1. Eaa tatou ka anoanoia ai kia akapapa i teianei no te takinokino anga?

I TE po i mua ake ka tamateia ai to tatou Atu ko Iesu, karanga aia e ka makitakitaia tetai ua atu tei riro mai ei pipi nana. (Ioa. 17:14) E tae mai ei ki teia tuatau, te takinokinoia nei rai te Au Kite Kerititiano o Iehova, e te aronga patoi i te akamorianga mou. (2 Timo. 3:12) I te openga o teia akatereanga e vaitata maira, ka tapapa atu tatou i to tatou au enemi tei patoi pakari ia tatou.—Mata. 24:9.

2-3. (a) Eaa ta tatou ka anoanoia kia kite no runga i te mataku? (e) Eaa ta tatou ka uriuri i roto i teia atikara?

² Akapeea tatou me akapapa ia tatou i teianei, no te takinokino anga ka tupu mai? Kare tatou e anoanoia kia akamanako atu i te au mea ka tupu kia tatou. Me pera tatou, ka tupu te mataku e te taitaia. Ka akamanako atu tatou i te au mea te ka tamataku ia tatou, i mua ake ka tupu ei te manamanata. (Mase. 12:25; 17:22) Ka tauta to tatou “enemi ko te diabolo,” kia tamataku ia tatou. (1 Pete. 5:8, 9) Eaa ta tatou ka rave i teianei ei akamaroiroi ia tatou?

³ I roto i teia atikara, ka uriuri tatou akapeea me akaketaketa i to tatou pirianga kia Iehova, e e puapinga kia rave tatou i te reira i teianei. Ka uriuri katoa tatou akapeea e rauka ai te tu ngakau toa. Pera katoa, ka akara matatio tatou, akapeea me akakoromaki i te tu makitakita o te aronga patoi.

4. Ia Ebera 13:5, 6, eaa ta tatou i papu, e eaa te tumu?

⁴ Papu e te akaperepere ra a Iehova ia koe e kare rava aia e akaruke ia koe. (E tatau ia Ebera 13:5, 6.) No tetai tuatau roa  i topa akenei, kua akakite Te Punanga Tiaki e: “Ko te tangata tei kite meitaki i te Atua, ka irinaki aia iaia me tupu te takinokino anga.” E tika rai! Kia akakoromaki i te takinokino anga, kia inangaro e kia irinaki tikai tatou ia Iehova, auraka rava e ekoko i tona aroa no tatou.—Mata. 22:36-38; Iako. 5:11.

5. Eaa te ka tauturu ia koe kia kite i te aroa o Iehova?

⁵ E tatau i te Pipiria i te au rā ravarai kia piri vaitata atu kia Iehova. (Iako. 4:8) Ia koe e tatau ra, e akamou ki runga i to Iehova au tu maru. Akara i tona tu aroa i roto i tana e tuatua ra e e rave ra. (Exo. 34:6) Penei ka ngata no tetai aronga, kia irinaki e te akaperepere maira te Atua ia ratou, no te mea kare ratou i kite ana i te reira tu aroa. Me te manako akapera ra koe, e tata i tetai akapapa anga no runga i to Iehova au tu akaaroa e te takinga meitaki noou. (Sala. 78:38, 39; Roma 8:32) Ia koe e akamanako ra i tei tupu kia koe, e te akamanako oonu i taau e tatau ra i roto i te Tuatua a te Atua, papu e ka rauka ia koe i te akamanako i te au mea ta Iehova i rave noou. Ko te maata atu i taau ka āriki i ta Iehova e rave ra, ka ketaketa atu toou pirianga kiaia.—Sala. 116:1, 2.

6. Ia Salamo 94:17-19, akapeea te pure ngakau tae me tauturu ia koe?

⁶ E pure putuputu. Akamanako ana i tetai tamaiti e takaveia ra e tona papa. Reka ua te tamaiti i te tuatua ki tona papa, no runga i te au mea meitaki e te au mea kino, tei tupu kiaia i te reira rā. Ka reka katoa koe i teia tu pirianga me akavaitata koe kia Iehova, ma te pure akatenga i te au rā ravarai. (E tatau ia Salamo 94:17-19.) Ia koe e pure ra kia Iehova, e “riringi a vai ua i to ngakau” e e akakite ki toou Metua aroa i toou mataku e te apiapi. (Te Aue 2:19) Eaa te ka tupu? Ka kite koe i ta te Pipiria e karanga ra ko “te au o te Atua, ko tei maata ua atu i te kite tangata.” (Phili. 4:6, 7) Ko te maata atu i taau pure, ka vaitata atu toou pirianga kia Iehova.—Roma 8:38, 39.

