1. Eaa te aiteanga o “te tuatua mou”?

“AKAPEEA i kitea ai e koe te tuatua mou?” Utuutuia ainei koe ki roto i te tuatua mou?” “Eaa toou roa ki roto i te tuatua mou?” Penei kua ui mai tetai i teia au uianga kia koe e penei kua ui koe i te reira ki tetai ke. Eaa te aiteanga o te tuatua “te tuatua-mou”? Tei matauia, ko te irinakianga, te akamorianga, e to tatou oraanga. Kua kite te aronga i roto i “te tuatua-mou” eaa ta te Pipiria e apii ra, e ka aru ratou i te au kaveinga. Kua matara ratou mei te au pikikaa akonoanga e te rekareka ra i te oraanga meitaki ei aronga apa ua.—Ioa. 8:32.

2. Ia Ioane 13:34, 35, eaa tei akakeu i tetai tangata kia inangaro i te tuatua mou?

² Eaa tei akakeu ia koe kia inangaro i te tuatua mou? Penei no te tu meitaki o te iti tangata o Iehova. (1 Pete. 2: 12) Penei no to ratou tu aroa. Maara i tetai pae te aroa tei akaariia i te uipaanga mua, e kare i maara roa ana i te ako tei orongaia. Karanga a Iesu ko te tu aroa teia e kite ei te tangata i tana au pipi. (E tatau ia Ioane 13:34, 35.) Inara e maata atu te ka anoanoia kia rauka te akarongo ketaketa.

3. Eaa te ka tupu me akatumuia te akarongo i te Atua ki runga i te aroa Kerititiano tei akaariia e te au taeake e te au tuaine?

³ Kare te aroa Kerititiano no te iti tangata o te Atua e rava ua kia rauka te akarongo. Eaa ra? Akapeea me rave tetai taeake i te ara kino—penei e tangata pakari me kore e painia. Akapeea me akakino mai tetai taeake me kore tuaine ia koe? Akapeea me akaruke tetai i te akarongo, e kare teia i te tuatua mou? Me tupu teia, ka akaturoriia ainei koe e ka akamutu i te tavini ia Iehova? Te apiianga:  Me akatumu koe i toou akarongo i te Atua ki runga i te tu o te tangata, kare ki runga i toou pirianga kia Iehova, kare toou akarongo e ketaketa. I roto i toou are o te akarongo, eiaa e taangaanga ua i te au apinga paruparu mei te au manako ngakau aroa mari ra e taangaanga katoa i te au tika e te au mea papu. E akapapu koe kia koe uaorai e tei roto i te Pipiria te tuatua mou no runga ia Iehova.—Roma 12:2.

4. Ia Mataio 13:3-6, 20, 21, eaa te ka tupu ki tetai pae me timataia to ratou akarongo?

⁴ Karanga a Iesu e ka āriki tetai pae i te tuatua mou “ma te rekareka,” inara ka paruparu to ratou akarongo i raro ake i te timata anga. (E tatau ia Mataio 13:3-6, 20, 21.) Kare ratou i kite ana e me aru ratou ia Iesu ka tupu rai te manamanata. (Mata. 16:24) Penei kua manako ratou kare e manamanata e tupu ki tetai Kerititiano—ka tupu ua te akameitakianga. I teianei ao ma te tu apa ua, ka tupu rai te manamanata. Ka taui te turanga, e ka akakore i to tatou rekareka.—Sala. 6:6; Kohe. 9:11.

5. Akapeea to tatou au taeake e te au tuaine te akapapu anga e kua rauka ia ratou te tuatua mou?

⁵ Ka akapapu te au taeake e te au tuaine e kua rauka ia ratou te tuatua mou. Akapeea? Kare to ratou akarongo e akaparuparu noatu me kua akakino tetai taeake ia ratou e me kua ō ratou ki roto i te manamanata kare i tau ki tetai Kerititiano. (Sala. 119:165) Me tupu te timata anga, ka matutu atu to ratou akarongo, kare e akaparuparu. (Iako. 1:2-4) Akapeea koe me akamatutu i toou akarongo?

