ATIKARA APII 28
Kopae i te Vaerua Tarere—Akatupu i te ‘Au
“Eiaa tatou e akateitei puapinga kore ua, i te akaongoongo anga tetai ki tetai, e te vareae anga tetai ki tetai.”—GALA. 5:26.
IMENE 101 Angaanga Kapiti ma te Rotai
I ROTO I TEIA APII *
1. Eaa ta te vaerua tarere ka akakeu i te tangata kia rave?
I TEIA tuatau, e manganui te tangata tei akakeuia e te vaerua tarere kia meitaki atu ratou i tetai ke. Ka taangaanga tetai tangata pitiniti i te au ravenga tau kore kia meitaki atu aia i tetai. Ka tauta te tangata tarere tipoti i te rave akakoro i te kino ki tetai ke kia peke iaia te re. Ka pikikaa te tangata apii kia pati aia i tana tarere kia tae aia ki tetai apii teitei. Ei au Kerititiano, kua mārama tatou e e tarevake te reira; e tuanga teia no te “au angaanga a te kopapa.” (Gala. 5:19-21) Inara, ka akatupu ainei tetai tavini o Iehova i te vaerua tarere i roto i te putuputuanga ma te kore e kite i te reira? E uianga puapinga teia, no te mea ka takino te vaerua tarere i te tu taokotai o te putuputuanga.
2. Eaa ta tatou ka uriuri i roto i teia atikara?
2 I roto i teia atikara, ka uriuri tatou i te au tu tarevake te ka akatupu i te vaerua tarere ki to tatou au taeake. Ka uriuri katoa tatou i te akaraanga o te au tane e te au vaine tiratiratu o te tuatau Pipiria, tei kore i akakeuia e teia vaerua tarere. Mea mua, uriuri tatou akapeea me akara matatio i to tatou akakoroanga.
AKARA MATATIO I TOOU AKAKOROANGA
3. Eaa te au uianga ka ui tatou?
3 I tetai au taime, e mea meitaki kia akara matatio i to tatou au akakoroanga. E ui kia koe uaorai: ‘Te akaaite ra
ainei au i taku i rauka ki tetai ke? Te akakeuia ra ainei au kia manako e meitaki atu taku e rave ra, me kore e meitaki atu au i tetai taeake me kore tuaine? Me te inangaro ra ainei au i te oronga i toku maroiroi katoa kia Iehova? Eaa tatou ka ui ei i teia au uianga? Akara tatou i ta te Pipiria e akakite maira.4. Ia Galatia 6:3, 4, eaa te tumu kare tatou e akaaite ia tatou uaorai ki tetai ke?
4 Akamaroiroi mai te Pipiria, auraka e akaaite ia tatou ki tetai ke. (E tatau ia Galatia 6:3, 4.) No teaa ra? Me manako tatou e e meitaki atu tatou i te au taeake, ka tupu te tu parau kia tatou. I tetai tua, me akaaite tau koreia tatou ki tetai ke, ka taitaia tatou. Me tupu teia, kare tatou e akamanako meitaki ana. (Roma 12:3) Karanga a Katerina, * e tuaine no Ereni: “I mua ana, e akaaite ana au iaku uaorai ki te aronga akaraanga manea, tei meitaki atu i te tutu aere, e te meitaki atu i te akatupu i te au oa. Tei tupu, kua maromaroa tikai au.” Kia akamaara tatou e kua akavaitata mai a Iehova ia tatou kiaia, kare no to tatou akaraanga manea, te kite karape, me kore te tu rongonui, mari ra no to tatou inangaro iaia e te akarongo ki tana Tamaiti.—Ioa. 6:44; 1 Kori. 1:26-31.
5. Eaa taau i apii mai mei te akaraanga o te taeake ko Hyun?
5 Tetai akaou uianga kia ui tatou, ‘E tangata akatupu ‘au ainei au, me e tangata akatupu pekapeka?’ Teia tei tupu ki te taeake ko Hyun, tei noo i Korea Apatonga. I tetai atianga, kua manako aia e te tauta ra tetai au taeake i roto i te putuputuanga kia meitaki atu iaia. Karanga aia, “Kua vareae au ia ratou, e kare au i āriki ana i ta ratou ka tuatua mai.” Eaa tei tupu? Karanga aia, “Kua riro toku tu i te akatupu i te ke i roto i te putuputuanga.” Kua tauturu te au oa o Hyun iaia kia kite i tona tu tarevake. Kua akatano a Hyun i tona tu, e i teia rā te tavini nei aia ei tangata pakari. Me e vaerua tarere to tatou e kare e akatupu ana i te ‘au, ka anoanoia tatou kia kopae viviki i te reira.
