Kia akamareka ia Iehova, ka anoanoia tatou kia akarongo. Inara karanga te Pipiria, “kare oki i ope katoatoa te tangata i te akarongo.” (2 Tesa. 3:2) Kua tuatua te apotetoro ko Paulo no te aronga tei takinokino iaia e e au “tangata kikino [ratou] e te akono kore.” Inara ko tana i tuatua no te akarongo, kua tau rai tona manako no te aronga ke. Kua iki tetai pae i te patoi i te au akapapuanga e ko te Atua Tei Anga i te au mea. (Roma 1:20) E penei ko tetai pae kua irinaki ratou e e Atua tetai. Inara kare e rava ua tera no te akamareka ia Iehova.

Ka akapapu tatou e e Atua tika tikai a Iehova e ka “tutaki” aia i te aronga e akarongo ketaketa to ratou. (Ebe. 11:6) E rauka ai te akarongo, ka anoanoia to te Atua vaerua tapu. Ka pure e ka pati tatou kia oronga mai aia i tona vaerua tapu. (Luka 11:​9, 10, 13) Tetai ravenga puapinga e rauka ai te vaerua tapu na te tatau anga i te Pipiria. Ka akamanako oonu tatou e te taangaanga i te reira. Ka āriki tatou i to Iehova vaerua tapu kia arataki i to tatou oraanga e te akarongo no te akamareka iaia.