6. Eaa tei akamatutu i te akarongo o te au pipi o te anere mataiti mua?

⁶ Matutu te akarongo o te au pipi o te anere mataiti mua no tei apii ratou i te au Tuatua Tapu e te apiianga a Iesu Karaiti, koia oki, “te tuatua-mou o te evangelia.” (Gala. 2:5) Ko te tuatua mou tikai teia o te au apiianga Kerititiano, kapiti mai to Iesu atinga oko e tona tuakaouanga. Papu i te apotetoro ko Paulo e e tika teia au apiianga. Eaa ra? No te mea kua taangaanga aia i te au Tuatua Tapu ei akapapu “i taua tuatua ra, e te akakite pu anga atu e, e mate rai te Mesia, e e tu akaou mei te mate maira.” (Anga. 17:2, 3) Āriki te au pipi o te anere mataiti mua i taua apiianga e kua irinaki i te vaerua tapu kia tauturu ia ratou kia mārama i te Tuatua a te Atua. Akapapu ratou kia ratou uaorai e kua akatumuia teia apiianga ki runga i te au Tuatua Tapu. (Anga. 17:11, 12; Ebe. 5:14) Kare ratou i akamatutu ana i to ratou akarongo ki runga i te au manako ngakau aroa anake, e kare ratou i tavini ua ia Iehova no te mea kua mataora ratou i te piri atu ki te au taeake irinaki. Mari ra, kua akamatutu ratou i to ratou akarongo ki runga i te “kite i te Atua.”—Kolo. 1:9, 10.

7. Eaa ta te akarongo i te tuatua mou Pipiria ka rave no tatou?

⁷ Ka vai papu rai te au tuatua mou o te Tuatua a te Atua. (Sala. 119:160) Ei akaraanga, kare te reira e taui me akariri mai tetai taeake ia tatou e me rave aia i tetai ara kino. E kare katoa e taui me o tatou ki roto i te manamanata. No reira ka anoanoia tatou kia apii meitaki i te au apiianga Pipiria ma te akapapu e e tuatua mou teia. Na te akarongo matutu tei akatumuia ki runga i te au tuatua mou Pipiria e akatutau ia tatou i te tuatau timata anga, mei te tutau tei akatutau i te pai i te tuatau uriia. Akapeea koe me  akamatutu i toou akarongo e tei ia koe te tuatua mou?

8. Ia 2 Timoteo 3:14, 15, akapeea i papu ei ia Timoteo e tei iaia te tuatua mou?

⁸ Papu ia Timoteo e tei iaia te tuatua mou. Akapeea aia i papu ei? (E tatau ia 2 Timoteo 3:14, 15.) Apii tona mama e tona mama ruau iaia i te apiianga o “te tuatua tapu i tataia ra.” Kare ekoko e kua akapou katoa aia i te taime e te maroiroi no te apii i teia au tuatua tapu. Tei tupu mai, kua irinaki aia “i tei tukuia atu ra” e e tuatua mou te reira. I muri mai, kua apii a Timoteo, tona mama, e tona mama ruau i te apiianga Kerititiano. Kare e ekoko kua umere a Timoteo i te aroa o te au pipi a Iesu, e kua inangaro i te taokotai atu ki te au taeake e te au tuaine pae vaerua. (Phili. 2:19, 20) Inara kare tona akarongo i akatumuia ki runga i tona au manako ngakau no te au taeake, mari ra ki runga i te au tuatua mou tei akavaitata iaia kia Iehova. E akamanako meitaki katoa koe i taau i apii no runga ia Iehova na te tatau anga i te Pipiria.

9. Eaa te tuatua mou e toru taau ka akapapu kia koe uaorai?

⁹ Ei akamataanga, ka anoanoia koe kia akapapu kia koe uaorai e toru tuatua mou. Mea mua, e akapapu kia koe uaorai e na te Atua ko Iehova i Anga i te au mea ravarai. (Exo. 3:14, 15; Ebe. 3:4; Apo. 4:11) Te rua, e akapapu kia koe uaorai e ko te Pipiria ta te Atua evangelia akauruia ki te tangata. (2 Timo. 3:16, 17) Te toru, e akapapu kia koe uaorai e e iti tangata akaaereia to Iehova te akamori nei iaia i raro ake i te arataki anga a Karaiti, ko te Au Kite o Iehova. (Isa. 43:10-12; Ioa. 14:6; Anga. 15:14) Kare te aiteanga e me akapapu koe i teia au tuatua mou kia koe uaorai e kua kite koe i te au mea ravarai i roto i te Pipiria. E taangaanga i toou manako “e tau ïa” ei akamatutu i toou akarongo e tei ia koe te tuatua mou.—Roma 12:1.

