1. Eaa to tatou manako i te tikaanga kia pure kia Iehova?

 KUA orongaia mai te tikaanga ngateitei​—kia aere tatou ki Tei Anga i te rangi e te enua na roto i te pure. E akamanako: Ka riringi ua tatou i to tatou ngakau kia Iehova i tetai ua atu taime e i tetai ua atu reo, kare e anoanoia tetai tapaoanga. Ka rauka ia tatou te pure kiaia mei to tatou roi i te are maki me kore i te are auri, ma te papu e ka akarongo mai to tatou Metua aroa ia tatou. Kare tatou e manako puapinga kore ua i teia tikaanga.

2. Akapeea te Ariki ko Davida te akaari anga e kua akaperepere aia i te tikaanga no te pure?

² Akaperepere te Ariki ko Davida i te tikaanga no te pure. Kua imene aia kia Iehova: “Kia ana atu taku pure ki mua ia koe mei te atinga kakara ra.” (Sala. 141:1, 2) I to Davida tuatau, kua taangaanga meitakiia te atinga kakara ki roto i te akamorianga mou e te au taunga. (Exo. 30:34, 35) Te akakite maira ta Davida taikuanga i te atinga kakara e kua akamanako meitaki aia i tana ka tuatua ki tona Metua i te rangi. Ka akapera rai tatou. Ka inangaro tatou i te pure ei akamareka ia Iehova.

3. Akapeea tatou me pure kia Iehova, e eaa te tumu?

³ Me pure tatou kia Iehova, auraka tatou e tuatua tangata ua kiaia. Mari ra, kia pure tatou ma te ngateitei. Akamanako i te au orama umere ta Isaia, Ezekiela, Daniela,  e Ioane i kite. E tuke teia au orama, inara aiteite te manako. Kua akatutu te reira ia Iehova ei Ariki Ngateitei. “Akara atura [a Isaia] i te Atu, i te noo anga ki runga i te terono.” (Isa. 6:1-3) Kua kite a Ezekiela ia Iehova e noo ra ki runga i tona kariota marama, ma te ‘kakā mei te tu o te anuanua.’ (Eze. 1:26-28) Kua kite a Daniela i “To te au rā taito” ma te kakau teatea, e te aʼi e aere maira mei Tona terono. (Dani. 7:9, 10) E kua kite a Ioane ia Iehova e noo ra ki runga i te terono tei koropiniia e tetai anuanua emeradino manea. (Apo. 4:2-4) Ia tatou e akamanako ra i to Iehova kakā ngateitei, ka akatapu tatou i te tikaanga kia pure kiaia. Inara akapeea tatou me pure?

4. Eaa ta tatou i apii mai mei te au tuatua mua o te pure ia Mataio 6:9, 10?

⁴ E tatau ia Mataio 6:9, 10. I te Akoanga i te Maunga, kua apii a Iesu i tana au pipi kia pure e marekaia ai e te Atua. I muri ake i tana tuatua “na ko kotou kia pure,” kua taiku mua a Iesu i te au mea puapinga no te au akakoroanga o Iehova: te akatapuanga i Tona ingoa; te aerenga mai o te Patireia te ka takore i te aronga tei patoi i te Atua; e te au akameitakianga Tana i akakoro no te enua e te tangata no te tuatau ki mua. Na te kapiti anga i teia ki roto i ta tatou pure, e puapinga to te Atua anoano kia tatou.

5. E tau ainei kia pure tatou no te au mea o te ngutuare?

⁵ I te tuanga ka aru mai o te pure, kua akaari mai a Iesu, e mea tau kia pure i te au mea o te ngutuare. Ka pati tatou kia Iehova kia oronga mai i te kai no te rā, kia akakore i ta tatou ara, te paruru ia tatou mei te timataanga, e te akaora ia tatou mei te vaerua kino. (Mata. 6:11-13) Me pati tatou i teia au mea kia Iehova, te irinaki ra e te anoano ra tatou i tona tauturu.

6. Kua kotingaia ainei te au mea ta tatou ka pure mei ta te pure a te Atu? Akamārama mai.

⁶ Kare a Iesu e tapapa atu i tana au pipi kia aru ua i te au tuatua o te pure a te Atu. Tetai au pure ta Iesu i oronga, kua taiku aia i tetai au mea ke, te au mea  puapinga o te reira taime. (Mata. 26:39, 42; Ioa. 17:1-26) Ka pure rai tatou i te au mea tei manata tatou. Me e tukuanga tika ta tatou ka rave, ka pure tatou no te pakari e te mārama. (Sala. 119:33, 34) Me ka rave tatou i tetai angaanga ngata, ka pure tatou no te kite oonu e te manako karape. (Mase. 2:6) Ka pure te au metua no te tamariki, ka pure te tamariki no te au metua, e ka pure tatou no te aronga apii Pipiria e te aronga ta tatou e tutu aere atura. Ae, e maata atu ta tatou ka pure.

