1. Eaa to Iehova anoano i teia tuatau?

 I TEIA tuatau e anoano no te Atua kia tutu aereia te nuti meitaki o te Patireia ki te ao katoa. (Mare. 13:10; 1 Timo. 2:3, 4) Na Iehova teia angaanga puapinga e kua tuku aia i te reira ki raro ake i te akatere anga a tana Tamaiti akaperepereia. Kua papu ia tatou e me akaaere a Iesu, ka akaotiia te angaanga tutu aere kia mareka a Iehova i te reira i mua ake ka tae mai ei te openga.​—Mata. 24:14.

2. Eaa ta tatou ka uriuri i teia atikara?

² I teia atikara, ka kite tatou akapeea a Iesu me taangaanga i tona “tavini akono meitaki e te pakari” kia tuʼa mai i te kai vaerua e kia akaaere i tana au pipi no te angaanga tutu aere maata roa atu. (Mata. 24:45) Ka kite katoa tatou akapeea me turu ia Iesu e te tavini akono meitaki.

3. Eaa te mana tei orongaia kia Iesu?

³ Te akaaere nei a Iesu i te angaanga tutu aere. Akapeea tatou i kite ei? I mua ua ake ka aere ei ki te rangi, kua aravei a Iesu i tana au pipi tiratiratu i te maunga o Galilea. Akakite aia kia ratou: “Ko te mana katoa o to te rangi e te ao katoa nei, kua tukuia mai, tei iaku anake.” E oti tuatua aia: “E teianei, ka aere kotou, e akariro i to te pa enua katoa ei pipi.” (Mata. 28:18, 19) I te pae i tetai au mea ke, kua orongaia te mana kia Iesu kia akatere i te angaanga tutu aere.

4. Eaa tatou i papu ei e te arataki nei a Iesu i te angaanga tutu aere?

 ⁴ Akakite a Iesu e ka raveia te angaanga tutu aere e te akariro i te tangata ei pipi i “te pa enua katoa” e ka noo ua aia i te pae i tana au pipi “e tae ua atu ki te openga o teianei ao.” (Mata. 28:20) Te akataka maira teia au tuatua e ka raveia te angaanga tutu aere i raro ake i te arataki anga a Iesu e tae ua mai ki teia tuatau.

5. Eaa ta tatou tuanga i te akatupu anga ia Salamo 110:3?

⁵ Kare a Iesu i manata ana e e meangiti ua te aronga angaanga i te tuatau openga o teia akatereanga. Kua kite aia e ka akatupuia te tuatua totou a te tata salamo: “E puareinga roa to toou ra au tangata, i te rā o toou ra mana.” (Sala. 110:3) Me te rave ra koe i te angaanga tutu aere, te turu ra koe ia Iesu e te tavini akono meitaki e te akatupu ra koe i te reira totou. Te raveia nei te angaanga, inara te vaira te manamanata.

6. Eaa tetai manamanata ta te aronga tutu aere i te Patireia e aro atura i teia rā?

⁶ Okotai manamanata ta te aronga tutu aere i te Patireia e aro atura, ko te patoianga. Kua pikikaa te aronga tei akaruke i te akarongo, te au arataki akonoanga, e te aronga poritiki i ta tatou angaanga. Me akavareia e kua pikikaaia te kopu tangata, te aronga tei kite tatou, e te au oa angaanga, penei ka māro ratou ia tatou kia akamutu i te tavini ia Iehova e kia akamutu i te tutu aere. I tetai au enua, kua akatupu te patoianga i te angaanga tamataku, te akakino, te tapekaanga, e kua tiriaia ki roto i te are auri. Kare tatou e poitirere i teia. Akakite a Iesu: “E makitakitaia mai kotou e te pa enua ravarai i toku nei ingoa.” (Mata. 24:9) Mei te mea te kite ra tatou i teia tu makitakita, te akapapu maira te reira e te mareka ra a Iehova. (Mata. 5:11, 12) Te turu ra te Tiaporo i teia patoianga. Inara e ririnui rava atu a Iesu ia Satani! Ma te tauturu a Iesu, te tae ra te nuti meitaki ki te au tangata ravarai. Akamanako ana i te akapapu anga.

