ATIKARA APII 25
IMENE 7 Iehova to Matou Maroiroi
E Akamaara ko Iehova “te Atua Ora”
“Te ora rā Iehova!”—SALA. 18:46.
AKAKOROANGA
Ka puapingaia tatou me akamaara e ko te Atua ta tatou e akamori nei, koia “te Atua ora.”
1. Eaa tei tauturu i to Iehova iti tangata kia akamori ua rai iaia noatu te au manamanata?
“KA TUPU te kino maata i taua tuatau openga ra,” ko ta te Pipiria tera i akataka mai no te tuatau e noo nei tatou. (2 Timo. 3:1) I te pae mai i te au manamanata e tupu nei ki te au tangata ravarai i roto i teia ao kino, ka akakoromaki to Iehova iti tangata i te patoianga e te takinokinoanga. Eaa te ka tauturu ia tatou kia akamori ua rai ia Iehova noatu teia au manamanata? Tetai tumu maata koia oki kua kite tatou e ko Iehova “te Atua ora.”—Iere. 10:10; 2 Timo. 1:12.
2. Akapeea a Iehova me akamaroiroi ia tatou?
2 E Atua mou tikai a Iehova tei akamaroiroi ia tatou i te tuatau manamanata e kua papa ua aia i te tauturu ia tatou. (2 Para. 16:9; Sala. 23:4) Me akamaara tatou e koia te Atua ora, ka tauturu tera ia tatou kia akakoromaki i tetai ua atu timataanga. Akamanako ana i te akaraanga o te Ariki ko Davida.
3. Eaa te aiteanga o ta Davida tuatua “Te ora rā Iehova”?
3 Kua kite e kua irinaki a Davida ia Iehova. Te arumaki anga tona au enemi iaia kapiti mai te Ariki ko Saula, kua pure a Davida kia Iehova i te pati i tana tauturu. (Sala. 18:6) Te pau anga te Atua i tana pure e te akaora anga iaia, kua akakite a Davida: “Te ora rā Iehova!” (Sala. 18:46) Eaa te aiteanga o ta Davida tuatua? Akakite tetai tataanga e te akaari ra a Davida i tona irinaki e ko Iehova te Atua ora te ka tauturu ua rai i tona au tavini. Ae, kua mārama a Davida e te kite maira te Atua i te au manamanata tana e na roto ra, e kua akakeu iaia kia tavini ua atu e te akapaapaa ia Iehova.—Sala. 18:28, 29, 49.
4. Me papu ia tatou e ko Iehova te Atua ora, akapeea teia me tauturu ia tatou?
4 Me papu ia tatou e ko Iehova te Atua ora, ka tauturu te reira ia tatou kia tavini maroiroi iaia. Ka akamaroiroi teia ia tatou kia akakoromaki i te timataanga e kia angaanga pakari tatou i te rave i te anoano o te Atua. Ka tauta katoa tatou kia piri vaitata ua rai kia Iehova.
KA AKAMAROIROI TE ATUA ORA IA KOE
5. Eaa te ka akamaroiroi ia tatou me tupu te au timataanga? (Philipi 4:13)
5 Ka akakoromaki tatou i tetai ua atu timataanga, noatu te meangiti me kore te maata, me akamaara tatou e ko Iehova te Atua ora e ka tauturu ua aia ia tatou. Kare e manamanata kare e rauka i te Atua i te akatikatika. Koia te Atua Mana Katoatoa, e ka akamaroiroi aia ia tatou kia akakoromaki. (E tatau ia Philipi 4:13.) Ka tauturu tera ia tatou me tupu te au timataanga. Me kite tatou i ta Iehova tauturu me tupu te au timataanga rikiriki, mea papu e ka tauturu mai aia ia tatou me tupu te au timataanga maata.
6. Eaa tei tupu i to Davida mapu anga tei tauturu iaia kia irinaki ia Iehova?
6 E akamanako ana e rua tupuanga tei tauturu ia Davida kia irinaki papu ia Iehova. I to Davida mapu anga, iaia e tiaki ra i te anana mamoe a tona metua, kua opu te pea e te riona i tetai mamoe. I tera atianga, kua akaari a Davida i te tu ngakau toa i te tā anga i te nga manu taae e kua akaora i te mamoe. Inara, kare aia i manako ana e kua rave aia i teia i tona uaorai maroiroi. Mari ra, kua kite aia e na Iehova i oronga mai i te maroiroi kiaia. (1 Samu. 17:34-37) Kare i ngaropoina ia Davida teia au tupuanga. Na te akamanako oonu anga i te reira, kua irinaki papu aia e ka akamaroiroi te Atua ora iaia a te tuatau ki mua.
