Te inangaro ra a Iehova i te nga tokorua akaipoipo kia mataora to raua oraanga e kia piri vaitata ua rai ki tetai e tetai. (Mata. 19:4-6) Me ka inangaro koe i te akaipoipo, akapeea koe me kimi i tetai tokorua meitaki noou? Kua kite Tei Anga ia tatou, a Iehova, akapeea e rauka ai tetai oraanga akaipoipo mataora. No reira, me taangaangaia te au kaveinga tana i oronga mai, ka mataora tatou. Akamanako tatou i teia au kaveinga.

Mea mua, ka anoanoia tatou kia mārama no runga ia tatou uaorai: “E pikikaa maata to te ngakau i te au mea katoa nei, e kua kino takiri.” (Iere. 17:9) Me aravei e me akainangaro tetai nga tokorua i tetai e tetai, ka tupu te inangaro ngakau ki te maata e ka ngata i te rave i te au ikianga meitaki. Me iki tetai tangata i te akaipoipo no te inangaro o tona uaorai ngakau, ka tupu te mamae kiaia a muri ake. (Mase. 28:26) No reira kare i te mea meitaki kia akakite te nga tokorua i to raua inangaro ngakau, me kore kia taputou raua ki tetai e tetai i mua ake ka kite meitaki ei raua ia raua uaorai.

Karanga a Maseli 22:3: “E kite mamao te tangata pakari i te kino, e kua pipini iora; te aere ua atura te kite kore, e mate atura.” Eaa te kino ka tupu me taangaanga tatou i te au website kimi tokorua akaipoipo? Mea maromaroa, kua aravei e kua akameamea tetai pae i te aronga i runga i te initaneti, e i muri mai kua pikikaaia ratou. Pera katoa, e taui ana te aronga pikikaa i to ratou ingoa e ka tauta i te keia i te moni a te tangata. Tetai taime, ka karanga te aronga te rave ra i teia au pikikaa kino e e Au Kite ratou.

Teia akaou tetai kino. E taangaanga ana tetai au website i te mathematical algorithms no te tamanako e ko teea tangata te ka tau no tetai. Inara, kare e akapapuanga e kua puapingaia teia ravenga. E mea meitaki ainei kia irinakiia te porokaramu initaneti a te tangata, kia rave i te au ikianga puapinga no te akaipoipo? Ka rauka ainei ia tatou i te akaaite i te porokaramu initaneti ki te au kaveinga Pipiria?—Mase. 1:7; 3:5-7.

Akakite te kaveinga ia Maseli 14:15: “Te akarongo ra te kite kore i te au tuatua katoa ra: te akara meitaki ra te tangata akono ra i tona takainga.” Mua ake ka iki ei koe i tetai tangata ei tokorua akaipoipo noou, ka anoanoia koe kia kite meitaki iaia. Inara, kare e  rauka ia koe i te rave i te reira i runga i te initaneti. Noatu ka akakite korua i te au akakiteanga no runga i tetai e tetai, ka karanga ainei koe e kua kite meitaki tikai koe iaia? Tetai pae tei manako e kua kitea to ratou tokorua inangaro mou, kua tupu te taitaia i ta ratou i kite mai te aravei anga ratou iaia.

Karanga te tata salamo: “Kare au i noo i roto i te au tangata tarevakaua, kare oki i kapiti i roto i te aronga pikikaa.” (Sala. 26:4) E mea matau na te maata anga kia tuku i te au akakiteanga pikikaa no runga ia ratou kia akaraanga meitaki ratou. Ka uuna ratou i to ratou au tu kino me kore kare e akaari mai i te reira i runga i te initaneti. E mea puapinga kia akamanako i teia au uianga. Noatu ka karanga tetai pae e e Kite ratou no Iehova, kua papetito tikai ia ainei ratou ei Kerititiano? E turanga pae vaerua matutu ainei to ratou? E pirianga vaitata ainei to ratou kia Iehova? Te akangateiteiia ra ainei ratou i roto i te putuputuanga? E akaraanga me kore e “kapiti anga kikino” ainei to ratou? (1 Kori. 15:33; 2 Timo. 2:20, 21) Kua tau ainei ki te Pipiria kia akaipoipo ratou? Ka anoanoia koe kia kite i te pauanga ki teia au uianga. Inara ka ngata te reira me kare koe e tuatua ki te au taeake tei kite meitaki iaia. (Mase. 15:22) Kare rava tetai tavini tiratiratu o Iehova e manako kia “kapitiia ma te tau kore” ki tetai tangata akarongo kore.—2 Kori. 6:14; 1 Kori. 7:39.

No te au kino ka tupu me taangaangaia te au website kimi tokorua akaipoipo, e ravenga meitaki atu tetai no te kimi e te akatupu i te pirianga meitaki ki tetai, te ka riro mai ei tokorua akaipoipo noou. Ka kitea tetai tokorua akaipoipo meitaki kiea? Me akatikaia te Au Kite o Iehova kia taokotai ki te au ngai tangata, ka rauka ia tatou i te aravei e kia kite meitaki i tetai e tetai i ko i te au uipaanga, akaputuputuanga, uruoaanga e tetai au ngai ke atu.

Me kare e rauka ia tatou i te akaputuputu ki te au ngai tangata, i teia tuatau o te maki COVID-19, ka taangaanga tatou i te au apinga electronic no te aere ki te au uipaanga kia aravei i te au Kite kare i akaipoipo ake. Ka akarongo koe i ta ratou ako e ka kite i te tu o to ratou akarongo i ko i te au uipaanga. (1 Timo. 6:11, 12) Penei ka rauka katoa ia koe i te tuatua kiaia i roto i te breakout room me akaoti te uipaanga. Me aravei tetai Au Kite na roto i te vitio karangaranga, ka kite katoa koe akapeea te tangata taau e inangaro ra me tuatua ki te au taeake, e ka akaari mai te reira i tona tu tikai. (1 Pete. 3:4) Aere ua rai, me kite meitaki koe iaia, ka rauka ia koe i te kite me kua aiteite ta korua au akakoroanga e to korua au tu, e ka riro mai korua ei tokorua akaipoipo meitaki.

Me taangaanga te aronga kare i akaipoipo ake i te au kaveinga Pipiria no te kimi i tetai tokorua akaipoipo meitaki no ratou, ka mataora to ratou oraanga akaipoipo. Mei ta te maseli i akakite: “Ko tei rauka iaia te vaine [me kore te tane] ra, e meitaki rai tana i rauka, e akaperepereia mai aia e Iehova.”—Mase. 18:22.