7. Eaa tatou ka akapaapaa ei ia Iehova na roto i te pure?

⁷ Kia akamaara tatou i te akapaapaa ia Iehova i roto i ta tatou pure. Kua tau te Atua kia akapaapaa maataia. E “tika [Iaia] i te akakore mai te ara nei.” E “Atua takinga-meitaki koe e te aroa, te akakoromaki roa, e maata oki i te tangi e te tuatua-mou.” (Sala. 86:5, 15) E tumu meitaki katoa tetai kia akapaapaa ia Iehova e koai aia e tana e rave ra.

8. Eaa tetai au mea ka akameitaki tatou ia Iehova? (Salamo 104:12-15, 24)

⁸ I te pae i te akapaapaa anga ia Iehova na roto i te pure, ka akameitaki tatou iaia no te au mea meitaki tana i oronga mai. Ei akaraanga, ka akameitaki tatou iaia no te au tiare manea, te au kai tukeke e te reka, e te au taeake akaperepere e te oaoa. E maata atu ta te Metua aroa e oronga maira kia mataora tatou. (E tatau ia Salamo 104:12-15, 24.) Tei puapinga rava atu, ka akameitaki tatou ia Iehova no te au kai pae vaerua tana e oronga maira e te manakonakoanga manea no te tuatau ki mua.

9. Eaa te ka tauturu ia tatou kia akamaara i te akameitaki ia Iehova? (1 Tesalonia 5:17, 18)

⁹ Ka ngaropoina rai te akameitaki ia Iehova no tana i rave. Eaa te ka tauturu ia tatou kia maara? Ka rauka ia tatou i te akapapa i tetai au patianga e kia tiaki akapeea a Iehova me pau mai i te reira. E pure ma te akameitaki iaia no tana tauturu. (E tatau ia 1 Tesalonia 5:17, 18.) Akamanako i teia: Ka mataora  ua tatou me akameitakiia mai tatou. Pera rai, me akamaara tatou i te akameitaki ia Iehova no tei pau mai i ta tatou pure, ka pumaana aia. (Kolo. 3:15) Eaa atu tetai tumu puapinga kia akameitaki tatou i te Atua?

10. Ia 1 Petero 2:21, eaa te tumu kia akameitaki tatou ia Iehova no tei tono mai ia Iesu ki te enua nei?

¹⁰ E tatau ia 1 Petero 2:21. Ka akameitaki tatou ia Iehova no tei tono mai i tana Tamaiti akaperepere kia apii ia tatou. E maata ta tatou ka apii no Iehova e te akamareka iaia na te apiianga i te oraanga o Iesu. Me taangaanga tatou i te akarongo ki roto i te atinga oko o Karaiti, ka piri vaitata tatou ki te Atua ko Iehova ma te rekareka.​—Roma 5:1.

11. Eaa ta Iesu tuanga i roto i ta tatou pure kia Iehova?

¹¹ Ka akameitaki tatou ia Iehova no te mea ka rauka ia tatou i te pure na roto i tana Tamaiti. Ko Iesu ta Iehova i taangaanga kia pau mai i ta tatou patianga. Ka akarongo a Iehova e ka pau mai i te au pure tei orongaia na roto i te ingoa o Iesu. Akamārama a Iesu: “Ko ta kotou e pati ma toku ingoa, naku ïa e rave, kia akakakāia te Metua i te Tamaiti.”​—Ioa. 14:13, 14.

12. Eaa atu tetai tumu kia akameitaki ia Iehova no tana Tamaiti?

¹² Ka akakore a Iehova i ta tatou ara tei akatumuia ki runga i te atinga oko o Iesu. Te akatutu maira te au Tuatua Tapu ia Iesu ei “taunga maata [no] tatou, te noo ra i te pae katau i te terono o Tei Maata i runga i te rangi.” (Ebe. 8:1) Ko Iesu to tatou ‘tauturu tei ko i te Metua.’ (1 Ioa. 2:1) Mei teaa atura ta tatou akameitaki ia Iehova no tei oronga mai i te Taunga Maata tangi aroa tei mārama i to tatou tu paruparu e tei “pati ra i ta tatou”! (Roma 8:34; Ebe. 4:15) E aronga apa ua tatou, naringa kare to Iesu atinga oko, kare e rauka ia tatou kia aere kia Iehova na roto i te pure. Kare rava e rauka ia tatou i te akameitaki i teia apinga aroa akaperepere ta Iehova i oronga mai kia tatou​—koia oki ko tana Tamaiti akaperepere!

13. I te po i mua ake i tona mate, akapeea a Iesu te akaperepere anga i tana au pipi?

¹³ I te po i mua ake i tona mate, kua pure a Iesu no tana au pipi, te patianga ki tona Metua “kia tiaki ia ratou no te vaerua kino ra oki.” (Ioa. 17:15, NW) Mei teaa atura to Iesu aroa! Te vaitata ra aia i te na roto i tona timata anga pakari; inara kua manata aia i tana au apotetoro.

