1. Eaa ta Iehova i rave te ara anga a Adamu e Eva? (Genese 3:15)

 I MURI mai te ara anga a Adamu e Eva, kua oronga a Iehova i tetai manakonakoanga ki ta raua uanga na roto i tetai totou umere. Kua tataia te reira ia Genese 3:15.​—E tatau.

2. Eaa te mea umere i teia totou?

² Tei roto te totou i te puka mua o te Pipiria. Te rotai ra te reira ki te au puka o te Pipiria. Mei te ivi mokotua o tetai puka tei ruru kapiti i te au kapi, ka ruru kapiti te au tuatua o Genese 3:15 i te au puka o te Pipiria ei okotai karere, koia oki, ka tukuia mai te Akaora ei takore i te Tiaporo e tona aronga kino. * Eaa te akameitakianga no te aronga tei akaperepere ia Iehova!

3. Eaa ta tatou ka uriuri i teia atikara?

³ I teia atikara, ka pau tatou i teia au uianga no te totou o Genese 3:15: Koai ma tei taikuia? Akapeea teia totou me akatupuia? E akapeea tatou e puapingaia ai?

4. Koai te “ovi,” e akapeea tatou i kite ei?

⁴ Te aronga tei taikuia i roto ia Genese 3:14, 15 ko te  “ovi,” e te “uanga” a te ovi, te “vaine,” e te “uanga” a te vaine. Ka tauturu te Pipiria ia tatou kia kite koai ma ratou. * Akamata tatou ki “te ovi.” Kare te ovi e mārama i ta Iehova tuatua i roto i te aua o Edene. Kua tuatua a Iehova i tana akavaanga ki tetai mea ora kikite. Koai aia? Kua akakite mai a Apokalupo 12:9 e koai aia. Ko “taua ovi taito” ko te Tiaporo ko Satani. Inara koai te uanga a te ovi?

5. Koai ma te uanga a te ovi?

⁵ Me taiku te Pipiria i te uanga ei akatutu anga, te tuatua ra no te aronga tei manako e tei aite te tu ki to ratou metua. Ko te uanga a te ovi ko te au mea ora vaerua e te au tangata mei ia Satani, kua patoi i te Atua ko Iehova e Tona iti tangata. Ka kapiti mai i te au angera tei akaruke i ta ratou angaanga i te rangi i to Noa tuatau pera katoa te au tangata kino tei aite to ratou tu ki te metua te Tiaporo.​—Gene. 6:1, 2; Ioa. 8:44; 1 Ioa. 5:19; Iuda 6.

6. Eaa te tumu kare ko Eva “te vaine”?

⁶ Aru mai, ka akara tatou e koai “te vaine.” Kare ko Eva. Eaa te tumu? Akamanako ana i teia tumu okotai. Te akakite ra te totou e ka “akaparuparu” te uanga a te vaine i te mimiti o te ovi. Mei ta tatou i uriuri, te ovi e vaerua ora ko Satani, kare e rauka i te uanga apa ua a Eva i te akaparuparu iaia. E maata atu tei anoanoia.

7. Ia Apokalupo 12:1, 2, 5, 10, koai te vaine tei taikuia ia Genese 3:15?

⁷ Te vaine tei taikuia ia Genese 3:15 kua akakiteia mai aia i te puka openga o te Pipiria. (E tatau ia Apokalupo 12:1,  2, 5, 10.) Kare e ko tetai vaine i te enua nei! Tei raro te marama i tona nga vaevae e te korona etu raungauru ma rua i tona upoko. Anau akera aia i tetai tama tuke​—te Patireia o te Atua. Tei te rangi te Patireia, e tei te rangi katoa te vaine. Te akatutu ra te reira i te akaaereanga a Iehova i te rangi ma te au vaerua ora tiratiratu.​—Gala. 4:26.

8. Koai te uanga puapinga a te vaine, e i naea aia i riro ei e koia ia? (Genese 22:15-18)

⁸ Ka tauturu katoa ta te Atua Tuatua ia tatou kia kite e koai te uanga a te vaine. E uanga teia na Aberahama. (E tatau ia Genese 22:15-18.) Tei tau ki te totou, e uanga a Iesu na te reira pateriareka tiratiratu. (Luka 3:23, 34) E ririnui ake aia i tetai ua atu tangata no te mea ka takore aia i te Tiaporo ko Satani. I to Iesu 30 mataiti, kua akatainuia aia ei Tamaiti anau tai na te Atua. I tona akatainuia anga kua riro a Iesu e ko te uanga puapinga a te vaine. (Gala. 3:16) Muri ake i to Iesu matenga e te tuakaouanga, kua “akakorona [te Atua] iaia i te kakā e te mana” e kua oronga kiaia “te mana katoa o to te rangi e te ao,” e pera te mana ‘kia akakore i te angaanga a te diabolo.’​—Ebe. 2:7; Mata. 28:18; 1 Ioa. 3:8.

