ATIKARA APII 23
IMENE 28 Kia Riro ei Oa no Iehova
Pati Mai a Iehova ia Tatou ei Manuiri Nana
“Ei i o ratou taku puakapa vai ei: e ei Atua au no ratou.”—EZE. 37:27.
AKAKOROANGA
Kia tauturu ia tatou kia mārama i te aiteanga kia riro ei manuiri i roto i to Iehova puakapa e akapeea aia i te akono anga ia tatou.
1-2. Eaa ta Iehova patianga ki tona aronga akamori?
EAA ta Iehova tuanga i roto i toou oraanga? Penei ka pau koe, ‘Koia toku Metua, toku Atua e toku Oa.’ Inara, e au taoonga ke atu tona. No reira, e manako ana ainei koe iaia ei Atua Akono manuiri?
2 Kua akaaite te Ariki ko Davida i to Iehova pirianga ki Tona aronga akamori mei tetai tei akono i tana au manuiri. Kua ui aia: “Koai, e Iehova, te ka tuitarere i toou ra puakapa? koai te ka noo i to maunga tapu ra?” (Sala. 15:1) Ka kite mai tatou mei teia irava e ka riro mai tatou ei manuiri na Iehova koia oki, ei au oa nona. Kare ainei e patianga ngateitei teia no ko mai ia Iehova?
INANGARO A IEHOVA IA TATOU EI MANUIRI NANA
3. Koai ta Iehova manuiri mua, e eaa to raua manako i tetai e tetai?
3 I mua ake ka angaia ai te au mea ravarai, te vai ua ra a Iehova koia anake ua. I muri mai, kua āriki aia i tana Tama mua ki roto i tona puakapa. Kua mataora a Iehova i te akono i tana manuiri mua. Te akakite maira te Pipiria no Iehova e “te mataora ua ra” aia i tana Tamaiti. Akakite katoa te irava no te Tamaiti i tona “rekareka tamou marie anga ki mua i [to Iehova] aroaro.”—Mase. 8:30.
4. Koai ma atu ta Iehova manuiri?
4 I reira, kua anga a Iehova i te au angera kia riro katoa ei manuiri nana. Kua kapikiia ratou e ko “te au tamariki a te Atua” e kua maeva ratou i te noo i te pae ia Iehova. (Iobu 38:7; Dani. 7:10) No tetai tuatau roa, kua piri te Atua kia ratou i te rangi. Muri mai, kua anga aia i te au tangata kia riro katoa ei manuiri nana. Aere ua rai, kua piri mai a Enoka, Noa, Aberahama e Iobu kiaia. Kua riro ratou ei au oa no Iehova e kua aaere ratou ma “te Atua.”—Gene. 5:24; 6:9; Iobu 29:4; Isa. 41:8.
5. Eaa ta tatou i kite mai mei te totou ia Ezekiela 37:26, 27?
5 I te au mataiti i aereia mai, kua pati a Iehova i tetai aronga ke kia riro ei manuiri nana. (E tatau ia Ezekiela 37:26, 27.) Ei akaraanga, ka kite tatou mei ta Ezekiela totou e kua inangaro te Atua i tona aronga akamori kia akavaitata kiaia. Kua papau aia “i tetai koreromotu au ia ratou.” Te akataka ra te reira totou e ka taokotaiia to Iehova aronga akatainuia e te aronga e manakonakoanga to ratou no te enua kia riro ei “okotai oki anana” i roto i tona puakapa. (Ioa. 10:16) Ko teia tera tuatau!
KA AKONO A IEHOVA IA TATOU
6. Akapeea tetai e riro mai ei ei manuiri i roto i to Iehova puakapa, e ka kitea tona puakapa kiea?
6 I te tuatau taito, i riro ana te puakapa ei ngai akangaroianga e te akaruruanga no te tangata. Ka akonoia te au manuiri i reira. Me akatapu tatou ia tatou uaorai kia Iehova, ka riro mai tatou ei manuiri i roto i tona puakapa. (Sala. 61:4) Ka rauka ia tatou te au kai pae vaerua e kia piri vaitata ki te aronga tei riro katoa ei manuiri na Iehova. Ka riro mai te tangata i te au enua ravarai ei manuiri i roto i to Iehova puakapa. Ei akaraanga, penei kua teretere ana koe ki tetai enua no te uruoaanga takake e kua aravei koe i te au manuiri. Ae, ka kitea tona puakapa i te au ngai ravarai te tavini ra tona aronga akamori iaia.—Apo. 21:3.