KOPAE I TE TU AKATEITEI E TE VAREAE
6. Ia Galatia 5:26, eaa te au tu tau kore te ka akatupu i te vaerua tarere?
6 E tatau ia Galatia 5:26. Eaa te au tu tau kore te ka akatupu i te vaerua tarere? Tetai ko te tu akateitei. Ko tetai tangata akateitei, e tu ngakau parau tona e te manako ra iaia uaorai. Tetai akaou tu, ko te vareae. Kare ua te tangata vareae e inangaro i te au apinga a tetai ke, mari ra kia kore e rauka ia ratou te reira. Te tika, kua aite te tu vareae ki te tu makitakita. Ka inangaro tatou i te kopae i teia au tu kino mei tetai maki rai!
7. Akapeea koe me akatutu mai i te kino o te tu akateitei e te vareae?
7 Ka aite te tu akateitei e te vareae ki te repo i roto i te penitini o te pairere. Noatu ka rauka i te pairere i te rere, ka arairai teia repo i te ara o te penitini, ka matemate te matini o te pairere i mua ua ake ka to ei e ka ū atu te reira. Mei te reira rai, penei ka tavini tetai tangata ia Iehova no tetai tuatau. Inara, me te akakeuia ra aia e te tu akateitei e te vareae, ka ū e ka mate aia. (Mase. 16:18) Ka akamutu aia i te tavini ia Iehova e ka takino iaia uaorai e tetai ke. Akapeea i reira tatou me kopae i te tu akateitei e te vareae?
8. Akapeea tatou me kopae i te tu akateitei?
Phili. 2:3) Me manako tatou e e meitaki atu tetai ke ia tatou, kare tatou e tarere atu ki te aronga e maata atu to ratou tareni e te kite i to tatou. Mari ra, ka mataora tatou no ratou. Tika rai te reira me taangaanga ratou i to ratou tareni no te tavini ia Iehova. Pera katoa me aru te au taeake e te au tuaine kite karape i te ako a Paulo, ka akamou ratou ki runga i to tatou au tu meitaki. Me pera tatou, ka tupu te ‘au e te taokotai i roto i te putuputuanga.
8 Ka rauka ia tatou i te kopae i te tu akateitei me akamaara tatou i ta Paulo ako ki te putuputuanga i Philipi: “Auraka takiri e mea e raveia ma te taumāro, e te akanengonengo puapinga kore; ei ngakau akaaka ra, i te manako akameitaki atu tetai ki tetai, auraka iaia uaorai.” (9. Akapeea tatou me akatere i te tu vareae?
9 Ka rauka ia tatou i te akatere i te tu vareae na te akatupuanga i te tu akaaka, koia oki, kia mārama i to tatou au kotinga. Me e tu akaaka to tatou, kare tatou e tauta kia meitaki atu me kore kia maata atu to tatou kite i to tetai ke. Mari ra, ka tauta tatou i te apii mei te aronga tei meitaki atu ia tatou. Ei akaraanga, penei e taeake tetai i roto i te putuputuanga, meitaki tikai tana ako. Penei ka ui tatou akapeea aia me akapapa i tana ako. Penei e tuaine tetai e reka tana tunu kai, ka pati tatou i tana tauturu kia meitaki mai ta tatou tunu kai. Me e Kerititiano mapu tetai kare e meitaki ana i te kimi oa, penei ka pati aia i te tauturu a tetai tangata kite i te rave i te reira. Na teia tu, te kopae ra tatou i te tu vareae e ka akameitaki atu i to tatou tu karape.
APII ANGA MEI TE AU AKARAANGA PIPIRIA
No tona tu akaaka, kua akatupu a Gideona i te ‘au ki te au tangata o Epheraima (Akara i te parakarapa 10-12)
10. Eaa te manamanata tei tupu kia Gideona?
10 Akamanako ana i tei tupu kia Gideona, no roto mai i te kopu o Manase, e te au tangata mei te kopu o Epheraima. Ma te tauturu a Iehova, kua autu a Gideona e te au tangata e 300 i tetai tamaki e kua tau rai kia ngakau parau ratou. Aka. 8:1.
