Kua anauia au i St. Paul, Minnesota, Marike i te 1954 i roto i tetai ngutuare Katorika Roma. Ko au te rua o te rima tamariki. E aere ana au ki te apii Katorika, e ko taku angaanga e tamaiti tauturu i te orometua. Inara, e meangiti toku kite i te Pipiria. E irinaki ana rai au e e Atua tetai tei anga i te au mea ravarai, kare ra oku akarongo no te akonoanga.

I toku mataiti mua i te William Mitchell College of Law, kua aere mai te Au Kite o Iehova ki toku ngutuare. Te pua kakau ra au, kua akatika mai te nga tokorua e ka oki akaou mai raua. Te tae mai anga raua, e rua aku uianga: “Eaa ra te aronga meitaki kare e manuia ana i teia ao?” e “Akapeea te tangata e mataora ai?” Kua āriki au i te puka Te Tuatua-Mou te ka Arataki ki te Ora Mutukore e te New World Translation of the Holy Scriptures, e puka kapi matie. Kua āriki katoa au i tetai apii Pipiria. Kua kite mai au i te aiteanga o te apii Pipiria. Kua mareka au i te Patireia o te Atua ei kavamani te ka  akameitaki i te au angaanga a te tangata. Kite katoa mai au i te tutara anga a te tangata, kare e marikoanga te reira e kua ki te enua i te mamae, te tika kore, e te manamanata.

Kua akatapu au i toku oraanga kia Iehova i te 1982 e kua papetitoia i muri mai i ko i te Uruoaanga “Kingdom Truth” tei raveia i ko i te St. Paul Civic Center. Kua oki akaou au ki te civic center i tera mai epetoma no te tarere i Minnesota kia riro mai au ei roia. Ia Okotopa i te au rā mua, kua kite mai au e kua pāti au i te tarere, e kua riro mai au ei roia.

I ko i te Uruoaanga “Kingdom Truth,” kua aravei au ia Mike Richardson, e taeake Betela i Brooklyn, tei akamārama mai e kua akanooia tetai opati ture i ko i te opati maata. Maara iaku te tuatua o te eunuka Etiopia ia Angaanga 8:36 e kua ui au kiaku uaorai, ‘Eaa au nei e kore e angaanga i ko i te Opati o te Ture?’ No reira kua tuku au i taku pepa patianga kia angaanga i Betela.

Kare toku nga metua i mataora ana, te riro mai anga au ei Au Kite no Iehova. Kua tuatua mai toku tati kiaku, eaa au i angaanga ai na te Watctower i kore ei i angaanga ei roia. Kua akamārama au kiaia e te rave ra au i tetai angaanga oronga ua. Kua akakite au kiaia e ka orongaia mai e $75 kiaku i te marama, e moni tauturu tei orongaia ki te aronga angaanga i Betela.

I muri ake i te akaoti anga au i taku angaanga, kua akamata au i te angaanga Betela i Brooklyn, New York i te 1984. Kua tukuia au ki te Opati o te Ture. Kiaku, kua papa au i te rave i teia angaanga meitaki.

Kua okoia te Stanley Theater i Jersey City, New Jersey ia Noema 1983. Kua pati te au taeake kia akaouia te au ngai no te uira e te ngai tae anga o te vai. Ia ratou e aravei ra i teia au konitara, kua akamārama te au taeake kia tukuia tetai patianga kia taangaanga i te Stanley Theater ei ngai uruoaanga no te au Au Kite o Iehova. Kua tupu tetai manamanata. Kua patoi te oire konitara kia kore e akatuia tetai ngai akamori anga i te ngai e noo ra te tangata. Tei roto te Stanley Theater i te oire o te au pitiniti, no reira kare te oire konitara i akatika mai i te pepa patianga. Kua tuku te au taeake i tetai patianga akavaanga, inara kua patoiia mai te reira.

