Kua anauia au ia Titema 22, 1929, i Noville, e oire meangiti, e iva au ngai tiaki manu vaitata atu ki Bastogne, i Belgian Ardennes. Mataora tikai to matou oraanga ko toku nga metua i reira. I te au rā, ka pāte maua ko toku teina ko Raymond i te ū o te au puakatoro e pera te tauturu i te angaanga tanutanu. I roto i to matou oire, e taokotai ana matou i te tauturu i tetai e tetai.

E Katorika tumu toku nga metua ko Emile e Alice. E aere ana matou ki te Oroa i te au Tapati. Inara i te 1939, kua aere mai tetai tangata painia no England mai e kua oronga i tetai makatini ki toku tati (kapikiia teia E Ara!). Kua irinaki toku tati e ko te tuatua mou teia e kua akakeuia aia kia tatau i te Pipiria. Te akamutu anga aia i te aere ki te Oroa, kua riri tona au tangata tupu e kua patoi pakari iaia. Kua māroia toku tati kia noo ua aia ki roto i te Akonoanga Katorika, e e maata tikai te au tauetono anga.

Kua mamae tikai au i te akakinoia anga toku tati. Kua akakeu teia iaku kia pure akatenga ki te Atua kia tauturu i toku tati, mei tei taikuia i te akamata anga o teia atikara. Mataora tikai au te akamutu anga teia aronga i te akakino iaia. Kua papu iaku e ko Iehova anake “tei akarongo i te pure.”

Kua tamaki atu te Nazi o Tiamani kia Belgium ia Me 10, 1940, e e maata te au tangata tei akaruke i te enua. Kua oro toku ngutuare tangata ki te tua apatonga o Varani. Ia matou e teretere ra, kua na roto matou i tetai au tumatetenga, te tamaki ra te au vaeau Tiamani ki te au vaeau Varani.

I muri mai, kua oki matou ki to matou kainga, inara kua keiaia te maata anga o ta matou apinga. Ko ta matou puakaoa anake ko  Bobbie to reira. No teia i tupu kua ui au, ‘Eaa ra i maata ai te tamaki e te tumatetenga?’

I te reira taime, kua akamaroiroiia matou te atoro anga mai te taeake ko Emile Schrantz, a e tangata pakari aia e e painia katoa. Kua akamārama meitaki aia mei te Pipiria i te tumu i tupu ei te au kino e kua pau mai aia i taku au uianga. Kua rauka iaku tetai pirianga vaitata kia Iehova e te irinaki e koia te Atua aroa.

I mua ake ka akamutu ei te tamaki, kua mataora toku pamiri i te aravei i te au taeake. Ia Aukute 1943, kua atoro mai te Taeake ko José-Nicolas Minet ia matou e kua oronga mai i tetai akoanga. Kua ui mai aia, “Koai te ka inangaro kia papetitoia?” Kua tāki toku tati i tona rima ki runga e au katoa. No reira, kua papetitoia maua i roto i tetai manga kauvai i te pae i to matou kainga.

Ia Titema 1944, kua tamaki atu te vaeau Tiamani ki te tua opunga o Europa, tei kapikiia e ko te Battle of the Bulge. Te tupu ra te tamaki vaitata mai kia matou no reira kua noo ua matou ki roto i tetai pia paruru e tai marama. I tetai rā te angai ra au i te au manu, kua aruru mai tetai pomu i te pae ia matou e kua puia te tauu o te are manu. Kua ava mai tetai vaeau Marike, “E takoto ki raro!” kua oro au e kua takoto ki te pae iaia, i reira kua tuku mai aia i tona pare ki runga i toku upoko ei paruru iaku.

I muri ake i te tamaki, kua aravei putuputu matou i te au taeake e te au tuaine i roto i te putuputuanga i Liège, e 90 kiromita te mamao i te tua tokerau. Tei tupu mai, kua akamataia tetai manga pupu apii Pipiria i Bastogne. Kua angaanga au i ko i te ngai ko’i tero e kua rauka katoa iaku te apii i te ture. I muri mai, kua angaanga au i ko i tetai opati a te kavamani. I te 1951, kua akanooia tetai manga akaputuputuanga kotinga i Bastogne. E anere ua atu tangata tei tae mai, kapiti mai tetai painia maroiroi ko Elly Reuter. Ka teretere aia na runga i tona patikara takatakai e 50 kiromita te mamao. Kare i roa ana, kua akainangaro au iaia e kua tapaoia maua  no te akaipoipo. Kua patiia a Elly kia aere ki te Apii Gileada i Marike. Inara, kua tata atu aia ki te opati maata i Betela i te akamārama e kare aia e tae ki te apii. Kua pau maru mai te Taeake ko Knorr, te akono ra i te iti tangata o Iehova, e penei a tetai rā ka tae atu maua ki te apii Gileada. Kua akaipoipo maua ia Peperuare 1953.

