ATIKARA APII 26
Tauturu te Aroa ia Tatou Kia Autu i te Mataku
“Tei iaku a Iehova, kare au e mataku.”—SALA. 118:6.
IMENE 105 “Ko te Atua Oki te Aroa”
I ROTO I TEIA APII *
1. Eaa tetai au tu mataku tei matauia?
AKAMANAKO ana i teia au tua oraanga. Kua inangaro a Nestor e tana vaine ko María, i te tavini i te ngai te anoanoia ra te tauturu. * Ka anoanoia raua kia akatano atu ki te oraanga i reira. Penei kua mataku raua ka meangiti ua ta raua moni. Te riro anga mai a Biniam ei Au Kite no Iehova i te enua te patoiia ra ta tatou angaanga, kua kite mai aia e ka takinokinoia aia. Kua mataku aia. Inara kua mataku rava atu aia i tona ngutuare tangata. Kua tuia a Valérie e te maki kino o te cancer, e kua ngata kia kitea tetai taote vaʼi te ka āriki i tona irinakianga Pipiria no te toto. Kua mataku aia e ka mate aia.
2. Eaa tatou ka angaanga pakari ei kia autu i to tatou mataku?
2 Kua kite ainei koe i teia tu mataku? Ae. Me kare tatou e akatere i to tatou mataku, ka rave tatou i te ikianga kino te ka takino i to tatou pirianga kia Iehova. Ta Satani tera ka inangaro. Ka rekareka aia me akarongo kore tatou i ta Iehova au ture, pera te tutu aere i te nuti meitaki. (Apo. 12:17) E kino tikai a Satani, e te ririnui. Inara ka rauka ia koe i te paruru ia koe uaorai. Akapeea ra?
3. Eaa te ka tauturu ia tatou kia autu i to tatou mataku?
3 Me irinaki tatou e te akaperepere ra a Iehova ia tatou—e tei te pae aia ia tatou—ka autu tatou ia Satani. (Sala. 118:6) Ei akaraanga, kua aro atu te tata Salamo 118 i tetai turanga kino. E maata tona au enemi, e aronga taoonga tetai ia ratou (irava 9, 10). I tetai au taime, tei raro aia i te au taomi anga pakari (irava 13). E kua ako pakariia aia e Iehova (irava 18). Noatu rai, kua akakeuia te tata salamo kia imene: “Kare au e mataku.” Eaa aia i noo tinamou ei? Noatu kua ako a Iehova iaia, te akaperepere ra tona Metua i te rangi iaia. Kua irinaki te tata salamo e ka papa ua rai tona Atua aroa i te tauturu iaia.—Sala. 118:29.
4. Eaa te au tu mataku ka autu tatou me irinaki tatou e te akaperepere ra te Atua ia tatou?
4 Ka anoanoia tatou kia irinaki e te akaperepere ra a Iehova ia tatou. Ka tauturu te reira kia autu tatou e toru tu mataku, (1) te mataku kare e rauka te akono i te ngutuare tangata, (2) te mataku i te tangata, e te (3) te mataku i te mate. Kua rauka i te aronga tei taikuia i te parakarapa mua, kia autu i te mataku no te mea kua irinaki ratou i to te Atua aroa.
TE MATAKU KARE E RAUKA TE AKONO I TE NGUTUARE TANGATA
E taeake e tana tamaiti, e tautai ana raua ei angai i te ngutuare tangata (Akara i te parakarapa 5)
5. Eaa te upoko o te ngutuare ka manata kino ei? (Akara i te tutu i te kapi mua.)
5 Ka anoanoia tetai upoko Kerititiano kia akono i tona ngutuare tangata. (1 Timo. 5:8) Me e upoko koe no te ngutuare, penei i teia tuatau maki kino kua mataku koe e ka ngere koe i taau ngai angaanga. Penei kua manata koe akapeea me angai i te ngutuare e te tutaki i te are tarau me kore te kaiou o te are. Penei kua mataku koe e me ngere koe i taau ngai angaanga, kare e kitea akaouia tetai. Mei ia Nestor e María, penei kua tapupu koe i te akatanotano i taau ngai angaanga, te openga e meangiti mai taau moni. Te manuia nei a Satani i te akatupu i teia tu mataku.
6. Eaa ta Satani ka akakeu ia tatou kia irinaki?
6 E akakeu ana a Satani kia irinaki tatou e kare a Iehova e manako mai ana e kua akaruke aia ia tatou kia akono i to tatou ngutuare. Penei ka akono ua tatou i te ngai angaanga noatu eaa te tu, e kua kopae i te au kaveinga Pipiria.