7. Eaa ta Davida i akamanako, e akapeea teia te tauturu anga iaia kia tamaki ia Golia?
7 I tona mapu anga, kua aere a Davida i te atoro i te nuku vaeau o te ngati Iseraela. Te tae anga aia ki reira, kua kite aia e mataku maata to te au vaeau i te tuputupua ko Golia o Philiseti no te akakino e te akavaavaa ia ratou. (1 Samu. 17:10, 11) Kua mataku te au vaeau no te mea kua akamanako ua ratou i te tuputupua e tana au tuatua akakino. (1 Samu. 17:24, 25) Inara e manako ke atu to Davida. Kua kite aia e te akakino ra a Golia i te au nuku o Iseraela e “te au nuku a te Atua ora nei.” (1 Samu. 17:26) No reira, kua akamou a Davida i tona manako ki runga ia Iehova. Kua irinaki katoa a Davida e ka tauturu te Atua iaia mei te tiaki anga i te anana mamoe e pera katoa i teia atianga. Ma te tauturu a te Atua, kua tamaki a Davida ia Golia e kua autu atu aia!—1 Samu. 17:45-51.
8. Eaa te ka akamaroiroi ia tatou kia irinaki e ka tauturu ua rai a Iehova ia tatou? (Akara katoa i te tutu.)
8 Ka autu katoa tatou i te au timataanga, me akamaara tatou e te papa ua ra te Atua ora i te tauturu mai ia tatou. (Sala. 118:6) Ka akamatutuia to tatou irinakianga ia Iehova me akamanako tatou i tana i rave i te au tuatau i topa. E tatau i te au tua Pipiria akapeea a Iehova i te akaora anga i tona au tavini. (Isa. 37:17, 33-37) E akamanako katoa i te au tupuanga i runga i ta tatou website jw.org, akapeea a Iehova te tauturu anga i te au taeake e te au tuaine i teia tuatau. Pera katoa, e akamanako i te au tuatau i tauturu ei a Iehova ia koe. Auraka e taitaia me kare e maara ia koe tetai tupuanga umere, mei te tā anga i te pea e te riona. No teaa ra? No te mea te tauturu ua nei a Iehova ia koe i roto i toou oraanga! Kua akavaitata mai aia kia koe e kua riro koe ei oa nona. (Ioa. 6:44) E i teianei, te tauturu nei rai aia ia koe. No reira, e pati i te tauturu a Iehova kia akamaara koe i te au atianga i pau mai ei aia i taau au pure, te tauturu i te taime tau e te akamaroiroi ia koe e na roto ra i tetai turanga ngatā. Na te akamanako oonu anga i teia au tupuanga, ka akamatutuia toou irinaki e ka tauturu ua rai a Iehova ia koe.
Me akakoromaki ua tatou i to tatou manamanata, ka akamareka tatou ia Iehova (Akara i te parakarapa 8-9)
9. Eaa ta tatou ka akamaara me tupu te au manamanata? (Maseli 27:11)
9 Me kite tatou e Atua ora a Iehova, ka tauturu tera ia tatou kia akamanako meitaki i to tatou au manamanata. Akapeea ra? Me tupu te au manamanata, ka akamanako tatou i te mea puapinga. Karanga te Tiaporo e me timataia tatou, ka akaruke tatou ia Iehova. No reira, me akakoromaki ua tatou i to tatou au manamanata ka akamareka tatou ia Iehova. (Iobu 1:10, 11; e tatau ia Maseli 27:11.) Inara me autu tatou i te au timataanga, ka akaari mai te reira i to tatou inangaro ia Iehova e te akapapuanga e pikikaa te Tiaporo. Te akakoromaki ra ainei koe i te patoianga a te kavamani, te au manamanata i te pae moni, te akakino anga a te tangata i roto i te angaanga tutu aere me kore tetai ua atu timataanga? Me koia ïa, e akamaara e ka riro toou turanga ei akarekareka i to Iehova ngakau. E akamaara katoa, ka tauturu ua rai aia ia koe kia akakoromaki i tetai ua atu timataanga. (1 Kori. 10:13) Ka akamaroiroi aia ia koe kia akakoromaki.