9-10. (a) Koai atu tetai tuanga o te uanga a te vaine, e i naea ratou i pera ei? (e) Eaa ta tatou ka uriuri i teianei?

⁹ Inara te vaira te tuanga rua o te uanga. Kua akataka te apotetoro ko Paulo i teia tuanga o te uanga i tona akakite anga ki te au Kerititiano ngati Iuda e te au tangata ke tei akatainuia: “E no te Mesia oki kotou ra, e uanga ïa kotou no Aberahama, e e tangata kainga ïa i tei tuatuaia maira.” (Gala. 3:28, 29) I te akatainu anga a Iehova i tetai Kerititiano ki te vaerua tapu, kua riro mai te reira tangata ei tuanga no te uanga a te vaine. Ko Iesu Karaiti e tona au taeake tutara e 144,000 te uanga. (Apo. 14:1) Te aite ra to ratou tu mei to ratou Metua, ko te Atua ko Iehova.

¹⁰ I teianei ka akataka tatou i te aronga tei taikuia ia Genese 3:15, e ka akara poto tatou akapeea a Iehova i te akatupu anga i teia totou e akapeea tatou e puapingaia ai.

11. Akapeea te uanga a te vaine te akaparuparuia anga ki runga “i tona pooavae”?

¹¹ I te totou o Genese 3:15, kua akaparuparu te ovi i te uanga a te vaine ki runga “i tona pooavae.” Kua akatupuia te reira te akakeu anga a Satani i te ngati Iuda e to Roma kia tamate i te Tamaiti a te Atua. (Luka 23:13, 20-24) Mei te mamae pooavae te ka akaparuparu i tetai tangata, kua riro to Iesu mate ei akaparuparu iaia no tetai tuatau e kua mate i roto i te vaarua no tetai toru rā.​—Mata. 16:21.

12. Akapeea e aea te mimiti o te ovi e akaparuparuia ai?

¹² Me ka akatupuia te totou o Genese 3:15, kare a Iesu e vai ua ki roto i te vaarua tanumanga. Eaa te tumu? No te mea kia tau ki te totou, ka akaparuparu te uanga i te mimiti o te ovi. Tera te aiteanga ka anoanoia a Iesu kia meitaki mai mei tona mamae pooavae. E kua meitaki rai aia! I te toru o te rā i muri ake i tona mateanga, kua akatuia mai a Iesu ei vaerua mate kore. I to te Atua tuatau tau, ka takore a Iesu ia Satani. (Ebe. 2:14) Te aronga te ka tutara ma Karaiti ka piri atu  ratou kia takore i te au enemi katoatoa o te Atua i te enua nei​—te uanga a te ovi.​—Apo. 17:14; 20:4, 10. *

13. Akapeea tatou e puapinga ai me akatupuia teia totou?

¹³ Me kua akatapuia koe ei tavini no te Atua, ka puapingaia koe mei teia totou. Kua aere mai a Iesu ei tangata ki te enua nei. Kua aru meitaki aia i te tu o tona Metua. (Ioa. 14:9) Na roto iaia kua kite mai tatou e kua akaperepere i te Atua ko Iehova. Ka puapinga katoaia tatou mei te au apiianga e te aratakianga a Iesu iaia e akatere ra i te putuputuanga Kerititiano i teia tuatau. Kua apii aia ia tatou akapeea me akono i te oraanga marekaia e Iehova. E ka puapingaia tatou mei te mate o Iesu​—te akaparuparu anga o tona pooavae? Akapeea ra? Te akatuangaia a Iesu, kua akaatinga aia i tona toto apa kore kia ‘tamā i ta tatou au ara ravarai.’​—1 Ioa. 1:7.