7. Eaa ta Iesu i akapapu mai kia tatou?
7 Kua kite meitaki tikai a Iesu i te Metua, e kua akapapu mai, e ‘kua kite te Atua i te au mea e tau ia tatou, ou tatou i pati atu ei.’ (Mata. 6:8) Kua papa ua a Iehova i te akono mai ia tatou. Ei au Kerititiano, e tamariki tatou no te ngutuare o te Atua. Kua papu ia tatou ei Upoko no te ngutuare, ka akono a Iehova i te kaveinga tana i tata ia 1 Timoteo 5:8.
Ka akono ua rai a Iehova ia tatou. Penei ka taangaanga aia i te au taeake kia tauturu ia tatou (Akara i te parakarapa 8) *
8. (a) Eaa te ka tauturu kia autu i te mataku e kare e rauka ia tatou te akono i te ngutuare tangata? (Mataio 6:31-33) (e) Akapeea tatou me aru i te akaraanga o te tokorua tei kaikai kapiti ki tetai tuaine?
8 Me irinaki tatou e te akaperepere ra a Iehova ia tatou e te ngutuare, papu e ka akono aia ia tatou. (E tatau ia Mataio 6:31-33.) Ka inangaro a Iehova i te akono ia tatou, e mei teaa atura tona tu Oronga ua ma te aroa! I tona anga anga i te enua, e maata atu tana i oronga mai i te au mea tei anoanoia. Kua akaki aroa aia i te enua ma te au mea memeitaki. (Gene. 2:9) Noatu e kua rava ua ta tatou i te kainga, e mea meitaki kia akamanako tatou e te meitaki ua nei tatou. Kare ake rai a Iehova i kore ake i te akono ia tatou. (Mata. 6:11) Ka anoanoia tatou kia akamanako e ko tetai ua atu atinga materia tei na roto tatou, kare te reira e aiteia ki ta te Atua aroa ka oronga mai na tatou, i teianei e te tuatau ki mua. Kua kite a Nestor e María i te reira.—Isa. 65:21, 22.
9. Eaa ta tatou ka apii mei te akaraanga o Nestor e María?
9 Kua mataora a Nestor e María i tetai oraanga meitaki i Colombia. “Kua manako maua i te akamāmā mai i to maua oraanga e te akamaata atu i ta maua angaanga tutu aere,” i na raua ei, “inara kua mataku maua ko te kore maua e reka i te oraanga ma te moni meangiti.” Eaa tei tauturu kia autu i to raua mataku? Kua akamanako raua i to Iehova aroa no raua. Te irinaki anga e ka akono a Iehova ia raua, kua akamutu raua i ta raua ngai angaanga meitaki. Kua oko raua i to raua are e kua neke ki tetai tua o te enua te ngai te anoanoia ra te aronga tutu aere i te Patireia. Eaa to raua manako no te reira? Karanga a Nestor: “Kua kite maua i te tika anga o Mataio 6:33. Kare rava maua i ngere ana i te pae materia. E mataora atu to maua oraanga i teianei.”
TE MATAKU I TE TANGATA
10. Eaa tatou i manako ei, e mataku ana te tangata i te tangata?
10 E takinokino ana te tangata i tetai e tetai. (Kohe. 8:9) Ei akaraanga, e taangaanga tau kore ana te tangata i to ratou mana akaaere, e rave ana te aronga kino i te ta ua, e takinokino ana tetai tamariki apii i tetai, e e takinokino ana tetai aronga i to ratou ngutuare tangata. No reira te tangata i mataku ei i te tangata! Akapeea a Satani me taangaanga i teia ravenga kia mataku te tangata i te tangata?
11-12. Akapeea a Satani me taangaanga i te mataku i te tangata, kia patoi ia tatou?
11 E taangaanga ana a Satani i te mataku i te tangata kia tiratiratu kore tatou e kia akamutu i te tutu aere. I raro ake i ta Satani akatere, kua arai te au kavamani i ta tatou angaanga e kua takinokino ia tatou. (Luka 21:12; Apo. 2:10) Te akavare ra tetai au ngai i to Satani ao e kua pikikaa kino i te Au Kite o Iehova. Te aronga te irinaki ra i teia au pikikaa penei ka aviri ia tatou, me kore ka tā ia tatou. (Mata. 10:36) Ka poitirere ainei tatou i ta Satani au ravenga? Kare. Kua taangaanga takere aia i te reira i te anere mataiti mua.—Anga. 5:27, 28, 40.