 I te epetoma mua iaku i Betela, kua tuku te akaaerenga i tetai oroanga akaapa ki te akavaanga. No te mea koi akamutu ua akera au i te angaanga e rua mataiti i roto i te akavaanga i St. Paul, Minnesota, kua mārama au i teia au tu akavaanga. Akakite to matou roia e taangaangaia ana te Stanley Theater ei ngai tamataora anga mei te akaari teata e te imene. Eaa te tumu kare e akatikaia no tetai angaanga a te akonoanga? Kua uriuriia teia e te akavaanga a te kavamani e kua akakite e kare a Jersey City i akangateitei ana i te tu rangatira o te akonoanga. Kua akaue te akavaanga i te oire kia akatika i te patianga, e kua kite au i ta Iehova akameitakianga i tana akaaerenga kia taangaanga i te ture ei turu i tana angaanga. Mataora tikai au i te piri atu ki roto i teia.

Kua rave te au taeake i te au angaanga akaou anga, e kua raveia te 79 apii o Gileada i Jersey City Assembly Hall ia Tepetema 8, 1985. Akameitakiia au no te piri ki teia angaanga Patireia ei tuanga no te pupu roia, e kua mareka tikai au i taku angaanga ei roia kare au i kite ana i mua ake ka aere mai ei au ki Betela. Kare au i kite ana e e maata atu ta Iehova au akameitakianga tei akanooia noku.

I te tuatau o te 1980, e mea matau na te au taote e te au are maki i te patoi i te au patianga a te aronga maki o te Au Kite kia kore e pamu toto. E aro atu ana te au vaine nui i teia au arairai anga no te mea e putuputu ana te au akavaanga i te patoi i te tikaanga o te au vaine nui kia kore e pamu toto. Kua akamanako te aronga akavaanga e me kare e raveia tetai pamu toto, penei ka ora mai te pepe kare e metua vaine.

Ia Titema 29, 1988, i muri ake te anau anga i tana pepe kua taʼe ririnui ua te toto o te Tuaine ko Denise Nicoleau. Kua topa tona vaito ki te 5.0, e kua pati tona taote kiaia kia raveia tetai pamu anga toto. Kua patoi te Tuaine ko Nicoleau i te reira. I tera mai popongi, kua tuku te are maki i tetai patianga ki te akavaanga kia akatika i te are maki kia rave i tetai pamu toto. Ma te kore e akavaanga i raveia me kore kare ratou i akakite ana ki te Tuaine Nicoleau e tana tane, kua oronga te akavaanga i te tika anga ki te are maki kia rave i te pamu toto.

I te Varaire, ia Titema 30, kua rave te are maki i te pamu toto ki te Tuaine Nicoleau, noatu te patoi anga a tana tane e te ngutuare tangata. I taua aiai, kua tapekaia te au kopu tangata e te nga tangata pakari, no  tei takapini ma te paruru i te roi o te Tuaine Nicoleau kia kore e pamu toto. I te popongi Maanakai, ia Titema 31, kua akakite te nuti o te New York City e te Long Island e kua akautungaia te Au Kite o Iehova.

I te popongi Monite, kua tuatua au ki te akavanui, ko Milton Mollen. Kua akakite au i te au tika, e kua rave tera pupu akavaanga i tetai taina anga no te pamu toto ma te kore e akavaanga. Kua pati mai te Akavanui Mollen kia aere au ki tona opati i te reira avatea no te uriuri i te au tika anga o te ture. Kua aru katoa mai toku akaaere ko Philip Brumley iaku ki te opati o te Akavanui Mollen i te reira aiai. Kua pati katoa te akavanui i te roia o te are maki kia piri mai. Kua riro ta matou uriuri anga ei akariri iaku. I tera taime, kua tata te Taeake Brumley ki raro e kua akakite mai kiaku kia “rangi marie.” Kua riro te reira ei akoanga meitaki kiaku, no te mea te veravera maira au i te patoi e kua tarevake te roia o te are maki.

I muri ake i te tai ora, kua karanga mai te Akavanui Mollen e ko teia te oroanga mua ka raveia i tera mai popongi. Ia matou e akaruke ra i te pia o Mollen, kua karanga te Akavanui Mollen, e e “apainga teiaa to apopo” ta te roia o te are maki. Tera te aiteanga ka ngata i te roia o te are maki kia paruru i tana oroanga. Papu iaku e te akamaroiroi maira a Iehova iaku e ta matou oroanga. Ma te tu akaaka, akamanako au e kua taangaanga a Iehova ia matou kia akatupu i tona anoano.