7. No teaa koe ka papu ei i te au taputou a te Atua no runga i tona Patireia?

⁷ Papu ia koe e ka tupu te au akameitakianga o te Patireia o te Atua. (Nume. 23:19) Me te apikepike ra toou akarongo i teia au taputou, ka māmā i reira ia Satani e tona pupu kia tamataku ia koe. (Mase. 24:10; Ebe. 2:15) Akapeea koe me akamatutu i toou irinaki i te Patireia o te Atua i teianei? E apii meitaki no runga i te au taputou a te Atua, no runga i tona Patireia e te tumu ka irinaki ei koe e e tika te reira. Akapeea te reira e riro ei ei tauturu? Akamanako ana i te akaraanga o Stanley Jones, tei roto aia i te are auri no tetai itu mataiti no tona akarongo. * Eaa tei tauturu iaia kia akakoromaki ma te tiratiratu? Karanga aia: “No toku kite papu i te Patireia o te Atua, kua akamaroiroiia au, kare e ekoko  anga, kare rava au e akaruke ia Iehova.” Me e akarongo ketaketa toou ki roto i te au taputou a te Atua, ka piri vaitata atu koe kia Iehova e kare rava koe e mataku.—Mase. 3:25, 26.

8. Eaa ta to tatou tu no te au uipaanga e akaari maira? Akamārama mai.

⁸ E aere putuputu ki te au uipaanga Kerititiano. Ka tauturu te au uipaanga ia tatou kia piri vaitata atu kia Iehova. Na to tatou inangaro i te aere ki te au uipaanga e akaari mai e, ka autu ua atu tatou i te au takinokino anga a te tuatau ki mua. (Ebe. 10:24, 25) Akapeea ra? Me tuku tatou i te au manamanata rikiriki, kia arai ia tatou kia kore e aere ki te au uipaanga i teianei, eaa te ka tupu a te tuatau ki mua me anoanoia tatou kia aravei kapiti ki te au taeake? I tetai tua, me akapapu tatou kia tae ki te au uipaanga, kare tatou e tuku i te au, me tauta te aronga patoi i te tāpū ia tatou. Ko te taime teia no te akatupu i te inangaro no ta tatou uipaanga. Me anoano tatou i te aere ki te uipaanga, kare e okotai patoi anga, kare e arai anga a te kavamani, e tāpū ia tatou mei te akarongo anga ki te Atua.—Anga. 5:29.

9. No teaa te au irava tei tamou ngakauia, i riro ei ei ravenga meitaki kia akapapa no te takinokino anga?

⁹ E tamou ngakau i taau au irava akaperepere. (Mata. 13:52) Penei kare e maara ia koe, inara ka taangaanga a Iehova i tona vaerua tapu ririnui, kia rauka ia koe i te akamaara i teia au irava. (Ioa. 14:26) Akamanako ana i ta tetai taeake i roto i te are auri i te tua Itinga o Tiamani i karanga: “Mei teaa atura te akameitakianga i toku tamou ngakau anga e anere ua atu irava! Kua rauka iaku i te akamanako oonu i te au manako Pipiria tukeke i te au rā ko au anake ua.” Kua tauturu teia au irava i to tatou taeake kia piri vaitata kia Iehova—e kia akakoromaki ma te tiratiratu.

10. Eaa tatou ka tamou ngakau ei i te au imene?

¹⁰ E tamou ngakau i te au imene tei akapaapaa ia Iehova. Ia raua i roto i te are auri i Philipi, kua imenemene a Paulo raua ko Sila i te au imene ta raua i tamou ngakau. (Anga. 16:25) Pera katoa, te tukuia anga te au taeake i te Soviet Union ki Siberia, akapeea ratou te akamaroiroi anga ia ratou uaorai? Maara i te tuaine ko Mariya Fedun: “Kua imene ua matou i te au imene ta matou i kite, te au imene no roto mai i te puka imene.” Kua akamaroiroi tikai teia au imene ia matou e kia piri vaitata kia Iehova, i karanga ai aia. Te akamaroiroiia ra ainei koe me imene i taau au imene akaperepere i te pae vaerua? E tamou  ngakau i te reira imene i teianei!—Akara i te pia “ O Mai Noku te Ngakau Toa.”