7. Akapeea tatou e kite ei e manuiri rai te aronga tiratiratu tei mate i roto i to Iehova puakapa? (Akara katoa i te tutu.)
7 Akapeea te aronga tiratiratu tei mate? E au manuiri ainei ratou i roto i to Iehova puakapa? Ae! Eaa te tumu? No te mea te ora ra ratou i roto i to Iehova manako. Kua akamārama a Iesu: “Kareka te tuakaouanga o te aronga i mate, kua akakite mai oki a Mose, iaia i karanga atu i te Atu i te pu ngangaere ra, i ‘te Atua no Aberahama, e te Atua no Isaaka, e te Atua no Iakoba.’ Kare oki aia i te Atua no tei mate, no tei ora ra; te ora katoatoa ra iaia.”—Luka 20:37, 38.
Ka rauka i te aronga tiratiratu tei mate kia riro ei manuiri i te puakapa o Iehova (Akara i te parakarapa 7)
TE AU AKAMEITAKIANGA E TE AU APAINGA
8. Eaa te au akameitakianga ka rauka i te au manuiri a Iehova?
8 Mei tetai puakapa tei riro ei ngai akangaroianga e te akaruruanga, ka paruru to Iehova puakapa i tana au manuiri kia kore ratou e takinoia i te pae vaerua e te pae manako. Me piri vaitata tatou kia Iehova, ka paruru Aia ia tatou mei ia Satani. (Sala. 31:23; 1 Ioa. 3:8) I roto i te ao ou, ka paruru ua rai a Iehova i tona au oa tiratiratu mei te kino i te pae vaerua e te mate.—Apo. 21:4.
9. Eaa ta Iehova e tapapa maira no tana au manuiri kia rave?
9 E tikaanga ngateitei no tatou kia riro ei manuiri i roto i te puakapa o Iehova koia oki, kia piri vaitata kiaia e tuatau ua atu. Eaa ta tatou ka rave kia riro ua rai ei manuiri nana? Me patiia mai koe ki te ngutuare o tetai tangata, mea papu ka inangaro koe i te akamareka iaia. Ei akaraanga, penei ka karanga mai aia kia kiriti koe i toou tamaka me tomo koe ki roto i te are, e ka rave koe i te reira. Mei te reira rai, ka inangaro tatou i te kite eaa ta Iehova e tapapa maira mei ia tatou ei au manuiri i roto i tona puakapa. Na te inangaro ia Iehova e akakeu ia tatou kia rave “i te au mea katoa e mareka mai ei” aia. (Kolo. 1:10) E Oa a Iehova no tatou e pera katoa koia to tatou Atua e te Metua kia akangateiteiia. (Sala. 25:14) No reira, e akangateitei ua rai tatou iaia e auraka e akangaropoina i tona turanga kakā. Ka tauturu teia ia tatou kia kopae i te akamareka kore iaia. Ka inangaro tatou i te aaere ma te “akamako tikai” i te Atua.—Mika 6:8.
TO IEHOVA TU PAPAKITAI KORE I TE METEPARA
10-11. Akapeea a Iehova i te akono anga i te ngati Iseraela ia ratou i te metepara, e akapeea teia te akaari anga i tona tu papakitai kore?
10 Ka akono a Iehova i tana au manuiri ma te papakitai kore. (Roma 2:11) Ka kite tatou i teia tu mei tana akono anga i te ngati Iseraela i te metepara i Sinai.
11 I muri mai te akaora anga a Iehova i tona iti tangata mei Aiphiti, kua iki aia i te au kau taunga kia tavini i ko i te tapenakara. Kua iki katoa aia i te ngati Levi kia rave i te au angaanga ke no te puakapa tapu. E tuke ainei ta Iehova akono anga i teia aronga e te aronga vaitata ki te puakapa, i tetai atu au kopu o Iseraela? Kare! Kare a Iehova e papakitai ana.
12. Akapeea ta Iehova akono anga i te ngati Iseraela te akaari anga mai e kare aia i papakitai ana? (Exodo 40:38) (Akara katoa i te tutu.)