7. Eaa te akapapu anga ta tatou e kite nei e kua akatupuia a Apokalupo 14:6, 7?

⁷ Ei aronga tutu aere i te Patireia, ka aro katoa atu tatou i te manamanata o te reo ke. I roto i te apokalupo tana i oronga ki te apotetoro ko Ioane, kua totou a Iesu kare teia e riro ei manamanata no te nuti meitaki i to tatou tuatau. (E tatau ia Apokalupo 14:6, 7.) Akapeea ra? Te oronga nei tatou i te tuatau no te tangata kia ariu mai ki te karere o te Patireia. I teia rā, ka rauka i te tangata i te tatau i tetai puka Pipiria i runga i te jw.org website no te mea e 1,000 tuma reo i reira! Kua akatika te Pupu Akaaere kia uriia te puka Oraanga Mataora e Tuatau Ua Atu!​—ta tatou puka apii ei akariro i te tangata ei pipi—​ki roto i te 700 tuma reo! Kua rauka katoa te au kai vaerua na roto i te au vitio na te aronga turi e te au puka braille na te aronga matapo. Te kite nei tatou i te au totou Pipiria e akatupuia nei. Te apii nei te tangata mei “te au reo katoa o te pa enua” i te “reo ma” o te tuatua mou Pipiria. (Zeka. 8:23; Zepha. 3:9, NW) Kua akatupuia teia i raro ake i te akaaere anga a Iesu Karaiti.

8. Eaa tei tupu ki ta tatou angaanga tutu aere i teianei?

⁸ I teia rā, e 8,000,000 tuma tangata i te 240 enua e taokotai atura ki ta Iehova  akaaerenga, e i te au mataiti ravarai e tai ngauru ua atu tauatini tei papetitoia! Tei puapinga rava atu i te numero, ko te au tu pae vaerua o teia au pipi ou kia “akatangata ou.” (Kolo. 3:8-10) Kua akamutu te maata anga i to ratou tu akaturi, ta ua, papaki tai, e te akaepaepa enua. Te akatupuia ra te totou ia Isaia 2:4; “kare oki ratou e apii akaou i te tamaki.” Ia tatou e angaanga pakari ra kia akatangata ou, ka akavaitata tatou i te tangata ki te akaaerenga a te Atua e te aru i to tatou akaaere ko Iesu Karaiti. (Ioa. 13:35; 1 Pete. 2:12) Kare teia i te mea tupu ua. Te tauturu nei a Iesu ia tatou.

9. Ia Mataio 24:45-47, eaa tei totouia no te tuatau openga?

⁹ E tatau ia Mataio 24:45-47. Kua akakite a Iesu e i te tuatau openga, ka iki aia i tetai “tavini akono meitaki e te pakari” ei tuʼa mai i te kai vaerua. E ka tapapa atu tatou i teia tavini kia angaanga pakari i teia tuatau. E tika rai teia. Kua taangaanga to tatou akaaere i tetai pupu tangata akatainuia kia tuʼa mai i te kai vaerua “i te ora mou.” Kare teia pupu tangata i te pu ki rungao i te akarongo o tetai ke. (2 Kori. 1:24) Mari ra, te āriki ra ratou ia Iesu Karaiti ei “arataki, e ei tutara” no tona iti tangata.​—Isa. 55:4.

10. Eaa te au puka i roto i te tutu tei akakeu ia koe kia aru i te arataa o te ora mutu kore?

¹⁰ Mei te 1919 mai kua akapapa te tavini akono meitaki i tetai au puka tukeke na te aronga tei inangaro i te apii i te tuatua mou no te taime mua. I te 1921 kua akapapa te tavini i te puka The Harp of God na te aronga tei inangaro i te au apiianga Pipiria. Kua rauka katoa tetai au puka, te taui anga te tuatau. Eaa te puka  tei tauturu ia koe kia kite e kia akaperepere i to tatou Metua i te rangi? Ko teia au puka ainei, te “Let God Be True,” Te Tuatua-Mou te ka Arataki ki te Ora Mutukore, Ka Rauka ia Koe te Ora Mutukore i Paradaiso i te Enua Nei, Te Kite te ka Arataki ki te Ora Mutu Kore, Eaa Tikai ta te Pipiria e Apii Maira?, Eaa ta te Pipiria ka Apii Mai ia Tatou?, me kore te Oraanga Mataora e Tuatau Ua Atu!, ta tatou puka ou. Kua akapapaia teia au puka ei akariro i te tangata ei pipi i te tuatau tau.

11. Eaa i puapinga ai kia rauka te kai pae vaerua?

¹¹ Kare ko te aronga ou ua te inangaro ra i te kai vaerua. Pouroa tatou. Tata te apotetoro ko Paulo: “Te kai pakari ra, na te tangata pakari ïa.” Karanga katoa a Paulo e me taangaangaia te reira kai vaerua, e “kite ei to [tatou] ngakau i te meitaki e te kino.” (Ebe. 5:14) I teia tuatau manamanata te kino ua atura te tu o te tangata, ka ngatā rai te aru i te au turanga o Iehova. Inara kua papa ua a Iesu te akamaroiroi ia tatou na roto i teia au kai vaerua matutu. Te tumu o teia au kai ko te Tuatua akauruia a te Atua, te Puka Tapu. Te akapapa ra te tavini akono meitaki e te tuʼa ra i teia au kai i raro ake i te akatere anga a Iesu.

