Au Uianga a te Aronga Tatau
Ko te irava ia Salamo 12:7 “naau, e Iehova, e tapapa ia ratou,” te akataka ra ainei teia i “te aronga ao” (irava 5) me kore i “te tuatua a Iehova” (irava 6)?
Te akaari maira te aerenga tuatua o tera irava e te akataka ra te reira no runga i te tangata.
Ia Salamo 12:1-4, te karanga ra e ko “te aronga tuatua-mou ra, kua kore akenei i o te tamariki a te tangata nei.” E oti ia Salamo 12:5-7, te na ko ra.
“No te takinga-kino i te aronga ao ra,
no te kaku anga o te aronga akaaka,
e tu ei au nei, te tuatua mairā Iehova.
ka tuku au ia ratou ki te ngai e ora, i te aronga e akaviivii mai ia ratou.
E tuatua iro koreia te tuatua a Iehova;
mei te ario i tamāia i roto i te āriki one ra, i tataki ituia te tamā anga.
Naau, e Iehova, e tapapa ia ratou;
e tiaki ia ratou i taua uki nei e tuatau ua atu.”
Te akakite maira te irava 5 i ta te Atua ka rave no “te aronga ao.” Ka akaora aia ia ratou.
Karanga te irava 6 e “e tuatua iro koreia te tuatua a Iehova; mei te ario i tamāia.” Kua āriki tikai tatou i teia au tuatua.—Sala. 18:30; 119:140.
Akamanako i te irava tei aru mai. Karanga a Salamo 12:7: “Naau, e Iehova, e tapapa ia ratou, e tiaki ia ratou i taua uki nei e tuatau ua atu.” Koai ma “ratou”?
Te akataka ra te irava 6 i “te tuatua a Iehova,” penei ka manako tetai pae e te karanga ra te irava 7 e ka tapapa “ratou” me kore ka paruru te Atua i tana tuatua. Kite tatou e kua paruru te Atua i te Pipiria, noatu ta te aronga patoi tautaanga i te arai e te takore i te reira.—Isa. 40:8; 1 Pete. 1:25.
Inara, kua aiteite te aerenga tuatua i roto i te irava 5. Ka tauturu ua rai a Iehova i “te aronga ao” e “te aronga akaaka,” e ka akaora aia ia ratou.—Iobu 36:15; Sala. 6:4; 31:1, 2; 54:7; 145:20.
No reira, koai ma “ratou” i roto i te irava 7?
Me tatau meitaki tatou i teia salamo, taka meitaki ua e ko te tangata.
Akakite a Salamo 12:1 no “te aronga tuatua-mou” tei akavareia e te aronga kino. Aru mai, ka kite tatou e ka akautunga a Iehova i te aronga tei tuatua i te au mea kino. Te akapapu maira teia salamo e ka akaora te Atua ia tatou no te mea e tuatua iro kore tana.
No reira, te karanga ra te irava 7 e ka paruru e ka tiaki a Iehova ia “ratou,” koia oki te aronga tei takinoia e te aronga kino.
Kua taangaangaia te tuatua “ratou” i roto i te au kopi o te au Tuatua Tapu Epera. Pera katoa te tuatua “tatou” e rua taime i te irava 7 o te Septuagint Ereni ei akataka i te aronga tuatua mou tei takinoia. Te mea openga, karanga te irava 7 e ka paruruia “ratou” koia oki te aronga tuatua mou mei “taua uki” aronga kino. (Sala. 12:7, 8) I roto i tetai urianga o te Tuatua Tapu Epera reo Arama, kua taangaanga te tuanga mua o teia irava 7 i te tuatua “ratou” e te karanga ra: “Naau, e te ATU, e paruru i te aronga tuatua-tika, ka tiaki koe ia ratou i taua uki kino nei e tuatau ua atu.” Te akapapu maira teia au akaraanga e kare a Salamo 12:7 e taiku ra i te tuatua a te Atua.
No teia tumu, ka akamaroiroi teia irava i te “aronga tuatua-mou” e ka akaora te Atua ia ratou.