14. Kia tapapa atu ainei te tangata kia tupu viviki te totou i Edene? Akamārama mai.

¹⁴ Te au tuatua ta Iehova i akakite i Edene ka topa tetai tuatau i mua ake ka akatupu takiriia ai te reira. Ka pou rai te tuatau kia uanga mai te vaine i te uanga taputouia, kia akaputu te Tiaporo i tona aronga, e kia tupu te ke (me kore, te makitakita) i rotopu i nga pupu e rua. Ka puapingaia tatou me mārama tatou i teia totou no te mea te akamatakite maira e ka makitakita te ao ta Satani e akatere ra, i te aronga te akamori ra ia Iehova. Kua oronga a Iesu i teia akamatakite anga ki tana au pipi. (Mare. 13:13; Ioa. 17:14) Kua kite ana tatou i te akatupuia anga te tuanga mua o te totou, i teia 100 mataiti tikai i topa akenei. Akapeea ra?

15. Eaa teianei ao i makitakita atu ei, eaa te tumu kare tatou e mataku ia Satani?

¹⁵ I muri ua ake i te akateronoia anga a Iesu ei Ariki Mesia i te 1914, kua uriia mai a Satani ki vao mei te rangi. Tei te enua aia i teianei, te tiaki anga i tona takoreanga. (Apo. 12:9, 12) Inara kare aia e noonoo ua ra. E riri kino to Satani e te kave nei i tona riri ki runga i te iti tangata o te Atua. (Apo. 12:13, 17) No teia tumu, kua makitakita atu teianei ao i te iti tangata o te Atua. No reira kare tatou e mataku ia Satani e tona pupu. Mari ra, kua papu ia tatou mei te apotetoro ko Paulo, tei tata: “No tatou te Atua ra, ka tika iaai kia māro mai?” (Roma 8:31) Ka irinaki tatou ia Iehova no te mea kua kite tatou e kua akatupu takereia te totou ia Genese 3:15.

16-18. Akapeea a Curtis, Ursula e Jessica i puapingaia ai mei te mārama anga ia Genese 3:15?

¹⁶ Ka riro ta Iehova taputou ia Genese 3:15 ei tauturu ia tatou kia akakoromaki i tetai ua atu timataanga. Karanga a Curtis tei tavini ei mitinari i Guam e: “I tetai au taime kua akakoromaki au i te au manamanata tei timata i toku tu tiratiratu kia Iehova. Na te akamanako oonu anga i te totou ia Genese 3:15 kua tauturu iaku kia irinaki i toku Metua i te rangi.” Te tapapa nei a Curtis i te rā me takore a Iehova i to tatou manamanata.

¹⁷ Karanga tetai tuaine ko Ursula tona ingoa i Bavaria e i tona mārama anga ia Genese 3:15 kua irinaki aia e kua akauruia  te Pipiria e te Atua. Kua kite aia i te au totou pouroa i te taokotai anga ki teia totou, e kua umere tikai aia. Karanga katoa aia: “Kua pakia toku ngakau te kite anga e kua rave viviki a Iehova i te akaora i te tangata nei kia rauka te manakonakoanga.”

¹⁸ Karanga a Jessica, no Micronesia mai: “Te maara nei iaku i toku kite anga i te tuatua mou! Kua akatupuia te totou ia Genese 3:15. Kua tauturu te reira iaku kia kite e kare teia oraanga i teia tuatau i te oraanga tikai. Kua akaketaketa teia totou i toku irinakianga e na te tavini anga ia Iehova ka tupu te oraanga meitaki i teianei e te tuatau ki mua.”

19. Eaa tatou ka irinaki ei e ka akatupuia te tuanga openga o te totou?

¹⁹ Mei ta tatou i kite mai, te akatupuia nei rai a Genese 3:15. Kua akataka meitakiia te uanga a te vaine e te uanga a te ovi. Ko Iesu te uanga puapinga a te vaine, kua ora mai aia i tona mamae pooavae e teianei e Ariki kakā aia e te mate kore. Te vaitata nei kia akaoti ta Iehova ikianga i te tuanga rua o te uanga. No te mea kua akatupuia te tuanga mua o te totou, ka irinaki tatou e ka akatupuia te tuanga openga, te akaparuparu anga i te mimiti o te ovi. Mei teaa atura te rekareka no te aronga tiratiratu me takoreia a Satani! E tae ua atu ki te reira taime, auraka e tuku i te au. Ka irinaki tatou i to tatou Atua. Na roto i te uanga a te vaine, ka apai mai aia i te au akameitakianga ki “te pa enua katoa o te ao nei.”​—Gene. 22:18.