Noatu ka patoi mai te ngutuare tangata, irinaki ua tatou i to Iehova aroa (Akara i te parakarapa 12-14) *
12 Kare ko te patoi anga a te au kavamani ta Satani ravenga anake e taangaanga ra. Te mataku ra tetai pae akapeea te pamiri me ariu ki te tuatua mou, kare ratou e manata ana i te takinokino anga i te pae kopapa. Akaperepere ratou i te kopu tangata e te anoano ra kia kite ratou e kia akaperepere ia Iehova. E mamae ana ratou me akakino te kopu tangata i te Atua mou e te aronga tei akamori iaia. I muri roa mai, kua āriki te kopu tangata tei patoi i te tuatua mou i mua ana, i te tuatua mou. Inara, akapeea me ka kopae takiri te kopu tangata ia tatou no to tatou irinakianga ou? Eaa ta tatou ka rave?
13. Akapeea tatou me papu e ka tauturu te aroa o te Atua kia akakoromaki tatou i te patoi anga a te ngutuare tangata? (Salamo 27:10)
13 Pumaana tatou i te tuatua mou manea ia Salamo 27:10. (E tatau.) Me akamaara tatou i to Iehova akaperepere maata ia tatou, ka noo tinamou tatou noatu te patoi anga. Papu ia tatou e ka tutaki aia i to tatou tu akakoromaki. Ka akono meitaki a Iehova ia tatou i te pae kopapa, te manako ngakau, e te pae vaerua! Kua kite mai a Biniam i te reira.
14. Eaa ta tatou ka apii mai mei te akaraanga o Biniam?
14 Kua riro mai a Biniam ei Au Kite no Iehova noatu e ka tupu te takinokino anga pakari kiaia. Akamanako akapeea tona kite anga e te akaperepere ra a Iehova iaia me tauturu ia Biniam kia autu i te mataku i te tangata. “Kua kino atu te takinokino anga,” i nana ei. “Inara ko taku i mataku rava atu, koia oki ko te takinokino anga a toku ngutuare tangata. Kua mataku au e ka riro taku iki anga ei Au Kite no Iehova ei akariri i toku metua tane e ka manako ratou e e puapinga kore ua au.” Inara, kua irinaki a Biniam e ka akono ua rai a Iehova i te aronga Tana i akaperepere. Akamārama a Biniam: “Kua akamanako au i ta Iehova tauturu anga i tetai pae kia akakoromaki i te rava kore o te moni, te tu papakitai, e te tu ta ua o te tangata. Kua kite au e me piri vaitata au kia Iehova, ka akameitaki aia iaku. I toku tapeka putuputuia anga e kua tamamaeia, kua kite au i ta Iehova tauturu me vai tiratiratu tatou kiaia.” Kua riro mai a Iehova ei metua tikai no Biniam, e kua riro Tona iti tangata ei kopu tangata tikai nona.
TE MATAKU I TE MATE
15. Eaa te mataku i te mate i riro ei ei mea matauia?
15 Akatika te Pipiria e e enemi te mate. (1 Kori. 15:25, 26) Penei ka apiapi tatou i te manako o te mate, me rokoia tatou e te maki kino pera te aronga tei akaperepere tatou. Eaa te tumu i mataku ei tatou i te mate? No te mea kua anga a Iehova ia tatou ma te oraanga mataora e tuatau ua atu. (Kohe. 3:11) Inara ka riro te manako pārani ei paruru i to tatou oraanga. Ei akaraanga, ka akakeu te reira ia tatou kia tuku i te au iki anga meitaki no te oraanga matutu, te akaetaeta kopapa, te kimi i te tauturu a te au taote e te vairakau, e auraka e rokoia e te tumatetenga.
16. Akapeea a Satani me akavare ia tatou kia mataku i te mate?
16 Kua kite a Satani e ka akaperepere tatou i to tatou oraanga. Karanga aia, e ka akaatinga tatou i ta tatou au mea ravarai—to tatou pirianga oa kia Iehova—no te akono i to tatou oraanga. (Iobu 2:4, 5) Kua tarevake a Satani! E mei te mea “nona te mate,” ka taangaanga a Satani kia mataku tatou i te mate kia akaruke tatou ia Iehova. (Ebe. 2:14, 15) I tetai au tu, kua riro to Satani au kauono ei tamataku i te aronga tei akamori ia Iehova e kia akaruke i te akarongo. Tetai, penei ka na roto a Satani i tetai rapakau anga maki kia tiratiratu kore tatou. Penei ka māro mai te au taote me kore te kopu tangata kia āriki tatou i te pamu toto, kia aati i ta te Atua ture. E ka akakeu ia tatou kia kimi i te rapakau anga tei patoi i te au kaveinga Pipiria.