KA TUTAKI TE ATUA ORA IA KOE
10. Eaa ta te Atua ora ka rave no te aronga tei akamori iaia?
10 Ko Iehova Tei Tutaki mai i te aronga tei akamori iaia. (Ebe. 11:6) Ka oronga aia i te ngakau ’au e te mataora i teianei e te ora mutu kore a te tuatau ki mua. Ka irinaki pu tikai tatou i to Iehova inangaro e tei iaia te mana no te tutaki ia tatou. Ka tauturu teia ia tatou kia oronga i te mea meitaki i roto i ta tatou akamorianga, mei te au tavini rai i te tuatau taito. Ko teia ta Timoteo i rave i te anere mataiti mua.—Ebe. 6:10-12.
11. Eaa tei akakeu ia Timoteo kia angaanga pakari i roto i te putuputuanga? (1 Timoteo 4:10)
11 E tatau ia 1 Timoteo 4:10. Kua irinaki a Timoteo i te Atua ora. No reira aia i angaanga pakari ei na Iehova e na tetai ke. Eaa tana i rave? Kua akamaroiroi te apotetoro ko Paulo iaia kia riro mai ei puapii tukatau i roto i te angaanga tutu aere e te putuputuanga. Kua ako katoa a Paulo iaia kia akanoo i te akaraanga meitaki no tona au taeake, te mapu e te pakarikari. E au apainga ngatā katoa tana i rave na te akoanga i tetai pae ma te aroa. (1 Timo. 4:11-16; 2 Timo. 4:1-5) Noatu kare tetai ke i kite i te angaanga meitaki a Timoteo e te akameitaki iaia, kua papu ra ia Timoteo e ka tutaki a Iehova iaia.—Roma 2:6, 7.
12. Eaa te ka akakeu i te aronga pakari kia angaanga maroiroi i roto i te putuputuanga? (Akara katoa i te tutu.)
12 Mea papu katoa e te akaperepere ra a Iehova i te aronga pakari no ta ratou angaanga meitaki. I te pae mai i te akamaroiroianga, te apiianga e te angaanga tutu aere, ka turu katoa te aronga pakari i te angaanga pātu are e te tauturu i te tuatau tumatetenga. Ka tavini katoa tetai pae i roto i te Pupu Atoro Aronga Maki e te Kumiti Are Maki. Ko te aronga pakari tei tauturu i teia au angaanga, ka kite ratou e na Iehova teia akanoonooanga e kare na te tangata. No reira, ka angaanga pakari ratou i roto i te putuputuanga ma te irinaki tikai e ka tutaki mai te Atua ia ratou.—Kolo. 3:23, 24.
Ka tutaki te Atua ora ia koe no te angaanga pakari taau i rave na te putuputuanga (Akara i te parakarapa 12-13)
13. Eaa to Iehova manako i taau tauta anga i te tavini iaia?
13 Kare te katoatoa e riro mai ei aronga pakari. Noatu ra, ka rauka ia tatou pouroa i te oronga i tetai apinga kia Iehova. Te mareka maira to tatou Atua i ta tatou tauta anga i te tavini iaia. Te kite ra aia i ta tatou moni oronga ei tauturu i te angaanga tutu aere i te ao katoa, noatu e iti ua te reira. Te mareka ra aia me paupau tatou i ko i te au uipaanga noatu te rū e kia akakore tatou i te apa a te aronga tei akariri mai ia tatou. Noatu ka manako koe e puapinga kore taau e rave ra na Iehova, e irinaki e te akaperepere maira aia i taau i rave nona. Inangaro aia ia koe, e ka tutaki aia ia koe.—Luka 21:1-4.