I te reira mataiti, kua aere atu maua ko Elly ki ko i te New World Society Assembly i ko i te Yankee Stadium i New York. Iaku i reira, kua oronga mai tetai taeake i te ngai angaanga meitaki naku e te pati mai kia neke au ki Marike. I muri ake i te pure anga maua kia Iehova, kua patoi maua ko Elly i teia patianga e kua oki maua ki Belgium no te turuturu i te manga pupu e tai ngauru au papuritia i Bastogne. E tai mataiti i muri mai, kua anau ta maua tamaiti ko Serge. Te mea akaaroa ra, e itu ona marama, kua makiia a Serge e kua mate aia. Kua akakite maua i to maua mamae ngakau kia Iehova na roto i te pure, e kua akamaroiroiia maua no te manakonakoanga o te tuakaouanga.

Ia Okotopa 1961, kua rauka mai tetai angaanga naku ei painia. I te reira rā, kua ringiia mai au e te opati Betela i Belgium. Kua akakite mai te taeake me ka rauka ia maua i te tavini ei akaaere kotinga. Inara, kua pati atu au “Me ka tika kia painia maua na mua i mua ake ka āriki ei i teia patianga.” Kua akatikaia mai te reira. E varu marama i to maua painia anga, kua akamata maua i te angaanga akaaere kotinga ia Tepetema 1962.

E rua mataiti te rave anga i teia angaanga, kua patiia maua kia tavini atu i ko i te opati Betela i Brussels. Kua tavini maua ki reira ia Okotopa 1964. Kua apai mai teia i te au akameitakianga. Kua atoro mai te Taeake ko Knorr ia matou i Betela i te 1965, e kua poitirere tikai au kua ikiia au ei tavini akaaere i Betela. E oti kua patiia mai maua ko Elly kia aere ki te pupu 41 o te Apii Gileada. Ko ta te Taeake ko Knorr i tuatua e 13 mataiti i mua atu ana, kua akatupuia te reira! Te akaoti anga ta maua apii, kua oki maua ki te Betela i Belgium.

I te au mataiti i aereia mai, kua rauka tetai tikaanga kia taangaanga i toku kite i te pae ture no te paruru i to tatou tikaanga kia akamori ia Iehova i Europa e i te au enua ke. (Phili. 1:7) E no teia angaanga, kua aravei au i te aronga mana mei te 55 au enua tei patoi atu i ta tatou angaanga. Kare au e akakite ki te aronga mana i toku kite i te pae ture, mari ra e “tangata au no te Atua.” Ka pure ua au kia Iehova no tana aratakianga, no te mea kua kite au “e au matāvai te ngakau o te ariki [me kore akava] i te rima o Iehova, te akaariu ra aia ki tana ngai i inangaro.”—Mase. 21:1.

 Te maara nei rai iaku te pukapuka anga au ki tetai mema paramani i Europa. E maata te taime e pati ana au kia pukapuka kiaia, e aere ua rai kua āriki mai aia i te reira. Kua pau mai aia, “E rima rai oou miniti, e kare atu.” Kua rave au i tetai pure. Kua ui mai aia, tei teaa koe. Kua pau atu au, “Te akameitaki nei au i te Atua no te mea ko koe tetai tavini nona.” Kua ui mai aia, “Eaa taau e tuatua mai nei?” Kua akaari au kiaia ia Roma 13:4. E Porotetani aia e e reka ana aia i te Pipiria. Tei tupu? Kua oake mai aia e apa ora, e kua puapingaia ta maua uriurianga. Kua akakite mai aia e e akangateitei ana aia i ta matou angaanga.

I te au mataiti i aereia mai, e maata te au akavaanga ta te iti tangata o Iehova i rave ana i Europa kia vai takake, kia tiaki i te tamariki, te tutaki tero e te vai atura. E atianga meitaki rava noku i te kite i ta Iehova tauturu anga ia matou e te autu anga i te reira. Kua autu te Au Kite o Iehova e 140 tuma akavaanga i ko i te European Court of Human Rights!