17. Ia Roma 8:37-39, eaa tatou ka kore ei e mataku i te mate?
17 Noatu kare tatou e inangaro i te mate, kua kite tatou ka akaperepere ua a Iehova ia tatou me mate ake tatou. (E tatau ia Roma 8:37-39.) Me mate to Iehova au oa, ka akamaara aia ia ratou, mei te mea e te ora ua ra ratou. (Luka 20:37, 38) Te anoano ra aia i te akaoki mai ia ratou mei te mate. (Iobu 14:15) Kua tutaki a Iehova i te tutaki maata “kia rauka [ia tatou] te ora mutu kore.” (Ioa. 3:16) Kua kite tatou e te akaperepere ra e te akono ra a Iehova ia tatou. No reira, auraka tatou e akaruke ia Iehova me rokoia tatou e te maki e me tamateia tatou, e uri tatou kiaia no te pumaana, te kite pakari e te maroiroi. Kua rave a Valérie e tana tane i te reira.—Sala. 41:3.
18. Eaa ta tatou ka apii mai mei te akaraanga o Valérie?
18 I tona 35 mataiti, kua tuia a Valérie e te maki kino o te cancer. Akara akapeea te aroa te tauturu anga iaia kia kore e mataku i te mate. Karanga aia: “Kua taui toku maki i toku oraanga i tetai po. Kua anoanoia tetai vaʼi e ora ai au. Kua ui au ki te au taote vavaʼi, inara kare ratou e vaʼi iaku me kare e toto. Kua mataku au, inara me akamanako au i ta te Atua akaue anga, kare rava au e āriki i tetai pamu toto! I toku oraanga, kua akaperepere tikai a Iehova iaku. I teianei e tuatau toku te akaari e te akaperepere ra au iaia. Me rongo au i te nuti kino kua inangaro au i te akangakau parau ia Iehova e auraka rava a Satani e rē. I muri mai kua meitaki toku vaʼi ma te kore e toto. Noatu toku oraanga kinokino i te pae kopapa, kua akono ua a Iehova ia maua. Ei akaraanga, i ta matou uipaanga i te openga epetoma i mua ake ka kite ei au i toku maki, kua uriuri maua i te atikara ‘Autu Mataku Kore i te au Tumatetenga i Teia Tuatau.’ * E atikara meitaki tikai teia. Kua tatau putuputu ua maua i te reira. Kua riro te au atikara mei teia e tetai akanooanga meitaki i te pae vaerua kia rauka ia maua ko taku tane, te tu ‘au e te au iki anga meitaki e te maru.”
AUTU ANGA I TO TATOU MATAKU
19. Eaa te ka tupu kare e roa?
19 Ma te tauturu a Iehova, kua autu te au Kerititiano i te ao katoa i te au turanga manamanata e kua maroiroi ratou i te patoi i te Tiaporo. (1 Pete. 5:8, 9) Ka rauka rai ia koe. Kare e roa, ka tono a Iehova ia Iesu e tona au taeake tutara “kia akakore . . . i te angaanga a te diabolo ra.” (1 Ioa. 3:8) E kare rava te iti tangata o te Atua i te enua nei “e mataku; e i te rikarika.” (Isa. 54:14; Mika 4:4) Ka anoanoia tatou i teianei kia angaanga pakari kia autu i te mataku.
20. Eaa te ka tauturu ia tatou kia autu i te mataku?
20 Kia irinaki ua tatou e ka akaperepere e ka paruru a Iehova i tona au tavini. Ka pera tatou me akamanako oonu tatou e te akakite i ta Iehova paruru anga i tona au tavini i mua ana. E kia akamanako i tona tauturu anga ia tatou tataki tai kia akakoromaki i te au turanga taitaia. Ma te tauturu a Iehova, ka rauka ia tatou kia autu i te mataku!—Sala. 34:4.
IMENE 129 Ka Akakoromaki Atu Rai Tatou
^ Ka riro te mataku ei paruru ia tatou mei te tumatetenga. Me tupu ra, te mataku tau kore, ka tupu te kino. Akapeea ra? Ka taangaanga a Satani i te mataku ei takino ia tatou. Ae, ka angaanga pakari tatou kia akatere i teia tu mataku. Eaa te ka tauturu ia tatou? Mei ta teia atikara ka akaari mai, me irinaki tatou, tei te pae a Iehova ia tatou e te akaperepere ra aia ia tatou, ka autu tatou i tetai ua atu tu mataku.
^ Tauiia te au ingoa.