aroa takinga meitaki ia Lisa kia apii tikai i te tuatua mou.

Akaperepere katoa a Anne, tei taikuia i mua akenei, i te aroa takinga meitaki ta te Au Kite i akaari kiaia. Karanga aia: “No tei tupu i teianei ao, kua manako ekoko au i tetai. Kua ngatā iaku i te irinaki i te tangata.” Karanga katoa aia: “I te aravei anga au i te Au Kite, kua ekoko au i to ratou akakoroanga. Manako au, ‘Eaa ra ratou ka inangaro mai ei iaku?’ Na roto i te aroa takinga meitaki o toku puapii Pipiria i akakeu iaku kia irinaki iaia.” Eaa tei tupu? “Kua akamou au i toku manako ki taku e apii ra.”

Kua akakeuia a Lisa e Anne e te au angaanga aroa takinga meitaki a tetai pae i roto i te putuputuanga, e kua tauturu te reira ia raua kia āriki i te tuatua mou. Kua tauturu te aroa takinga meitaki o te putuputuanga ia raua kia ngakau maoraora.

Ka tuatua maru tetai e ka katakata mai penei ko ta ratou peu te reira. Kia akameitakiia teia tu maru e te oaoa. Inara me kua akakeu anake uaia tatou no te reira, kare tera i te aroa takinga meitaki o te Atua.—Akaaite kia Angaanga 28:2.

E tuanga no te ua o te vaerua o te Atua te takinga meitaki o te Atua. (Gala. 5:22, 23) No reira, i te tatanu anga i te tu takinga meitaki ka anoanoia te arataki anga a te vaerua. Te rotai ra te reira ki to tatou anoano kia aru ia Iehova e Iesu. Ei au Kerititiano, e aroa ua ana tatou i tetai ke. Kua akakeukeuia tatou e te aroa ia Iehova te Atua, e to tatou tangata tupu. E tu maroiroi to tatou aroa takinga meitaki mei te ngakau e te akamareka ra i te Atua.

E māmā ua i te aroa takinga meitaki i te aronga tei aroa mai ia tatou me kore te aronga kua kite tatou. (2 Samu. 2:6) Tetai mataara kia akameitaki ia ratou. (Kolo. 3:15) Akapeea me kua manako tatou kare tetai papaki i tau kia aroa takinga meitakiia?

Akamanako i teia: Kua akanoo a Iehova i te akaraanga maata no te aroa takinga meitaki, e te apii maira tana Tuatua tataia i te puapinga kia akaari i teia tu. Te kupu “aroa ua” me kore takinga meitaki kua taiku putuputuia i roto i te Tuatua Tapu Ereni Kerititiano. Akapeea te Atua i te aroa takinga meitaki ia tatou?

Akamanako ana i te au mirioni ua atu tangata kua aroa takinga meitaki a Iehova ia ratou na te oronga anga mai i tei anoanoia. (Mata. 5:45) I mua ake, ka kite te tangata ia Iehova kua aroa takinga meitaki mai aia ia ratou. (Ephe. 2:4, 5, 8) Ei akaraanga, kua oronga mai aia i tei meitaki tikai, tana Tamaiti anau tai no te tangata ravarai. Tata te apotetoro ko Paulo e kua oronga mai a Iehova i te oko “no te maata o tona aroa ua.” (Ephe. 1:7) E tetai katoa, noatu kua ara e kua akataitaia tatou ia Iehova, te arataki ra e te apii maira aia ia tatou. Tana ikuikuanga e te au tuatua kua aite mei te “ua maru rai.” (Deu. 32:2) Papu kare e rauka ia tatou i te tutaki iaia no tona aroa takinga meitaki ia tatou. Te tikaanga ka irinaki tatou ki to Iehova aroa takinga meitaki no te tuatau ki mua.—Akaaite kia 1 Petero 1:13.

Kare e ekokoanga, e mea akaperepere te aroa takinga meitaki o Iehova. Tei tupu, kare e iriiri e koai ta tatou ka aroa takinga meitaki, e tauta tatou i te aru i to Iehova akaraanga na te akaari anga i te aroa takinga meitaki i roto i to tatou oraanga. (1 Tesa. 5:15) Me putuputu tatou i te aroa takinga meitaki i tetai, kua aite tatou mei te aʼi maanaana i te po anuanu. Ka akamaroiroiia tatou e to tatou ngutuare, te au taeake akamori, oa angaanga, oa apii e to tatou tangata tupu.

Akamanako ana i to tatou ngutuare me kore putuputuanga, ka akamaroiroiia ratou e taau au angaanga e te tuatua takinga meitaki. Penei te anoano maira tetai i roto i te putuputuanga i te tauturu kia akono i to ratou kainga, aua tanutanu, e te oko apinga na ratou. Pera katoa, me aravei koe i tetai tangata i roto i te angaanga tutu aere te inangaro ra i te tauturu ka rauka ainei ia tatou i te tauturu?

I te aru anga ia Iehova, kia riro ua rai ta tatou au tuatua e te angaanga e kia aratakiia e “te ture ra i te takinga-meitaki.”