Kua angaanga matou i te reira po no te akapapa i ta matou ka tuatua i te popongi. Kare e mamao ana te ngai o te akavaanga mei te Betela Brooklyn, no reira kua aaere ua matou ki te Opati o te Ture. I muri ake te akarongo anga te aronga akavaanga e a i ta matou oroanga, kua takore ratou i te pamu toto. Kua oronga te akavaanga maata i te tikaanga ki te Tuaine Nicoleau e kua akakite e kare e tika anga o tetai kia taina i tetai akaue anga i mua ake ka akarongo ei i te manako o te tangata maki.

Kua akatika te akavaanga maata o New York kia rapakauia te Tuaine Nicoleau ma te kore e pamu toto. Ko te taime mua teia i toku piri anga ki roto i te tuku anga tika  na te akavaanga teitei tukeke no te oroanga e a no te toto. (Akara i te pia “ Re Anga i ko i te Akavaanga Teitei.”) Kua piri katoa au ki tetai au roia i Betela no te oroanga kia akono i te tamariki, te tatara, te enua e te are.

I toku aravei anga i taku vaine ko Dawn, e vaine takaua aia e e toru ana tamariki. Te angaanga ra aia e te painia ra. Kua kite aia i te ngata o te oraanga, e kua mareka au i te reira no tana i rave i te tavini ia Iehova. I te 1992, kua aere au ki te Uruoaanga Tapere “Light Bearers” i New York City, e kua pati au kia kite au no runga iaia. Kua akaipoipo maua i tera mai mataiti. Kua riro te tu pae vaerua e te tu kangakanga o taku vaine ei akameitakianga no ko mai ia Iehova. Kua akono meitaki tikai a Dawn iaku i te au rā ravarai i to maua oraanga.—Mase. 31:12.

I to maua akaipoipo anga, e 11, 13, e te 16 o te tamariki mataiti. Inangaro au kia riro mai ei metua tane meitaki kia ratou, no reira kua tatau meitaki au i te au puka e kua taangaanga i te reira ei metua. E akaaoanga maata tei tupu i tera au mataiti, inara kua mataora au i te tamariki tei āriki mai iaku ei oa meitaki e ei metua tane aroa. Kua tuera ua te ngutupa no ta maua tamariki e to ratou au oa e kua mataora te ngutuare.

I te 2013, kua neke maua ko Dawn ki Wisconsin i te akono i to maua nga metua. I toku poitirere, kare taku tavini anga i Betela i akamutuia. Kua patiia au kia angaanga ei roia tauturu no te akaaerenga.

Ia Tepetema 2018, kua kite mai au i tetai apinga i roto i toku karaponga. Kua akara te taote iaku, inara kare aia i kite, eaa te manamanata. I muri mai, kua tuatua mai tetai taote ke kia aere kia akaraia au e te taote no te ara uaua ki te roro e te ivi mokotua. Ia Tianuare 2019, kua akakite mai aia e e maki tuke ake rai toku te ka taui i toku kopapa katoa.

E toru rā i muri mai, iaku e tupaorooro ra i runga i te kiona, kua topa au ki raro e kua ati toku rima. E reka ua ana au i teia kanga tupaorooro. No reira kua kite mai au e te ngaro atura toku tu maroiroi. Umere au i te viviki i te kino o teia maki kiaku, kare taku tuatua e takataka ana, te neke neke aere, e te apuku i te kai.

Kua mataora au i te taangaanga i toku oraanga ei roia i roto i te akaaerenga a Iehova ei turu i te Patireia. Rekareka au i te tata i tetai au atikara na te au makatini tei tatauia e te au taote, te au roia, e te au akavanui. Kua tuatua katoa au takapini i teia ao, te paruru anga i te tika anga o te iti tangata o Iehova kia iki i te rapakau anga kare e pamu toto. Noatu rai, kua aite au ki ta Luka 17:10 e karanga ra: ‘E tavini puapinga kore au nei. Ko tei tau tikai iaku ra, ko taku ïa i rave.’