E PIRI VAITATA UA RAI KI TE ATUA ORA
14. Me piri vaitata tatou kia Iehova, akapeea teia me tauturu ia tatou kia vai tiratiratu? (Akara katoa i te tutu.)
14 Me piri vaitata tatou kia Iehova, ka māmā ua ia tatou kia vai tiratiratu kiaia. Ko teia tei tupu kia Iosepha. Kua patoi pakari aia i te rave i te ainga tau kore. Kua piri vaitata aia ki te Atua e kare i inangaro i te akamareka kore Iaia. (Gene. 39:9) Kia rauka tetai pirianga vaitata kia Iehova, ka anoanoia tatou kia akapou i te tuatau no te pure kiaia e te apii i tana Tuatua. Me rauka ia tatou tetai pirianga vaitata kia Iehova, mei ia Iosepha rai, kare tatou e rave i tetai ua atu mea te ka akamareka kore ia Iehova.—Iako. 4:8.
Me akavaitata koe ki te Atua ora ka tauturu te reira ia koe kia vai tiratiratu (Akara i te parakarapa 14-15)
15. Eaa ta tatou ka apii mai mei te ngati Iseraela ia ratou i te metepara? (Ebera 3:12)
15 Te aronga tei akangaropoina e ko Iehova te Atua ora, ka māmā ua ia ratou i te akamamao atu mei iaia. E akamanako i tei tupu ki te ngati Iseraela ia ratou i te metepara. Kua kite ratou e ko Iehova to ratou Atua inara kua ekoko ratou me ka akono mai aia ia ratou. Kua ui ratou: “Tei rotopu ainei a Iehova ia tatou nei, e kare aina?” (Exo. 17:2, 7) Tei tupu, kua akarongo kore ratou ki te Atua. No reira, e kopae tatou i to ratou tu akarongo kore tei riro ei akamatakiteanga no tatou.—E tatau ia Ebera 3:12.
16. Eaa te ka timata i to tatou akarongo?
16 Ka ngatā ia tatou i te piri vaitata kia Iehova i roto teianei ao. E manganui tei kopae i te irinakianga e e Atua tetai. I te akaraanga, e oraanga meitaki ua to te aronga tei kopae i ta te Atua e umuumu maira ia ratou. Me kite tatou i teia, penei ka timataia to tatou akarongo. Noatu te irinaki ra tatou i te Atua, ka ekoko rai tatou me ka tauturu mai aia ia tatou. Kua manako akapera te tangata tei tata ia Salamo 73. Kua kite aia i te aronga takapini iaia kare i akono i te ture a te Atua e e oraanga meitaki to ratou. Tei tupu, kua ekoko aia me e puapinga rai tana tavini anga i te Atua.—Sala. 73:11-13.
17. Eaa te ka tauturu ia tatou kia piri vaitata kia Iehova?
17 Eaa tei tauturu i te tata salamo kia akatikatika i tona manako tarevake? Kua akamanako oonu aia i tei tupu ki te aronga tei akangaropoina ia Iehova. (Sala. 73:18, 19, 27) Kua akamanako katoa aia i te au akameitakianga no te tavini i te Atua. (Sala. 73:24) Ka rauka katoa ia tatou i te akamanako i te au akameitakianga a Iehova. E akamanako ana mei teaa rai toou oraanga naringa koe kare i tavini ia Iehova. Me pera tatou, ka tauturu teia ia tatou kia vai tiratiratu e kia tuatua mei te tata salamo: “E mea meitaki ra iaku kia akavaitata atu ki te Atua.”—Sala. 73:28.
18. Eaa te tumu kare tatou e mataku i te tuatau ki mua?
18 Ka rauka ia tatou i te akakoromaki i te au timataanga te ka tupu i teia tuatau openga no te mea te akamori nei tatou “i te Atua ora e te mou.” (1 Tesa. 1:9) Ka akono e ka tauturu ua rai to tatou Atua ia tatou. Kua rave aia i teia no tona au tavini i taito e i teia tuatau. Kare e roa atu ana, ka tae mai te mate maata. Kare tatou e noo ko tatou anake ua mari ra te vaitata maira a Iehova kia tatou. (Isa. 41:10) No reira, “kia akamaroiroi, e kia karanga e, ‘Ko Iehova toku tauturu, kare au e mataku.’”—Ebe. 13:5, 6.
IMENE 3 To Tatou Maroiroi, Manakonakoanga, Irinakianga