Kua aravei te au tangata no Epheraima ia Gideona, kare kia akameitaki iaia, mari ra kia akatupu pekapeka kiaia. Te akaraanga kua riri ratou no tei kore a Gideona i pati ia ratou i te akamataanga kia piri ki te tamaki anga. Kua manako ua ratou i te akangateitei i to ratou kopu, e kare i mārama eaa tei tupu—kua rauka ia Gideona i te akatapu i te ingoa o Iehova e te paruru i tona iti tangata.—11. Akapeea a Gideona te tuatua anga ki te au tangata o Epheraima?
11 Ma te tu akaaka kua karanga a Gideona ki te au tangata o Epheraima: “Eaa taku puapinga i rave nei i ta kotou?” E kua akamaara aia kia ratou akapeea a Iehova te akameitakianga ia ratou. Tei tupu, “atiau iora to ratou riri.” (Aka. 8:2, 3) Kua kopae a Gideona i te tu ngateitei kia vai ua rai te ‘au i rotopu i te iti tangata o te Atua.
12. Eaa ta tatou ka apii mai mei te akaraanga o Gideona e te au tangata o Epheraima?
12 Eaa ta tatou ka apii mai mei teia akaraanga? Mei te au tangata o Epheraima, auraka tatou e akamou ki runga i to tatou uaorai puapinga, mari ra kia akangateitei ia Iehova. Ei au upoko ngutuare e ei aronga pakari, ka rauka ia tatou i te apii mai mei ia Gideona. Me ka riri tetai ke i ta tatou i rave, e tauta tatou kia mārama eaa aia i pera ei. Ka rauka katoa ia tatou i te akameitaki iaia no tana i rave. Ka anoanoia tatou kia akaari i te tu akaaka, noatu te taka ua ra e kua tarevake aia. E puapinga atu te tu ‘au i to tatou tu ngateitei.
No tona irinaki ia Iehova kia akatikatika i te au manamanata, kua rauka ia a Hana te manako ‘au (Akara i te parakarapa 13-14)
13. Eaa te manamanata tei tupu kia Hana, e akapeea aia te autu anga i te reira?
13 Akamanako katoa i te akaraanga o Hana. Kua akaipoipo aia i tetai tangata ngati Levi, ko Elikana, tei inangaro maata iaia. Inara, e vaine ke atu rai tana, ko Penina. E maata atu to Elikana inangaro no Hana i to Penina; inara, “e tamariki ta Penina, kare ra a Hana e tamariki.” No teia, kua akakoko rava a Penina ia Hana “kia mii” aia. Eaa tei tupu kia Hana? Kua taitaia tikai aia. “Aue iora aia, e kare akera i kaikai.” (1 Samu. 1:2, 6, 7) Kare e akapapuanga e kua tauta a Hana i te tutaki i te kino kia Penina. Mari ra, kua pure akatenga aia kia Iehova e kua irinaki e Nana e akatikatika i teia manamanata. Kua taui ainei to Penina tu kia Hana? Kare te Pipiria i akakite mai. Inara, kua kite tatou e kua rauka akaou ia Hana te manako ‘au. “Kare atura tona mata i kinokino ra.”—1 Samu. 1:10, 18.
14. Eaa ta tatou ka apii mai mei te akaraanga o Hana?
14 Eaa ta tatou ka apii mai mei te akaraanga o Hana? Me tauta tetai tangata i te Roma 12:17-21) Noatu kare aia e akarongo mai, ka rauka rai ia koe te manako ‘au.
tarere kia koe, e akamaara ka rauka ia koe i te akatere i te reira. Kare koe e anoanoia kia ō i roto i te tarereanga. Auraka e akaoki i te kino ki te kino, mari ra e tauta i te akatupu i te ‘au. (No te mea kua kite raua e na Iehova i akameitaki i te angaanga, kare a Apolo e Paulo i manako e e meitaki atu tetai i tetai (Akara i te parakarapa 15-18)
15. Eaa te tu aiteite i rotopu ia Apolo e Paulo?
15 Ei taopenga, ka akamanako tatou i te apii anga mei te akaraanga o te pipi ko Apolo e te apotetoro ko Paulo. Kua kite meitaki tikai raua i te Pipiria. E nga puapii rongonui e te kite pakari raua. E manganui ta raua au tangata i tauturu kia riro mai ei pipi. Inara, kare raua i manako ana i te tarere atu ki tetai e tetai.