10. Me kite tatou i te tuatua mou, eaa ta tatou ka anoanoia kia rave?

¹⁰ Me akatumu koe i te tuatua mou e toru no runga i te Atua, te Pipiria, e te iti tangata o te Atua, ka anoanoia koe kia taangaanga i te au Tuatua Tapu no te akapapu i teia au tuatua mou ki tetai ke. Eaa ra? No te mea e apainga ta te au Kerititiano no te apii i te au tuatua mou ki te aronga te ka akarongo mai. * (1 Timo. 4:16) Me tauta tatou i te apii i te tuatua mou Pipiria ki tetai ke, ka akamatutu tatou i to tatou akarongo no teia au tuatua mou.

11. Eaa te akaraanga ta te apotetoro ko Paulo i akanoo ei puapii?

¹¹ Te apii anga te apotetoro ko Paulo i te tangata, “ako atura [aia] ia ratou i te au tuatua no Iesu i roto i te ture a Mose, e te au peroveta ra.” (Anga. 28:23) Akapeea tatou me aru ia Paulo me apii i te tuatua mou ki tetai ke. E maata atu ta tatou ka rave i te akakite ua i ta te Pipiria e apii ra. Ka tauturu tatou i te aronga apii Pipiria kia akamanako meitaki i ta te Tuatua Tapu e akakite ra, ia ratou e akavaitata ra kia Iehova. Ka inangaro tatou kia āriki ratou i te tuatua mou, kare e te reka ua maira ratou ia tatou, mari ra kua akapapu ratou kia ratou uaorai e ko te tuatua mou teia no runga i to tatou Atua aroa.

12-13. Akapeea te au metua me tauturu i ta ratou tamariki kia noo ki roto i te tuatua mou?

¹² E te au metua, kare e ekoko ka inangaro koe i taau tamariki kia noo ki roto i te tuatua mou. Penei ka manako koe e me rauka te au oa memeitaki i roto i te putuputuanga, ka tere ratou ki mua i te pae vaerua. Inara, e rauka ai te tuatua mou, e maata atu te ka anoanoia i te au oa memeitaki. Ka anoanoia tetai pirianga vaitata ki te Atua e kia papu e tuatua mou ta te Pipiria.

¹³ Me ka apii te au metua i te tuatua mou no te Atua ki ta ratou tamariki, e akanoo ratou i te akaraanga meitaki ei aronga apii i te Pipiria. E akamanako oonu i ta ratou e apii ra. Ka rauka i reira ia ratou i te apii i ta ratou tamariki kia pera katoa. E apii i ta ratou tamariki kia taangaanga i te au puka apii Pipiria, mei tei apiiia ki ta ratou aronga apii Pipiria. Me pera ratou, ka tauturu ratou i te tamariki kia āriki ia Iehova e te pupu tei oronga mai i te kai pae vaerua—ko “te tavini akono meitaki e te pakari.” (Mata. 24:45-47) E te au metua, eiaa e apii ua i ta kotou tamariki i te au apiianga māmā ua o te Pipiria. E tauturu i te akamatutu i to ratou akarongo na te  apiianga i “te au mea oonu rai o te Atua ra” kia tau ki to ratou mataiti e te pakari.—1 Kori. 2:10.

14. Eaa tatou ka apii ei i te totou Pipiria? (Akara katoa i te pia “ Ka Rauka Ainei ia Koe te Akamārama i Teia au Totou?”)

¹⁴ Ko te totou Pipiria tetai tuanga puapinga o te Tuatua a te Atua te ka tauturu ia tatou kia akamatutu i te akarongo ki roto ia Iehova. Eaa te au totou te ka akamatutu i toou akarongo? Penei ka taiku koe i te au totou no te “tuatau openga.” (2 Timo. 3:1-5; Mata. 24:3, 7) Eaa atu te au totou tei akatupuia te ka akamatutu i toou akarongo? Ei akaraanga, ka rauka ainei ia koe i te akamārama i te au totou ia Daniela pene 2 e Daniela pene 11 tei akatupuia e te akatupuia nei rai? * Me rauka te akarongo tei akatumuia ki runga i te Pipiria, ka matutu atu toou akarongo. Akamanako i te akaraanga o te au taeake tei takinokinoia i Tiamani i te tuatau o te Tamaki II o te Ao. Noatu kare ratou i mārama meitaki i te au totou Pipiria no te tuatau openga, kua rauka te akarongo matutu no te Tuatua a te Atua.