12. Mei ia Iesu, akapeea tatou te akangateitei anga i te ingoa o te Atua?

¹² Mei ia Iesu, kua akangateitei tatou i te ingoa o te Atua. (Ioa. 17:6, 26) Ei akaraanga, i te 1931 kua akono tatou i te ingoa Tuatua Tapu, te Au Kite o Iehova, te akavaitata anga ia tatou ki to tatou Metua i te rangi. (Isa. 43:10-12) Mei ia Okotopa mai o te reira mataiti, kua ira te ingoa o te Atua ki runga i te kapi mua o te au makatini. E kua akaoki te New World Translation of the Holy Scriptures i  te ingoa o te Atua ki tona ngai i roto i tana Tuatua. Mei teaa atura te tuke ki te au akonoanga a Kerititome tei kiriti i te ingoa o Iehova mei te maata anga o te au urianga Pipiria!

13. Eaa koe i papu ei e te taangaanga ra a Iesu i “te tavini akono meitaki e te pakari” i teia rā? (Ioa. 6:68)

¹³ Na roto i “te tavini akono meitaki e te pakari,” kua akanoo a Iesu i tetai akaaerenga umere i te enua nei ei turu i te akamorianga ma. Eaa toou manako i teia akaaerenga? Penei ka manako koe i te au tuatua a te apotetoro ko Petero, tei karanga kia Iesu: “Ka aere tika matou kiaai ra? Tei ia koe te tuatua o te ora mutu kore.” (Ioa. 6:68) Teiea tatou i teia rā naringa kare ta Iehova akaaerenga? Mari ua ake, kua akapapu a Karaiti e ka angai meitakiia tatou i te pae vaerua. Te tereni katoa ra aia ia tatou kia rave meitaki i te angaanga tutu aere. E te tauturu ra aia ia tatou kia “akatangata ou,” kia marekaia tatou e Iehova.​—Ephe. 4:24.

14. Akapeea koe i puapinga ai ei tuanga o ta Iehova akaaerenga i te tuatau maki kino COVID-19?

¹⁴ Te akatere nei a Iesu ma te tu pakari i teia tuatau manamanata. Te kiteaia nei tana akatere anga puapinga te akamata anga te maki kino COVID-19. E kite kore te tangata i teianei ao eaa te ka rave, kua akapapu mai a Iesu e ka rauka te aratakianga meitaki. Kua akamaroiroiia tatou kia aao i te au arai mata ki te ngai tangata e kia akamamao ia tatou uaorai. Kua akamaroiroiia te aronga pakari kia aravei putuputu i te au taeake i roto i te putuputuanga e kia matakite i to  ratou oraanga pae kopapa e te pae vaerua. (Isa. 32:1, 2) Kua rauka te akamaroiroianga e te akatereanga na roto i te au vitio akakiteanga a te Pupu Akaaere.

15. Eaa te aratakianga tei orongaia no te au uipaanga e te angaanga tutu aere i te tuatau maki kino, e eaa tei tupu?

¹⁵ I te tuatau o te maki kino, kua rauka te aratakianga taka meitaki akapeea me rave i te au uipaanga putuputuanga e te angaanga tutu aere. Ma te viviki, kua aere tatou ki te au uipaanga Kerititiano, te au akaputuputuanga, e te au uruoaanga na roto i te au vitio karangaranga. Kua akamata tatou i te tutu aere na roto i te tata reta e te tereponi. Kua akameitaki a Iehova ia tatou. E maata te au opati Betela tei ripoti i te au tupuanga numero o te au papuritia. E maata te au tupuanga akamaroiroi i teia tuatau.​—Akara i te pia “ Akameitaki a Iehova i ta Tatou Tutu Aere.”

16. Eaa ta tatou i papu meitaki?

¹⁶ Penei kua manako tetai pae e kua matakite kino roa te akaaerenga no te maki kino. Inara kua kiteaia mai e kua tano meitaki te reira aratakianga. (Mata. 11:19) E ia tatou e akamanako oonu ra i ta Iesu arataki anga aroa i tona iti tangata, te akapapuia maira e noatu eaa te tu, ka vai ua rai a Iehova e tana Tamaiti akaperepere i te pae ia tatou.​—E tatau ia Ebera 13:5, 6.

17. Eaa toou manako kia aratakiia e Iesu?

¹⁷ Mei teaa atura te akameitakianga me akaaere a Iesu ia tatou! E akaaerenga taokotai ta tatou i te pae o te au peu, te enua, e te au reo. Kua angai meitakiia tatou kia matutu i te pae vaerua e kia rave i te angaanga tutu aere. Kua tauturuia tatou uaorai kia akatangata ou e kia kite i te akaperepere i tetai e tetai. E tumu anga maata ta tatou kia akapaapaa i to tatou akaaere ko Iesu!