16. Akapeea koe me akataka i to Apolo tu?
16 Ko Apolo, kua anauia aia “i Alekanederea,” te oire maata no te apii i te anere mataiti mua. E tangata tukatau aia i te tuatua e te “pakari oki i te tuatua i tataia ra.” (Anga. 18:24) I to Apolo tavini anga i Korinetia, kua akaari tetai pae i roto i te putuputuanga e e reka atu ratou iaia i tetai au taeake ke, kapiti mai ia Paulo. (1 Kori. 1:12, 13) Kua akamaroiroi ainei a Paulo i teia tu? Kare. Tetai tuatau i muri ake i to Apolo akaruke anga ia Korinetia, kua pati a Paulo iaia kia oki ki reira. (1 Kori. 16:12) Kare a Paulo e rave i tera me kua manako aia e te akatakake ra a Apolo i te putuputuanga. Taka meitaki, kua taangaanga a Apolo i tona tu karape—kia akakite i te nuti meitaki e te akaketaketa i tona au taeake. Papu katoa ia tatou e e tu akaaka to Apolo. Ei akaraanga, kare e akakite anga e kua riri aia ia Akuila e Peresila no tei “akakite tikai atura kiaia i te tuatua a te Atua.”—Anga. 18:24-28.
17. Akapeea a Paulo te akatupuanga i te ‘au?
17 Kua kite te apotetoro ko Paulo i te angaanga meitaki a Apolo. Inara kare aia i manata ana e e meitaki atu a Apolo iaia. Kua kiteaia to Paulo tu akaaka e te tau ua i roto i tana au reta i tata ki te putuputuanga i Korinetia. Kare aia i ngakau parau ana me karanga tetai pae e “no Paulo au,” mari ra kua akaoki aia i te akameitakianga katoatoa kia Iehova e kia Iesu.—18. Ia 1 Korinetia 4:6, 7, eaa ta tatou ka apii mai mei te akaraanga o Apolo e Paulo?
18 Eaa ta tatou ka apii mai mei te akaraanga o Apolo e Paulo? Penei ka angaanga pakari tatou no Iehova, e ka tauturu i tetai pae kia papetitoia. Inara kia mārama tatou e ko te au meitaki ta tatou ka rauka, na Iehova i tauturu ia tatou. Tetai akaou apii anga mei ia Apolo e Paulo—ko te maata atu to tatou turanga puapinga, ka akatupu maata atu tatou i te ‘au. Ka mataora tatou me akatupu te aronga pakari e te au tavini tauturu i te ‘au e te taokotai me akamouia ta ratou akoanga ki runga i te Tuatua a te Atua e ki runga ia Iesu, e kare kia ratou uaorai!—E tatau ia 1 Korinetia 4:6, 7.
19. Eaa ta tatou tataki tai ka tauta i te rave? (Akara katoa i te pia “ Kopae i te Vaerua Tarere.”)
19 Kua oronga mai te Atua i tetai tu kite karape kia tatou tataki tai. Ka rauka ia tatou i te taangaanga i te reira ei “meitaki no tetai” ke. (1 Pete. 4:10) Penei ka manako tatou e meangiti ua ta tatou e rave ra. Inara ko te au angaanga rikiriki te ka akatupu i te tu taokotai, kua aite te reira ki te au tui rikiriki i runga i te kakau. Kia tauta ua rai tatou i te kopae i te vaerua tarere te ka tupu mai. E kia maroiroi katoa tatou i te akatupu i te ‘au e te taokotai i roto i te putuputuanga.—Ephe. 4:3.
IMENE 80 “Ka Tongi Ana Kia Kite i te Meitaki o Iehova”
^ para. 5 Mei tetai ngaʼa meangiti te ka akaparuparu i tetai potera, ka akaparuparu te vaerua tarere i te putuputuanga. Me kare te putuputuanga e matutu e te taokotaiia, kare e tupu te ‘au i roto i ta tatou akamorianga i te Atua. Ka uriuri teia atikara i te tumu ka kopae ei tatou i te vaerua tarere, e eaa ta tatou ka rave kia akatupu i te ‘au i roto i te putuputuanga.
^ para. 4 Tauiia tetai au ingoa.