14. Akapeea tatou me akaari e te akaperepere ra tatou i te au taeake e te au tuaine?

¹⁴ Kia aru ia Iesu, kare tatou e akamanako ua ia tatou uaorai. Mari ra, ka pure putuputu tatou no te au taeake e te au tuaine. Me pera tatou, te akarongo ra tatou i ta Iesu akaueanga kia aroa i tetai e tetai e kia kite a Iehova e te akaperepere ra tatou i te au taeake. (Ioa. 13:34) Kare te pure no te au taeake e te au tuaine i te kaimoumou taime. Te akakite maira te Tuatua a te Atua “te pure a te tangata tuatua-tika i akatupu mouia ki roto ra, e mea manuia maata ïa.”​—Iako. 5:16.

15. Eaa te au taeake akamori i anoano ei i ta tatou pure?

 ¹⁵ Te anoano ra te au taeake i ta tatou pure no te mea te rokoia ra ratou e te manamanata. Ka pati tatou kia Iehova kia akakoromaki te au taeake i te maki, te tumatetenga natura, te tamaki, te takinokinoanga, e te au tu ngata. Ka pure katoa tatou no te tu akaatinga o te au taeake e te au tuaine tei tauturu i tetai atu au taeake. Penei kua kite koe i te au taeake tei rokoia e te manamanata. E taiku i to ratou ingoa i roto i taau pure? Te aroa ra tatou i te au taeake me pati tatou ia Iehova kia tauturu ia ratou kia akakoromaki.

16. Eaa tatou ka pure ei no te aronga te arataki ra ia tatou?

¹⁶ Te āriki rekareka ra te aronga pakari o te putuputuanga i te au pure a te katoatoa e te puapinga ra ratou mei te reira. Kua tika te reira ki te apotetoro ko Paulo. Tata aia: “E noku oki, kia orongaia mai te tuatua iaku, e kia tuatua atu toku vaa ma te mataku kore, kia akakite ua atu au i te tuatua ngaro ra i te evangelia.” (Ephe. 6:19) I teia tuatau, e maata te au taeake te angaanga pakari ra kia arataki ia tatou. Ka akaperepere tatou ia ratou na te patianga kia Iehova kia akameitaki i ta ratou angaanga.

17-18. Eaa te au atianga ka patiia tatou kia pure no te katoatoa, e eaa ta tatou ka akamaara?

¹⁷ I tetai taime, ka patiia tatou kia pure no tetai ke. Ei akaraanga, te tuaine nana te apii Pipiria, ka pati aia i tetai tuaine kia oronga i te pure. Penei kare te reira tuaine i kite meitaki i te vaine apii, no reira ka inangaro aia i te oronga i te pure openga no te apii. Tera te aiteanga, ka rauka iaia i te akatano i tana pure ki te au anoano o te vaine apii.

¹⁸ Penei ka patiia tetai taeake kia pure no te uipaanga tutu aere me kore no te uipaanga putuputuanga. E akamaara te au taeake te ka pure i te akakoroanga o te uipaanga. Kare te pure i te tuatau no te ako i te putuputuanga e kia rave i te au tuatua akakite. Te maata anga o te au uipaanga putuputuanga, e rima miniti  no te imene e te pure, no reira eiaa te taeake e oronga ra i te pure i te akamata anga o te uipaanga e ‘maata te tuatua.’​—Mata. 6:7.

19. Eaa te ka tauturu ia tatou kia papa ua no te rā akavaanga o Iehova?

¹⁹ Ka akariro tatou i te pure ei mea puapinga i to tatou oraanga, i te rā akavaanga o Iehova e vaitata maira. Karanga a Iesu: “E ara kotou, e tamou tikai i te pure, kia tau ia kotou te ora i teianei au mea katoa e vaitata mai nei.” (Luka 21:36) Ae, ka tauturu te pure putuputu kia ara ua tatou i te pae vaerua kia kore to te Atua rā e opu ia tatou ma te papa kore.

20. Mei teaa te tu ta tatou pure me akaaiteia ki te atinga kakara?

²⁰ Eaa ta tatou i uriuri mai? Akaperepere tatou i te tikaanga no te pure. E akamou i ta tatou pure ki runga i te au akakoroanga o Iehova. Ka akameitaki katoa tatou i te Tamaiti akaperepere a te Atua e tana tutara anga Patireia, e kia pure tatou no te au taeake. Ae, ka pure katoa tatou no te au anoano i te pae kopapa e te pae vaerua. Me akamanako meitaki tatou i ta tatou ka tuatua i roto i te pure, te akaperepere ra tatou i teia tikaanga manea. Ka aite ta tatou tuatua mei te atinga kakara kia Iehova​—“e mea tau ïa Nana.”​—Mase. 15:8.