I te mataiti 1990, kua angaanga kapiti au ki te Taeake Philip Brumley, te tavini ra aia i ko i te opati maata i Betela, e pera te Taeake Valter Farneti mei Itaria, no te tauturu i te au taeake e te au tuaine i Cuba kia akamori ia Iehova no te mea kua araiia te angaanga i reira. Kua tata atu au ki te komono o Cuba i Belgium e kua aravei au i tetai tangata akaaere. I te akamata anga ta matou uipaanga, kare i rauka te au manako tarevake i te akatikatikaia.

I muri ake te patianga i ta Iehova aratakianga na roto i te pure, kua pati matou kia tukuia e 5,000 Pipiria ki Cuba e kua akatikaia mai te reira. Kua tae mai te au Pipiria e kua tu’aia atu ki te au taeake. Kua akapapu mai te reira i ta Iehova akameitakianga. E oti kua pati akaou matou kia tukuia e 27,500 Pipiria. Kua āriki katoa te kavamani i te reira. Mataora tikai matou i te tauturu i te au taeake e te au tuaine i Cuba kia rauka ta ratou kopi Pipiria.

E maata te au atianga te atoro anga au ia Cuba, kua tauturu au i te akatikatika i te au manamanata i te pae ture. Kua rauka atu tetai pirianga meitaki ki te aronga mana o te kavamani.

I te 1994 e 1,000,000 tangata tei tamateia i te takoreia anga te Tutsi i Rwanda e e tuatau rikarika tikai te reira i tera enua. Te mea tangi, kua mate atu tetai o to  tatou au taeake e te au tuaine. I muri mai kua akaaereia tetai au taeake kia tauturu i te au taeake e te au tuaine i reira.

Te tae anga to matou pupu ki te oire maata i Kigali, kua kite matou i te au paruru o te opati uri reo e te ngai tu’a makatini, kua putaputa te reira i te au katiriti. Kua rongo matou i te au tua vinivini no te au taeake e te au tuaine tei tamateia ki te matipi maata. Kua rongo katoa matou i te au akaraanga o te au taeake e te au tuaine tei tauturu e tei aroa i te au taeake. Ei akaraanga, kua aravei matou i tetai taeake Tutsi, tei pipini ki roto i te vaarua e 28 rā, kua paruruia aia e tetai ngutuare Hutu, e Au Kite ratou no Iehova. Kua raveia tetai uipaanga i Kigali, ei akamaroiroi e te akapumaana i te 900 au taeake e te au tuaine i reira.

Aru mai kua aere atu matou ki Zaire (teianei ko te Democratic Republic o Congo) i te kimi i te au taeake e te au tuaine no Rwanda mai, tei oro ki te au puakapa tuitarere ki te oire o Goma. Kare ratou i kiteaia mai, no reira kua pure matou i te pati i ta Iehova aratakianga no te kimi ia ratou. I reira, kua kite matou i tetai tangata e kua ui kiaia me kua kite aia i te Au Kite o Iehova. Kua pau mai aia “Ae, ko au tetai, e ka apai au ia kotou kia ratou.” I muri ake i tetai uipaanga akamaroiroianga i te kumiti tauturu, kua aravei matou e 1,600 au tuitarere no te akamaroiroi e te akapumaana ia ratou i te pae vaerua. Kua tatau katoa matou i tetai reta mei ko mai i te Pupu Akaaere. Kua pumaana tikai te au taeake e te au tuaine i te akarongo i teia au tuatua akamaroiroi: “Te pure atu nei matou no kotou. E kua kite matou e kare rava a Iehova e akaruke ia kotou.” E tika tikai teia au tuatua mei ko i te Pupu Akaaere. I teia rā, e 30,000 Au Kite o Iehova te tavini maroiroi nei i Rwanda!

Kua akaipoipo maua no tetai 58 mataiti, e kua takake atu toku akaperepere ko Elly i te 2011. Kua akapumaana mai a Iehova iaku na roto i te pure. Kua akapumaana katoa te angaanga tutu aere i te nuti meitaki o te Patireia iaku.

Noatu e 90 oku mataiti i teianei, te tutu aere nei rai au i te nuti meitaki i te au epetoma. Te mataora katoa nei au i te tauturu atu i te Tipatimani o te Ture i konei i te opati Betela i Belgium, te akamaroiroi i tetai ke e te au mapu o te pamiri Betela.

E 84 mataiti i topa akenei, toku pure mua anga kia Iehova. Ko te akamata anga teia o toku oraanga mataora, te akavaitata atu anga kiaia. Ka akameitaki au ia Iehova koia tei akarongo mai ki taku au pure.—Sala. 66:19. b