11-12. (a) Ia 1 Samuela 17:37, 45-47, eaa a Davida i ngakau toa ai? (e) Eaa te apiianga puapinga ta tatou ka apii mai mei te akaraanga o Davida?

¹¹ Ka anoanoia te tu ngakau toa me aro atu tatou i te takinokino anga. Eaa taau ka rave me kua ngere koe i teia tu? E akamaara, noatu toou maatamaata, toou maroiroi, e toou tu karape, ka anoanoia rai te tu ngakau toa. Akamanako ana i te akaraanga o Davida i tona aro atu anga ia Golia. Me akaaiteia ki te reira tuputupua, e meangiti ake, e e paruka ua a Davida, e kare aia i papa no te tamaki. E kare katoa a Davida koke. Inara e tu ngakau toa tikai tona. Kua oro ngakau toa a Davida i te tā i te tuputupua akatietie.

¹² Akapeea a Davida i ngakau toa ai? Kua irinaki papu aia e tei iaia a Iehova. (E tatau ia 1 Samuela 17:37, 45-47.) Kare a Davida i akara ana e e ketaketa atu a Golia iaia. Mari ra, kua akaaite aia e e meangiti a Golia kia Iehova. Eaa ta tatou ka apii mai mei teia akaraanga? Ka ngakau toa tatou me papu e tei ia tatou a Iehova e e aronga rikiriki ua to tatou aronga patoi, me akaaiteia ki te Atua Mana Katoatoa. (2 Para. 20:15; Sala. 16:8) Akapeea tatou me akamatutu i to tatou tu ngakau toa i teianei i mua ake ka tupu ei te takinokino anga?

13. Akapeea tatou me akamatutu i to tatou tu ngakau toa? Akamārama mai.

¹³ Ka akamatutu tatou i to tatou tu ngakau toa i teianei, na te tutu aere anga i te nuti meitaki o te Patireia o te Atua. Eaa te tumu? No te mea, ka riro te tutu aere ei apii ia tatou kia irinaki ia Iehova, e auraka e mataku i te tangata. (Mase. 29:25) Mei te au uaua tei akamatutuia, me akaetaeta tatou i to tatou kopapa, ka ngakau toa tatou me tutu aere mei tera are ki tera are, i te ngai tangata, ki tetai ua atu, e te ngai pitiniti. Me akatupu tatou i te tu ngakau toa no te tutu aere i teianei, ka papa meitaki atu tatou i te tutu aere, noatu me araiia ta tatou angaanga.—1 Tesa. 2:1, 2.

14-15. Eaa te au apiianga ta tatou ka apii mai mei ia Nancy Yuen e Valentina Garnovskaya?

¹⁴ E maata ta tatou ka apii mai mei te akaraanga tiratiratu o nga tuaine tei akaari i te tu ngakau toa. E vaine poto ua a Nancy Yuen, e rima tapuae te roroa (1.5 mita), kare ra aia i  mataku ana. * Kare rava aia i akamutu ana i te tutu aere i te nuti meitaki o te Patireia o te Atua. Tei tupu mai, kua tukuia aia ki roto i te are auri e 20 mataiti, i Tinito. Karanga te aronga opita tei kimikimi i tona akakoroanga e koia tetai “vaine mārokiakia rava atu” i to ratou enua!

¹⁵ Pera katoa, kua tukuia a Valentina Garnovskaya ki roto i te are auri i te Soviet Union e toru taime no tetai 21 mataiti. * Eaa ra? Kua aruaru aia i te tutu aere e kua kapiki te aronga opita iaia e ko “tetai vaine kino rava atu.” Akapeea teia nga vaine tiratiratu i ngakau toa ai? Kua papu ia raua, e tei ia raua a Iehova.