15-17. Akapeea te apiianga i te Pipiria te akamatutu anga i te au taeake tei takinokinoia e te tutara anga Nazi?

¹⁵ I raro ake i te tutara a Tiamani Nazi, tauatini ua atu au taeake e te au tuaine tei tukuia ki roto i te puakapa tamamae anga. Makitakita a Hitler e te SS Chief Heinrich Himmler i te Au Kite o Iehova. Karanga tetai tuaine, akakite a Himmler ki tetai pupu tuaine i roto i te puakapa tamamae anga: “Tutara to kotou Iehova i te rangi, ko matou te tutara nei i te enua! Ka akaari atu matou e koai te ka akakoromaki roa atu, ko kotou me ko matou!” Eaa tei tauturu i to Iehova iti tangata kia vai tiratiratu?

¹⁶ Kite meitaki te reira Aronga Apiipii e kua akamata te Patireia o te Atua i te  tutara i te 1914. Kare ratou i poitirere e kua takinokino pakariia ratou. Inara, kua papu i to Iehova iti tangata e kare e rauka i tetai kavamani tangata i te tāpu i te akakoroanga o te Atua. Kare i rauka ia Hitler i te takore i te akamorianga mou e kare i rauka i tetai kavamani i te kopae i te Patireia o te Atua. Papu i te au taeake e ka puapinga kore ta Hitler tutara.

¹⁷ Kua papu te akarongo o te au taeake e te au tuaine. Kare i roa, kua puapinga kore te tutara anga Nazi, e kua oro atura a Himmler—te tangata tei tuatua “ko matou te tutara nei i te enua.” Iaia e oro ra aravei atura aia i te Taeake ko Lübke, e mouauri i mua ana. Ma te taitaia, ui atura a Himmler ki te Taeake ko Lübke: “E te tangata Apii Pipiria, eaa te ka tupu i teianei?” Akamārama atu te Taeake ko Lübke e kua kite takere te Au Kite o Iehova e ka puapinga kore te tutara anga Nazi e ka akaoraia ratou. E maata ta Himmler tuatua kino i mua ana no te Au Kite o Iehova e i teianei kua muteki ua aia. I muri mai kua tamate aia iaia uaorai. Eaa te apiianga? Ka riro ta tatou apii i te Pipiria, kapiti mai te au totou, ei akamatutu i te akarongo ki roto i te Atua e kia ngaueue kore i te tuatau timata anga.—2 Pete. 1:19-21.

18. Ia Ioane 6:67, 68, eaa te tumu “kia maata atu rai [tatou] i te kite, e te utoa o te ngakau” mei ta Paulo i tata?

¹⁸ E aroa tatou i tetai e tetai—ei akaari e au Kerititiano mou tatou. “Kia maata atu rai [tatou] i te kite, e te utoa o te ngakau.” (Phili. 1:9) Te openga, e akapeke aereia tatou e “te matangi ra, . . . i te ravenga a te tangata nei,” kapiti mai te aronga tei akaruke i te akarongo. (Ephe. 4:14) Te akamutu anga te au pipi o te anere mataiti mua i te aru ia Iesu, kua akakite papu te apotetoro ko Petero i tona akarongo e tei ia Iesu “te tuatua o te ora mutu kore.” (E tatau ia Ioane 6:67, 68.) Noatu kare a Petero i mārama ana i te au tuatua mou katoatoa, kua vai tiratiratu aia no te mea kua mārama aia i te tuatua mou no Karaiti. Ka rauka katoa ia koe i te akamatutu i toou akarongo ki roto i te Pipiria. Me pera koe, ka matutu toou akarongo noatu eaa te tu, e ka akamatutu koe i te akarongo o tetai ke.—2 Ioa. 1, 2.