12 Kua rauka i te katoatoa i Iseraela i te piri vaitata kia Iehova, noatu eaa ta ratou angaanga e te ngai e noo ra ratou. Ei akaraanga, kua akapapu a Iehova e kia kite te katoatoa i te pou tumurangi e te pou a’i ki runga i te tapenakara. (E tatau ia Exodo 40:38.) Me neke te tumurangi ki te ngai ou, ka kite atu te aronga tei noo mamao mei te tapenakara i te reira e ka akaputu i ta ratou apinga, ka tatara i to ratou puakapa e ka aru atu i te katoatoa. (Nume. 9:15-23) Pera katoa, ka rongo ratou i te tangi anga o te nga pu ario e ka akamata i te neke. (Nume. 10:2) Noatu e te noo vaitata ra tetai pae i te tapenakara, kare te aiteanga e e pirianga vaitata atu to ratou kia Iehova i to te aronga tei noo mamao mei te tapenakara. No reira, ka rauka i te katoatoa kia riro ei manuiri i roto i to Iehova puakapa. Ka paruruia e ka aratakiia ratou e Iehova. Pera katoa i teia tuatau, noatu e teiea te ngai e noo ra tatou, ka puapingaia tatou mei ta Iehova akono anga, paruru anga e tona akaperepere ia tatou.
Akaari mai ta Iehova akanoonooanga no te tapenakara e kare aia e papakitai ana (Akara i te parakarapa 12)
TO IEHOVA TU PAPAKITAI KORE I TEIA TUATAU
13. Akapeea tatou i kite ei kare a Iehova e papakitai ana i teia tuatau?
13 Tetai pae o te iti tangata o Iehova i teia tuatau, te noo vaitata ra ratou ki te opati maata me kore tetai opati Betela o te Au Kite o Iehova. E tavini ana tetai pae i reira. No te reira, ka rauka ia ratou i te rave i te au angaanga i teia au ngai e te piri atu ki te au taeake e rave ra i te aratakianga. Te tavini ra tetai pae ei au akaaere tutaka me kore te rave ra i tetai atu angaanga tavini tamou takake. Noatu e kare ko teia toou turanga, ka rauka ia koe i te irinaki e e manuiri rai koe na Iehova e te akaperepere maira aia ia koe. Akaperepere a Iehova i tana au manuiri katoatoa e te akono ra aia ia ratou. (1 Pete. 5:7) Ka oronga mai a Iehova i te au kai pae vaerua ki tona au tavini tataki tai, e nana e arataki e te paruru ia ratou.
14. Eaa atu tetai akaraanga no te tu papakitai kore o Iehova?
14 Ko tetai atu akaraanga no te tu papakitai kore o Iehova, koia oki kua oronga mai aia i te Pipiria ki te au tangata ravarai i teia tuatau. Kua tataia te au kopi mua o te Tuatua Tapu i te reo Epera, Arama e te Ereni. Ko te aronga tei kite i teia au reo, e pirianga vaitata ainei to ratou kia Iehova i to te aronga kare i kite i te reo? Kare.—Mata. 11:25.
15. Eaa te akapapuanga no to Iehova tu papakitai kore? (Akara katoa i te tutu.)
15 Kare a Iehova i pati mai ia tatou kia riro ei oa nona no to tatou kite pakari e to tatou kite i te au reo mua o te Pipiria. Mari ra, ka oronga mai a Iehova i tona pakari ki te au tangata ravarai. Kua uriia tana Tuatua te Pipiria ki roto i te tauatini ua atu reo; no reira, ka puapingaia te au tangata ravarai mei tana apiianga e ka kite ratou akapeea me riro mai ei oa nona.—2 Timo. 3:16, 17.
Ka rauka i te katoatoa te Pipiria, te akapapu maira kare a Iehova e papakitai ana (Akara i te parakarapa 15)
KIA AKAMAREKA UA RAI IA IEHOVA
16. Ia Angaanga 10:34, 35, akapeea tatou me akamareka ia Iehova?
16 E tikaanga ngateitei to tatou kia ārikiia e Iehova ei manuiri i roto i tona puakapa. E Tiaki meitaki aia e te aroa ua. Ka akaari aia i te tu papakitai kore e ka āriki ua mai ia tatou noatu to tatou ngai e noo ra, to tatou turanga, te kite, te kopu tangata e to tatou mataiti. Inara, ka āriki ua mai a Iehova i te aronga tei akarongo kiaia.—E tatau ia Angaanga 10:34, 35.
17. Ka kitea te tauturu kiea no te riro anga mai ei manuiri i to Iehova puakapa?
17 Ia Salamo 15:1, kua ui a Davida: “Koai, e Iehova, te ka tuitarere i toou ra puakapa? koai te ka noo i to maunga tapu ra?” Kua oronga mai te tata salamo i te pauanga ki teia nga uianga. I te atikara ka aru mai, ka uriuri tatou i te au mea tei anoanoia kia akamareka tatou ia Iehova.
IMENE 32 Piri Kia Iehova!