16. Eaa te ravenga e rauka ai te tu ngakau toa?

¹⁶ Mei ta tatou i uriuri, ei akamatutu i te tu ngakau toa, auraka tatou e akamou ua ki runga i to tatou uaorai maroiroi e te tu karape. Mari ra, kia irinaki tatou e tei ia tatou a Iehova e te tamaki nei aia no tatou. (Deu. 1:29, 30; Zeka. 4:6) Ko te reira te ravenga e rauka ai te ngakau toa.

17-18. Ia Ioane 15:18-21, eaa te akamatakiteanga ta Iesu i oronga mai? Akamārama mai.

¹⁷ E reka ana tatou me akangateitei mai te tangata ia tatou, inara auraka e manako e e aronga puapinga kore tatou me kare te tangata e reka mai ia tatou. Karanga a Iesu: “E ao to kotou, kia makitakita mai te tangata ia kotou, e kia akataka ke mai ratou ia kotou, kia akakino mai, e kia akaruke akakinoia to kotou ingoa, no te Tamaiti a te tangata nei.” (Luka 6:22) Eaa te aiteanga o ta Iesu tuatua?

¹⁸ Kare a Iesu e karanga ra, e ka reka te au Kerititiano me makitakitaia mai ratou. Mari ra, te akamatakite maira aia ia tatou. Kare tatou no teianei ao. Te aru nei tatou i te au apiianga a Iesu, e te tutu aere nei tatou i tana karere. Tei tupu mai, kua makitakitaia tatou e teianei ao. (E tatau ia Ioane 15:18-21.) Ka inangaro tatou i te akamareka ia Iehova.  Me makitakita mai te tangata ia tatou, no tei akaperepere tatou i to tatou Metua, no ratou ïa manata.

19. Akapeea tatou me aru i te akaraanga o te au apotetoro?

¹⁹ Auraka rava e tuku i ta te au tangata ka tuatua e ka rave i te taakama ia koe, no te mea e Kite koe no Iehova. (Mika 4:5) Ka apii tatou akapeea me akakoromaki i te mataku i te tangata, na te uriuri anga i te akaraanga o te au apotetoro i Ierusalema, i muri ua ake i to Iesu matenga. Kua kite ratou e kua makitakitaia ratou e te au arataki akonoanga o te ngati Iuda. (Anga. 5:17, 18, 27, 28) I te au rā ravarai kua aere ratou ki te iero ma te akakite ia ratou uaorai ei pipi na Iesu. (Anga. 5:42) Kare ratou i mataku ana. Kare katoa tatou e mataku i te tangata, me akakite kia ratou e e Au Kite tatou no Iehova—i te ngai angaanga, i te apii, e ki te aronga i te pae mai.—Anga. 4:29; Roma 1:16.

20. Eaa te au apotetoro i mataora ai, noatu e kua makitakitaia ratou?

²⁰ Eaa te tumu i mataora ai te au apotetoro? Kua kite ratou i te tumu i makitakitaia ai ratou, e e turanga ngateitei te reira me takinokinoia ratou no te rave i to Iehova anoano. (Luka 6:23; Anga. 5:41) Tata te apotetoro ko Petero i muri mai e: “E kia mate rai kotou i te tuatua-tika ra, e ao rai to kotou.” (1 Pete. 2:19-21; 3:14) Me mārama tatou i te tumu i makitakitaia ai tatou no te rave i te tika, kare rava tatou e akatika i te tu makitakita o te tangata kia tamataku ia tatou.

21-22. (a) Eaa taau i akapapa no te rave, me tupu ake te takinokino anga? (e) Eaa te ka uriuriia i te atikara ka aru mai?

²¹ Kare tatou e kite aea te takinokino anga maata e tupu ei, e aea tetai arai anga i ta tatou akamorianga kia Iehova e tupu ei. Inara, kua kite tatou e ka rauka ia tatou i te akapapa i teianei, na te akaketaketa anga i to tatou pirianga kia Iehova, na te akamatutu anga i to tatou tu ngakau toa, e kia akakoromaki i te tu makitakita o te tangata. Ka riro ta tatou akateateamamao anga i teianei, kia ngakau toa tatou a te tuatau ki mua.

²² Inara akapeea me ka araiia ta tatou akamorianga? I te atikara ka aru mai, ka uriuri tatou i te au kaveinga te ka tauturu ia tatou i te tavini ua atu ia Iehova noatu te arai anga.